“Azərbaycan Respublikasının İqtisadiyyat Nazirliyi ilə Azərbaycan Respublikasının Ədliyyə Nazirliyi arasında elektron informasiya sistemləri vasitəsi ilə daşınmaz əmlakın dövlət reyestrindən elektron formada sənədlərin və məlumatların təqdim edilməsi, eləcə də notariat hərəkətinin nəticəsi olan sənədlərin daşınmaz əmlakın dövlət reyestrinə ötürülməsi ilə bağlı ödənişlərin həyata keçirilməsi Qaydası, həmçinin elektron informasiya sistemləri vasitəsilə məlumat mübadiləsinin təhlükəsizliyinə dair tələblər”in təsdiq edilməsi haqqında (İqtisadiyyat Nazirliyi, 10.10.2023)

“Daşınmaz əmlakın dövlət reyestri haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2022-ci il 29 noyabr tarixli 652-VIQD nömrəli Qanununun tətbiqi və “Daşınmaz əmlakın dövlət reyestri haqqında” Azərbaycan Respublikası Qanununun tətbiq edilməsi haqqında” Azərbaycan Respublikası Prezidentinin 2004-cü il 10 avqust tarixli 113 nömrəli Fərmanında dəyişiklik edilməsi barədə” Azərbaycan Respublikası Prezidentinin 2023-cü il 23 yanvar tarixli 1989 nömrəli Fərmanının 3.1-ci bəndinin icrasını təmin etmək məqsədilə Azərbaycan Respublikası Prezidentinin 2019-cu il 30 dekabr tarixli 911 nömrəli Fərmanı ilə təsdiq edilmiş “Azərbaycan Respublikasının İqtisadiyyat Nazirliyi haqqında Əsasnamə”nin 5.11.2-ci yarımbəndini rəhbər tutaraq Azərbaycan Respublikası İqtisadiyyat Nazirliyinin Kollegiyası

1. “Azərbaycan Respublikasının İqtisadiyyat Nazirliyi ilə Azərbaycan Respublikasının Ədliyyə Nazirliyi arasında elektron informasiya sistemləri vasitəsi ilə daşınmaz əmlakın dövlət reyestrindən elektron formada sənədlərin və məlumatların təqdim edilməsi, eləcə də notariat hərəkətinin nəticəsi olan sənədlərin daşınmaz əmlakın dövlət reyestrinə ötürülməsi ilə bağlı ödənişlərin həyata keçirilməsi Qaydası, həmçinin elektron informasiya sistemləri vasitəsilə məlumat mübadiləsinin təhlükəsizliyinə dair tələblər” təsdiq edilsin (əlavə olunur).

2. “Azərbaycan Respublikasının Əmlak Məsələləri Dövlət Komitəsi ilə Azərbaycan Respublikasının Ədliyyə Nazirliyi arasında elektron informasiya sistemləri vasitəsi ilə məlumatların mübadiləsinin təhlükəsizliyinə dair tələblər, qarşılıqlı əməkdaşlıq və arayışın əldə edilməsinə görə ödənişlərin həyata keçirilməsi Qaydası”nın təsdiq edilməsi haqqında” Azərbaycan Respublikası Əmlak Məsələləri Dövlət Komitəsinin Kollegiyasının 14.02.2014-cü il tarixli 03 nömrəli Qərarı ləğv edilsin.

3. Hüquq şöbəsinin müdiri Tural İsgəndərova tapşırılsın ki, bu Qərarın Azərbaycan Respublikasının Hüquqi Aktların Dövlət Reyestrinə daxil edilməsi məqsədilə 3 gün müddətində Azərbaycan Respublikasının Ədliyyə Nazirliyinə göndərilməsi üçün zəruri tədbirlərin görülməsini təmin etsin.

4. Kollegiyanın məsul katibi, Daxili nəzarət şöbəsinin müdir müavini Elnur Əliyevə tapşırılsın ki, bu Qərarın surətinin göndərilmə siyahısına uyğun çatdırılmasını təmin etsin.

5. Bu Qərarın icrasına nəzarəti öz üzərimdə saxlayıram.

Əsas: Azərbaycan Respublikası İqtisadiyyat Nazirliyinin Kollegiya iclasının protokolu.

1.1. Bu Qayda və tələblər “Daşınmaz əmlakın dövlət reyestri haqqında” Azərbaycan Respublikası Qanununun 5.6-cı maddəsinin və “Daşınmaz əmlakın dövlət reyestri haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2022-ci il 29 noyabr tarixli 652-VIQD nömrəli Qanununun tətbiqi və “Daşınmaz əmlakın dövlət reyestri haqqında” Azərbaycan Respublikası Qanununun tətbiq edilməsi haqqında” Azərbaycan Respublikası Prezidentinin 2004-cü il 10 avqust tarixli 113 nömrəli Fərmanında dəyişiklik edilməsi barədə” Azərbaycan Respublikası Prezidentinin 23 yanvar 2023-cü il tarixli, 1989 nömrəli Fərmanının 3.1-ci bəndinin icrası məqsədi ilə hazırlanmışdır.

1.2. Bu Qayda və tələblər aşağıdakıları müəyyən edir:

1.2.1. daşınmaz əmlak barəsində notariat hərəkətlərinin aparılması ilə bağlı daşınmaz əmlakın dövlət reyestrindən daşınmaz əmlaka dair çıxarışın, həmin əmlakın təsvirinin, bu əmlak üzərində qeydiyyata alınmış hüquqlara və onların məhdudlaşdırılmasına (yüklülüyünə) dair məlumatların notariuslar və ya qanunla müəyyən edilmiş hallarda notariat hərəkəti etməyə hüququ çatan digər vəzifəli şəxslər (bundan sonra – notariat hərəkətləri aparan şəxslər) tərəfindən əldə edilməsini;

1.2.2. daşınmaz əmlak barəsində aparılmış notariat hərəkətinin nəticəsi olaraq tərtib və (və ya) təsdiq edilmiş və həmin əmlak barəsində qeydiyyatın aparılması üçün əsas hesab edilən sənədin təsdiqləndikdən dərhal sonra elektron formada daşınmaz əmlakın dövlət reyestrinə (bundan sonra-dövlət reyestri) ötürülməsini;

1.2.3. mübadilənin təhlükəsizliyini, daşınmaz əmlaka sərəncam verilməsi barədə notariat qaydasında təsdiq edilmiş müqavilələr, habelə daşınmaz əmlak barəsində aparılmış notariat hərəkətinin nəticəsi olaraq tərtib və (və ya) təsdiq edilmiş digər sənədlər (o cümlədən ər-arvadın ümumi əmlakdakı paya mülkiyyət hüququ haqqında şəhadətnamə, qanun və ya vəsiyyət üzrə vərəsəlik şəhadətnaməsi, bölgü planı, nisyə alqı-satqı müqaviləsi üzrə son ödəniş barədə bildiriş və s.) dövlət reyestrinə ötürülməsi ilə bağlı ödənişlərin həyata keçirilməsi tələblərini;

1.2.4. dövlət torpaq kadastrı və Azərbaycan Respublikasının Vergi Məcəlləsi ilə müəyyən edilmiş fiziki şəxslərin sadələşdirilmiş verginin tutulması üçün yaşayış və qeyri-yaşayış sahələrinin və torpağın yerləşdiyi ərazi üzrə zona məlumatlarının real vaxt rejimində əldə edilməsini.

1.3. Elektron sənəd və məlumat mübadiləsi İqtisadiyyat Nazirliyi yanında Əmlak Məsələləri Dövlət Xidmətinin Daşınmaz Əmlakın Qeydiyyatı, Kadastrı və İdarə Edilməsi Sistemi (bundan sonra – “DƏQKİS”) və Ədliyyə Nazirliyinin Elektron Notariat İnformasiya Sistemi (bundan sonra - “Enotariat”) arasında real vaxt rejimində qarşılıqlı şəkildə, Elektron Hökumət İnformasiya Sistemi vasitəsilə həyata keçirilir. Elektron sistem vasitəsilə qanunla müəyyən edilmiş digər məlumatlar da ötürülə bilər.

2.1. Notariat hərəkətləri aparan şəxslər tərəfindən dövlət reyestri məlumatları daşınmaz əmlak barəsində notariat hərəkətlərinin aparılması ilə bağlı olaraq əldə edilir. Müvafiq məlumatlar əldə edildikdən sonra notariat hərəkətləri aparan şəxslər notariat qaydasında təsdiq edilmiş müqavilə, habelə daşınmaz əmlak barəsində digər notariat hərəkətlərinin nəticəsi olan sənədləri tərtib və təsdiq edərək daşınmaz əmlak üzərində hüquqların qeydiyyata alınması məqsədilə həmin sənədləri reyestrə ötürürlər.

2.2. Real vaxt rejimində notariat hərəkətləri aparan şəxslər, “Notariat haqqında” Azərbaycan Respublikasının Qanununun 18-ci maddəsinin birinci hissəsinin altıncı bəndində nəzərdə tutulan notariat əməliyyatlarının aparılması ilə bağlı rayon, şəhər, şəhər rayonu icra hakimiyyəti başçısının nümayəndələri tərəfindən əldə edilmiş çıxarış və ya dövlət reyestri məlumatları çap edilərək onun əsasında qanunla nəzərdə tutulmuş əməliyyat aparılır.

2.3. Hüquqların dövlət reyestrində qeydiyyata alınması üçün nəzərdə tutulan ödənişlər ödənildikdən sonra notariat qaydasında təsdiq edilmiş müqavilə, o cümlədən nisyə alqı-satqı müqaviləsinə münasibətdə son ödəniş barədə bildiriş, habelə daşınmaz əmlak barəsində digər notariat hərəkətlərinin nəticəsi olan sənədlərin elektron nüsxəsi qeydiyyatın aparılması məqsədilə dövlət reyestrinə ötürülür.

3.1. Daşınmaz əmlak barəsində aparılmış notariat hərəkətinin nəticəsi olaraq tərtib edilmiş sənədlərin təsdiq edilməsi ilə bağlı dövlət reyestri məlumatlarının əldə edilməsi məqsədilə ödənişlər “Dövlət rüsumu haqqında” Azərbaycan Respublikasının Qanunu və Azərbaycan Respublikası Tarif (qiymət) Şurasının Qərarı ilə tənzimlənir.

3.2. Elektron informasiya sistemləri vasitəsi ilə real vaxt rejimində qarşılıqlı şəkildə mübadilənin təşkili üçün qanunvericilikdə nəzərdə tutulmuş ödənişlərdən başqa əlavə haqq (ödəniş) tələb olunmamalıdır.

3.3. Dövlət reyestri məlumatlarının əldə edilməsi və hüquqların dövlət reyestrində qeydiyyata alınması üçün ödənişlərin elektron ödəmə sistemləri, o cümlədən “İnternet Bankinq” və ya bank köçürmə yolu ilə ödənilməsini təsdiq edən sənədlər barədə məlumat ötürülməlidir.

3.4. Dövlət reyestri məlumatlarının əldə edilməsi üçün qanunvericiliklə nəzərdə tutulmuş məbləğdə dövlət büdcəsinə dövlət rüsumu və daşınmaz əmlakın yerləşdiyi ərazi üzrə Əmlak Məsələləri Dövlət Xidmətinin tabeliyində “Daşınmaz Əmlakın Dövlət Kadastrı və Reyestri” publik hüquqi şəxsin müvafiq ərazi idarəsinin (bundan sonra-ərazi idarələri) hesabına xidmət haqqı ödənilir.

3.5. Ödənişlərin həyata keçirilməli olduğu ərazi idarələrinin hesabları və onlarda olan dəyişikliklər barədə Ədliyyə Nazirliyi 1 iş günü müddətində məlumatlandırılır.

4.1. Elektron informasiya sistemləri vasitəsi ilə real vaxt rejimində məlumat mübadiləsi təhlükəsiz VPN kanal vasitəsilə həyata keçirilərək məlumatların təhlükəsizliyi və mübadilənin etibarlılığı təmin edilir.

4.2. Notariat hərəkətləri aparan şəxslər, “Notariat haqqında” Azərbaycan Respublikasının Qanununun 18-ci maddəsinin birinci hissəsinin altıncı bəndində nəzərdə tutulan notariat əməliyyatlarının aparılması ilə bağlı rayon, şəhər, şəhər rayonu icra hakimiyyəti başçısının nümayəndələri əldə edilmiş çıxarış və dövlət reyestri məlumatlarını çap edərək, çap edildiyi tarix və saat əks etdirilməklə kağız daşıyıcısında saxlayır.

4.3. Hər bir tərəf digər tərəfdən götürdüyü məlumatın məxfi saxlanılmasına və mühafizə edilməsinə, həmin məlumatın üçüncü şəxslər qarşısında açıqlanmasına görə məsuliyyət daşıyır.

4.4. Məlumatları informasiya sistemləri vasitəsilə təqdim edən tərəf onların düzgünlüyünə cavabdehdir.

4.5. Məlumatı əldə edən tərəf müqavilə tərəfləri qarşısında həmin məlumatların düzgünlüyünə görə cavabdeh deyil.

4.6. Hər bir tərəfin digər tərəfdən götürdüyü məlumat həmin digər tərəfin məlumatı hesab olunur.

4.7. Məlumatları təqdim edən və əldə edən tərəflər hər iki informasiya sisteminin dayanıqlı fəaliyyətinin qorunub saxlanılması və məlumat bazalarının təhlükəsizliyinin təmin edilməsi, məlumat itkisinin qarşısının alınması istiqamətlərində bütün zəruri tədbirləri görməlidirlər.

4.8. İnformasiya sistemlərinin dayanıqlı fəaliyyətinin qorunub saxlanılması və məlumat bazalarının təhlükəsizliyinin təmin edilməməsi ilə əlaqədar digər tərəfə, habelə məlumat itkisinə yol verilməsi ilə bağlı dövlətə, hüquqi və fiziki şəxslərə dəyən ziyana görə bunda təqsiri olan tərəf məsuliyyət daşıyır.

4.9. Məlumatların üçüncü şəxslər tərəfindən istifadəsi və ya həmin məlumatların üçüncü şəxslərə satılması yolverilməzdir.

4.10. Hər bir tərəf əldə etdiyi və sistemdə gördüyü məlumatlarla bağlı məxfiliyin qorunmasını öz öhdələrinə götürür.

4.11. Hər bir tərəf üzərinə qoyulmuş vəzifələrin icrasına məsuliyyətlə yanaşmalıdır.

4.12. Zəruri hallarda elektron informasiya sistemlərindən istifadə olunması, təhlükəsizlik və sair məsələlərlə bağlı hər bir tərəf digər tərəfin istifadəçilərinə treninqlərin keçirilməsini təşkil edir.

5.1. Təqdim edilən sənədlərlə informasiya sistemlərindəki məlumatlar arasında olan hər hansı uyğunsuzluq dərhal qarşılıqlı əlaqə vasitəsilə aradan qaldırılır. Bu məqsədlə hər iki tərəfdən əlaqələndirici şəxslər təyin olunur və bu barədə qarşı tərəf yazılı qaydada məlumatlandırılır.

5.2. Mübahisəli məsələlər qarşılıqlı razılaşma yolu ilə həll edilir. Qarşılıqlı razılıq əldə edilmədikdə mübahisələr Azərbaycan Respublikasının qanunvericiliyinə uyğun olaraq məhkəmə qaydasında həll edilir.

“Azərbaycan Respublikasının İqtisadiyyat Nazirliyi ilə Azərbaycan Respublikasının Ədliyyə Nazirliyi arasında elektron informasiya sistemləri vasitəsi ilə daşınmaz əmlakın dövlət reyestrindən elektron formada sənədlərin və məlumatların təqdim edilməsi, eləcə də notariat hərəkətinin nəticəsi olan sənədlərin daşınmaz əmlakın dövlət reyestrinə ötürülməsi ilə bağlı ödənişlərin həyata keçirilməsi Qaydası, həmçinin elektron informasiya sistemləri vasitəsilə məlumat mübadiləsinin təhlükəsizliyinə dair tələblər”ə 1 nömrəli Əlavə

Alan müştəri - Vergilər Nazirliyinin Milli Gəlirlər Baş İdarəsi

Hesablaşma hesabı – AZ17CTRE00000000000002117131

Benefisiar (alan) bank - Dövlət Xəzinədarlığı Agentliyi