Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, “Azərbaycan Respublikası Xarici İşlər Nazirliyinin fəaliyyətinin təmin edilməsi ilə bağlı tədbirlər haqqında” Azərbaycan Respublikası Prezidentinin 2025-ci il 5 may tarixli 383 nömrəli Fərmanının icrası ilə əlaqədar qərara alıram:
1. “Azərbaycan Respublikasının Səfirliyi haqqında Əsasnamə” təsdiq edilsin (əlavə olunur).
2. “Azərbaycan Respublikasının Daimi Nümayəndəliyi haqqında Əsasnamə” təsdiq edilsin (əlavə olunur).
3. “Azərbaycan Respublikasının Konsulluğu haqqında Əsasnamə” təsdiq edilsin (əlavə olunur).
4. “Azərbaycan Respublikasının fəxri konsulu haqqında Əsasnamə” təsdiq edilsin (əlavə olunur).
5. Müəyyən edilsin ki, bu Fərmanın 1-ci hissəsi ilə təsdiq edilən “Azərbaycan Respublikasının Səfirliyi haqqında Əsasnamə” Azərbaycan Respublikasının Təmsilçilik Ofisinə, bu Fərmanın 2-ci hissəsi ilə təsdiq edilən “Azərbaycan Respublikasının Daimi Nümayəndəliyi haqqında Əsasnamə” isə Azərbaycan Respublikasının Nümayəndəliyinə də şamil edilir.
6. “Azərbaycan Respublikasının ştatdankənar (fəxri) konsulu haqqında” Əsasnamə barədə” Azərbaycan Respublikası Prezidentinin 1997-ci il 21 aprel tarixli 575 nömrəli Fərmanı (Azərbaycan Respublikasının Qanunvericilik Toplusu (Cild I); 2024, № 4, maddə 393) ləğv edilsin.
7. “Azərbaycan Respublikasının Səfirliyi haqqında Əsasnamə”nin təsdiq edilməsi barədə” Azərbaycan Respublikası Prezidentinin 2006-cı il 25 may tarixli 408 nömrəli Fərmanı (Azərbaycan Respublikasının Qanunvericilik Toplusu, 2006, № 5, maddə 406 (Cild I); 2024, № 5 (I kitab), maddə 529) ləğv edilsin.
8. “Azərbaycan Respublikasının beynəlxalq təşkilat yanında Daimi Nümayəndəliyi haqqında Əsasnamə”nin təsdiq edilməsi barədə” Azərbaycan Respublikası Prezidentinin 2006-cı il 22 iyun tarixli 422 nömrəli Fərmanı (Azərbaycan Respublikasının Qanunvericilik Toplusu, 2006, № 6, maddə 499 (Cild I); 2024, № 5 (I kitab), maddə 529) ləğv edilsin.
9. “Azərbaycan Respublikasının Konsulluğu haqqında Əsasnamə”nin təsdiq edilməsi barədə” Azərbaycan Respublikası Prezidentinin 2007-ci il 26 fevral tarixli 532 nömrəli Fərmanı (Azərbaycan Respublikasının Qanunvericilik Toplusu, 2007, № 2, maddə 98 (Cild I); 2024, № 4, maddə 395, № 5 (I kitab), maddə 529) ləğv edilsin.
10. Azərbaycan Respublikasının Nazirlər Kabineti bu Fərmandan irəli gələn məsələləri həll etsin.
Azərbaycan Respublikasının Prezidenti
Bakı şəhəri, 3 aprel 2026-cı il
1.1. Azərbaycan Respublikasının Səfirliyi (bundan sonra – Səfirlik) qəbul edən dövlətdə Azərbaycan Respublikasını təmsil edən diplomatik xidmət orqanıdır. Səfirlik Azərbaycan Respublikası Xarici İşlər Nazirliyinin (bundan sonra – Nazirlik) rəhbərlik etdiyi diplomatik xidmət orqanlarının vahid sisteminə daxildir.
1.2. Səfirlik Azərbaycan Respublikası Prezidentinin təqdimatı ilə Azərbaycan Respublikasının Milli Məclisi tərəfindən təsis edilir.
1.3. Səfirlik öz fəaliyyətində Azərbaycan Respublikasının Konstitusiyasını, Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələri, “Diplomatik xidmət haqqında” Azərbaycan Respublikasının Qanununu, Azərbaycan Respublikasının Konsul Nizamnaməsini, Azərbaycan Respublikasının digər qanunlarını, Azərbaycan Respublikasının Xarici İşlər Nazirliyi haqqında Əsasnaməni, bu Əsasnaməni, Azərbaycan Respublikası Prezidentinin digər fərmanlarını, həmçinin sərəncamlarını, Azərbaycan Respublikası Nazirlər Kabinetinin qərar və sərəncamlarını, digər normativ hüquqi aktları, Nazirliyin qərar, sərəncam və əmrlərini rəhbər tutur və qəbul edən dövlətin qanunvericiliyini nəzərə alır.
1.4. Səfirlik qəbul edən dövlətdə Azərbaycan Respublikasının xarici siyasətinin vahid xətt üzrə həyata keçirilməsini təmin etmək məqsədilə Azərbaycan Respublikası dövlət orqanlarının (qurumlarının) qəbul edən dövlətdə fəaliyyət göstərən və qəbul edən dövlətə ezam olunmuş nümayəndələrinin işini əlaqələndirir və onların fəaliyyəti üzərində nəzarəti reallaşdırır. Həmin nümayəndələr öz fəaliyyətini Səfirliklə razılaşdırmalı və bu fəaliyyət barədə Səfirliyə məlumat verməlidirlər.
1.5. Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və Azərbaycan Respublikasının normativ hüquqi aktlarına uyğun olaraq, Səfirliyin binasında və Azərbaycan Respublikası fövqəladə və səlahiyyətli səfirinin (bundan sonra – Səfir) iqamətgahında Azərbaycan Respublikasının Dövlət Bayrağı qaldırılır və Azərbaycan Respublikası Dövlət Gerbinin qabarıq təsviri vurulur. Xidməti vəzifələrini yerinə yetirərkən Səfirin nəqliyyat vasitəsinin üzərində Azərbaycan Respublikasının Dövlət Bayrağı yerləşdirilir. Səfirliyin binasında və ya ərazisində Azərbaycan dilində və qəbul edən dövlətin dövlət dilində (dillərində) Səfirliyin adı yazılan lövhə vurulur. Səfirlik Azərbaycan Respublikasının dövlət rəmzlərindən qəbul edən dövlətin qanunvericiliyi və diplomatik protokol qaydaları nəzərə alınmaqla istifadə edir.
1.6. Səfirlik, həmçinin Səfirlikdə xidmət keçən diplomatik xidmət orqanı əməkdaşları (bundan sonra – əməkdaşlar) və onlarla birlikdə yaşayan ailə üzvləri qəbul edən dövlətdə Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və qəbul edən dövlətin qanunvericiliyinə uyğun olaraq, qəbul edən dövlətdə imtiyazlardan və immunitetlərdən istifadə edirlər. Səfirliyin əməkdaşları və onlarla birlikdə yaşayan ailə üzvləri qəbul edən dövlətin qanunvericiliyinə, həmçinin adət-ənənələrinə hörmətlə yanaşmalı və daxili işlərinə qarışmamalıdırlar.
1.7. Səfirliyin, nümunələri Nazirlik tərəfindən təsdiq edilmiş və üzərində Azərbaycan Respublikası Dövlət Gerbinin təsviri və Səfirliyin adı həkk olunmuş möhürü, həmçinin kargüzarlıq xidmətinin gerbsiz möhürü, müvafiq ştampları, blankları və bank hesabları vardır.
1.8. Səfirliyin Azərbaycan Respublikasının mülkiyyəti olan torpaq sahələri, binaları, qurğuları və digər əmlakı Azərbaycan Respublikasının normativ hüquqi aktları ilə müəyyən olunmuş qaydada Səfirliyə təhkim edilir. Səfirlik ona təhkim olunmuş əmlak üzərində sahiblik, istifadə və sərəncam hüququnu Azərbaycan Respublikasının normativ hüquqi aktları ilə müəyyən edilmiş qaydada həyata keçirir.
2.1. Səfirliyin fəaliyyət istiqamətləri aşağıdakılardır:
2.1.1. qəbul edən dövlətdə Azərbaycan Respublikasını təmsil etmək;
2.1.2. qəbul edən dövlətdə Azərbaycan Respublikasının xarici siyasətini həyata keçirmək;
2.1.3. qəbul edən dövlətdə Azərbaycan Respublikasının müstəqilliyini, suverenliyini, ərazi bütövlüyünü, sərhədlərinin toxunulmazlığını, milli təhlükəsizliyini və milli maraqlarını xarici siyasət vasitələri ilə və diplomatik üsullarla qorumaq və təmin etmək;
2.1.4. Azərbaycan Respublikası ilə qəbul edən dövlət arasında dostluq münasibətlərini, sülhü və əməkdaşlığı inkişaf etdirmək;
2.1.5. qəbul edən dövlətdə Azərbaycan Respublikası vətəndaşlarının və hüquqi şəxslərinin hüquqlarını və qanuni mənafelərini xarici siyasət vasitələri ilə və diplomatik üsullarla müdafiə etmək;
2.1.6. qəbul edən dövlətin xarici və daxili siyasətini təhlil etmək və Nazirliyə təkliflər vermək;
2.1.7. qəbul edən dövlətlə Azərbaycan Respublikasının diplomatik və konsul əlaqələrini həyata keçirmək;
2.1.8. xaricdə yaşayan soydaşlarla bağlı dövlət siyasətinin həyata keçirilməsinə və əlaqələrin inkişafına dəstək vermək;
2.1.9. qəbul edən dövlətə Azərbaycan Respublikası rəsmi nümayəndə heyətlərinin səfərlərinin hazırlanmasına və həyata keçirilməsinə kömək göstərmək;
2.1.10. qəbul edən dövlətin ərazisinin Azərbaycan Respublikası Konsulluğunun konsul dairəsinə aid olmayan hissəsində, həmçinin Azərbaycan Respublikası Konsulluğunun olmadığı qəbul edən dövlətdə (bundan sonra – müvafiq dairədə) Azərbaycan Respublikasının adından konsul funksiyalarını həyata keçirmək;
2.1.11. Azərbaycan Respublikası Prezidentinin aktları ilə müəyyən edilmiş digər istiqamətlərdə fəaliyyət göstərmək.
3.1. Bu Əsasnamə ilə müəyyən edilmiş fəaliyyət istiqamətlərinə uyğun olaraq, Səfirliyin vəzifələri aşağıdakılardır:
3.1.1. Azərbaycan Respublikasını qəbul edən dövlətdə təmsil etmək və onun milli maraqlarını qorumaq;
3.1.2. Azərbaycan Respublikası ilə qəbul edən dövlət arasında dostluq münasibətlərinin, sülhün və əməkdaşlığın inkişafına, eləcə də qəbul edən dövlətin yerləşdiyi regionda Azərbaycan Respublikasının milli maraqlarının təmin olunmasına yardım etmək;
3.1.3. qəbul edən dövlətdə Azərbaycan Respublikasının xarici siyasətinin vahid xətt üzrə həyata keçirilməsini təmin etmək;
3.1.4. qəbul edən dövlətdə Azərbaycan Respublikasının milli təhlükəsizliyinin təmin olunmasından irəli gələn məsələləri xarici siyasət vasitələri ilə və diplomatik üsullarla həyata keçirmək;
3.1.5. qəbul edən dövlətdə Azərbaycan Respublikası vətəndaşlarının və hüquqi şəxslərinin hüquqlarının və qanuni mənafelərinin müdafiəsindən irəli gələn funksiyaları xarici siyasət vasitələri ilə və diplomatik üsullarla həyata keçirmək;
3.1.6. Azərbaycan Respublikasının milli maraqlarına uyğun sahələrdə qəbul edən dövlətlə əlaqələr yaratmaq, əməkdaşlığı genişləndirmək və inkişaf etdirmək;
3.1.7. qəbul edən dövlətin xarici və daxili siyasət məsələləri, qəbul edən dövlətdə və onun yerləşdiyi regionda mövcud beynəlxalq vəziyyət, habelə Azərbaycan Respublikasının milli maraqları baxımından əhəmiyyət kəsb edən hadisələr barədə Azərbaycan Respublikasının Prezidentini, Azərbaycan Respublikasının Nazirlər Kabinetini və Nazirliyi məlumatlandırmaq;
3.1.8. Azərbaycan Respublikası ilə qəbul edən dövlət arasında danışıqlar aparılmasını təşkil və təmin etmək;
3.1.9. qəbul edən dövlətdə Azərbaycan Respublikasının xarici siyasət məsələləri ilə bağlı şərh və açıqlamalar vermək;
3.1.10. qəbul edən dövlətə ezam olunmuş Azərbaycan Respublikası dövlət orqanlarının (qurumlarının) nümayəndələrinə xidməti vəzifələrini yerinə yetirməkdə yardım göstərmək;
3.1.11. qəbul edən dövlətdə yaşayan soydaşlarla bağlı dövlət siyasətinin həyata keçirilməsinə və əlaqələrin qurulmasına, eləcə də onlar arasında əməkdaşlığın inkişafına, həmrəyliyin gücləndirilməsinə və milli mənafeyə xidmət edən tədbirlərin təşkilinə yardım etmək;
3.1.12. Azərbaycan Respublikasının xarici siyasəti çərçivəsində beynəlxalq yardım fəaliyyətinə dair təkliflər vermək, qəbul edən dövlətdə beynəlxalq yardımın təşkilində, həyata keçirilməsində və əlaqələndirilməsində iştirak etmək;
3.1.13. qəbul edən dövlətin razılığı ilə müvafiq dairədə olan Azərbaycan hərbi və mülki məzarlarının, məzarüstü abidələrinin, abidə nişanlarının və memorial (xatirə) tikililərinin qeydiyyatı, mühafizəsi və abadlığı məqsədilə tədbirlər görmək;
3.1.14. Azərbaycan Respublikasının qəbul edən dövlətlə xarici iqtisadi əlaqələrinin qurulmasına və inkişaf etdirilməsinə, Azərbaycan Respublikasına xarici sərmayələrin cəlb olunmasına dəstək vermək, həmçinin Azərbaycan mal və xidmətlərinin beynəlxalq bazarlara çıxarılması sahəsində Azərbaycan Respublikasının aidiyyəti dövlət orqanlarına (qurumlarına) kömək göstərmək;
3.1.15. qəbul edən dövlətdə Azərbaycan Respublikasının iştirakı ilə keçirilən beynəlxalq tədbirlərdə aidiyyəti dövlət orqanları (qurumları) ilə birlikdə Azərbaycan mədəniyyətinin təqdim və təşviqini təmin edən tədbirlər görmək, Azərbaycan Respublikasının mədəniyyət tədbirlərinin keçirilməsinə dəstək göstərmək;
3.1.16. qəbul edən dövlətdə Azərbaycan Respublikasının xarici və daxili siyasəti, iqtisadi, sosial və mədəni həyatı haqqında rəsmi məlumatın yayılmasını təmin etmək;
3.1.17. Azərbaycan Respublikasının milli maraqları baxımından Azərbaycan Respublikasının dövlət orqanlarına (qurumlarına), qeyri-hökumət təşkilatlarına (ictimai birliklərinə və fondlarına) və işgüzar dairələrinə qəbul edən dövlətin dövlət orqanları (qurumları), qeyri-hökumət təşkilatları (ictimai birlikləri və fondları) və işgüzar dairələri ilə əlaqələrin qurulmasına və inkişafına kömək göstərmək;
3.1.18. Azərbaycan Respublikası Prezidentinin, Azərbaycan Respublikası Nazirlər Kabinetinin və Nazirliyin tapşırıqlarını yerinə yetirmək, həmçinin Azərbaycan Respublikasının digər dövlət orqanlarının (qurumlarının) və yerli özünüidarəetmə orqanlarının Nazirlik vasitəsilə daxil olmuş müraciətlərinə baxmaq;
3.1.19. Azərbaycan Respublikası Milli Məclisinin qəbul edən dövlətdə parlamentlərarası və digər beynəlxalq əlaqələrinin qurulmasına və həyata keçirilməsinə Nazirlik vasitəsilə kömək göstərmək;
3.1.20. Azərbaycan Respublikası ilə qəbul edən dövlət arasında beynəlxalq müqavilələrin layihələrinin hazırlanmasında, beynəlxalq müqavilələrin bağlanılması və ya ləğv edilməsi barədə təkliflər verilməsində, Azərbaycan Respublikası ilə qəbul edən dövlət arasında bağlanılmış beynəlxalq müqavilələrin icrası üzərində ümumi müşahidənin həyata keçirilməsində iştirak etmək;
3.1.21. Azərbaycan Respublikası ilə qəbul edən dövlət arasında protokol təminatından irəli gələn funksiyaları həyata keçirmək;
3.1.22. qəbul edən dövlətdə Azərbaycan Respublikasına, onun xarici siyasət təşəbbüslərinə münasibətdə müsbət mövqenin formalaşdırılmasına kömək göstərmək;
3.1.23. qəbul edən dövlətdə Azərbaycan Respublikası konsulluqlarının (olduğu halda) fəaliyyəti üzərində ümumi siyasi rəhbərliyi həyata keçirmək;
3.1.24. müvafiq dairədə Azərbaycan Respublikasının adından konsul funksiyalarının həyata keçirilməsindən irəli gələn hərəkətləri yerinə yetirmək;
3.1.25. müvafiq dairədə olan və ya yaşayan Azərbaycan Respublikası vətəndaşlarına, qəbul edən dövlətin qanunvericiliyinə riayət etməklə, mülki, ailə və cinayət işlərinə dair hüquqi yardım göstərmək;
3.1.26. müvafiq dairədə müvəqqəti və ya daimi yaşayan Azərbaycan Respublikası vətəndaşlarının uçotunu aparmaq;
3.1.27. müvafiq dairədə müvəqqəti və ya daimi yaşayan Azərbaycan Respublikası vətəndaşlarının hərbi uçotunu aparmaq, kişi cinsindən olan 18 yaşına çatmış vətəndaşların müddətli həqiqi hərbi xidmətə çağırılmaq üçün Azərbaycan Respublikasına gəlmələrini təmin etmək;
3.1.28. müvafiq dairədə haqqı ödənilən əmək fəaliyyəti ilə məşğul olan Azərbaycan Respublikası vətəndaşlarını qeydiyyatdan keçirmək;
3.1.29. Azərbaycan Respublikası məhkəmələrinin və istintaq orqanlarının müvafiq dairədə olan və ya yaşayan Azərbaycan Respublikası vətəndaşlarına dair tapşırıqlarını, əgər həmin aktların icrası qəbul edən dövlətin qanunvericiliyinə zidd deyilsə, Azərbaycan Respublikasının normativ hüquqi aktlarına əməl etməklə yerinə yetirmək;
3.1.30. müvafiq dairədə azadlığı məhdudlaşdırılan və ya azadlıqdan məhrum edilən Azərbaycan Respublikası vətəndaşlarına münasibətdə Azərbaycan Respublikası ilə qəbul edən dövlətin tərəfdar çıxdıqları beynəlxalq müqavilələrə və qəbul edən dövlətin qanunlarına əməl olunub-olunmamasına nəzarət etmək;
3.1.31. müvafiq dairədə itkin düşmüş Azərbaycan Respublikası vətəndaşlarının axtarışı üzrə tədbirlər görmək;
3.1.32. müvafiq dairədə olan və ya yaşayan Azərbaycan Respublikası vətəndaşlarına seçki hüquqlarını həyata keçirməkdə kömək göstərmək;
3.1.33. müvafiq dairədə qanunla nəzərdə tutulmuş notariat əməliyyatlarını aparmaq;
3.1.34. müvafiq dairədə konsul leqallaşdırmasını həyata keçirmək;
3.1.35. müvafiq dairədə olan və ya yaşayan Azərbaycan Respublikası vətəndaşları barəsində vətəndaşlıq vəziyyəti aktlarının dövlət qeydiyyatını (o cümlədən doğumun, atalığın müəyyən edilməsinin və ölümün elektron formada) aparmaq, vətəndaşlıq vəziyyəti aktı qeydlərində dəyişiklik etmək və onları ləğv etmək, itmiş akt qeydlərini bərpa etmək, akt kitablarını saxlamaq və vətəndaşlıq vəziyyəti aktlarının dövlət qeydiyyatı haqqında şəhadətnamələr və ya arayışlar vermək;
3.1.36. müvafiq dairədə müvəqqəti və ya daimi yaşayan Azərbaycan Respublikası vətəndaşları barəsində qəyyumluqla və himayəçiliklə bağlı tədbirləri yerinə yetirmək;
3.1.37. Azərbaycan Respublikasında yaşayan Azərbaycan Respublikası vətəndaşlarının xeyrinə müvafiq dairədə vərəsəlik açıldıqda, bu vərəsəliyə dair və ehtimal olunan vərəsələr haqqında məlumatı Nazirliyə göndərmək;
3.1.38. müvafiq dairədə səlahiyyətlərinə aid edilən məsələlər üzrə arayışlar vermək;
3.1.39. Azərbaycan Respublikasının vətəndaşları öz maraqlarının müdafiəsini digər şəxsə həvalə etmədikdə və ya öz maraqlarını müdafiə etmək iqtidarında olmadıqda, müvafiq dairədə olan məhkəmə və digər dövlət orqanlarında (qurumlarında), qəbul edən dövlətin qanunvericiliyinə riayət etməklə, onları təmsil etmək və ya müvafiq təmsilçiliyini təşkil etmək;
3.1.40. müvafiq dairədə müvəqqəti və ya daimi yaşayan şəxslərin Azərbaycan Respublikasının vətəndaşlığı məsələlərinə baxılmada iştirak etmək;
3.1.41. müvafiq dairədə müvəqqəti və ya daimi yaşayan Azərbaycan Respublikası vətəndaşlarına pasport vermək;
3.1.42. müvafiq dairədə olan və ya yaşayan Azərbaycan Respublikası vətəndaşlarının və Azərbaycan Respublikasında daimi yaşayan vətəndaşlığı olmayan şəxslərin şəxsiyyətini müəyyənləşdirmək və onlara Azərbaycan Respublikasına qayıdış şəhadətnaməsi vermək;
3.1.43. müvafiq dairədə yaşayan əcnəbilərə və vətəndaşlığı olmayan şəxslərə, daimi yaşayan Azərbaycan Respublikası vətəndaşlarına, fəaliyyət göstərən hüquqi şəxslərə elektron imza sertifikatının verilməsini təmin etmək;
3.1.44. müvafiq dairədə yaşayan və Azərbaycan Respublikasına gələn əcnəbilərə və vətəndaşlığı olmayan şəxslərə viza rəsmiləşdirmək, elektron viza əldə etmək qaydası haqqında məlumat vermək, həmçinin beynəlxalq tədbirlərdə sadələşdirilmiş viza rejiminin tətbiqi haqqında məlumatlandırmanı təmin etmək;
3.1.45. Azərbaycan Respublikasının dövlət orqanları (qurumları) tərəfindən müvafiq dairədə olan və ya yaşayan Azərbaycan Respublikası vətəndaşlarına dövlət xidmətlərinin səyyar formada göstərilməsinə dəstək vermək;
3.1.46. qəbul edən dövlətdə silahlı münaqişələr və fövqəladə hallar zamanı, həmçinin təhlükəsizliyə təhdid yarandığı digər hallarda Səfirlik əməkdaşlarının və onlarla birlikdə yaşayan ailə üzvlərinin, eləcə də qəbul edən dövlətdə olan və ya yaşayan digər Azərbaycan Respublikası vətəndaşlarının təhlükəsizliyini aidiyyəti dövlət orqanları (qurumları) ilə birlikdə təmin etmək, həmçinin onların təxliyəsini təşkil etmək;
3.1.47. müvafiq dairədə olan Azərbaycan Respublikasının mülki dəniz və hava gəmiləri, hərbi gəmiləri və köməkçi hərbi gəmiləri, hərbi təyyarələri və helikopterləri, həmçinin onların heyəti ilə bağlı normativ hüquqi aktlarla müəyyən edilmiş funksiyaları həyata keçirmək, belə gəmilərə və onların heyətinə yardım göstərmək;
3.1.48. müvafiq dairədə olan Azərbaycan Respublikasının beynəlxalq yük və sərnişin daşımalarını həyata keçirən avtomobil və dəmir yolu nəqliyyatı vasitələri, həmçinin onların heyəti ilə bağlı normativ hüquqi aktlarla müəyyən edilmiş funksiyaları həyata keçirmək, belə gəmilərə və onların heyətinə yardım göstərmək;
3.1.49. müvafiq dairədə sanitariya, fitosanitariya və baytarlıq mühafizəsi sahələrində normativ hüquqi aktlarla müəyyən edilmiş funksiyaları həyata keçirmək;
3.1.50. müvafiq dairədə apardığı konsul əməliyyatlarına görə dövlət rüsumu tutmaq və onun normativ hüquqi aktlarla müəyyən edilmiş qaydada və müddətdə dövlət büdcəsinə köçürülməsini təmin etmək;
3.1.51. Nazirliyin tapşırığı və qəbul edən dövlətin razılığı əsasında, qəbul edən dövlətdə təmsil olunmayan üçüncü dövlətin müraciəti ilə həmin üçüncü dövlətin maraqlarını qəbul edən dövlətdə müdafiə etmək, eləcə də üçüncü dövlətin adından konsul funksiyalarını yerinə yetirmək;
3.1.52. öz fəaliyyəti haqqında ictimaiyyətin məlumatlandırılmasını, sosial media hesablarının yaradılmasını, eləcə də malik olduğu və siyahısı qanunla müəyyən edilmiş açıqlanmalı olan ictimai informasiyanın rəsmi internet ehtiyatında və sosial media hesablarında yerləşdirilməsini və bu informasiyanın daim yenilənməsini təmin etmək;
3.1.53. fəaliyyət istiqamətlərinə aid məsələlər üzrə müraciətlərə baxmaq, diplomatik və rəsmi yazışmalar aparmaq və onların qeydiyyatını, saxlanılmasını, arxivləşdirilməsini və mühafizəsini təmin etmək;
3.1.54. Azərbaycan Respublikası Prezidentinin aktları ilə müəyyən edilmiş digər vəzifələri həyata keçirmək.
4.1. Bu Əsasnamə ilə müəyyən olunmuş vəzifələrini yerinə yetirmək üçün Səfirliyin aşağıdakı hüquqları vardır:
4.1.1. Azərbaycan Respublikasından və qəbul edən dövlətdən rəsmi nümayəndə heyətlərinin səfərlərinə dair Nazirliyə təkliflər vermək;
4.1.2. Azərbaycan Respublikası ilə qəbul edən dövlət arasında beynəlxalq müqavilələrin bağlanılması və ya ləğv edilməsi barədə Nazirliyə təkliflər vermək;
4.1.3. qəbul edən dövlətdə fəaliyyət göstərən üçüncü dövlətlərin diplomatik nümayəndəlikləri və konsulluqları, vəzifələrinə aid məsələlər üzrə qəbul edən dövlətin dövlət orqanları (qurumları), yerli özünüidarəetmə orqanları, qeyri-hökumət təşkilatları (ictimai birlikləri və fondları), media subyektləri və jurnalistləri, elmi, mədəni və işgüzar dairələri ilə xidməti əlaqələr qurmaq və əməkdaşlıq etmək, eləcə də onlara sorğular göndərmək, onlardan məlumat və sənədlər almaq;
4.1.4. fəaliyyət istiqamətlərinə aid məsələlər üzrə Nazirlik vasitəsilə Azərbaycan Respublikasının dövlət orqanlarına (qurumlarına), yerli özünüidarəetmə orqanlarına, qeyri-hökumət təşkilatlarına (ictimai birliklərə və fondlara), hüquqi və fiziki şəxslərə sorğular göndərmək və onlardan məlumat və sənədlər almaq;
4.1.5. qəbul edən dövlətlə əməkdaşlıq sahəsində yaradılan birgə hökumətlərarası və digər komissiyaların, eləcə də işçi qrupların işində iştirak etmək, konfranslar, forumlar, seminarlar, iclaslar, sərgilər, görüşlər və digər tədbirlər təşkil etmək, həmçinin bu tədbirlərin təşkilinə dəstək vermək;
4.1.6. müvafiq dairədə konsul funksiyalarından irəli gələn hüquqları həyata keçirmək, aparılan konsul əməliyyatlarına görə faktiki xərcləri tutmaq, eləcə də konsul əməliyyatlarının icrası üçün kənar xidmət təchizatçıları ilə əməkdaşlıq etmək;
4.1.7. konsul funksiyalarının icrası ilə bağlı müvafiq dairənin inzibati ərazi vahidlərində şəxslərin qəbulunu həyata keçirmək;
4.1.8. qəbul edən dövlətdə Azərbaycan Respublikası fəxri konsullarının təyin edilməsi barədə Nazirliyə təkliflər təqdim etmək;
4.1.9. fəaliyyət istiqamətlərinə aid məsələlərə dair rəy vermək, analitik materiallar hazırlamaq, təhlillər və ümumiləşdirmələr aparmaq;
4.1.10. vəzifələrindən irəli gələn məsələlər üzrə komissiyalar və işçi qruplar yaratmaq;
4.1.11. Azərbaycan Respublikası Prezidentinin aktları ilə müəyyən edilmiş digər hüquqları həyata keçirmək.
5.1. Səfirliyə qəbul edən dövlətdə Azərbaycan Respublikasının ən yüksək rəsmi nümayəndəsi olan Səfir rəhbərlik edir.
5.2. Səfir Azərbaycan Respublikasının Prezidenti tərəfindən təyin edilir və geri çağırılır.
5.3. Ali təhsili və peşə hazırlığı olan, Azərbaycan Respublikasının dövlət dilini sərbəst bilən Azərbaycan Respublikası vətəndaşı Səfir təyin edilə bilər.
5.4. Səfirin təyin edilməsi və geri çağırılması Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrlə və Azərbaycan Respublikasının normativ hüquqi aktları ilə tənzimlənir.
5.5. Səfir təyin edilməsi nəzərdə tutulan şəxs barəsində qəbul edən dövlətin əvvəlcədən razılıq sənədi alınır.
5.6. Səfirə Azərbaycan Respublikasının Prezidenti tərəfindən onun soyadını, adını, atasının adını, vətəndaşlığını, vəzifəsini və səlahiyyətini təsdiq edən sənəd (etimadnamə) verilir.
5.7. Səfirin qəbul edən dövlətdə fasiləsiz xidmət müddəti 5 (beş) ildir. Səfir müavininin qəbul edən dövlətdə fasiləsiz xidmət müddəti 4 (dörd) ildir. Azərbaycan Respublikası Prezidentinin qərarına uyğun olaraq Səfir və Səfirin müavini fasiləsiz xidmət müddətindən artıq fəaliyyətini davam etdirə və ya həmin müddətdən əvvəl geri çağırıla bilərlər.
5.8. Səfirliyin digər əməkdaşlarının fasiləsiz xidmət müddəti 3 (üç) ildir. Bu müddət Azərbaycan Respublikasının xarici işlər naziri tərəfindən onların razılığı ilə 1 (bir) ilədək uzadıla bilər və ya onlar “Diplomatik xidmət haqqında” Azərbaycan Respublikasının Qanunu ilə nəzərdə tutulan hallarda xidmət müddətinin başa çatmasından əvvəl geri çağırıla bilərlər.
5.9. Səfir Səfirliyə həvalə edilmiş vəzifələrin icrası üçün şəxsən məsuliyyət daşıyır və onların yerinə yetirilməsinə görə Nazirliyə hesabat verir.
5.10.1. qəbul edən dövlətdə Azərbaycan Respublikasını təmsil edir;
5.10.2. Səfirliyin fəaliyyətini təşkil edir və ona rəhbərlik edir;
5.10.3. Səfirlikdə dövlət sirrinin və qanunla mühafizə olunan digər sirlərin qorunmasını təşkil edir;
5.10.4. Səfirliyə ayrılan dövlət büdcəsi vəsaitinin səmərəli sərf olunmasına və maliyyə intizamına riayət edilməsinə nəzarəti həyata keçirir;
5.10.5. Səfirliyin fəaliyyətinə dair icrası məcburi olan sərəncamlar və əmrlər verir;
5.10.6. Səfirlikdə Azərbaycan Respublikasının hüquqi aktlarının və Nazirliyin qərar, sərəncam və əmrlərinin icrasını təşkil edir, həmçinin onların yerinə yetirilməsinə nəzarəti həyata keçirir;
5.10.7. Səfirliyin əməkdaşlarını xidmət üçün zəruri şəraitlə təmin edir, Səfirliyin fəaliyyətinin təşkili ilə bağlı Nazirliyə təkliflər verir;
5.10.8. Nazirliyin razılığı ilə xidməti ezamiyyətlərə gedir;
5.10.9. Səfirliyi təmsil edir;
5.10.10. Səfirlik əməkdaşlarının xidməti fəaliyyətini normativ hüquqi aktlarda nəzərdə tutulan qaydada qiymətləndirir;
5.10.11. Səfirliyin xidmətdə xüsusi fərqlənmiş əməkdaşlarının Azərbaycan Respublikasının dövlət təltifləri ilə təltif edilməsi üçün, habelə Səfirliyin əməkdaşları barəsində həvəsləndirmə və intizam tənbehi tədbirləri görülməsi üçün Nazirliyə təqdimat verir;
5.10.12. Səfirliyin diplomatik xidmət əməkdaşlarının rütbədə və vəzifədə yüksəldilməsi, Səfirlik əməkdaşlarının fasiləsiz xidmət müddətinin “Diplomatik xidmət haqqında” Azərbaycan Respublikasının Qanununa uyğun olaraq uzadılması haqqında Nazirliyə təklif verir;
5.10.13. Səfirliyin əməkdaşlarının və dövlət qulluğunda olmayan işçilərinin məzuniyyətləri və ezamiyyətləri barədə əmrlər verir;
5.10.14. Səfirliyin dövlət qulluğunda olmayan işçilərini Nazirliklə razılaşdıraraq işə qəbul edir və işdən azad edir;
5.10.15. Səfirliyin, onun əməkdaşlarının və onlarla birlikdə yaşayan ailə üzvlərinin təhlükəsizliyinin təmin edilməsi üçün lazımi tədbirlər görür, qəbul edən dövlətdə silahlı münaqişələr və fövqəladə hallar zamanı, həmçinin təhlükəsizliyə təhdid yarandığı digər hallarda Səfirliyin, habelə Azərbaycan Respublikasının qəbul edən dövlətdə olan digər diplomatik xidmət orqanlarının fəaliyyətini, həmçinin Səfirlik əməkdaşlarının və onlarla birlikdə yaşayan ailə üzvlərinin, eləcə də qəbul edən dövlətdə olan və ya yaşayan digər Azərbaycan Respublikası vətəndaşlarının davranış qaydasını müəyyən olunmuş qaydada təşkil edir və bu məsələlərlə bağlı rəhbərliyi həyata keçirir;
5.10.16. mühafizəsi zəruri hesab olunan Səfirlikdə mühafizə xidmətinin aparılmasına nəzarət edir;
5.10.17. Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrlə və qəbul edən dövlətin qanunvericiliyi ilə Səfirliyə, Azərbaycan Respublikasının qəbul edən dövlətdə olan digər diplomatik xidmət orqanlarına və Azərbaycan Respublikası dövlət orqanlarının (qurumlarının) qəbul edən dövlətdəki nümayəndəliklərinə, onların əməkdaşlarına (nümayəndələrinə) və onlarla birlikdə yaşayan ailə üzvlərinə, diplomatik poçta və onu daşıyan şəxslərə, həmçinin imtiyaz və immunitet hüququ olan Azərbaycan Respublikasının digər vətəndaşlarına verilən imtiyazların və immunitetlərin qəbul edən dövlətdə təmin olunması məqsədilə tədbirlər görür;
5.10.18. Səfirliyin əməkdaşlarına və Azərbaycan Respublikası dövlət orqanlarının (qurumlarının) qəbul edən dövlətdəki nümayəndələrinə qəbul edən dövlətdə Azərbaycan Respublikasının milli maraqlarına uyğun davranış nümayiş etdirmələri, qəbul edən dövlətin qanunvericiliyinə, həmçinin adət-ənənələrinə hörmətlə yanaşmaları və daxili işlərinə qarışmamaları barədə tövsiyələr verir;
5.10.19. qəbul edən dövlətdə danışıqlar aparır, beynəlxalq konfranslarda, forumlarda, seminarlarda, iclaslarda, sərgilərdə, görüşlərdə və digər tədbirlərdə iştirak edir, habelə Azərbaycan Respublikası Prezidentinin verdiyi səlahiyyət əsasında beynəlxalq müqavilələr imzalayır;
5.10.20. qəbul edən dövlətlə münasibətlərdə qarşılılıq prinsipinin tətbiq edilməsinə dair Nazirliyə təkliflər verir;
5.10.21. Azərbaycan Respublikası dövlət orqanlarının (qurumlarının) qəbul edən dövlətdə fəaliyyət göstərən və qəbul edən dövlətə ezam olunmuş nümayəndələrinin qərarları və hərəkətləri Azərbaycan Respublikasının milli maraqlarına cavab vermədiyi təqdirdə, həmin halların qarşısının alınması üçün Nazirliyə məlumat verir;
5.10.22. Azərbaycan Respublikasını eyni zamanda üçüncü dövlətdə yaxud, beynəlxalq təşkilatda və ya onun bölməsində təmsil etdikdə, bu təmsilçilikdən irəli gələn səlahiyyətləri yerinə yetirir;
5.10.23. Azərbaycan Respublikasının normativ hüquqi aktlarına uyğun olaraq digər səlahiyyətləri həyata keçirir.
5.11. Səfir vəzifəsi vakant olduqda və ya Səfir vəzifə funksiyalarını həyata keçirə bilmədikdə, habelə məzuniyyətdə və ya qəbul edən dövlətin xaricində ezamiyyətdə olduğu dövrdə bu vəzifəni Səfirin müavini, Səfirin müavini olmadıqda isə Səfirliyin digər diplomatik xidmət əməkdaşı müvəqqəti icra edir. Səfir vəzifəsini müvəqqəti icra edən diplomatik xidmət əməkdaşı müvəqqəti işlər vəkili adlandırılır. Səfir məzuniyyətdə və ya qəbul edən dövlətin xaricində ezamiyyətdə olduğu dövrdə müvəqqəti işlər vəkili, Nazirliklə razılaşdırmaqla, Səfir, digər hallarda isə Nazirlik tərəfindən müəyyən edilir və bu barədə Səfirlik tərəfindən qəbul edən dövlətin aidiyyəti dövlət orqanına məlumat verilir.
5.12. Səfirliyin strukturunu və ştat cədvəlini Nazirlik təsdiq edir.
5.13. Səfirliyin vəzifələrinin icrasının yerləşdiyi şəhərdən kənarda qəbul edən dövlətin digər inzibati ərazi vahidində icra etmək zərurəti yarandıqda, qəbul edən dövlətin razılığı ilə müvafiq inzibati ərazi vahidində Səfirliyin bölməsi, yaxud Səfir eyni zamanda üçüncü dövlətdə və ya bölməsi üçüncü dövlətdə yerləşən beynəlxalq təşkilatda Azərbaycan Respublikasını təmsil etdikdə, onun səlahiyyətlərinin həyata keçirilməsi üçün üçüncü dövlətin və ya beynəlxalq təşkilatın razılığı ilə həmin dövlətdə və ya beynəlxalq təşkilatda Azərbaycan Respublikasını təmsil edən bölmə yaradıla bilər.
5.14. Səfirliyin maddi-texniki təminatını Nazirlik həyata keçirir.
5.15. Səfirlik əməkdaşlarının hüquq və vəzifələri “Diplomatik xidmət haqqında” Azərbaycan Respublikasının Qanunu və vəzifə təlimatları ilə müəyyən olunur.
5.16. Səfirliyin fəaliyyəti Nazirlik tərəfindən təsdiq edilmiş illik iş planı əsasında təşkil olunur.
5.17. Səfirliyə normativ hüquqi aktlarla müəyyən olunmuş qaydada Azərbaycan Respublikası dövlət orqanlarının (qurumlarının) nümayəndələri təyin və ya ezam oluna bilərlər. Səfirliyə təyin və ya ezam olunmuş Azərbaycan Respublikası dövlət orqanlarının (qurumlarının) nümayəndələri öz qərarlarını və hərəkətlərini Səfirlə razılaşdırmalıdırlar.
1.1. Azərbaycan Respublikasının Daimi Nümayəndəliyi (bundan sonra – Daimi Nümayəndəlik) beynəlxalq təşkilatda və ya onun bölməsində (bundan sonra – beynəlxalq təşkilat) Azərbaycan Respublikasını təmsil edən diplomatik xidmət orqanıdır. Daimi Nümayəndəlik Azərbaycan Respublikası Xarici İşlər Nazirliyinin (bundan sonra – Nazirlik) rəhbərlik etdiyi diplomatik xidmət orqanlarının vahid sisteminə daxildir.
1.2. Daimi Nümayəndəlik Azərbaycan Respublikası Prezidentinin təqdimatı ilə Azərbaycan Respublikasının Milli Məclisi tərəfindən təsis edilir.
1.3. Daimi Nümayəndəlik öz fəaliyyətində Azərbaycan Respublikasının Konstitusiyasını, Azərbaycan Respublikasının və Daimi Nümayəndəliyin yerləşdiyi dövlətin (bundan sonra – yerləşmə dövləti), həmçinin beynəlxalq təşkilatın tərəfdar çıxdıqları beynəlxalq müqavilələri, “Diplomatik xidmət haqqında” Azərbaycan Respublikasının Qanununu, Azərbaycan Respublikasının digər qanunlarını, Azərbaycan Respublikasının Xarici İşlər Nazirliyi haqqında Əsasnaməni, bu Əsasnaməni, Azərbaycan Respublikası Prezidentinin digər fərmanlarını, həmçinin sərəncamlarını, Azərbaycan Respublikası Nazirlər Kabinetinin qərar və sərəncamlarını, digər normativ hüquqi aktları, Nazirliyin qərar, sərəncam və əmrlərini rəhbər tutur və yerləşmə dövlətinin qanunvericiliyini nəzərə alır.
1.4. Daimi Nümayəndəlik beynəlxalq təşkilatda Azərbaycan Respublikasının xarici siyasətinin vahid xətt üzrə həyata keçirilməsini təmin etmək məqsədilə Azərbaycan Respublikası dövlət orqanlarının (qurumlarının) beynəlxalq təşkilatda fəaliyyət göstərən və beynəlxalq təşkilatın orqanlarına, bölmələrinə və nümayəndəliklərinə (bundan sonra – beynəlxalq təşkilatların orqanları) ezam olunmuş nümayəndələrinin işini əlaqələndirir və onların fəaliyyətinə nəzarəti həyata keçirir. Həmin nümayəndələr öz fəaliyyətini Daimi Nümayəndəlik ilə razılaşdırmalı və bu barədə Daimi Nümayəndəliyə məlumat verməlidirlər.
1.5. Azərbaycan Respublikasının, yerləşmə dövlətinin və beynəlxalq təşkilatın tərəfdar çıxdıqları beynəlxalq müqavilələrə və Azərbaycan Respublikasının normativ hüquqi aktlarına uyğun olaraq, Daimi Nümayəndəliyin binasında və Azərbaycan Respublikası Daimi nümayəndəsinin (bundan sonra – Daimi nümayəndə) iqamətgahında Azərbaycan Respublikasının Dövlət Bayrağı qaldırılır və Azərbaycan Respublikası Dövlət Gerbinin qabarıq təsviri vurulur. Xidməti vəzifələrini yerinə yetirərkən Daimi nümayəndənin nəqliyyat vasitəsinin üzərində Azərbaycan Respublikasının Dövlət Bayrağı yerləşdirilir. Daimi Nümayəndəliyin binasında və ya ərazisində Azərbaycan dilində və yerləşmə dövlətinin dövlət dilində (dillərində), habelə beynəlxalq təşkilatın rəsmi dilində (dillərindən birində) Daimi Nümayəndəliyin adı yazılan lövhə vurulur. Daimi Nümayəndəlik tərəfindən Azərbaycan Respublikasının dövlət rəmzlərindən beynəlxalq təşkilatın və yerləşmə dövlətinin diplomatik protokol qaydaları, eləcə də yerləşmə dövlətinin qanunvericiliyi nəzərə alınmaqla istifadə olunur.
1.6. Daimi Nümayəndəlik, həmçinin Daimi Nümayəndəlikdə xidmət keçən diplomatik xidmət orqanı əməkdaşları (bundan sonra – əməkdaşlar) və onlarla birlikdə yaşayan ailə üzvləri Azərbaycan Respublikasının, yerləşmə dövlətinin və beynəlxalq təşkilatın tərəfdar çıxdıqları beynəlxalq müqavilələrə və yerləşmə dövlətinin qanunvericiliyinə uyğun olaraq, yerləşmə dövlətində imtiyazlardan və immunitetlərdən istifadə edirlər. Daimi Nümayəndəliyin əməkdaşları və onlarla birlikdə yaşayan ailə üzvləri yerləşmə dövlətinin qanunvericiliyinə, həmçinin adət-ənənələrinə hörmətlə yanaşmalı, yerləşmə dövlətinin daxili işlərinə qarışmamalıdırlar.
1.7. Daimi Nümayəndəliyin, nümunəsi Nazirlik tərəfindən təsdiq olunmuş və üzərində Azərbaycan Respublikası Dövlət Gerbinin təsviri və Daimi Nümayəndəliyin adı həkk olunmuş möhürü, həmçinin kargüzarlıq xidmətinin gerbsiz möhürü, müvafiq ştampları, blankları və bank hesabları vardır.
1.8. Daimi Nümayəndəliyin Azərbaycan Respublikasının mülkiyyəti olan torpaq sahələri, binaları, qurğuları və digər əmlakı Azərbaycan Respublikasının normativ hüquqi aktları ilə müəyyən olunmuş qaydada Daimi Nümayəndəliyə təhkim edilir. Daimi Nümayəndəlik ona təhkim olunmuş əmlak üzərində sahiblik, istifadə və sərəncam hüququnu Azərbaycan Respublikasının normativ hüquqi aktları ilə müəyyən edilmiş qaydada həyata keçirir.
2.1. Daimi Nümayəndəliyin fəaliyyət istiqamətləri aşağıdakılardır:
2.1.1. beynəlxalq təşkilatda Azərbaycan Respublikasını təmsil etmək;
2.1.2. beynəlxalq təşkilatda Azərbaycan Respublikasının xarici siyasətini vahid xətt üzrə həyata keçirmək;
2.1.3. beynəlxalq təşkilatda Azərbaycan Respublikasının müstəqilliyini, suverenliyini, ərazi bütövlüyünü, sərhədlərinin toxunulmazlığını, milli təhlükəsizliyini və milli maraqlarını xarici siyasət vasitələri ilə və diplomatik üsullarla qorumaq və təmin etmək;
2.1.4. Azərbaycan Respublikası ilə beynəlxalq təşkilat arasında əməkdaşlığı inkişaf etdirmək;
2.1.5. beynəlxalq təşkilatda Azərbaycan Respublikası vətəndaşlarının və hüquqi şəxslərinin hüquqlarını və qanuni mənafelərini xarici siyasət vasitələri ilə və diplomatik üsullarla müdafiə etmək;
2.1.6. beynəlxalq təşkilatın fəaliyyətində Azərbaycan Respublikasının iştirakını təmin etmək;
2.1.7. Azərbaycan Respublikasının beynəlxalq təşkilatla diplomatik əlaqələrini həyata keçirmək;
2.1.8. xaricdə yaşayan soydaşlarla bağlı dövlət siyasətinin beynəlxalq təşkilatda həyata keçirilməsinə dəstək vermək;
2.1.9. beynəlxalq təşkilatın orqanlarına Azərbaycan Respublikası rəsmi nümayəndə heyətlərinin səfərlərinin hazırlanmasına və həyata keçirilməsinə kömək etmək;
2.1.10. beynəlxalq təşkilatın fəaliyyətini təhlil etmək və Nazirliyə təkliflər vermək;
2.1.11. Azərbaycan Respublikası Prezidentinin aktları ilə müəyyən olunmuş digər istiqamətlərdə fəaliyyət göstərmək.
3.1. Bu Əsasnamə ilə müəyyən edilmiş fəaliyyət istiqamətlərinə uyğun olaraq, Daimi Nümayəndəliyin vəzifələri aşağıdakılardır:
3.1.1. Azərbaycan Respublikasını beynəlxalq təşkilatda təmsil etmək və onun milli maraqlarını qorumaq;
3.1.2. beynəlxalq təşkilatda Azərbaycan Respublikasının xarici siyasətinin vahid xətt üzrə həyata keçirilməsini təmin etmək;
3.1.3. Azərbaycan Respublikası ilə beynəlxalq təşkilat arasında əməkdaşlığı inkişaf etdirmək;
3.1.4. Azərbaycan Respublikasının milli təhlükəsizliyinin təmin olunmasından irəli gələn məsələləri beynəlxalq təşkilatda xarici siyasət vasitələri ilə və diplomatik üsullarla həyata keçirmək;
3.1.5. beynəlxalq təşkilatda Azərbaycan Respublikası vətəndaşlarının və hüquqi şəxslərinin hüquqlarının və qanuni mənafelərinin müdafiəsindən irəli gələn funksiyaları xarici siyasət vasitələri ilə və diplomatik üsullarla həyata keçirmək;
3.1.6. beynəlxalq təşkilatın fəaliyyəti barədə Azərbaycan Respublikasının Prezidentini, Azərbaycan Respublikasının Nazirlər Kabinetini və Nazirliyi məlumatlandırmaq;
3.1.7. Azərbaycan Respublikası ilə beynəlxalq təşkilat arasında danışıqlar aparılmasını təşkil və təmin etmək;
3.1.8. beynəlxalq təşkilatda Azərbaycan Respublikasının xarici siyasət məsələləri ilə bağlı şərh və açıqlamalar vermək;
3.1.9. beynəlxalq təşkilatın orqanlarına ezam olunmuş Azərbaycan Respublikası dövlət orqanlarının (qurumlarının) nümayəndələrinə xidməti vəzifələrini yerinə yetirməkdə kömək göstərmək;
3.1.10. xaricdə yaşayan soydaşlarla bağlı dövlət siyasətinin beynəlxalq təşkilatda həyata keçirilməsinə dəstək vermək, eləcə də yerləşmə dövlətində yaşayan soydaşlarla əlaqələrin qurulmasına və əməkdaşlığın inkişafına yardım etmək;
3.1.11. Azərbaycan Respublikasının xarici siyasəti çərçivəsində beynəlxalq yardım fəaliyyətinə dair təkliflər vermək, beynəlxalq yardımın təşkilində, həyata keçirilməsində və əlaqələndirilməsində iştirak etmək;
3.1.12. beynəlxalq təşkilatda Azərbaycan Respublikasının iştirakı ilə keçirilən beynəlxalq tədbirlərdə aidiyyəti dövlət orqanları (qurumları) ilə birlikdə Azərbaycan mədəniyyətinin təqdim və təşviqini təmin edən tədbirlər görmək, Azərbaycan Respublikasının mədəniyyət tədbirlərinin keçirilməsinə dəstək göstərmək;
3.1.13. beynəlxalq təşkilatda Azərbaycan Respublikasının xarici və daxili siyasəti, iqtisadi, sosial və mədəni həyatı haqqında rəsmi məlumatın yayılmasını təmin etmək;
3.1.14. beynəlxalq təşkilat çərçivəsində beynəlxalq müqavilələrin və beynəlxalq təşkilatın fəaliyyətinə dair digər sənədlərin layihələrinin hazırlanmasında, beynəlxalq təşkilat çərçivəsində beynəlxalq müqavilələrin bağlanılması və ya ləğv edilməsi barədə təkliflərin hazırlanmasında iştirak etmək;
3.1.15. Azərbaycan Respublikasının üzv və ya müşahidəçi olduğu beynəlxalq təşkilatın orqanlarında müvafiq vəzifələr üzrə Azərbaycan Respublikasına kvota ayrılması və ya ayrılmış kvotanın artırılması, həmçinin Azərbaycan Respublikasının üzv və ya müşahidəçi olduğu, eləcə də əməkdaşlıq etdiyi beynəlxalq təşkilatın orqanlarında müvafiq vəzifələrin Azərbaycan Respublikasının vətəndaşları tərəfindən tutulması istiqamətində iş aparmaq;
3.1.16. Azərbaycan Respublikasının beynəlxalq təşkilat qarşısında götürdüyü öhdəliklərinin yerinə yetirilməsində və beynəlxalq təşkilat çərçivəsində qəbul edilmiş Azərbaycan Respublikasının tərəfdar çıxdığı beynəlxalq müqavilələrin icrası üzərində ümumi müşahidənin həyata keçirilməsində iştirak etmək;
3.1.17. Azərbaycan Respublikasının milli maraqları baxımından Azərbaycan Respublikasının dövlət orqanlarına (qurumlarına) və qeyri-hökumət təşkilatlarına (ictimai birliklərə və fondlara) beynəlxalq təşkilatın orqanları ilə əlaqələrin qurulmasına və inkişafına kömək göstərmək;
3.1.18. Azərbaycan Respublikasına və onun xarici siyasət təşəbbüslərinə münasibətdə beynəlxalq təşkilatda müsbət mövqenin formalaşdırılmasına kömək göstərmək;
3.1.19. beynəlxalq təşkilatın fəaliyyətini, beynəlxalq təşkilata üzv və müşahidəçi olan, eləcə də beynəlxalq təşkilatla əməkdaşlıq edən xarici dövlətlərin beynəlxalq təşkilat çərçivəsində əməkdaşlığının səviyyəsini və əsas fəaliyyət istiqamətlərini öyrənmək və təhlil etmək;
3.1.20. Azərbaycan Respublikası Prezidentinin, Azərbaycan Respublikası Nazirlər Kabinetinin və Nazirliyin tapşırıqlarını yerinə yetirmək, həmçinin Azərbaycan Respublikasının digər dövlət orqanlarının (qurumlarının) və yerli özünüidarəetmə orqanlarının Nazirlik vasitəsilə daxil olmuş müraciətlərinə baxmaq;
3.1.21. Azərbaycan Respublikası Milli Məclisinin beynəlxalq təşkilatda parlamentlərarası və digər beynəlxalq əlaqələrinin qurulmasına və həyata keçirilməsinə Nazirlik vasitəsilə kömək göstərmək;
3.1.22. öz fəaliyyəti haqqında ictimaiyyətin məlumatlandırılmasını, sosial media hesablarının yaradılmasını, eləcə də malik olduğu və siyahısı qanunla müəyyən edilmiş açıqlanmalı olan ictimai informasiyanın rəsmi internet informasiya ehtiyatında və sosial media hesablarında yerləşdirilməsini və bu informasiyanın daim yenilənməsini təmin etmək;
3.1.23. yerləşmə dövlətində silahlı münaqişələr və fövqəladə hallar zamanı, həmçinin təhlükəsizliyə təhdid yarandığı digər hallarda, Daimi Nümayəndəlik əməkdaşlarının və onlarla birlikdə yaşayan ailə üzvlərinin, eləcə də yerləşmə dövlətində olan və ya yaşayan digər Azərbaycan Respublikası vətəndaşlarının təhlükəsizliyini aidiyyəti dövlət orqanları (qurumları) ilə birlikdə təmin etmək, həmçinin onların təxliyəsini Azərbaycan Respublikasının həmin dövlətdəki Səfirliyi ilə (olduğu halda) əlaqələndirməklə təşkil etmək;
3.1.24. fəaliyyət istiqamətlərinə aid məsələlər üzrə müraciətlərə baxmaq, diplomatik və rəsmi yazışmalar aparmaq və onların qeydiyyatını, saxlanılmasını, arxivləşdirilməsini və mühafizəsini təmin etmək;
3.1.25. Nazirliyin tapşırığı və beynəlxalq təşkilatın razılığı əsasında, beynəlxalq təşkilatda təmsil olunmayan üçüncü dövlətin xahişi ilə həmin dövlətin maraqlarını, eləcə də onun vətəndaşlarının və hüquqi şəxslərinin hüquqlarını və qanuni mənafelərini beynəlxalq razılaşmalar əsasında beynəlxalq təşkilatda müdafiə etmək;
3.1.26. Azərbaycan Respublikası Prezidentinin aktları ilə müəyyən edilmiş digər vəzifələri həyata keçirmək.
4.1. Bu Əsasnamə ilə müəyyən olunmuş vəzifələrini yerinə yetirmək üçün Daimi Nümayəndəliyin aşağıdakı hüquqları vardır:
4.1.1. Azərbaycan Respublikasından və beynəlxalq təşkilatdan rəsmi nümayəndə heyətlərinin səfərlərinə dair Nazirliyə təkliflər vermək;
4.1.2. Azərbaycan Respublikasının beynəlxalq təşkilat çərçivəsində beynəlxalq müqavilələrinin bağlanılması və ya ləğv edilməsi barədə Nazirliyə təkliflər vermək;
4.1.3. yerləşmə dövlətində fəaliyyət göstərən beynəlxalq təşkilatların orqanları, vəzifələrinə aid məsələlər üzrə yerləşmə dövlətinin dövlət orqanları (qurumları) və yerli özünüidarəetmə orqanları, qeyri-hökumət təşkilatları (ictimai birlikləri və fondları), media subyektləri və jurnalistləri, elmi, mədəni və işgüzar dairələri ilə xidməti əlaqələr qurmaq və əməkdaşlıq etmək, eləcə də onlara sorğular göndərmək, onlardan məlumat və sənədlər almaq;
4.1.4. fəaliyyət istiqamətlərinə aid məsələlər üzrə Nazirlik vasitəsilə Azərbaycan Respublikasının dövlət orqanlarına (qurumlarına), yerli özünüidarəetmə orqanlarına, qeyri-hökumət təşkilatlarına (ictimai birliklərə və fondlara), hüquqi və fiziki şəxslərə sorğular göndərmək və onlardan məlumat və sənədlər almaq;
4.1.5. beynəlxalq təşkilatla əməkdaşlıq sahəsində yaradılan birgə və digər komissiyaların, eləcə də işçi qrupların işində iştirak etmək, konfranslar, forumlar, seminarlar, iclaslar, sərgilər, görüşlər və digər tədbirlər təşkil etmək, həmçinin bu tədbirlərin təşkilinə dəstək vermək;
4.1.6. fəaliyyət istiqamətlərinə aid məsələlərə dair rəy vermək, analitik materiallar hazırlamaq, təhlillər və ümumiləşdirmələr aparmaq;
4.1.7. vəzifələrindən irəli gələn məsələlər üzrə komissiyalar və işçi qruplar yaratmaq;
4.1.8. Azərbaycan Respublikası Prezidentinin aktları ilə müəyyən edilmiş digər hüquqları həyata keçirmək.
5.1. Daimi Nümayəndəliyə Azərbaycan Respublikasının beynəlxalq təşkilatda ən yüksək rəsmi nümayəndəsi olan Daimi nümayəndə rəhbərlik edir.
5.2. Daimi nümayəndə Azərbaycan Respublikasının Prezidenti tərəfindən təyin edilir və geri çağırılır.
5.3. Ali təhsili və peşə hazırlığı olan, Azərbaycan Respublikasının dövlət dilini sərbəst bilən Azərbaycan Respublikası vətəndaşı Daimi nümayəndə təyin edilə bilər.
5.4. Daimi nümayəndənin təyin edilməsi və geri çağırılması Azərbaycan Respublikasının və beynəlxalq təşkilatın tərəfdar çıxdıqları beynəlxalq müqavilələrlə və Azərbaycan Respublikasının normativ hüquqi aktları ilə tənzimlənir.
5.5. Daimi nümayəndə təyin edilməsi nəzərdə tutulan şəxs barəsində beynəlxalq təşkilatın əvvəlcədən razılıq sənədi alınır.
5.6. Daimi nümayəndəyə Azərbaycan Respublikasının Prezidenti tərəfindən onun soyadını, adını, atasının adını, vətəndaşlığını, vəzifəsini və səlahiyyətini təsdiq edən sənəd (etimadnamə) verilir.
5.7. Daimi nümayəndənin beynəlxalq təşkilatda fasiləsiz xidmət müddəti 5 (beş) ildir. Daimi nümayəndənin müavininin beynəlxalq təşkilatda fasiləsiz xidmət müddəti 4 (dörd) ildir. Azərbaycan Respublikası Prezidentinin qərarına uyğun olaraq Daimi nümayəndə və Daimi nümayəndənin müavini fasiləsiz xidmət müddətindən artıq fəaliyyətini davam etdirə və ya həmin müddətdən əvvəl geri çağırıla bilərlər.
5.8. Daimi Nümayəndəliyin digər əməkdaşlarının fasiləsiz xidmət müddəti 3 (üç) ildir. Bu müddət Azərbaycan Respublikasının xarici işlər naziri tərəfindən onların razılığı ilə 1 (bir) ilədək uzadıla bilər və ya onlar “Diplomatik xidmət haqqında” Azərbaycan Respublikasının Qanunu ilə nəzərdə tutulan hallarda xidmət müddətinin başa çatmasından əvvəl geri çağırıla bilərlər.
5.9. Daimi nümayəndə Daimi Nümayəndəliyə həvalə edilmiş vəzifələrin icrası üçün şəxsən məsuliyyət daşıyır və onların yerinə yetirilməsinə görə Nazirliyə hesabat verir.
5.10. Daimi nümayəndə:
5.10.1. beynəlxalq təşkilatda Azərbaycan Respublikasını təmsil edir;
5.10.2. Daimi Nümayəndəliyin fəaliyyətini təşkil edir və ona rəhbərlik edir;
5.10.3. Daimi Nümayəndəlikdə dövlət sirrinin və qanunla mühafizə olunan digər sirlərin qorunmasını təşkil edir;
5.10.4. Daimi Nümayəndəliyə ayrılan dövlət büdcəsi vəsaitinin səmərəli sərf olunmasına və maliyyə intizamına riayət edilməsinə nəzarəti həyata keçirir;
5.10.5. Daimi Nümayəndəliyin fəaliyyətinə dair icrası məcburi olan sərəncamlar və əmrlər verir;
5.10.6. Daimi Nümayəndəlikdə Azərbaycan Respublikasının hüquqi aktlarının və Nazirliyin qərar, sərəncam və əmrlərinin icrasını təşkil edir, həmçinin onların yerinə yetirilməsi üzərində nəzarəti həyata keçirir;
5.10.7. Daimi Nümayəndəliyin əməkdaşlarını xidmət üçün zəruri şəraitlə təmin edir, Daimi Nümayəndəliyin fəaliyyətinin təşkili ilə bağlı Nazirliyə təkliflər verir;
5.10.8. Nazirliyin razılığı ilə xidməti ezamiyyətlərə gedir;
5.10.9. Daimi Nümayəndəliyi təmsil edir;
5.10.10. Daimi Nümayəndəlik əməkdaşlarının xidməti fəaliyyətini normativ hüquqi aktlarda nəzərdə tutulan qaydada qiymətləndirir;
5.10.11. Daimi Nümayəndəliyin xidmətdə xüsusi fərqlənmiş əməkdaşlarının Azərbaycan Respublikasının dövlət təltifləri ilə təltif edilməsi üçün, habelə Daimi Nümayəndəliyin əməkdaşları barəsində həvəsləndirmə və intizam tənbehi tədbirləri görülməsi üçün Nazirliyə təqdimat verir;
5.10.12. Daimi Nümayəndəliyin diplomatik xidmət əməkdaşlarının rütbədə və vəzifədə yüksəldilməsi, Daimi Nümayəndəlik əməkdaşlarının fasiləsiz xidmət müddətinin “Diplomatik xidmət haqqında” Azərbaycan Respublikasının Qanununa uyğun olaraq uzadılması haqqında Nazirliyə təklif verir;
5.10.13. Daimi Nümayəndəlik əməkdaşlarının və dövlət qulluğunda olmayan işçilərinin məzuniyyətləri və ezamiyyətləri barədə əmrlər verir;
5.10.14. Daimi Nümayəndəliyin dövlət qulluğunda olmayan işçilərini Nazirliklə razılaşdıraraq işə qəbul edir və işdən azad edir;
5.10.15. Daimi Nümayəndəliyin, onun əməkdaşlarının və onlarla birlikdə yaşayan ailə üzvlərinin təhlükəsizliyinin təmin edilməsi üçün lazımi tədbirlər görür, yerləşmə dövlətində silahlı münaqişələr və fövqəladə hallar zamanı, həmçinin təhlükəsizliyə təhdid yarandığı digər hallarda Daimi Nümayəndəliyin fəaliyyətini, həmçinin Daimi Nümayəndəlik əməkdaşlarının və onlarla birlikdə yaşayan ailə üzvlərinin, eləcə də yerləşmə dövlətində olan və ya yaşayan digər Azərbaycan Respublikası vətəndaşlarının davranış qaydasını Azərbaycan Respublikasının yerləşmə dövlətindəki Səfirliyi ilə (olduğu halda) əlaqələndirməklə təşkil edir;
5.10.16. mühafizəsi zəruri hesab olunan Daimi Nümayəndəlikdə mühafizə xidmətinin aparılmasına nəzarət edir;
5.10.17. Azərbaycan Respublikasının, yerləşmə dövlətinin və beynəlxalq təşkilatın tərəfdar çıxdıqları beynəlxalq müqavilələrə və yerləşmə dövlətinin qanunvericiliyinə görə Daimi Nümayəndəliyə və Azərbaycan Respublikası dövlət orqanlarının (qurumlarının) beynəlxalq təşkilatdakı nümayəndəliklərinə, onların əməkdaşlarına (nümayəndələrinə) və onlarla birlikdə yaşayan ailə üzvlərinə, diplomatik poçta və onu daşıyan şəxslərə, həmçinin imtiyaz və immunitet hüququ olan Azərbaycan Respublikasının digər vətəndaşlarına verilən imtiyazların və immunitetlərin yerləşmə dövlətində təmin olunması məqsədilə lazımi tədbirlər görür;
5.10.18. Daimi Nümayəndəliyin əməkdaşlarına və Azərbaycan Respublikası dövlət orqanlarının (qurumlarının) beynəlxalq təşkilatdakı nümayəndələrinə beynəlxalq təşkilatda Azərbaycan Respublikasının milli maraqlarına uyğun davranış nümayiş etdirmələri, yerləşmə dövlətinin qanunvericiliyinə, həmçinin adət-ənənələrinə hörmətlə yanaşmaları və daxili işlərinə qarışmamaları barədə tövsiyələr verir;
5.10.19. beynəlxalq təşkilatda danışıqlar aparır, beynəlxalq konfranslarda, forumlarda, seminarlarda, iclaslarda, sərgilərdə, görüşlərdə və digər tədbirlərdə iştirak edir, habelə Azərbaycan Respublikası Prezidentinin verdiyi səlahiyyət əsasında beynəlxalq müqavilələr imzalayır;
5.10.20. beynəlxalq təşkilat və ya yerləşmə dövləti ilə münasibətlərdə qarşılılıq prinsipinin tətbiq edilməsinə dair Nazirliyə təkliflər verir;
5.10.21. Azərbaycan Respublikası dövlət orqanlarının (qurumlarının) beynəlxalq təşkilatda fəaliyyət göstərən və beynəlxalq təşkilatın orqanlarına ezam olunmuş nümayəndələrinin qərarları və hərəkətləri Azərbaycan Respublikasının milli maraqlarına cavab vermədiyi təqdirdə, həmin halların qarşısının alınması üçün Nazirliyə məlumat verir;
5.10.22. Azərbaycan Respublikasını eyni zamanda üçüncü dövlətdə, yaxud digər beynəlxalq təşkilatda və ya onun bölməsində təmsil etdikdə, bu təmsilçilikdən irəli gələn səlahiyyətləri yerinə yetirir;
5.10.23. Azərbaycan Respublikasının normativ hüquqi aktlarına uyğun olaraq digər səlahiyyətləri həyata keçirir.
5.11. Daimi nümayəndə vəzifəsi vakant olduqda və ya Daimi nümayəndə vəzifə funksiyalarını həyata keçirə bilmədikdə, habelə məzuniyyətdə və ya yerləşmə dövlətinin xaricində ezamiyyətdə olduğu dövrdə bu vəzifəni Daimi nümayəndənin müavini, Daimi nümayəndənin müavini olmadıqda isə Daimi Nümayəndəliyin digər diplomatik xidmət əməkdaşı müvəqqəti icra edir. Daimi nümayəndə vəzifəsini müvəqqəti icra edən diplomatik xidmət əməkdaşı müvəqqəti işlər vəkili adlandırılır. Daimi nümayəndə məzuniyyətdə və ya yerləşmə dövlətinin xaricində ezamiyyətdə olduğu dövrdə müvəqqəti işlər vəkili, Nazirliklə razılaşdırmaqla, Daimi nümayəndə, digər hallarda isə Nazirlik tərəfindən müəyyən edilir və bu barədə Daimi Nümayəndəlik tərəfindən beynəlxalq təşkilatın aidiyyəti orqanına məlumat verilir.
5.12. Daimi Nümayəndəliyin strukturunu və ştat cədvəlini Nazirlik təsdiq edir.
5.13. Daimi nümayəndə eyni zamanda üçüncü dövlətdə və ya bölməsi üçüncü dövlətdə yerləşən beynəlxalq təşkilatda Azərbaycan Respublikasını təmsil etdikdə, onun səlahiyyətlərinin həyata keçirilməsi üçün üçüncü dövlətin razılığı ilə həmin dövlətdə müvafiq bölmə yaradıla bilər.
5.14. Daimi Nümayəndəliyin maddi-texniki təminatını Nazirlik həyata keçirir.
5.15. Daimi Nümayəndəliyin əməkdaşlarının hüquq və vəzifələri “Diplomatik xidmət haqqında” Azərbaycan Respublikasının Qanunu və vəzifə təlimatları ilə müəyyən olunur.
5.16. Daimi Nümayəndəliyin fəaliyyəti Nazirlik tərəfindən təsdiq edilmiş illik iş planı əsasında təşkil olunur.
5.17. Daimi Nümayəndəliyə normativ hüquqi aktlarla müəyyən olunmuş qaydada Azərbaycan Respublikası dövlət orqanlarının (qurumlarının) nümayəndələri təyin və ya ezam oluna bilərlər. Daimi Nümayəndəliyə təyin və ya ezam olunmuş Azərbaycan Respublikası dövlət orqanlarının (qurumlarının) nümayəndələri öz qərarlarını və hərəkətlərini Daimi nümayəndə ilə razılaşdırmalıdırlar.
1.1. Azərbaycan Respublikasının Konsulluğu (bundan sonra – Konsulluq) qəbul edən dövlətdə müvafiq konsul dairəsində Azərbaycan Respublikasının adından konsul funksiyalarını həyata keçirən diplomatik xidmət orqanıdır. Konsulluq Azərbaycan Respublikası Xarici İşlər Nazirliyinin (bundan sonra – Nazirlik) rəhbərlik etdiyi diplomatik xidmət orqanlarının vahid sisteminə daxildir.
1.2. Konsulluq, dərəcəsinə görə, Azərbaycan Respublikasının baş konsulluqlarından, konsulluqlarından, vitse-konsulluqlarından və konsul agentliklərindən ibarətdir.
1.3. Konsulluq Azərbaycan Respublikası xarici işlər nazirinin təklifi ilə Azərbaycan Respublikasının Prezidenti tərəfindən təsis edilir.
1.4. Konsulluq Azərbaycan Respublikasının qəbul edən dövlətdəki Səfirliyi (olduğu halda) rəhbərinin ümumi siyasi rəhbərliyi altında fəaliyyət göstərir.
1.5. Konsulluq öz fəaliyyətində Azərbaycan Respublikasının Konstitusiyasını, Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələri, “Diplomatik xidmət haqqında” Azərbaycan Respublikasının Qanununu, Azərbaycan Respublikasının Konsul Nizamnaməsini, Azərbaycan Respublikasının digər qanunlarını, Azərbaycan Respublikasının Xarici İşlər Nazirliyi haqqında Əsasnaməni, bu Əsasnaməni, Azərbaycan Respublikası Prezidentinin digər fərmanlarını, həmçinin sərəncamlarını, Azərbaycan Respublikası Nazirlər Kabinetinin qərar və sərəncamlarını, digər normativ hüquqi aktları, Nazirliyin qərar, sərəncam və əmrlərini rəhbər tutur və qəbul edən dövlətin qanunvericiliyini nəzərə alır.
1.6. Konsulluq Azərbaycan Respublikası dövlət orqanlarının (qurumlarının) konsul dairəsində fəaliyyət göstərən və ya konsul dairəsinə ezam olunmuş nümayəndələrinin Konsulluğun fəaliyyət istiqamətlərinə aid məsələlər üzrə işini əlaqələndirir və onların həmin istiqamətdə fəaliyyətinə nəzarəti həyata keçirir. Həmin nümayəndələr Konsulluğun fəaliyyət istiqamətlərinə aid məsələlər üzrə fəaliyyətlərini Konsulluqla razılaşdırmalı və bu barədə Konsulluğa məlumat verməlidirlər.
1.7. Konsulluğun yeri (təsis olunacağı şəhər), dərəcəsi və konsul dairəsi qəbul edən dövlətlə razılıq əsasında müəyyənləşdirilir.
1.8. Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və Azərbaycan Respublikasının normativ hüquqi aktlarına uyğun olaraq, Konsulluğun binasında və Konsulluq rəhbərinin iqamətgahında Azərbaycan Respublikasının Dövlət Bayrağı qaldırılır və Azərbaycan Respublikası Dövlət Gerbinin qabarıq təsviri vurulur. Xidməti vəzifələrini yerinə yetirərkən Konsulluq rəhbərinin nəqliyyat vasitəsinin üzərində Azərbaycan Respublikasının Dövlət Bayrağı yerləşdirilir. Konsulluğun binasında və ya ərazisində Azərbaycan dilində və qəbul edən dövlətin dövlət dilində (dillərində) Konsulluğun adı yazılan lövhə vurulur. Konsulluq tərəfindən Azərbaycan Respublikasının dövlət rəmzlərindən qəbul edən dövlətin qanunvericiliyi və diplomatik protokol qaydaları nəzərə alınmaqla istifadə olunur.
1.9. Konsulluq, həmçinin Konsulluqda xidmət keçən diplomatik xidmət orqanı əməkdaşları (bundan sonra – əməkdaşlar) və onlarla birlikdə yaşayan ailə üzvləri qəbul edən dövlətdə Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və qəbul edən dövlətin qanunvericiliyinə uyğun olaraq, qəbul edən dövlətdə imtiyazlardan və immunitetlərdən istifadə edirlər. Konsulluğun əməkdaşları və onlarla birlikdə yaşayan ailə üzvləri qəbul edən dövlətin qanunvericiliyinə, həmçinin adət-ənənələrinə hörmətlə yanaşmalı və daxili işlərinə qarışmamalıdırlar.
1.10. Konsulluğun, nümunələri Nazirlik tərəfindən təsdiq olunmuş və üzərində Azərbaycan Respublikası Dövlət Gerbinin təsviri və Konsulluğun adı həkk olunmuş möhürləri, həmçinin kargüzarlıq xidmətinin gerbsiz möhürü, müvafiq ştampları, blankları və bank hesabları vardır.
1.11. Konsulluğun Azərbaycan Respublikasının mülkiyyəti olan torpaq sahələri, binaları, qurğuları və digər əmlakı Azərbaycan Respublikasının normativ hüquqi aktları ilə müəyyən olunmuş qaydada Konsulluğa təhkim edilir. Konsulluq ona təhkim olunmuş əmlak üzərində sahiblik, istifadə və sərəncam hüququnu Azərbaycan Respublikasının normativ hüquqi aktları ilə müəyyən edilmiş qaydada həyata keçirir.
2.1. Konsulluğun fəaliyyət istiqamətləri aşağıdakılardır:
2.1.1. konsul dairəsində Azərbaycan Respublikasının konsul əlaqələrini həyata keçirmək;
2.1.2. konsul dairəsində Azərbaycan Respublikasının milli maraqlarını qorumaq və təmin etmək;
2.1.3. konsul dairəsində Azərbaycan Respublikası vətəndaşlarının və hüquqi şəxslərinin hüquqlarını və qanuni mənafelərini müdafiə etmək;
2.1.4. qəbul edən dövlətlə Azərbaycan Respublikasının dostluq münasibətlərinin inkişafına, iqtisadi, elmi-texniki, mədəni, ticarət, idman, turizm və digər sahələrdə əlaqələrinin genişlənməsinə yardım göstərmək;
2.1.5. konsul dairəsində yaşayan soydaşlarla bağlı dövlət siyasətinin həyata keçirilməsinə və əlaqələrin inkişafına dəstək vermək;
2.1.6. qəbul edən dövlətə Azərbaycan Respublikası rəsmi nümayəndə heyətlərinin səfərlərinin hazırlanmasına və həyata keçirilməsinə kömək göstərmək;
2.1.7. konsul dairəsində Azərbaycan Respublikasının adından konsul funksiyalarını həyata keçirmək;
2.1.8. Azərbaycan Respublikası Prezidentinin aktları ilə müəyyən edilmiş digər istiqamətlərdə fəaliyyət göstərmək.
3.1. Bu Əsasnamə ilə müəyyən edilmiş fəaliyyət istiqamətlərinə uyğun olaraq, Konsulluğun vəzifələri aşağıdakılardır:
3.1.1. Azərbaycan Respublikası ilə qəbul edən dövlət arasında dostluq münasibətlərinin inkişafına yardım etmək;
3.1.2. konsul dairəsində Azərbaycan Respublikasının xarici və daxili siyasəti, iqtisadi, sosial, elmi-texniki, mədəni, ticarət, idman, turizm və digər sahələrdə nailiyyətləri haqqında rəsmi məlumatın yayılmasını təmin etmək;
3.1.3. konsul dairəsi çərçivəsində qəbul edən dövlətin iqtisadi, sosial, elmi-texniki, mədəni, ticarət, idman, turizm və digər məsələləri barədə Azərbaycan Respublikasının Prezidentini, Azərbaycan Respublikasının Nazirlər Kabinetini və Nazirliyi məlumatlandırmaq, həmin sahələr üzrə əməkdaşlığın yaradılmasına və inkişaf etdirilməsinə kömək göstərmək;
3.1.4. Azərbaycan Respublikasının milli maraqları baxımından Azərbaycan Respublikasının dövlət orqanlarına (qurumlarına), qeyri-hökumət təşkilatlarına (ictimai birliklərə və fondlara) və işgüzar dairələrinə qəbul edən dövlətin konsul dairəsində olan dövlət orqanları (qurumları), qeyri-hökumət təşkilatları (ictimai birliklər və fondlar) və işgüzar dairələri ilə əlaqələrin qurulmasına və inkişafına kömək göstərmək;
3.1.5. Azərbaycan Respublikası Prezidentinin, Azərbaycan Respublikası Nazirlər Kabinetinin və Nazirliyin tapşırıqlarını yerinə yetirmək, həmçinin Azərbaycan Respublikasının digər dövlət orqanlarının (qurumlarının) və yerli özünüidarəetmə orqanlarının Nazirlik vasitəsilə daxil olmuş müraciətlərinə baxmaq;
3.1.6. Azərbaycan Respublikasının qəbul edən dövlətlə bağlanılması nəzərdə tutulan beynəlxalq müqavilələrinin layihələrinin hazırlanmasında iştirak etmək;
3.1.7. Azərbaycan Respublikasının qəbul edən dövlətlə xarici iqtisadi əlaqələrinin qurulmasına və inkişaf etdirilməsinə, Azərbaycan Respublikasına xarici sərmayələrin cəlb olunmasına dəstək vermək, həmçinin Azərbaycan mal və xidmətlərinin beynəlxalq bazarlara çıxarılması sahəsində Azərbaycan Respublikasının aidiyyəti dövlət orqanlarına (qurumlarına) kömək göstərmək;
3.1.8. konsul dairəsində Azərbaycan Respublikasının iştirakı ilə keçirilən beynəlxalq tədbirlərdə aidiyyəti dövlət orqanları (qurumları) ilə birlikdə Azərbaycan mədəniyyətinin təqdim və təşviqini təmin edən tədbirlər görmək, Azərbaycan Respublikasının mədəniyyət tədbirlərinin keçirilməsinə dəstək göstərmək;
3.1.9. konsul dairəsinə ezam olunmuş Azərbaycan Respublikası dövlət orqanlarının (qurumlarının) nümayəndələrinə xidməti vəzifələrini yerinə yetirməkdə yardım göstərmək;
3.1.10. konsul dairəsində yaşayan soydaşlarla bağlı dövlət siyasətinin həyata keçirilməsinə və əlaqələrin qurulmasına, eləcə də onlar arasında əməkdaşlığın inkişafına, həmrəyliyin gücləndirilməsinə və milli mənafeyə xidmət edən tədbirlərin təşkilinə, mədəni-maarif tədbirlərinin keçirilməsinə yardım etmək;
3.1.11. Azərbaycan Respublikasının xarici siyasəti çərçivəsində beynəlxalq yardım fəaliyyətinə dair təkliflər vermək, konsul dairəsində beynəlxalq yardımın təşkilində, həyata keçirilməsində və əlaqələndirilməsində iştirak etmək;
3.1.12. qəbul edən dövlətin razılığı ilə konsul dairəsində olan Azərbaycan hərbi və mülki məzarlarının, məzarüstü abidələrinin, abidə nişanlarının və memorial (xatirə) tikililərinin qeydiyyatı, mühafizəsi və abadlığı məqsədilə tədbirlər görmək;
3.1.13. konsul dairəsində Azərbaycan Respublikasının milli maraqlarını, onun vətəndaşlarının və hüquqi şəxslərinin hüquqlarını və qanuni mənafelərini konsul funksiyalarına aid üsul və vasitələrlə müdafiə etmək;
3.1.14. konsul dairəsində Azərbaycan Respublikasının adından konsul funksiyalarının həyata keçirilməsindən irəli gələn hərəkətləri yerinə yetirmək;
3.1.15. konsul dairəsində olan və ya yaşayan Azərbaycan Respublikası vətəndaşlarına, qəbul edən dövlətin qanunvericiliyinə riayət etməklə, mülki, ailə və cinayət işlərinə dair hüquqi yardım göstərmək;
3.1.16. konsul dairəsində müvəqqəti və ya daimi yaşayan Azərbaycan Respublikası vətəndaşlarının uçotunu aparmaq;
3.1.17. konsul dairəsində müvəqqəti və ya daimi yaşayan Azərbaycan Respublikası vətəndaşlarının hərbi uçotunu aparmaq, vətəndaşların müddətli həqiqi hərbi xidmətə çağırılmaq üçün Azərbaycan Respublikasına gəlmələrini təmin etmək;
3.1.18. konsul dairəsində haqqı ödənilən əmək fəaliyyəti ilə məşğul olan Azərbaycan Respublikası vətəndaşlarını qeydiyyatdan keçirmək;
3.1.19. Azərbaycan Respublikası məhkəmələrinin və istintaq orqanlarının konsul dairəsində olan və ya yaşayan Azərbaycan Respublikası vətəndaşlarına dair tapşırıqlarını, əgər həmin aktların icrası qəbul edən dövlətin qanunvericiliyinə zidd deyilsə, Azərbaycan Respublikasının normativ hüquqi aktlarına əməl etməklə yerinə yetirmək;
3.1.20. konsul dairəsində azadlığı məhdudlaşdırılan və ya azadlıqdan məhrum edilən Azərbaycan Respublikası vətəndaşlarına münasibətdə Azərbaycan Respublikası ilə qəbul edən dövlətin tərəfdar çıxdıqları beynəlxalq müqavilələrə və qəbul edən dövlətin qanunlarına əməl olunub-olunmamasına nəzarət etmək;
3.1.21. konsul dairəsində itkin düşmüş Azərbaycan Respublikası vətəndaşlarının axtarışı üzrə tədbirlər görmək;
3.1.22. konsul dairəsində olan və ya yaşayan Azərbaycan Respublikası vətəndaşlarına seçki hüquqlarını həyata keçirməkdə kömək göstərmək;
3.1.23. konsul dairəsində qanunla nəzərdə tutulmuş notariat əməliyyatlarını aparmaq;
3.1.24. konsul dairəsində konsul leqallaşdırmasını həyata keçirmək;
3.1.25. konsul dairəsində olan və ya yaşayan Azərbaycan Respublikası vətəndaşları barəsində vətəndaşlıq vəziyyəti aktlarının dövlət qeydiyyatını (o cümlədən doğumun, atalığın müəyyən edilməsinin və ölümün elektron formada) aparmaq, vətəndaşlıq vəziyyəti aktı qeydlərində dəyişiklik etmək və onları ləğv etmək, itmiş akt qeydlərini bərpa etmək, akt kitablarını saxlamaq və vətəndaşlıq vəziyyəti aktlarının dövlət qeydiyyatı haqqında şəhadətnamələr və ya arayışlar vermək;
3.1.26. konsul dairəsində müvəqqəti və ya daimi yaşayan Azərbaycan Respublikası vətəndaşları barəsində qəyyumluqla və himayəçiliklə bağlı tədbirləri yerinə yetirmək;
3.1.27. Azərbaycan Respublikasında yaşayan Azərbaycan Respublikası vətəndaşlarının xeyrinə konsul dairəsində vərəsəlik açıldıqda, bu vərəsəliyə dair və ehtimal olunan vərəsələr haqqında məlumatı Nazirliyə göndərmək;
3.1.28. konsul dairəsində səlahiyyətlərinə aid edilən məsələlər üzrə arayışlar vermək;
3.1.29. Azərbaycan Respublikasının vətəndaşları öz maraqlarının müdafiəsini digər şəxsə həvalə etmədikdə və ya öz maraqlarını müdafiə etmək iqtidarında olmadıqda, konsul dairəsində olan məhkəmə və digər dövlət orqanlarında (qurumlarında), qəbul edən dövlətin qanunvericiliyinə riayət etməklə, onları təmsil etmək və ya müvafiq təmsilçiliyi təşkil etmək;
3.1.30. konsul dairəsində müvəqqəti və ya daimi yaşayan şəxslərin Azərbaycan Respublikasının vətəndaşlığı məsələlərinə baxılmada iştirak etmək;
3.1.31. konsul dairəsində müvəqqəti və ya daimi yaşayan Azərbaycan Respublikası vətəndaşlarına pasport vermək;
3.1.32. konsul dairəsində olan və ya yaşayan Azərbaycan Respublikası vətəndaşlarının və Azərbaycan Respublikasında daimi yaşayan vətəndaşlığı olmayan şəxslərin şəxsiyyətini müəyyənləşdirmək və onlara Azərbaycan Respublikasına qayıdış şəhadətnaməsi vermək;
3.1.33. konsul dairəsində yaşayan əcnəbilərə və vətəndaşlığı olmayan şəxslərə, daimi yaşayan Azərbaycan Respublikası vətəndaşlarına, fəaliyyət göstərən hüquqi şəxslərə elektron imza sertifikatının verilməsini təmin etmək;
3.1.34. konsul dairəsində yaşayan və Azərbaycan Respublikasına gələn əcnəbilərə və vətəndaşlığı olmayan şəxslərə viza rəsmiləşdirmək, elektron viza əldə etmək qaydası haqqında məlumat vermək, həmçinin beynəlxalq tədbirlərdə sadələşdirilmiş viza rejiminin tətbiqi haqqında məlumatlandırmanı təmin etmək;
3.1.35. Azərbaycan Respublikasının dövlət orqanları (qurumları) tərəfindən konsul dairəsində Azərbaycan Respublikası vətəndaşlarına dövlət xidmətlərinin səyyar formada göstərilməsinə dəstək vermək;
3.1.36. konsul dairəsində silahlı münaqişələr və fövqəladə hallar zamanı, həmçinin təhlükəsizliyə təhdid yarandığı digər hallarda, Konsulluq əməkdaşlarının və onlarla birlikdə yaşayan ailə üzvlərinin, eləcə də qəbul edən dövlətdə olan və ya yaşayan digər Azərbaycan Respublikası vətəndaşlarının təhlükəsizliyini aidiyyəti dövlət orqanları (qurumları) ilə birlikdə təmin etmək, həmçinin onların təxliyəsini Azərbaycan Respublikasının qəbul edən dövlətdəki Səfirliyi ilə (olduğu halda) əlaqələndirməklə təşkil etmək;
3.1.37. konsul dairəsində olan Azərbaycan Respublikasının mülki dəniz və hava gəmiləri, hərbi gəmiləri və köməkçi hərbi gəmiləri, hərbi təyyarələri və hərbi helikopterləri, həmçinin onların heyəti ilə bağlı normativ hüquqi aktlarla müəyyən edilmiş funksiyaları həyata keçirmək, belə gəmilərə və onların heyətinə yardım göstərmək;
3.1.38. konsul dairəsində olan Azərbaycan Respublikasının beynəlxalq yük və sərnişin daşımalarını həyata keçirən avtomobil və dəmir yolu nəqliyyatı vasitələri, həmçinin onların heyəti ilə bağlı normativ hüquqi aktlarla müəyyən edilmiş funksiyaları həyata keçirmək, belə nəqliyyat vasitələrinə və onların heyətinə yardım göstərmək;
3.1.39. konsul dairəsində sanitariya, fitosanitariya və baytarlıq mühafizəsi sahələrində normativ hüquqi aktlarla müəyyən edilmiş funksiyaları həyata keçirmək;
3.1.40. konsul dairəsində apardığı konsul əməliyyatlarına görə dövlət rüsumu tutmaq və onun normativ hüquqi aktlarla müəyyən edilmiş qaydada və müddətdə dövlət büdcəsinə köçürülməsini təmin etmək;
3.1.41. Nazirliyin tapşırığı və qəbul edən dövlətin razılığı əsasında, qəbul edən dövlətdə təmsil olunmayan üçüncü dövlətin müraciəti ilə həmin üçüncü dövlətin adından konsul funksiyalarını yerinə yetirmək;
3.1.42. öz fəaliyyəti haqqında ictimaiyyətin məlumatlandırılmasını, sosial media hesablarının yaradılmasını, eləcə də malik olduğu və siyahısı qanunla müəyyən edilmiş açıqlanmalı olan ictimai informasiyanın rəsmi internet informasiya ehtiyatında və sosial media hesablarında yerləşdirilməsini və bu informasiyanın daim yenilənməsini təmin etmək;
3.1.43. fəaliyyət istiqamətlərinə aid məsələlər üzrə müraciətlərə baxmaq, diplomatik və rəsmi yazışmalar aparmaq, həmçinin onların qeydiyyatını, saxlanılmasını, arxivləşdirilməsini və mühafizəsini təmin etmək;
3.1.44. Azərbaycan Respublikası Prezidentinin aktları ilə müəyyən edilmiş digər vəzifələri həyata keçirmək.
4.1. Bu Əsasnamə ilə müəyyən olunmuş vəzifələrini yerinə yetirmək üçün Konsulluğun aşağıdakı hüquqları vardır:
4.1.1. Azərbaycan Respublikasından və konsul dairəsindən rəsmi nümayəndə heyətlərinin səfərlərinə dair Nazirliyə təkliflər vermək;
4.1.2. konsul dairəsində fəaliyyət göstərən üçüncü dövlətlərin konsulluqları, vəzifələrinə aid məsələlər üzrə qəbul edən dövlətin dövlət orqanları (qurumları), yerli özünüidarəetmə orqanları, qeyri-hökumət təşkilatları (ictimai birlikləri və fondları), media subyektləri və jurnalistləri, elmi, mədəni və işgüzar dairələri ilə xidməti əlaqələr qurmaq və əməkdaşlıq etmək, eləcə də onlara sorğular göndərmək, onlardan məlumat və sənədlər almaq;
4.1.3. fəaliyyət istiqamətlərinə aid məsələlər üzrə Nazirlik vasitəsilə Azərbaycan Respublikasının dövlət orqanlarına (qurumlarına), yerli özünüidarəetmə orqanlarına, qeyri-hökumət təşkilatlarına (ictimai birliklərə və fondlara), hüquqi və fiziki şəxslərə sorğular göndərmək, onlardan məlumat və sənədlər almaq;
4.1.4. xarici dövlətlərlə əməkdaşlıq sahəsində yaradılan birgə komissiyaların və işçi qrupların işində iştirak etmək, konfranslar, forumlar, seminarlar, iclaslar, sərgilər, görüşlər və digər tədbirlər təşkil etmək, həmçinin bu tədbirlərin təşkilinə dəstək vermək;
4.1.5. konsul dairəsində konsul funksiyalarından irəli gələn hüquqları həyata keçirmək, aparılan konsul əməliyyatlarına görə faktiki xərcləri tutmaq, eləcə də konsul əməliyyatlarının icrası üçün kənar xidmət təchizatçıları ilə əməkdaşlıq etmək;
4.1.6. konsul funksiyalarının icrası ilə bağlı konsul dairəsinin inzibati ərazi vahidlərində şəxslərin qəbulunu həyata keçirmək;
4.1.7. qəbul edən dövlətdə Azərbaycan Respublikası fəxri konsullarının təyin edilməsi barədə Nazirliyə təkliflər vermək;
4.1.8. fəaliyyət istiqamətlərinə aid məsələlərə dair rəy vermək, analitik materiallar hazırlamaq, təhlillər və ümumiləşdirmələr aparmaq;
4.1.9. vəzifələrindən irəli gələn məsələlər üzrə komissiyalar və işçi qruplar yaratmaq;
4.1.10. Azərbaycan Respublikası Prezidentinin aktları ilə müəyyən edilmiş digər hüquqları həyata keçirmək.
5.1. Baş konsulluğa, konsulluğa, vitse-konsulluğa və konsul agentliyinə müvafiq olaraq Baş konsul, konsul, vitse-konsul və konsul agenti rəhbərlik edir.
5.2. Baş konsul Azərbaycan Respublikası xarici işlər nazirinin təklifi ilə Azərbaycan Respublikasının Prezidenti tərəfindən, konsul, vitse-konsul və konsul agenti Azərbaycan Respublikasının xarici işlər naziri tərəfindən təyin edilir və geri çağırılır.
5.3. Ali təhsili və peşə hazırlığı olan, Azərbaycan Respublikasının dövlət dilini sərbəst bilən Azərbaycan Respublikası vətəndaşı Konsulluğun rəhbəri təyin edilə bilər.
5.4. Konsulluq rəhbərinin təyin edilməsi və geri çağırılması Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrlə və Azərbaycan Respublikasının normativ hüquqi aktları ilə tənzimlənir.
5.5. Konsulluğun rəhbəri təyin edilməsi nəzərdə tutulan şəxs barəsində qəbul edən dövlətin əvvəlcədən razılıq sənədi (ekzekvatura) alınır.
5.6. Konsulluğun rəhbərinə Nazirlik tərəfindən onun soyadını, adını, atasının adını, vətəndaşlığını, vəzifəsini, kateqoriyasını, dərəcəsini, konsul dairəsini və Konsulluğun yerini (təsis olunduğu şəhəri) təsdiq edən vəkalətnamə (konsul patenti) verilir.
5.7. Baş konsulun qəbul edən dövlətdə fasiləsiz xidmət müddəti 4 (dörd) ildir. Azərbaycan Respublikası Prezidentinin qərarına uyğun olaraq Baş konsul fasiləsiz xidmət müddətindən artıq fəaliyyətini davam etdirə və ya həmin müddətdən əvvəl geri çağırıla bilər.
5.8. Konsulun, vitse-konsulun və konsul agentinin fasiləsiz xidmət müddəti 3 (üç) ildir. Bu müddət Azərbaycan Respublikasının xarici işlər naziri tərəfindən onların razılığı ilə 1 (bir) ilədək uzadıla və ya onlar “Diplomatik xidmət haqqında” Azərbaycan Respublikasının Qanunu ilə nəzərdə tutulan hallarda xidmət müddətinin başa çatmasından əvvəl geri çağırıla bilərlər.
5.9. Qəbul edən dövlətin konsul dairəsinə aid olmayan ərazisində, həmçinin Konsulluğun olmadığı xarici dövlətdə konsul funksiyalarını həmin dövlətdə akkreditə olunan Azərbaycan Respublikasının Səfirliyi həyata keçirir.
5.10. Konsulluğun rəhbəri konsulluğa həvalə edilmiş vəzifələrin icrası üçün şəxsən məsuliyyət daşıyır və onların yerinə yetirilməsinə görə Nazirliyə hesabat verir.
5.11. Konsulluğun rəhbəri:
5.11.1. Konsulluğun fəaliyyətini təşkil edir və ona rəhbərlik edir;
5.11.2. Konsulluqda dövlət sirrinin və qanunla mühafizə olunan digər sirlərin qorunmasını təşkil edir;
5.11.3. Konsulluğa ayrılan dövlət büdcəsi vəsaitinin səmərəli sərf olunmasına və maliyyə intizamına riayət edilməsinə nəzarəti həyata keçirir;
5.11.4. Konsulluğun fəaliyyətinə dair icrası məcburi olan sərəncamlar və əmrlər verir;
5.11.5. Konsulluqda Azərbaycan Respublikasının hüquqi aktlarının və Nazirliyin qərar, sərəncam və əmrlərinin icrasını təşkil edir, həmçinin onların yerinə yetirilməsinə nəzarəti həyata keçirir;
5.11.6. Konsulluğun əməkdaşlarını xidmət üçün zəruri şəraitlə təmin edir, Konsulluğun fəaliyyətinin təşkili ilə bağlı Nazirliyə təkliflər verir;
5.11.7. Nazirliyin razılığı ilə xidməti ezamiyyətlərə gedir;
5.11.8. Konsulluğu təmsil edir;
5.11.9. Konsulluq əməkdaşlarının xidməti fəaliyyətini normativ hüquqi aktlarda nəzərdə tutulan qaydada qiymətləndirir;
5.11.10. Konsulluğun xidmətdə xüsusi fərqlənmiş əməkdaşlarına Azərbaycan Respublikası fəxri adlarının verilməsi və ya onların dövlət mükafatları ilə təltif edilməsi üçün, habelə Konsulluğun əməkdaşları barəsində həvəsləndirmə və intizam tənbehi tədbirləri görülməsi üçün Nazirliyə təqdimat verir;
5.11.11. Konsulluğun diplomatik xidmət əməkdaşlarının rütbədə və vəzifədə yüksəldilməsi, Konsulluq əməkdaşlarının fasiləsiz xidmət müddətinin “Diplomatik xidmət haqqında” Azərbaycan Respublikasının Qanununa uyğun olaraq uzadılması haqqında Nazirliyə təklif verir;
5.11.12. Konsulluğun əməkdaşlarının və dövlət qulluğunda olmayan işçilərinin məzuniyyətləri və ezamiyyətləri barədə əmrlər verir;
5.11.13. Konsulluğun dövlət qulluğunda olmayan işçilərini Nazirliklə razılaşdıraraq işə qəbul edir və işdən azad edir;
5.11.14. Konsulluğun, onun əməkdaşlarının və onlarla birlikdə yaşayan ailə üzvlərinin təhlükəsizliyinin təmin edilməsi üçün lazımi tədbirlər görür, konsul dairəsində silahlı münaqişələr və fövqəladə hallar zamanı, həmçinin təhlükəsizliyə təhdid yarandığı digər hallarda Konsulluğun fəaliyyətini, həmçinin Konsulluq əməkdaşlarının və onlarla birlikdə yaşayan ailə üzvlərinin, eləcə də qəbul edən dövlətdə olan və ya yaşayan digər Azərbaycan Respublikası vətəndaşlarının davranış qaydasını Azərbaycan Respublikasının qəbul edən dövlətdəki Səfirliyi ilə (olduğu halda) əlaqələndirməklə təşkil edir;
5.11.15. mühafizəsi zəruri hesab olunan Konsulluqda mühafizə xidmətinin aparılmasına nəzarət edir;
5.11.16. Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrlə və qəbul edən dövlətin qanunvericiliyi ilə Konsulluğa, onun əməkdaşlarına və onlarla birlikdə yaşayan ailə üzvlərinə, konsul valizinə və onu daşıyan şəxslərə, həmçinin imtiyaz və immunitet hüququ olan Azərbaycan Respublikasının digər vətəndaşlarına verilən imtiyazların və immunitetlərin konsul dairəsində təmin olunması məqsədilə tədbirlər görür;
5.11.17. Konsulluğun əməkdaşlarına və Azərbaycan Respublikası dövlət orqanlarının (qurumlarının) konsul dairəsindəki nümayəndələrinə qəbul edən dövlətdə Azərbaycan Respublikasının milli maraqlarına uyğun davranış nümayiş etdirmələri, qəbul edən dövlətin qanunvericiliyinə, həmçinin adət-ənənələrinə hörmətlə yanaşmaları və daxili işlərinə qarışmamaları barədə tövsiyələr verir;
5.11.18. qəbul edən dövlətdə danışıqlar aparır, beynəlxalq konfranslarda, forumlarda, seminarlarda, iclaslarda, sərgilərdə, görüşlərdə və digər tədbirlərdə iştirak edir;
5.11.19. qəbul edən dövlətlə münasibətlərdə Konsulluğun fəaliyyət istiqamətlərinə aid məsələlər üzrə qarşılılıq prinsipinin tətbiq edilməsinə dair Nazirliyə təkliflər verir;
5.11.20. Azərbaycan Respublikası dövlət orqanlarının (qurumlarının) konsul dairəsində fəaliyyət göstərən və konsul dairəsinə ezam olunmuş nümayəndələrinin qərarları və hərəkətləri Azərbaycan Respublikasının milli maraqlarına cavab vermədiyi təqdirdə, həmin halların qarşısının alınması üçün Nazirliyə məlumat verir;
5.11.21. Azərbaycan Respublikasını eyni zamanda beynəlxalq təşkilatda və ya onun bölməsində təmsil etdikdə, bu təmsilçilikdən irəli gələn səlahiyyətləri yerinə yetirir;
5.11.22. Azərbaycan Respublikasının normativ hüquqi aktlarına uyğun olaraq digər səlahiyyətləri həyata keçirir.
5.12. Konsulluq Nazirliyin tapşırığı və qəbul edən dövlətin razılığı ilə üçüncü dövlətin konsul funksiyalarını yerinə yetirə bilər.
5.13. Konsulluğun rəhbəri vəzifəsi vakant olduqda və ya Konsulluğun rəhbəri vəzifə funksiyalarını həyata keçirə bilmədikdə, habelə məzuniyyətdə və ya qəbul edən dövlətin xaricində ezamiyyətdə olduğu dövrdə bu vəzifəni Konsulluğun digər diplomatik xidmət əməkdaşı müvəqqəti icra edir. Konsulluğun rəhbəri məzuniyyətdə və ya qəbul edən dövlətin xaricində ezamiyyətdə olduğu dövrdə Konsulluğun rəhbəri vəzifəsini müvəqqəti icra edən şəxs Nazirliklə razılaşdırmaqla Konsulluğun rəhbəri, digər hallarda isə Nazirlik tərəfindən müəyyən edilir. Konsulluğun rəhbəri vəzifəsini müvəqqəti icra edən şəxs barəsində Azərbaycan Respublikasının qəbul edən dövlətdəki Səfirliyi, Səfirlik olmadığı halda, Konsulluq tərəfindən qəbul edən dövlətin aidiyyəti dövlət orqanına məlumat verilir.
5.14. Konsulluğun vəzifələrinin icrasının yerləşdiyi şəhərdən kənarda konsul dairəsinin digər inzibati ərazi vahidində icra etmək zərurəti yarandıqda, həmin inzibati ərazi vahidində, qəbul edən dövlətlə razılaşdırmaqla, Konsulluğun bölməsi yaradıla bilər.
5.15. Konsulluq əməkdaşlarının hüquq və vəzifələri “Diplomatik xidmət haqqında” Azərbaycan Respublikasının Qanunu və vəzifə təlimatları ilə müəyyən olunur.
5.16. Konsulluğun strukturunu və ştat cədvəlini Nazirlik təsdiq edir.
5.17. Konsulluğun maddi-texniki təminatını Nazirlik həyata keçirir.
5.18. Konsulluğun fəaliyyəti Nazirlik tərəfindən təsdiq edilmiş illik iş planı əsasında təşkil olunur.
5.19. Konsulluğa normativ hüquqi aktlarla müəyyən olunmuş qaydada Azərbaycan Respublikası dövlət orqanlarının (qurumlarının) nümayəndələri təyin və ya ezam oluna bilərlər. Konsulluğa təyin və ya ezam olunmuş Azərbaycan Respublikası dövlət orqanlarının (qurumlarının) nümayəndələri öz qərarlarını və hərəkətlərini Konsulluğun rəhbəri ilə razılaşdırmalıdırlar.
1.1. Azərbaycan Respublikasının fəxri konsulu (bundan sonra – fəxri konsul) Azərbaycan Respublikası ilə diplomatik əlaqələri olan dövlətin müvafiq ərazisində (bundan sonra – dairə) bu Əsasnamə ilə müəyyən edilmiş funksiyaları həyata keçirir. Fəxri konsul diplomatik xidmətdə və dövlət qulluğunda olmur.
1.2. Fəxri konsul öz dairəsində Azərbaycan Respublikası ilə qəbul edən dövlət arasında müvafiq sahələr (iqtisadi, ticarət, nəqliyyat, kənd təsərrüfatı, səhiyyə, elm, təhsil, mədəniyyət, diaspor, turizm, idman və sair) üzrə əlaqələrin yaradılmasına və inkişaf etdirilməsinə yardım edir, Azərbaycan Respublikası vətəndaşlarının və hüquqi şəxslərinin hüquqlarını və qanuni mənafelərini müdafiə edir, eləcə də bu məqsədlə həyata keçirilən tədbirlərə dəstək verir.
1.3. Fəxri konsul Azərbaycan Respublikasının Xarici İşlər Nazirliyinə (bundan sonra - Nazirlik) tabe olub, qəbul edən dövlətdə Azərbaycan Respublikası Səfirliyinin, Təmsilçilik Ofisinin və ya Konsulluğunun (bundan sonra – diplomatik nümayəndəlik və ya konsulluq) (olduğu halda), yaxud bilavasitə Nazirliyin rəhbərliyi altında fəaliyyət göstərir.
1.4. Fəxri konsulun dairəsi və dəftərxanasının yerləşəcəyi şəhər Nazirliklə qəbul edən dövlətin səlahiyyətli dövlət orqanı arasında razılaşdırılmaqla müəyyən edilir. Fəxri konsulun öz funksiyalarını icra etdiyi dəftərxanasının hüquqi ünvanı barədə məlumat diplomatik nümayəndəlik və ya konsulluq, yaxud Nazirlik tərəfindən qəbul edən dövlətin səlahiyyətli dövlət orqanına bildirilir. Fəxri konsulun dəftərxanası qəbul edən dövlətdə diplomatik nümayəndəliklə və ya konsulluqla eyni inzibati ərazi vahidində yerləşə bilməz.
1.5. Fəxri konsul öz funksiyalarını yerinə yetirərkən Azərbaycan Respublikasının Konstitusiyasını, Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələri, “Diplomatik xidmət haqqında” Azərbaycan Respublikasının Qanununu, Azərbaycan Respublikasının Konsul Nizamnaməsini, Azərbaycan Respublikasının digər qanunlarını, Azərbaycan Respublikasının Xarici İşlər Nazirliyi haqqında Əsasnaməni, bu Əsasnaməni, Azərbaycan Respublikası Prezidentinin digər fərmanlarını, həmçinin sərəncamlarını, Azərbaycan Respublikası Nazirlər Kabinetinin qərar və sərəncamlarını, digər normativ hüquqi aktları, Nazirliyin qərar, sərəncam və əmrlərini rəhbər tutur və qəbul edən dövlətin qanunvericiliyini nəzərə alır.
1.6. Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və Azərbaycan Respublikasının normativ hüquqi aktlarına uyğun olaraq, fəxri konsulun dəftərxanasının yerləşdiyi binada Azərbaycan Respublikasının Dövlət Bayrağını qaldırmaq və Azərbaycan Respublikasının Dövlət Gerbinin qabarıq təsvirini vurmaq hüququ vardır. Fəxri konsul öz funksiyalarını yerinə yetirərkən nəqliyyat vasitəsində Azərbaycan Respublikasının Dövlət Bayrağını yerləşdirə bilər. Fəxri konsulun dəftərxanasının yerləşdiyi binaya Azərbaycan dilində və qəbul edən dövlətin dilində (dillərində) “Azərbaycan Respublikasının (qəbul edən dövlətin müvafiq şəhərində) fəxri konsulunun dəftərxanası” yazısı olan lövhə vurula bilər. Fəxri konsul tərəfindən Azərbaycan Respublikasının dövlət rəmzlərindən Azərbaycan Respublikasının və qəbul edən dövlətin qanunları və protokol qaydaları nəzərə alınmaqla istifadə olunur.
1.7. Fəxri konsulun, nümunəsi Nazirlik tərəfindən təsdiq olunmuş və üzərində Azərbaycan Respublikası Dövlət Gerbinin təsviri və “Azərbaycan Respublikasının (qəbul edən dövlətin müvafiq şəhərində) fəxri konsulu” yazısı həkk olunmuş möhürü vardır.
1.8. Fəxri konsul eyni zamanda Azərbaycan Respublikasının və qəbul edən dövlətin qanunları ilə qadağan olunmayan kommersiya və öz peşə fəaliyyəti ilə məşğul ola və bu fəaliyyətdən gəlir əldə edə bilər.
2.1. Fəxri konsulun öz dairəsində funksiyaları aşağıdakılardır:
2.1.1. iqtisadi və ticarət sahəsində:
2.1.1.1. Azərbaycan Respublikasının sahibkarlıq subyektlərinə öz dairəsinin, öz dairəsinin sahibkarlıq subyektlərinə isə Azərbaycan Respublikasının iqtisadi, ticarət və biznes mühiti, enerji siyasəti və potensialı, həmçinin bu sahələr üzrə normativ hüquqi aktları barədə məlumat vermək;
2.1.1.2. Azərbaycan Respublikasının nəqliyyat-tranzit potensialı və onun səmərəliliyi, həmçinin mövcud azad iqtisadi zona və sənaye parkları, eləcə də orada yaradılmış şərait və imtiyazlar haqqında məlumat yaymaq;
2.1.1.3. Azərbaycan Respublikasında istehsal və ixrac edilən məhsullara öz dairəsində mövcud olan ehtiyac və bazar şərtləri haqqında məlumatı diplomatik nümayəndəlik və ya konsulluq, yaxud Nazirlik vasitəsilə Azərbaycan Respublikasının aidiyyəti dövlət orqanlarına (qurumlarına) çatdırmaq, eləcə də öz dairəsinin sahibkarlıq subyektlərini Azərbaycan Respublikasında sərmayə qoymağa təşviq etmək;
2.1.1.4. Azərbaycan Respublikasının turizm potensialını təbliğ etmək, turizmin mövcud istiqamətləri haqqında məlumat yaymaq və xarici turistlərin Azərbaycan Respublikasına gəlmələrinə yardım etmək;
2.1.2. elm, təhsil və sosial-mədəni sahələrdə:
2.1.2.1. Azərbaycanlı tələbələrlə mütəmadi əlaqə saxlamaq və onların yerli orqanlarla bağlı məsələlərinin həllinə kömək göstərmək;
2.1.2.2. Azərbaycan Respublikasının ali təhsil müəssisələrində təhsil imkanlarını təbliğ etmək və əcnəbilərin həmin təhsil müəssisələrində təhsil almalarını təşviq etmək;
2.1.2.3. Azərbaycan Respublikasının və öz dairəsinin elm və təhsil müəssisələri arasında əməkdaşlığın yaradılmasına və inkişafına kömək etmək;
2.1.2.4. Azərbaycanın ədəbiyyat, mədəniyyət və incəsənət əsərləri sərgilərinin, konsertlərin keçirilməsinə, kino və teatr əsərlərinin nümayişinə, eləcə də digər mədəni tədbirlərin təşkilinə yardım etmək;
2.1.2.5. Azərbaycan Respublikasının və öz dairəsinin mədəniyyət və incəsənət nümayəndələri və müəssisələri arasında əməkdaşlığın yaradılmasına və inkişafına kömək etmək;
2.1.2.6. daimi və müvəqqəti yaşayan Azərbaycan Respublikası vətəndaşlarına və soydaşlara mədəni-maarif tədbirlərinin keçirilməsində kömək göstərmək;
2.1.2.7. keçirilən idman yarışlarında Azərbaycan idmançılarının iştirak etməsi üçün tədbirlər görmək və idman yarışlarında Azərbaycan Respublikasını təmsil edən idmançılara müvafiq kömək göstərmək;
2.1.2.8. Azərbaycan hərbi və mülki məzarlarının, məzarüstü abidələrinin, abidə komplekslərinin (nişanlarının) və memorial (xatirə) tikililərinin mühafizəsi və abadlığı üzrə tədbirlər görmək;
2.1.3. Azərbaycan Respublikasının hüquqi şəxsləri və vətəndaşları, həmçinin diaspor təşkilatları ilə və soydaşlarla əlaqələr sahəsində:
2.1.3.1. Azərbaycan Respublikasının hüquqi şəxslərini və vətəndaşlarını Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələr, həmçinin qəbul edən dövlətin aidiyyəti qanunvericiliyi, adət və ənənələri barədə məlumatlandırmaq;
2.1.3.2. Azərbaycan Respublikası vətəndaşlarının və hüquqi şəxslərinin müraciətləri əsasında onları dövlət orqanlarında (qurumlarında) təmsil etmək, onların hüquqlarını və qanuni mənafelərini müdafiə etmək və ya bu məqsədlə həyata keçirilən tədbirlərə dəstək vermək;
2.1.3.3. daimi və müvəqqəti yaşayan Azərbaycan Respublikası vətəndaşlarının sayı və məşğuliyyətləri barədə məlumat əldə etmək və bu barədə diplomatik nümayəndəliyə və ya konsulluğa, yaxud Nazirliyə məlumat vermək;
2.1.3.4. ezam olunmuş Azərbaycan Respublikası dövlət orqanlarının (qurumlarının) nümayəndələrinə xidməti vəzifələrini yerinə yetirməkdə yardım göstərmək;
2.1.3.5. Azərbaycan diaspor təşkilatlarının fəaliyyətinə və onların diplomatik nümayəndəlik və ya konsulluq, yaxud Nazirlik ilə əlaqələrinə kömək göstərmək;
2.1.3.6. yetkinlik yaşına çatmamış, valideyn himayəsindən məhrum olmuş, habelə yetkinlik yaşında olan, səhhətinə görə hüquqlarını həyata keçirə və vəzifələrini yerinə yetirə bilməyən Azərbaycan Respublikası vətəndaşlarının himayəyə və qəyyumluğa götürülməsi üçün tədbirlər görmək;
2.1.3.7. repatriasiya edilməsi nəzərdə tutulan Azərbaycan Respublikası vətəndaşlarının olduqları yerlərin müəyyən edilməsinə və onların repatriasiyası ilə bağlı müvafiq tədbirlərin həyata keçirilməsinə yardım etmək;
2.1.3.8. Azərbaycan Respublikasının vətəndaşı öldükdə, onun əmlakının mühafizəsi üçün və ya əgər qalmış əmlak tez xarab olandırsa, yaxud saxlanılması baha başa gəlirsə, onun satılması və satışdan əldə edilmiş pulun aidiyyəti üzrə göndərilməsi üçün tədbirlər görmək;
2.1.3.9. Azərbaycan Respublikası vətəndaşlarının xeyrinə vərəsəlik açıldığı məlum olduqda, vərəsəlik və ehtimal olunan vərəsələr haqqında ona məlum olan məlumatları diplomatik nümayəndəliyə və ya konsulluğa, yaxud Nazirliyə bildirmək;
2.1.3.10. miras əmlakı Azərbaycan Respublikasında yaşayan vərəsələrə vermək üçün qəbul etmək;
2.1.3.11. Azərbaycan Respublikasına, onun hüquqi şəxslərinə və vətəndaşlarına pulun, qiymətli əşyaların və əmlakın ianə edilməsinə yardım etmək;
2.1.3.12. itkin düşmüş Azərbaycan Respublikası vətəndaşlarının axtarışı üçün qəbul edən dövlətin səlahiyyətli dövlət orqanlarına müraciət etmək;
2.1.3.13. Azərbaycan Respublikası vətəndaşının azadlığı məhdudlaşdırıldıqda və ya Azərbaycan Respublikası vətəndaşı azadlıqdan məhrum edildikdə, bu barədə diplomatik nümayəndəliyə və ya konsulluğa, yaxud Nazirliyə məlumat vermək və onların tapşırıqlarına uyğun hərəkət etmək;
2.1.3.14. azadlığı məhdudlaşdırılan və ya azadlıqdan məhrum edilən Azərbaycan Respublikası vətəndaşlarına münasibətdə Azərbaycan Respublikası ilə qəbul edən dövlətin tərəfdar çıxdıqları beynəlxalq müqavilələrə və qəbul edən dövlətin qanunlarına əməl olunub-olunmaması barədə diplomatik nümayəndəliyi və ya konsulluğu, yaxud Nazirliyi məlumatlandırmaq;
2.1.3.15. Azərbaycan Respublikasının vətəndaşı öldükdə, onun nəşinin, sənədlərinin və şəxsi əşyalarının Azərbaycan Respublikasına göndərilməsinə kömək göstərmək;
2.1.4. Azərbaycan Respublikasına gələn əcnəbilərə və vətəndaşlığı olmayan şəxslərə viza, eləcə də elektron viza əldə etmək qaydaları haqqında məlumat vermək, həmçinin beynəlxalq tədbirlərdə sadələşdirilmiş viza rejiminin tətbiq edilməsi haqqında məlumatlandırmanı təmin etmək;
2.1.5. Azərbaycan Respublikasının mülki dəniz və hava gəmilərinin (bundan sonra - gəmi) heyət üzvlərinə və sərnişinlərinə yardım sahəsində:
2.1.5.1. hava və dəniz limanlarında, Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və qəbul edən dövlətin qanunvericiliyinə uyğun olaraq, gəmi heyətinin üzvlərinə kömək göstərmək və onların öz hüquqlarından istifadə edə bilmələrinə yardım etmək;
2.1.5.2. gəmi kapitanının müraciəti əsasında gəmiyə baş çəkmək, gəmi kapitanına hava və dəniz limanının vəziyyəti, liman qaydaları, yerli qanunlar və adətlər haqqında məlumat vermək, habelə diplomatik nümayəndəlik və ya konsulluq ilə əlaqə yaradılmasında yardım etmək və onu qəbul edən dövlətin vəzifəli şəxsləri ilə görüşlərdə müşayiət etmək;
2.1.5.3. gəmi qəzaya uğradıqda diplomatik nümayəndəliyə və ya konsulluğa, yaxud Nazirliyə bu barədə məlumat vermək, sərnişinlərin, heyət üzvlərinin, gəminin və yükün xilas edilməsi üçün mümkün tədbirlər görmək, zərərçəkənlərə tibbi yardım göstərilməsinə və onların vətənə göndərilməsinə kömək etmək;
2.1.6. Azərbaycan Respublikasının beynəlxalq yük və sərnişin daşımalarını həyata keçirən avtomobil və dəmiryol nəqliyyatı vasitələrinin heyət üzvlərinə və sərnişinlərinə yardım sahəsində bu Əsasnamənin 2.1.5-ci yarımbəndində qeyd olunan tədbirləri həyata keçirmək;
2.1.7. sanitariya, fitosanitariya və baytarlıq mühafizəsi sahəsində:
2.1.7.1. karantin qoyulan xəstəlik əvvəllər bu xəstəliyin olmadığı ərazidə meydana gəldikdə, həmin xəstəliyin yayıldığı bölgənin adı, yoluxanların sayı və yerli orqanlar (qurumlar) tərəfindən görülən tədbirlər barədə diplomatik nümayəndəliyə və ya konsulluğa, yaxud Nazirliyə məlumat vermək, tələb olunduğu halda Azərbaycan Respublikasına gedən şəxsləri peyvənd olunmaları barədə müvafiq beynəlxalq sertifikatı ölkə ərazisinə daxil olarkən təqdim etmələri barədə xəbərdar etmək;
2.1.7.2. kənd təsərrüfatı bitkilərinə və ev heyvanlarına aid təhlükəli xəstəliklər və ziyanvericilər meydana gəldikdə, habelə heyvan və quşlar kütləvi xəstələndikdə, yaxud insanlar, heyvanlar və quşlar üçün ümumi olan xəstəliklərin yayılmaq təhlükəsi yarandıqda diplomatik nümayəndəliyə və ya konsulluğa, yaxud Nazirliyə bu barədə məlumat vermək;
2.1.7.3. Azərbaycan Respublikasına gedən şəxslərə apardıqları xammal, heyvan, heyvan mənşəli qidalar barədə baytarlıq sertifikatını ölkə ərazisinə daxil olarkən təqdim etmələri zərurətini bildirmək, eləcə də toxum, bitki, meyvə və tərəvəzlərin aparılması qaydaları haqqında məlumat vermək.
2.2. Azərbaycan Respublikasının və qəbul edən dövlətin tərəfdar çıxdıqları beynəlxalq müqavilələrə və qanunvericiliklərinə uyğun olaraq, Nazirlik fəxri konsula ayrı-ayrı konsul funksiyalarının və həmin funksiyalardan irəli gələn hərəkətlərin yerinə yetirilməsini tapşıra bilər.
3.1. Bu Əsasnamə ilə müəyyən olunmuş funksiyaları yerinə yetirmək üçün işgüzar və mənəvi keyfiyyətləri, eləcə də sağlamlıq vəziyyəti qənaətbəxş olan Azərbaycan Respublikasının, qəbul edən dövlətin və ya qəbul edən dövlətdə daimi yaşayan üçüncü dövlətin vətəndaşı fəxri konsul ola bilər.
3.2. Fəxri konsul Nazirliyin təklifi ilə Azərbaycan Respublikasının Prezidenti tərəfindən təyin edilir. Fəxri konsul təyin edilməsi nəzərdə tutulan şəxs barəsində qəbul edən dövlətin razılıq sənədi (ekzekvatura) əvvəlcədən alınır.
3.3. Fəxri konsul təyin edilərkən həmin şəxs bu Əsasnamə ilə müəyyən olunmuş funksiyalarını layiqincə yerinə yetirəcəyi və öz funksiyalarının icrasına görə Azərbaycan Respublikasından ödəniş tələb etməyəcəyi barədə Nazirliyə yazılı iltizam təqdim edir.
3.4. Fəxri konsula Nazirlik tərəfindən onun soyadını, adını, atasının adını, vətəndaşlığını, vəzifəsini, kateqoriyasını, dairəsini və dəftərxanasının yerləşdiyi şəhəri təsdiq edən vəkalətnamə (fəxri konsul patenti) verilir.
3.5. Fəxri konsulun qəbul edən dövlətin müvafiq dairəsində fasiləsiz səlahiyyət müddəti 4 (dörd) ildir. Azərbaycan Respublikası Prezidentinin qərarına uyğun olaraq, fəxri konsul fasiləsiz səlahiyyət müddətindən artıq fəaliyyətini davam etdirə və ya həmin müddətdən əvvəl onun fəaliyyətinə xitam verilə bilər.
3.6. Qəbul edən dövlətin razılıq sənədini (ekzekvaturasını) almış fəxri konsul öz funksiyalarının icrasına başladığı tarix barədə diplomatik nümayəndəliyə və ya konsulluğa, yaxud Nazirliyə məlumat verir.
3.7. Fəxri konsul öz funksiyalarını şəxsən yerinə yetirir və fəaliyyətini diplomatik nümayəndəlik və ya konsulluq, yaxud Nazirlik ilə əlaqələndirir. Fəxri konsul fəaliyyətini vətəndaş məmnunluğu, operativlik, şəffaflıq, nəzakətlilik və məsuliyyət prinsipləri əsasında həyata keçirir.
3.8. Fəxri konsul öz dairəsində fəaliyyət göstərən qəbul edən dövlətin orqanlarına (qurumlarına), hüquqi və fiziki şəxslərinə funksiyalarına aid məsələlər üzrə müraciət edə, həmçinin üçüncü dövlətlərin konsulluqları və fəxri konsulları ilə əməkdaşlıq edə bilər.
3.9. Fəxri konsul funksiyalarının yerinə yetirilməsindən irəli gələn məsələləri öz dairəsindən kənarda fəaliyyət göstərən qəbul edən dövlətin dövlət orqanları (qurumları), hüquqi və fiziki şəxsləri ilə əlaqəli şəkildə həyata keçirməli olduqda, bu məsələlərin icrasını diplomatik nümayəndəlik və ya konsulluq, yaxud Nazirliklə razılaşdırmaqla yerinə yetirir.
3.10. Fəxri konsul Azərbaycan Respublikası ilə bağlı öz dairəsindən olan müraciətləri baxılmaq üçün diplomatik nümayəndəliyə və ya konsulluğa, yaxud Nazirliyə göndərə, həmçinin onların tapşırığı ilə Azərbaycan Respublikası dövlət orqanlarının (qurumlarının), hüquqi və fiziki şəxslərinin müraciətlərinin öz dairəsində olan aidiyyəti dövlət orqanlarına (qurumlarına), hüquqi və fiziki şəxslərə çatdırılmasına və bu müraciətlərdən irəli gələn məsələlərin əlaqələndirilməsinə yardım göstərə bilər.
3.11. Fəxri konsul funksiyalarını müvəqqəti olaraq yerinə yetirə bilmədiyi hallar barədə mümkün qədər əvvəlcədən diplomatik nümayəndəliyə və ya konsulluğa, yaxud Nazirliyə, həmçinin qəbul edən dövlətin səlahiyyətli dövlət orqanına məlumat verir və belə hallarda onun funksiyaları diplomatik nümayəndəlik və ya konsulluq, yaxud Nazirlik tərəfindən qəbul edən dövlətin razılığı ilə həmin dövlətdəki digər fəxri konsula (olduğu halda) həvalə edilə bilər.
3.12. Fəxri konsul Nazirliyin təlimatına uyğun olaraq kargüzarlığını Azərbaycan dilində və ya qəbul edən dövlətin dilində (dillərində) aparır.
3.13. Fəxri konsul funksiyalarının icrası zamanı diplomatik nümayəndəliyin və ya konsulluğun, yaxud Nazirliyin təlimatına əsasən açıqlanması məqbul hesab edilməyən məlumatların yayılmamasını təmin edir. Fəxri konsulun yazışmaları diplomatik nümayəndəliyin və ya konsulluğun, yaxud Nazirliyin razılığı olmadan dərc edilmir və üçüncü şəxslərə verilmir.
3.14. Fəxri konsula Nazirlik tərəfindən müvafiq konsul əməliyyatlarının yerinə yetirilməsi həvalə oluna bilər. Həmin konsul əməliyyatları üçün Azərbaycan Respublikasının normativ hüquqi aktları ilə dövlət rüsumunun və faktiki xərclərin tutulması müəyyən edildiyi hallarda, müvafiq dövlət rüsumunun və faktiki xərclərin məbləği, eləcə də fəxri konsul tərəfindən tutulan dövlət rüsumunun Azərbaycan Respublikasının dövlət büdcəsinə köçürülməsi Azərbaycan Respublikasının qanunları ilə tənzimlənir.
3.15. Fəxri konsul diplomatik nümayəndəliyə və ya konsulluğa, yaxud Nazirliyə hər ilin yanvar ayında əvvəlki il üzrə fəaliyyəti barədə hesabat, o cümlədən olduğu təqdirdə maliyyə hesabatı verir.
3.16. Fəxri konsul istifadəsində olan Azərbaycan Respublikası Dövlət Bayrağının, Azərbaycan Respublikası Dövlət Gerbinin, həmçinin möhürünün və arxivinin saxlanılmasını, mühafizəsini və toxunulmazlığını təmin etmək üçün tədbirlər görür və bunun üçün şəxsən məsuliyyət daşıyır.
3.17. Fəxri konsulun fəaliyyəti ilə bağlı daxil olan müraciətlərə (ərizə, təklif və şikayətlərə) diplomatik nümayəndəlik və ya konsulluq, yaxud Nazirlik tərəfindən baxılır. Fəxri konsulun fəaliyyəti qənaətbəxş hesab edilmədikdə Nazirlik onun səlahiyyətinə xitam verilməsi barədə Azərbaycan Respublikasının Prezidentinə müraciət edir.
3.18. Fəxri konsulun fəaliyyətinə bu Əsasnamənin 3.5-ci bəndi ilə müəyyən edilmiş fasiləsiz səlahiyyət müddəti bitdikdə və onun bu müddətdən artıq fəaliyyətini davam etdirməsi barədə qərar olmadıqda, habelə Nazirliyin təklifi, fəxri konsulun şəxsi vəsatəti və ya qəbul edən dövlətin səlahiyyətli dövlət orqanının müraciəti əsasında Azərbaycan Respublikasının Prezidenti tərəfindən xitam verilir.
3.19. Fəxri konsulun funksiyalarına xitam verildikdə qəbul edən dövlətin səlahiyyətli dövlət orqanı bu barədə diplomatik nümayəndəlik və ya konsulluq, yaxud Nazirlik tərəfindən məlumatlandırılır.
3.20. Fəxri konsulun fəaliyyətinə xitam verilərkən onun möhürü və arxivi, həmçinin Azərbaycan Respublikasının mülkiyyəti olan əmlak diplomatik nümayəndəliyə və ya konsulluğa, yaxud Nazirliyə təhvil verilməlidir.