1. “Azərbaycan Respublikası Dövlət Təhlükəsizliyi Xidmətinin Əlahiddə Taborunun Döyüş Bayrağı haqqında Əsasnamə” təsdiq edilsin (əlavə olunur).
2. “Azərbaycan Respublikası Dövlət Təhlükəsizliyi Xidmətinin Əlahiddə Taborunun Döyüş Bayrağının təsviri” təsdiq edilsin (əlavə olunur).
Azərbaycan Respublikasının Prezidenti
Bakı şəhəri, 21 noyabr 2008-ci il
1. Azərbaycan Respublikası Dövlət Təhlükəsizliyi Xidmətinin Əlahiddə Taborunun Döyüş Bayrağı əsgəri şərəf, şücaət və şöhrət rəmzidir. O, Əlahiddə Taborun hər bir hərbi qulluqçusuna Vətəninə sədaqətlə xidmət etmək, Vətəninin müstəqilliyini, suverenliyini, ərazi bütövlüyünü, konstitusiya quruluşunu, milli maraqlarını öz qanını və canını belə əsirgəmədən mərdlik və bacarıqla müdafiə etmək, verilən tapşırıqları əzmlə yerinə yetirmək, doğma torpağın hər qarışını düşməndən qorumaq borcunu xatırlatmaq üçündür.
2. Döyüş Bayrağı adının dəyişməsindən asılı olmayaraq, Azərbaycan Respublikası Dövlət Təhlükəsizliyi Xidmətinin Əlahiddə Taborunda həmişəlik qalır. Əlahiddə Taborun adının dəyişməsi Döyüş Bayrağı ilə birlikdə verilən Təqdimata yazılır.
3. Döyüş Bayrağı həmişə Azərbaycan Respublikası Dövlət Təhlükəsizliyi Xidmətinin Əlahiddə Taborunda, döyüş əməliyyatları zamanı isə döyüş meydanında olmalıdır.
4. Azərbaycan Respublikası Dövlət Təhlükəsizliyi Xidmətinin Əlahiddə Taborunun bütün şəxsi heyəti Döyüş Bayrağını fədakarlıq və mərdliklə qorumalı, onun düşmən tərəfindən ələ keçirilməsinə yol verməməlidir. Döyüş Bayrağı itirildikdə, Əlahiddə Taborun komandiri və məsul hərbi qulluqçular Azərbaycan Respublikasının qanunvericiliyi ilə müəyyən edilmiş qaydada məsuliyyətə cəlb olunmalı, Əlahiddə Tabor isə ləğv edilməlidir.
Azərbaycan Respublikası Dövlət Təhlükəsizliyi Xidmətinin Əlahiddə Taborunun Döyüş Bayrağı ikiüzlü qumaşdan, ağac dəstəkdən və qotazlı qaytandan ibarətdir.
Bayrağın qumaşı düzbucaqlıdır, eni 114 sm, uzunluğu 145 sm-dir. Kənarları üç tərəfdən qızılı rəngli ipək saçaqlarla köbələnmişdir. Bayraq Azərbaycan Respublikası Dövlət Bayrağının rənglərinə uyğun olaraq, üçrəngli ikiqat ipək faydan hazırlanmışdır.
Qumaşın üz tərəfində qırmızı zolağın ortasında ağ ipək sapdan 38 sm hündürlükdə aypara və 20 sm hündürlükdə səkkizguşəli ulduz tikilmişdir. Mavi zolaqda qızılı ipək sapla “AZƏRBAYCAN UĞRUNDA!” şüarı tikilib. Yazıdakı hərflərin hündürlüyü 6,5 sm, eni 5 sm-dir.
Qumaşın arxa tərəfində, qırmızı zolağın ortasında Azərbaycan Respublikası Dövlət Təhlükəsizliyi Xidmətinin emblemi (hündürlüyü 54 sm) tikilmişdir. Mavi zolaqda sətirarası məsafə 2 sm olmaqla, 2 sətirdə qızılı rəngli ipək sapla “AZƏRBAYCAN RESPUBLİKASI DÖVLƏT TƏHLÜKƏSİZLİYİ XİDMƏTİ” sözləri tikilib. Yazıdakı hərflərin hündürlüyü 6 sm, eni 5 sm-dir.
Yaşıl zolaqda qızılı rəngli ipək sapla Azərbaycan Respublikası Dövlət Təhlükəsizliyi Xidmətinin Əlahiddə Taborunun adı tikilmişdir. Yazıdakı hərflərin hündürlüyü 5 sm, eni 4,5 sm-dir.
Bayrağın dəstəyi en kəsiyinin diametri 4 sm, uzunluğu 250 sm olan girdə ağacdandır.
Ağac dəstək tünd qəhvəyi rəngdə rənglənib, laklanıb, aşağı ucunda metal halqa, yuxarı ucunda isə qızılı rəngli fiqurlu ucluq vardır.
Bayrağın qaytanı eşmədir, qızılı rəngli ipəkdən hazırlanıb, hər iki ucunda qotazlar var. Qaytanın uzunluğu 270 — 285 sm-dir.
1. 18 dekabr 2017-ci il tarixli 1737 nömrəli Azərbaycan Respublikası Prezidentinin Fərmanı (Azərbaycan Respublikasının Qanunvericilik Toplusu, 2017-ci il, № 12, I kitab, maddə 2305)
FƏRMANA EDİLMİŞ DƏYİŞİKLİK VƏ ƏLAVƏLƏRİN SİYAHISI