“Azərbaycan Respublikası Dövlət Sosial Müdafiə Fondunun fəaliyyəti məsələləri haqqında” Azərbaycan Respublikası Nazirlər Kabinetinin 1992-ci il 16 oktyabr tarixli 553 nömrəli qərarının 3-cü bəndinin icrası üçün Azərbaycan Respublikası Nazirlər Kabineti qərara alır:
1. “Sığortaolunanlar üçün xəstəlik vərəqələrinin elektron sənəd formasında tərtib edilməsi qaydası haqqında təlimat” təsdiq edilsin (əlavə olunur).
2. Azərbaycan Respublikasının Əmək və Əhalinin Sosial Müdafiəsi Nazirliyinə tapşırılsın:
müalicə-sağlamlıq məqsədləri üçün ayrılan vəsaitlərin mövcud qanunçuluqda nəzərdə tutulan müddətlərdə verilməsini təmin etsin və həmin vəsaitlərin məqsədəuyğun xərclənməsi üzərində nəzarəti gücləndirsin;
keçmiş sosial-sığorta fondu və kolxozların sosial-sığorta ayırmaları hesabına tikilən müalicə-sağlamlıq obyektlərini Azərbaycan Həmkarlar İttifaqı Şurası və Azərbaycan Respublikası Kolxozlar Şurasının iştirakı ilə inventarizasiya etsin və tikilməkdə olan obyektlərin tikintisinin başa çatdırılması üçün onları lazımi vəsaitlə təmin etsin.
3. Azərbaycan Respublikasının Səhiyyə Nazirliyi Azərbaycan Respublikası Prezidentinin 2018-ci il 12 sentyabr tarixli 263 nömrəli Fərmanı ilə təsdiq edilmiş “Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları”nın tələbləri nəzərə alınmaqla, xəstəlik vərəqələrinin elektron sənəd formasında “Vahid Səhiyyə İnformasiya Sistemi” vasitəsilə Elektron Hökumət İnformasiya Sisteminə ötürülməsi üçün Azərbaycan Respublikasının Rəqəmsal İnkişaf və Nəqliyyat Nazirliyi ilə birlikdə zəruri tədbirlər görsün.
İşlər müdiri F.MURADƏLİYEV
Bakı şəhəri 8 yanvar 1993-cü il
Azərbaycan Respublikası Nazirlər Kabinetinin
1993-cü il 8 yanvar tarixli 9 nömrəli qərarına
1. Sığortaolunanların əmək qabiliyyətinin müvəqqəti itirilməsi xəstəlik vərəqəsi ilə təsdiq olunur.
Sığortaolunanlara əmək qabiliyyətinin müvəqqəti itirilməsi haqqında arayışın verilməsi bu təlimatda göstərilmiş xüsusi hallardan başqa, digər hallarda qadağan olunur.
2. Sığortaolunanlar üçün xəstəlik vərəqələri, onları tərtib etmək hüququna malik olan tibb müəssisələrinin həkimləri (bundan sonra - tibb müəssisələrinin həkimləri) tərəfindən elektron sənəd formasında tərtib edilir.
Xəstəlik vərəqələri sığortaolunanlar və sığortaedənlər tərəfindən Azərbaycan Respublikası Səhiyyə Nazirliyinin (bundan sonra - Nazirlik) “Vahid Səhiyyə İnformasiya Sistemi” (bundan sonra - VSİS) vasitəsilə elektron sənəd formasında, o cümlədən sığortaolunan tərəfindən tibb müəssisəsinə müraciət edildikdə VSİS-dən kağız daşıyıcıda çap olunmuş formada əldə edilir.
4. Xəstəlik və ya xəsarət nəticəsində sığortaolunan əmək qabiliyyətini müvəqqəti itirdikdə xəstəlik vərəqələri həmin gündən tibb müəssisələrinin həkimləri tərəfindən elektron sənəd formasında tərtib edilir..
5. Vərəm, psixi və zöhrəvi xəstəliklər zamanı xəstəlik vərəqələri müvafiq xüsusi tibb müəssisələrinin həkimləri tərəfindən elektron sənəd formasında tərtib edilir. Həmin xəstəliklərə tutulmuş şəxslər ümumi tibb müəssisələrinə müraciət etdikdə, həkim onlara 3 gün müddətinə xəstəlik vərəqəsini elektron sənəd formasında tərtib edərək, xəstəni xüsusi tibb müəssisələrinə göndərməlidir.
Xüsusi tibb müəssisələri olmayan yerlərdə həmin xəstəliklər üzrə xəstəlik vərəqələri ümumi tibb müəssisələrinin həkimləri tərəfindən elektron sənəd formasında tərtib edilir.
6. Xəstəlik və ya xəsarət üzrə xəstəlik vərəqələri sığortaolunanın əmək qabiliyyəti bərpa olanadək və ya tibbi-sosial ekspert komissiyası tərəfindən ona əlillik müəyyən edilənədək bütün müddət üzrə tərtib edilir.
Sərxoşluq və ya sərxoşluq təsiri ilə əlaqədar, həmçinin spirtli içkilərdən hədsiz istifadə edilməsi nəticəsində (zədə, sərxoşluq psixozu, ağ qızdırma, xroniki sərxoşluq) xəstəliklərdə ambulatoriya və stasionar müalicəsində xəstəlik vərəqələri ümumi əsaslar üzrə tərtib edilir.
Azərbaycan Respublikası Nazirlər Kabinetinin 2020-ci il 16 yanvar tarixli 12 nömrəli Qərarı ilə təsdiq edilmiş “Əlilliyin qiymətləndirilməsi məqsədilə tibbi-sosial ekspertiza müayinəsinə göndərişlərin verilməsi Qaydası”nın 1.5-ci bəndində göstərilən əsaslar olduqda, həkim-məsləhət komissiyaları bundan sonra – HMK) tərəfindən xəstələrə əlilliyin qiymətləndirilməsi məqsədilə tibbi-sosial ekspertiza müayinəsinə göndərişlər verilir. HMK tərəfindən əlilliyin qiymətləndirilməsi məqsədilə tibbi-sosial ekspertiza müayinəsinə göndərişlərin verilməsindən imtina barədə qərar qəbul edildikdə və ya tibbi-sosial ekspert komissiyası tərəfindən əlilliyin müəyyən edilməsindən imtina barədə qərar qəbul edildikdə, əgər xəstənin əmək qabiliyyətinin müvəqqəti itirilməsi davam edirsə, xəstəlik vərəqəsi bu təlimatla müəyyən edilmiş qaydada uzadılır.
7. Həkimlər hər dəfə 3 gündən artıq olmayaraq, ümumiyyətlə həmin xəstəlik və ya xəsarət üzrə 6 gündən artıq olmayaraq xəstəlik vərəqəsi tərtib etmək hüququna malikdirlər.
8. Əmək qabiliyyətinin müvəqqəti itirilməsi başlandıqdan sonra xəstəlik vərəqəsinin 6 gündən çox artırılması üçün müalicə həkimi tərəfindən xəstəlik vərəqəsinin davamı olan xəstəlik vərəqəsi tərtib edilir. Həmin xəstəlik vərəqəsi bu təlimatın 11-ci hissəsi nəzərə alınmaqla yalnız HMK-nin sədrinin, tibb müəssisəsində HMK olmadıqda isə baş həkimin və ya bu hissənin Qeydində göstərilən hallarda şöbə müdirinin gücləndirilmiş elektron imzası ilə təsdiq edilir.
Qeyd: İxtisaslar üzrə şöbələri olan tibb müəssisələrində xəstəlik vərəqələrinin 6 gündən artıq uzadılması baş həkim tərəfindən şöbə müdirinə həvalə edilir.
9. Xəstəlik vərəqəsini 6 gündən çox artırmağa ixtiyar verilmiş şəxslərin hamısına xəstəni şəxsən müayinə etdikdən və tibbi müayinələrin nəticəsini öyrəndikdən sonra xəstəlik vərəqəsini artırmağa icazə verilə bilər. Xəstəlik uzun çəkdikdə bu müayinələr azı hər 10 gündən bir keçirilməlidir.
Vərəm xəstəliyi və ya peşə xəstəliyi nəticəsində əmək qabiliyyətini müvəqqəti itirmiş sığortaolunan üçün HMK tərəfindən tərtib edilmiş və HMK sədrinin gücləndirilmiş elektron imzası ilə təsdiq edilmiş 2 aydan artıq olmayan müddətə xəstəlik vərəqəsi verilə bilər. Tibb müəssisəsində HMK olmadıqda, həmin xəstəliklər üzrə sığortaolunanlar üçün 2 aydan artıq olmayan müddətə xəstəlik vərəqəsi müalicə həkimi tərəfindən tərtib edilir və baş həkimin gücləndirilmiş elektron imzası ilə təsdiq edilir. Xəstənin vəziyyətinin iş yerində onun əmək funksiyalarının yerinə yetirilməsinə imkan vermədiyi və müalicənin gedişinə maneçilik törədilmədiyi halda həmin xəstəlik vərəqəsinə sığortaolunanın müvəqqəti olaraq başqa işə keçirilməsinin mümkünlüyünə dair qeyd əlavə olunur. İşçini bu abzasda göstərilməyən digər xəstəliklərlə əlaqədar olaraq başqa işə keçirmək lazım gəldikdə xəstəlik vərəqəsi deyil HMK-nin rəyi verilir.
10. Sığortaolunanlar üçün bütün laboratoriya tədqiqatları və müalicə üsulları (fizioterapiya, rentgenoterapiya və sairə) iş günündən kənar vaxtda, xəstəlik vərəqələri verilmədən keçirilməli, lazım olan hallarda həmin tədqiqatın və üsulların xüsusiyyətlərindən asılı olaraq onlar iş günü vaxtında keçirilə bilər.
11. Əmək qabiliyyətini müvəqqəti itirmiş sığortaolunan (xəstəliyin kəskinləşməsi və ya istehsalat qəzası zamanı) tibb məntəqəsinə müraciət etdikdə həkim 3 gün müddətinə xəstəlik vərəqəsi tərtib edir. Bu xəstəlik vərəqəsinin müddəti ümumi qayda ilə poliklinika, ambulatoriya və sairə həkimlərinin, o cümlədən HMK-nin rəyi ilə uzadılır. Tibb məntəqəsində həkim olmadıqda, yalnız tibb bacısı və ya feldşer olduqda onlar xəstəlik vərəqəsi tərtib etmir, ilkin tibbi yardım göstərərək əmək qabiliyyətini müvəqqəti itirmiş sığortaolunanı dərhal qəbul olunmaq üçün poliklinikaya və ya ambulatoriyaya göndərirlər.
Əmək qabiliyyəti bərpa olunmuş sığortaolunan üçün xəstəlik vərəqəsi tərtib edilmir, göndəriş vərəqəsində onun gəlib-getdiyi vaxt haqqında qeydlər olunur.
12. Axşam və yaxud gecə vaxtı, poliklinikada və ya ambulatoriyada qəbul olmadıqda, tibb məntəqəsinə müraciət edilərsə, məntəqədə yalnız tibb bacısı və ya feldşer növbə çəkdikdə onlar müraciət etmiş şəxsə ilkin tibbi yardım göstərib, növbəti gün poliklinika və ya ambulatoriyaya getməyi, lazım gəldiyi halda isə evə həkim çağırmağı təklif edirlər. Bu halda onlar öz imzası və möhürü ilə arayış verirlər. Arayışda işdən azad olma vaxtı, xəstələnmə və xəsarətin xarakteri haqqında qısa məlumatlar göstərilir.
Poliklinikanın və ya ambulatoriyanın həkimi sığortaolunanın əmək qabiliyyətini müvəqqəti itirməsini təsdiq edərək, ona arayışda göstərilmiş vaxtdan etibarən xəstəlik vərəqəsi tərtib edir. Həkim onun əmək qabiliyyəti olduğunu hesab edərsə, bu zaman arayışda göstərildiyi vaxtdan başlayaraq yalnız həmin növbə qurtaranadək xəstəlik vərəqəsi tərtib edir.
13. Stasionarda (xəstəxanada, klinikada və i.a.) müalicə edilərkən xəstənin stasionarda qaldığı bütün günlər üçün müalicə edən həkim və şöbə müdiri tərəfindən xəstəlik vərəqəsi tərtib edilərək şöbə müdirinin gücləndirilmiş elektron imzası ilə təsdiq edilir.
Stasionardan vaxtında buraxılmaq, habelə əlilliyin əlamətləri olan xəstələri vaxtında aşkar etmək və əlilliyin qiymətləndirilməsi üçün tibbi-sosial ekspert komissiyasına göndəriş verilməsi məsələsinə baxılması üçün HMK-yə təqdim edilməsi vəzifəsi baş həkimə tapşırılır.
14. Stasionardan buraxılarkən əmək qabiliyyətini müvəqqəti itirmiş sığortaolunanın xəstəlik vərəqəsi, stasionarın müalicə həkimi və şöbə müdiri tərəfindən tibb müəssisəsinə gələnədək və ya evə həkim çağıranadək, lakin birdəfəlik 10 gündən çox olmayan müddətədək uzadılır.
15. Bir həkimi olan tibb müəssisələrində (kənd yerlərində, uzaq rayonlarda və i.a.) həmin həkimə bütün xəstələnmə dövrü üçün təkbaşına xəstəlik vərəqəsini tərtib etmək hüququ verilir. Həmin xəstələr 20 gündən bir HMK-yə təqdim olunmalıdır. Onkoloji və vərəm xəstələrin xəstəlik vərəqələri həmin həkim tərəfindən onlar xəstəxanaya gedənə qədər və ya xəstəliyin sonuncu gününə qədər təkbaşına uzadıla bilər.
16. Ölkə daxilində başqa şəhərdə (yerlərdə) müalicə olunmaq üçün xəstəlik vərəqəsi HMK-nin sədri və üzvləri tərəfindən (HMK olmadıqda isə müalicə həkimi və baş həkim tərəfindən) elektron sənəd formasında tərtib edilib, həmin xəstəlik vərəqəsi ərazi üzrə dövlət tibb müəssisəsinin rəhbərinin gücləndirilmiş elektron imzası ilə təsdiq edilməlidir. Xəstəlik vərəqəsi olan şəxs müalicə həkiminin icazə qeydiyyatı olmadan başqa şəhərə gedirsə, bu hal rejimin pozulması kimi hesab olunur.
17. Uzun müddət və tez-tez xəstələnən sığortaolunana baş həkim ayrıca həkim təhkim etməli və bu barədə həmkarlar ittifaqları komitələrini xəbərdar etməlidir. Sığrtaolunana ayrıca həkim təhkim olunması barədə həmkarlar ittifaqları komitələri xəstəni yazılı surətdə xəbərdar etməlidir ki, başqa həkimlər tərəfindən ona dair tərtib edilmiş xəstəlik vərəqələri ödənilməyəcəkdir (müstəsna olaraq həmkarlar ittifaqları komitələrinin xüsusi qərarlarından başqa).
Sığortaolunanın bu və ya digər xəstəliyi ona təhkim olunmuş həkimə aid olmadıqda, məsləhət üçün müvafiq mütəxəssis cəlb olunmalıdır.
Bu halda xəstəlik vərəqəsi hər iki həkim tərəfindən tərtib edilir və ona təhkim olunmuş həkimin gücləndirilmiş elektron imzası ilə təsdiq edilir və həmin xəstəlik vərəqəsinin 6 gündən artıq uzadılması ümumi qayda üzrə aparılır.
17-1. Sığortaolunanın xəsarət nəticəsində əmək qabiliyyətini müvəqqəti itirməsi ilə bağlı tibb müəssisəsi tərəfindən hüquq mühafizə orqanına məlumat verildiyi hallarda, bu barədə xəstəlik vərəqəsində müvafiq qeyd aparılır.
18. Hamiləlik və doğuşa görə xəstəlik vərəqəsi hamilə qadınlar üçün mama-ginekoloq həkimi tərəfindən elektron sənəd formasında tərtib edilir. Mama-ginekoloq həkimi olmadıqda, xəstəlik vərəqələri ümumi qəbul aparan həkim tərəfindən elektron sənəd formasında tərtib edilir.
Hamiləlik və doğuşa görə xəstəlik vərəqəsi birdəfəlik 126 təqvim günü (doğuşdan əvvəl 70 təqvim günü və doğuşdan sonra 56 təqvim günü) müddətinə elektron sənəd formasında tərtib edilir. Doğuş çətin olduqda, iki və daha çox uşaq doğulduqda, xəstəlik vərəqəsi 140 təqvim günü (doğuşdan əvvəl 70 təqvim günü və doğuşdan sonra 70 təqvim günü) müddətinə elektron sənəd formasında tərtib edilir.
Kənd təsərrüfatı istehsalında çalışan qadınlara (həmin qadınların çalışdığı istehsalatlar, işlər, peşələr, vəzifələr və göstəricilər Azərbaycan Respublikası Kənd Təsərrüfatı Nazirliyi, Nazirlik, Əmək və Əhalinin Sosial Müdafiəsi Nazirliyi, Dövlət Statistika Komitəsi tərəfindən hazırlanmış və Azərbaycan Respublikası Nazirlər Kabinetinin təsdiq etdiyi Siyahıya müvafiq olaraq müəyyənləşdirilir) hamiləliyə və doğuşa görə xəstəlik vərəqəsi normal doğuşda 140 təqvim günü (doğuşdan əvvəl 70 təqvim günü və doğuşdan sonra 70 təqvim günü), doğuş çətin olduqda 156 təqvim günü (doğuşdan əvvəl 70 təqvim günü və doğuşdan sonra 86 təqvim günü), iki və daha çox uşaq doğulduqda 180 təqvim günü (doğuşdan əvvəl 70 təqvim günü və doğuşdan sonra 110 təqvim günü) müddətinə elektron sənəd formasında tərtib edilir.
Belə xəstəlik vərəqəsi qadın məsləhətxanaları (qadın məsləhətxanaları olmadıqda ümumi tibb müəssisələri) tərəfindən doğuş baş vermiş tibb müəssisəsində dəyişdirmə vərəqəsində qeyd əsasında elektron sənəd formasında tərtib edilir. Bu hallarda xəstəlik vərəqəsi müalicə həkimi tərəfindən elektron sənəd formasında tərtib edilməklə tibb müəssisəsinin baş həkimi və ya qadın məsləhətxanalarının müdirinin gücləndirilmiş elektron imzası ilə təsdiq edilir. Otuz həftəlik hamiləlik müddətinə qədər doğuş baş verdikdə və diri uşaq doğulduqda, hamiləlik və doğuşa görə xəstəlik vərəqəsi doğuş baş vermiş tibb müəssisəsi tərəfindən 140 təqvim günü, uşağın öldüyü doğuş hallarında isə xəstəlik vərəqəsi 126 təqvim günü müddətinə elektron sənəd formasında tərtib edilir. Qadının hamiləliyi qismən ödənişli sosial məzuniyyət dövründə baş verərsə, xəstəlik vərəqəsi bütün hamiləliyə və doğuşa görə məzuniyyət dövrü üçün elektron sənəd formasında tərtib edilir.
Təzəcə doğulmuş uşağı birbaşa doğum evindən övladlığa götürən, yaxud övladlığa götürmədən uşaq böyüdərkən (ana öldükdə, stasionarda ruhi və digər xəstəliklərdən müalicə olunduqda və ananın uşağı böyütmək iqtidarında olmadığı sair hallarda) xəstəlik vərəqəsi doğum evinin baş həkimi tərəfindən övladlığa götürmə haqqında və övladlığa götürmədən uşaq böyütməsi haqqında sənədin təqdimindən sonra, doğum şəhadətnaməsində göstərilmiş uşağın anadan olan günündən etibarən 56 təqvim günü müddətinə elektron sənəd formasında tərtib edilir.
19. Səbəbindən asılı olmayaraq hamiləliyin süni yolla pozulması ilə əlaqədar əməliyyat zamanı xəstəlik vərəqələri ümumi qayda üzrə elektron sənəd formasında tərtib edilir.
20. Ailənin xəstə üzvünə xidmət etmək üçün xəstəlik vərəqəsi, həmin xəstəni müalicə edən həkim tərəfindən elektron sənəd formasında tərtib edilir.
Karantin üzrə xəstəlik vərəqəsini həkim-epidemioloq, olmadıqda isə müalicə həkimi elektron sənəd formasında tərtib edir.
21. 14 yaşı tamam olmuş və ailənin böyük yaşlı xəstə üzvünə qulluq etmək üçün xəstəlik vərəqəsi, qulluq edilməməsi xəstənin həyatı və sağlamlığı üçün təhlükə törətdikdə, xəstəni xəstəxanaya qoymaq imkanı olmadıqda tərtib edilir.
Ailənin belə xəstə üzvünə qulluq etmək üçün tərtib edilən xəstəlik vərəqəsinin müddəti 7 gündən artıq olmamalıdır. Bu müddət yalnız müstəsna hallarda xəstəliyin ağırlığından və məişət şəraitindən asılı olaraq müalicə həkimi və baş həkim tərəfindən ümumiyyətlə 10 təqvim günündən çox olmayaraq uzadıla bilər.
22. 14 yaşına çatmamış xəstə uşağa qulluq etmək üçün xəstəlik vərəqəsi uşağın anası (atası), digər qanuni nümayəndələri və ya uşağa qulluq edən digər ailə üzvləri üçün tərtib edilir. Xəstəlik vərəqəsi bu cür xəstə uşağın istər ambulator, istərsə də stasionar müalicəsində, onun xidmətə ehtiyacı olan bütün dövr üçün tərtib edilir.
Xəstəlik vərəqəsi uşağın stasionar müalicəsində ona qulluq etmək üçün yanında qaldıqda aşağıdakı müddət üçün tərtib edilir:
İmmun çatışmamazlığı virusu ilə yoluxmuş və ya SPİD xəstəliyinə tutulmuş 16 yaşına çatmamış xəstə uşağın müalicəsində valideynlərindən birinə, yaxud digər qulluq edən şəxsə uşağın qulluğa ehtiyacı olan bütün dövr üçün.
23. Aşağıdakı hallarda xəstəlik vərəqəsi tərtib edilmir;
a) xroniki xəstələrə qulluq üçün;
b) həyati göstərişə görə stasionar müalicəsi vacib olarsa, xəstə yaxud onun ailəsi bundan imtina etdikdə;
v) sağlam uşağa xidmət üçün (ana xəstələndiyi halda, körpələr evi, uşaq bağçası və həmin uşaq karantində saxlandıqda və s.)
24. Sanatoriya-kurort müalicəsi üçün xəstəlik vərəqələri sığortaolunanın əsas və əlavə məzuniyyət günləri hesaba alınaraq, putyovkanın tam müddəti və sanatoriyaya gedib-qayıtmaq günləri üçün elektron sənəd formasında tərtib edilir. Əsas və əlavə məzuniyyət günləri müalicə və sanatoriyaya gedib-gəlmək müddətindən az olduqda, çatışmayan müddət üçün xəstəlik vərəqəsi, sanatoriya-kurort müalicəsinə ehtiyac müalicə həkimi ilə birlikdə şöbə müdiri və ya baş həkim tərəfindən müəyyənləşdirildikdə elektron sənəd formasında tərtib edilir.
Yuxarıda göstərilən qaydada (kursovka) putyovka ilə ambulator kurort müalicəsində də xəstəlik vərəqəsi elektron sənəd formasında tərtib edilir.
Əgər işçinin üst-üstə 2 və daha çox il üçün əmək məzuniyyəti almaq hüququ varsa, onda sanatoriya-kurort müalicəsi üçün xəstəlik vərəqəsi elektron sənəd formasında tərtib edilərkən əmək məzuniyyətinin ümumi davamiyyəti hesablanır.
Əgər işçi sanatoriya və ya kurorta gedənə qədər əmək məzuniyyətindən istifadə etmişdirsə, lazımi putyovka və müalicə həkiminin rəyi barədə arayış olarsa, onda müdiriyyət həmkarlar ittifaqı komitəsi ilə birlikdə onun əsas və ya əlavə məzuniyyət günlərinə bərabər əmək haqqı saxlanılmamaq şərtilə əmək məzuniyyətinin verilməsi məsələsini həll edir. Bu halda xəstəlik vərəqəsi, növbəti və əlavə məzuniyyət günlərini çıxmaqla elektron sənəd formasında tərtib edilir.
25. Vərəm sanatoriyasında müalicə istisna olmaqla, sanatoriya-kurort müalicəsi üçün xəstəlik vərəqəsi HMK tərəfindən, HMK olmadıqda isə müalicə edən həkim və baş həkim tərəfindən yalnız sanatoriyaya gedənədək elektron sənəd formasında tərtib edilir.
Xəstəlik vərəqəsinin tərtib olunması üçün müraciət etdikdə sığortaolunan tərəfindən aşağıdakı sənədlər təqdim olunmalıdır:
b) əsas və əlavə məzuniyyət müddəti haqqında müdiriyyətin verdiyi arayış;
v) sanatoriya-kurort kartası.
Tibb müəssisələrinin stasionarından birbaşa sanatoriyaya müalicə olunmaq üçün göndərilmiş xəstələrə, xəstəlik vərəqəsi tibb müəssisələri tərəfindən stasionardakı müalicə müddətinə tərtib edilərək sanatoriyada tam müalicə dövrü üçün uzadılır.
26. Vərəm sanatoriyasında müalicə zamanı xəstəlik vərəqələri sanatoriyanın müalicə həkimi və baş həkimi tərəfindən elektron sənəd formasında tərtib edilir.
Vərəm sanatoriyasında xəstəlik vərəqələrinin tərtib edilməsi üçün müraciət edən sığortaolunanlar sanatoriyaya göndərilmə vərəqəsini, əsas və əlavə məzuniyyət müddəti haqqında arayış təqdim etməlidirlər.
27. Sanatoriyada putyovkada göstərilən vaxtdan artıq qalmağa, yalnız işçinin sanatoriyada qalma müddəti qurtardığı zaman kəskin xəstələnməsi və ya əsas xəstəliyin ağırlaşması nəticəsində əmək qabiliyyətini müvəqqəti itirdiyi, sanatoriyadan buraxılması və xəstəxanaya köçürülməsi mümkün olmadığı hallarda icazə verilir.
Sanatoriyada qalma müddətinin uzadılması və bununla əlaqədar olaraq xəstəlik vərəqəsi:
a) həmkarlar ittifaqlarının, dövlət səhiyyə sisteminin sanatoriyalarında sanatoriyanın baş həkimindən (sədr) müalicə edən həkimdən və müvafiq ixtisas üzrə sanatoriyanın məsləhətçisindən (əgər varsa) ibarət olan komissiya tərəfindən elektron sənəd formasında tərtib edilir.
b) digər sanatoriyalarda ərazi üzrə tibb müəssisələrindəki HMK tərəfindən sanatoriyanın müalicə həkiminin iştirakı ilə, HMK olmadıqda isə ərazi üzrə tibb müəssisəsinin (poliklinikanın, xəstəxananın və i.a.) baş həkimi tərəfindən elektron sənəd formasında tərtib edilir.
28. Sanatoriyada başlayan, əmək məzuniyyəti günlərinə təsadüf edən əmək qabiliyyətinin müvəqqəti itirilməsi hallarında xəstəlik vərəqəsi bu təlimatın 27-ci hissəsində qeyd olunan komissiyalar tərəfindən, sığortaolunan sanatoriyadan buraxıldığı zaman elektron sənəd formasında tərtib edilir.
İşçinin əmək məzuniyyəti günlərinə təsadüf edən əmək qabiliyyətinin müvəqqəti itirildiyi bütün günlər üçün xəstəlik vərəqəsi həmin sanatoriyaya göndərilməklə əlaqədar tərtib edilmiş xəstəlik vərəqəsi günləri çıxılmaqla tərtib edilir.
Əmək haqqı saxlanılmaqla verilən məzuniyyətə təsadüf edən günlər üçün xəstəlik vərəqəsi tərtib edilmir.
29-1. Xəstəlik vərəqələri sığortaolunanların müraciəti əsasında tibb müəssisələri tərəfindən elektron sənəd formasında tərtib edilir.
Xəstəlik vərəqələri əmək qabiliyyətini müvəqqəti itirmiş şəxsin soyadı, adı, atasının adı, fərdi identifikasiya nömrəsi (FİN), əmək qabiliyyətinin müvəqqəti itirilmə növü (xəstəlik, istehsalatda və ya məişətdə baş vermiş bədbəxt hadisə, karantin, xəstəyə qulluq, sanatoriya-kurort müalicəsi və ya hamiləlik və doğuş), doğuşla əlaqədar olduqda doğuş tarixi, xəstəyə qulluqla əlaqədar olduqda həmin xəstənin soyadı, adı, atasının adı, FİN-i, qohumluq dərəcəsi, diaqnozu, karantinlə əlaqədar olduqda karantinə səbəb olan xəstəliyin adı, xəstəliklərin beynəlxalq təsnifatına uyğun olaraq əsas diaqnoz, yanaşı xəstəliklər, ağırlaşmalar və xəstəlik vərəqələrinin tərtib edilməsinə əsas verən digər hallar, xəstəlik vərəqəsinin başlama və bitmə tarixləri, onu verən tibb müəssisəsinin adı, hüquqi ünvanı, vergi ödəyicisinin eyniləşdirmə nömrəsi (VÖEN), xəstəlik vərəqəsinin uzadılma tarixi, davamı olması barədə qeyd, iş yeri, rejim, rejim pozuntusuna dair qeyd, sanatoriya-kurort müalicəsi ilə əlaqədar olduqda yollayışın başlandığı və bitdiyi vaxt, müvəqqəti olaraq başqa işə keçirilmə barədə qeyd, olduğu halda əlilliyin qiymətləndirilməsinin nəticələrinə dair məlumatlar əlavə edilməklə səlahiyyətli həkimlər tərəfindən elektron sənəd formasında tərtib edilir.
Xəstəlik vərəqəsi tərtib edilərək VSİS-yə daxil edildikdən və gücləndirilmiş elektron imza ilə təsdiq edildikdən sonra sığortaolunanın əks-əlaqə vasitələrindən birinə bu barədə məlumat göndərilir və ya sığortaolunanın tələbi əsasında kağız daşıyıcıda çap olunaraq ona təqdim edilir.
30. Xəstəlik vərəqələri müəssisələrin nəzdində olan, yaxud müəssisələrin təhkim olduğu tibb müəssisələri, həmçinin işçinin yaşayış yerindəki tibb müəssisələri tərəfindən elektron sənəd formasında tərtib edilir.
İşdən azad olanlara xəstəlik vərəqələri tərtib edilmir.
Müstəsna olaraq xəstəlik vərəqəsi sahə həmkarlar ittifaqları birliklərinin göstərişi ilə işçiyə əmək qabiliyyətini müvəqqəti itirməsi bir aydan çox çəkdikdə, yaxud hamiləliyə və doğuşa görə məzuniyyət işdən azad edildiyi gündən etibarən iki ay ərzində baş verdikdə, sabiq hərbi qulluqçulara həqiqi xidmətdən təxris edildikdən sonra üç ay ərzində xəstələndikdə tərtib edilə bilər.
31. Sığortaolunanların əmək qabiliyyətini müvəqqəti itirməsi daimi yaşayış və iş yerindən kənarda (məs. ezamiyyət zamanı, istirahət evində və i.a.) müvəqqəti olduqları yerdə tibb müəssisəsinin baş həkiminin gücləndirilmiş elektron imzası ilə təsdiqlənərək tərtib edilir.
32. Yaşayış və ya iş yerindən kənarda xəstələr üçün tərtib edilmiş xəstəlik vərəqələrinin müddətləri onların digər yerlərə getməyinin mümkünlüyünü nəzərə alaraq başqa yerdə tibb müəssisəsinin rəyi əsasında uzadılır.
33. Xəstəlik vərəqələri stasionar müalicəsindən başqa əmək qabiliyyətinin müvəqqəti itirilməsi təyin olunduğu gündən elektron sənəd formasında tərtib edilir.
34. Əmək qabiliyyətinin müvəqqəti itirilməsi, növbəti əmək haqqı verildiyi vaxt davam edərsə, bu halda müalicə həkimi sığortaolunana xəstəlik vərəqəsinin «davamını» elektron sənəd formasında tərtib edir. Xəstəlik vərəqəsində isə «işə başlamalı» qrafasında xəstəlik vərəqəsinin «davamını» tərtib etməsi haqqında qeyd edir.
35. Sığortaolunanlara müvəqqəti olaraq onlar respublikadan xaricdə olduqda əmək qabiliyyətinin müvəqqəti itirilməsi ilə əlaqədar verilmiş sənədlərin əsaslığı şübhə doğurmursa və təcili müalicəyə ehtiyac yoxdursa, həmin sənədlər yaşayış və ya iş yeri üzrə tibb müəssisələrinin HMK-sı tərəfindən bu təlimatla müəyyən edilmiş qaydada elektron sənəd formasında tərtib edilən xəstəlik vərəqələri ilə əvəz olunur.
35-1. Nazirlik əmək qabiliyyətinin müvəqqəti itirilməsi ilə bağlı xəstəlik vərəqələrinin elektron sənəd formasında tərtib edilməklə VSİS-yə daxil edilməsini və gücləndirilmiş elektron imza ilə təsdiq olunmasını təmin edir.
35-2. Azərbaycan Respublikasının Əmək və Əhalinin Sosial Müdafiəsi Nazirliyi tərəfindən müvafiq xəstəlik vərəqəsinə əsasən əmək qabiliyyətinin müvəqqəti itirilməsi, hamiləliyə və doğuşa görə müavinətin ödənilməsindən sonra həmin xəstəlik vərəqəsinə düzəliş edilməsi yolverilməzdir. Sığortaolunanın tibb müəssisəsinə müraciət etdiyi gündən əvvəlki tarixə xəstəlik vərəqəsinin tərtib edilməsi qadağandır.
36. Əmək qabiliyyətinin müvəqqəti itirilməsilə əlaqədar arayışlar aşağıdakı hallarda verilir:
müəssisədə, idarədə işləyən zaman axşam və ya gecə vaxtı xəstənin xəstəliyi və zədəsi ağırlaşdıqda, tibb məntəqəsində isə yalnız tibb bacısı və ya feldşer növbə çəkdikdə;
zərərli və əlverişsiz iş şəraitində çalışan işçilər mövcud qaydada dövri tibbi müayinələri keçdikdə;
ambulatoriya və stasionar şəraitdə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin göndərişilə tibbi müayinədən keçən hərbi qulluqçular və hərbi xidmətə çağırılmış şəxslərə, eləcə də müayinə olunduğu yerə getdiyi və qayıtdığı müddətdə;
məhkəmə-tibbi ekspertizasının (məhkəmə psixiatriyasının) eyni zamanda stasionar şəraitində ekspertizanın keçirildiyi hallarda;
məhkəmənin qərarı ilə məcburi müalicə keçdikdə;
sağlam uşaqlara xidmət üçün, məs., ana xəstələndiyi halda, məktəbəqədər təhsil müəssisələrinə və ya həmin uşağa karantin qoyulduqda (körpələr evi, uşaq bağçası). Ana xəstə olduğu halda, ataya və ya ailənin digər üzvünə sağlam uşağa xidmət üçün arayış, ananın müalicə həkimi tərəfindən, karantinlə əlaqədar xidmət üçün isə həkim-epidemioloqun rəyi əsasında verilir. Müalicə həkimi özü arayışı 6 təqvim günü müddətinə verir, bu müddətdən sonra şöbə ilə (o olmadıqda baş həkimlə) birlikdə verir.
işdən azad olmuş şəxslər əgər fasiləsiz iş stajının saxlanılması şərti ilə təzə iş yerinə daxil olduğu müddət üçün xəstə ailə üzvünə qulluqla əlaqədar əmək qabiliyyətini itirdikdə (xəstəlik vərəqəsinin tərtib edildiyi müddətdən çox olmayaraq). Göstərilən arayışlar müalicə həkimi və tibb müəssisəsinin baş həkimi tərəfindən verilərək dəyirmi möhürlə təsdiq olunur.
yaşlılara qulluq üçün mövcud qanunvericilik əsasında xəstəlik vərəqələrinin ambulator müalicəsində müddətləri qurtardıqdan sonra xəstənin xəstəliyinin ağırlığını, xəstəxanaya yerləşdirmək mümkün olmadığını, ailə vəziyyətini nəzərə alaraq (göstərilən hallarda arayış tibb müəssisəsinin baş həkiminin razılığı ilə verilir).
Yaşlılara stasionar müalicəsi zamanı onlara qulluq etmək vacib olduqda (xəstənin yanında qalan qohumlarından birinə qulluq lazım olan müddət üçün xəstəlik vərəqəsinin tərtib edilməsini stasionarın baş həkimi, tibb hissəsi üzrə baş həkimin müavini ilə həll edir və bu haqda xəstənin tibb kartasında müalicə həkimi və şöbə müdiri tərəfindən qeydiyyat aparılır).
Əmək qabiliyyətinin ekspertizası üzrə işin təşkilinə, xəstəlik vərəqələrinin tərtib olunmasına və arayışların qeydiyyatının aparılmasına, onların verilməsinə və kağız daşıyıcıda saxlanılmasına nəzarət baş həkim tərəfindən həyata keçirilir.
38. Sığortaolunanlara xəstəlik vərəqələrinin və arayışların verilməsi, sənədləşdirilməsinə dair həkimlərin düzgün olmayan hərəkətləri barədə şikayətlər baş həkim və ya həmin tibb müəssisəsindəki HMK (əgər HMK olarsa) tərəfindən həll edilir.
Əgər xəstə tibb müəssisəsi tərəfindən şikayətinin həlli ilə razı deyilsə, aidiyyəti üzrə Nazirlik və ya Tibbi Ərazi Bölmələrini İdarəetmə Birliyi həmin şikayətə baxıb, onun səbəbini aradan qaldırmaq üçün ölçü götürürlər.
39. Əvvəl qəbul edilmiş, hazırki təlimata zidd olan bütün qaydalar və qanunlar ləğv olunur.
40. Bu təlimat 1993-cü il yanvarın 1-dən qüvvəyə minir.
Azərbaycan Respublikası Nazirlər Kabinetinin 1993-cü il 8 yanvar tarixli 9 nömrəli qərarına 3 №-li əlavə