Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. “Xarici ölkələrə ixrac missiyalarının və Azərbaycan ərazisinə alıcı missiyalarının təşkilinə, xarici bazarların araşdırılması və marketinq fəaliyyətinə, “Made in Azerbaijan” brendinin xarici bazarlarda təşviqinə, yerli şirkətlərin ixracla bağlı beynəlxalq sertifikat almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsi hesabına ödənilən hissəsinin müəyyənləşdirilməsi və ödənilmə mexanizminin tənzimlənməsi Qaydası” təsdiq edilsin (Əlavə 1).
2. “Azərbaycan mənşəli qeyri-neft məhsullarının ixracının stimullaşdırılması ilə bağlı görülmüş işlər barədə hesabat”ın forması təsdiq edilsin (Əlavə 2).
3. Bu Fərmanın 1-ci hissəsi ilə təsdiq edilən Qaydada nəzərdə tutulmuş dəstək tədbirlərinin maliyyələşdirilməsi üçün 2016-cı ilin dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının İqtisadiyyat Nazirliyinə 3 (üç) milyon manat ayrılsın.
4. Azərbaycan Respublikasının Nazirlər Kabineti:
4.1. Azərbaycan Respublikası Prezidentinin aktlarının bu Fərmana uyğunlaşdırılmasına dair təkliflərini üç ay müddətində hazırlayıb Azərbaycan Respublikasının Prezidentinə təqdim etsin;
4.2. Azərbaycan Respublikası Nazirlər Kabinetinin normativ hüquqi aktlarının bu Fərmana uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat versin;
4.3. mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;
4.4. Azərbaycan Respublikasının Maliyyə Nazirliyi və Azərbaycan Respublikasının İqtisadiyyat Nazirliyi ilə birlikdə 2017-ci il və növbəti illər üzrə Azərbaycan Respublikasının dövlət büdcəsi layihələrində bu Fərmanın 1-ci hissəsi ilə təsdiq edilən Qaydada nəzərdə tutulmuş dəstək tədbirlərinin maliyyələşdirilməsi, təşkili və idarə edilməsi üçün tələb olunan vəsaitin nəzərə alınmasını təmin etsin;
4.5. bu Fərmandan irəli gələn digər məsələləri həll etsin.
5. Azərbaycan Respublikasının Maliyyə Nazirliyi bu Fərmanın 3-cü hissəsində göstərilən məbləğdə maliyyələşməni təmin etsin.
6. Azərbaycan Respublikasının İqtisadiyyat Nazirliyi:
6.1. bu Fərmanla təsdiq edilən Qaydanın 3.2-ci, 4.4-cü, 6.2-ci bəndlərində və 4.8.2-ci və 4.10.1-ci yarımbəndlərində nəzərdə tutulmuş meyarları bir ay müddətində təsdiq etsin;
6.2. bu Fərmanın 2-ci hissəsi ilə təsdiq edilən formaya uyğun olaraq, ixrac olunan məhsullar barədə hesabatı Azərbaycan Respublikasının Dövlət Gömrük Komitəsi ilə birlikdə üç ayda bir dəfə Azərbaycan Respublikasının Prezidentinə təqdim etsin;
6.3. bu Fərmandan irəli gələn digər məsələləri həll etsin.
7. Azərbaycan Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını təmin edib Azərbaycan Respublikasının Nazirlər Kabinetinə məlumat versin.
Azərbaycan Respublikasının Prezidenti
Bakı şəhəri, 5 oktyabr 2016-cı il
1.1. Bu Qayda xarici ölkələrə ixrac missiyalarının və Azərbaycan ərazisinə alıcı missiyalarının təşkilinə, xarici bazarların araşdırılması və marketinq fəaliyyətinə, “Made in Azerbaijan” brendinin xarici bazarlarda təşviqinə, yerli şirkətlərin ixracla bağlı beynəlxalq sertifikat almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsinin vəsaiti hesabına ödənilən hissəsini və ödənilmə mexanizmini müəyyən edir.
1.2. Azərbaycan mənşəli qeyri-neft məhsullarının (bundan sonra – qeyri-neft məhsulları) ixracatçısı olaraq Azərbaycan Respublikasında vergi ödəyicisi kimi uçota alınmış fiziki və hüquqi şəxslər (bundan sonra – ixracatçı) bu Qaydada müəyyən olunmuş dəstək tədbirlərindən istifadə etmək hüququna malikdirlər.
1.3. Bu Qayda xarici iqtisadi fəaliyyətin mal nomenklaturasının 27-ci mal qrupuna (mineral yanacaq, neft və onların qovulma məhsulları, bitum tərkibli maddələr, mineral mumlar) daxil olan məhsullara, eləcə də dövlət mülkiyyətində olan və ya səhmlərinin (paylarının) nəzarət zərfi dövlətə məxsus olan hüquqi şəxslərə (bu Qaydanın 4.7-ci bəndi istisna olmaqla) şamil edilmir.
1.4. Bu Qaydada nəzərdə tutulmuş dəstək tədbirlərinin maliyyələşdirilməsi, təşkili və idarə edilməsi Azərbaycan Respublikası dövlət büdcəsinin vəsaiti hesabına həyata keçirilir. Dəstək tədbirlərinin təşkili və dəstək məbləğinin ödənilməsi Azərbaycan Respublikasının İqtisadiyyat Nazirliyi (bundan sonra – Nazirlik) tərəfindən həyata keçirilir. Beynəlxalq sərgi və yarmarkalarda fərdi qaydada iştirak istisna olmaqla, digər dəstək tədbirlərinin həyata keçirilməsi xərcləri ilə bağlı nəzərdə tutulmuş vəsait həmin dəstək tədbirlərində iştirak edən ixracatçılara və ya xarici alıcılara ödənilmir.
1.5. Bu Qaydada (4.4-cü və 4.10-cu bəndləri istisna olmaqla) nəzərdə tutulmuş dəstək tədbirlərində iştirak edəcək ixracatçılar Azərbaycan Respublikası Nazirlər Kabinetinin müəyyən etdiyi qaydada təşkil edilən müsabiqə əsasında seçilir.
1.6. Bu Qaydada nəzərdə tutulmuş dəstək məbləğinin ödənilməsi yalnız nağdsız qaydada həyata keçirilir.
1.7. Bu Qaydada istifadə olunan anlayışlar aşağıdakı mənaları ifadə edir:
1.7.1. ixracatçı – malları və xidmətləri ixrac edən şəxs;
1.7.2. dəstək tədbiri – xarici ölkələrə ixrac missiyalarının və Azərbaycan ərazisinə alıcı missiyalarının təşkili, xarici bazarların araşdırılması və marketinq fəaliyyəti, “Made in Azerbaijan” brendinin xarici bazarlarda təşviqi, ixracla bağlı beynəlxalq sertifikat alınması, tədqiqat-inkişaf proqram və layihələrinin həyata keçirilməsi;
1.7.3. dəstək məbləği – dəstək tədbirinin həyata keçirilməsi üçün ödənilən maliyyə vəsaiti;
1.7.4. ixrac missiyası – qeyri-neft məhsullarının yeni ixrac bazarlarına çıxış imkanlarını aşkar etmək və mövcud ixrac bazarlarında ixracatçıların biznesini daha da genişləndirmək üçün təşkil edilən fəaliyyət;
1.7.4-1. alıcı missiyası – xarici ölkələrə məhsulların idxalını və ya distribütorluğunu həyata keçirən şəxsin Azərbaycan bazarından qeyri-neft məhsullarını alması üçün təşkil edilən fəaliyyət;
1.7.5. bazar araşdırması – qeyri-neft məhsullarının və ya məhsul qruplarının ixracı üçün yeni və mövcud ixrac bazarlarına çıxış imkanlarının tədqiqi məqsədi ilə təşkil edilən fəaliyyət;
1.7.6. tədqiqat-inkişaf proqramı – ixracyönümlü yeni məhsulun və ya istehsal texnologiyalarının yaradılması və inkişaf etdirilməsi, habelə mövcud məhsulun istehsal xərclərinin azaldılması və əlavə dəyərinin artırılması məqsədi ilə həyata keçirilən fəaliyyət.
2.1. Azərbaycan Respublikasının iqtisadi və ticarət əlaqələri, qeyri-neft məhsullarının ixrac potensialı, habelə ixracatçılardan daxil olmuş müraciətlər nəzərə alınmaqla, ixrac missiyalarının tarixi və səfər ediləcək xarici ölkələr Nazirlik tərəfindən müəyyən edilir və onun rəsmi internet saytında yerləşdirilir.
2.2. Hər ixrac missiyasının müddəti 6 (altı) gündən və hər ixrac missiyasında iştirak edən ixracatçıların sayı 30 (otuz) nəfərdən artıq ola bilməz. Hər ixrac missiyasında ixracatçı bir nümayəndə ilə təmsil edilə bilər.
2.3. Bu Qaydaya əsasən təşkil edilən ixrac missiyasının sayı təqvim ili ərzində 25-dən (iyirmi beşdən) çox ola bilməz.
2.4. İxrac missiyasında iştirak edən ixracatçıların xarici ölkəyə səfəri ilə bağlı təşkilati işləri (viza, mehmanxana, beynəlxalq hava nəqliyyatı və ölkədaxili nəqliyyat (taksi istisna olmaqla), tərcümə xidmətləri, görüş yerlərinin və avadanlığın icarəsi) və onlarla bağlı xərcləri Nazirlik təmin edir.
2-1.1. Azərbaycan Respublikasının iqtisadi və ticarət əlaqələri, qeyri-neft məhsullarının ixrac potensialı, habelə ixracatçılardan daxil olmuş müraciətlər nəzərə alınmaqla, alıcı missiyalarının tarixini və iştirak edəcək xarici şəxsləri Nazirlik müəyyən edir və bu barədə məlumatı özünün rəsmi internet saytında yerləşdirir.
2-1.2. Hər alıcı missiyasının müddəti 6 (altı) gündən və hər alıcı missiyasında iştirak edən alıcıların sayı 10 (on) nəfərdən artıq ola bilməz. Hər alıcı missiyasında alıcı yalnız bir nümayəndə ilə təmsil edilə bilər.
2-1.3. Bu Qaydaya əsasən təşkil edilən alıcı missiyalarının sayı təqvim ili ərzində 20-dən (iyirmidən) çox ola bilməz.
2-1.4. Alıcı missiyasında iştirak edən xarici şəxslərin Azərbaycana səfəri ilə bağlı təşkilati işləri (mehmanxana, beynəlxalq hava nəqliyyatı və ölkədaxili nəqliyyat (taksi istisna olmaqla), tərcümə xidmətləri, görüş yerlərinin və avadanlığın icarəsi) və onlarla bağlı xərcləri Nazirlik təmin edir.
2-1.5. Alıcı missiyasında iştirak edəcək xarici şəxslər Azərbaycan Respublikası Nazirlər Kabinetinin təsdiq etdiyi meyarlara uyğun olaraq müəyyən edilir.
3.1. Bazar araşdırması ixracatçıların sifarişi əsasında həyata keçirilir.
3.2. Bazar araşdırmasının keçirilməsi ilə bağlı ixracatçılardan daxil olmuş sifarişlərin qiymətləndirilməsi meyarlarını Nazirlik müəyyən edir.
3.3. Bazar araşdırması “Dövlət satınalmaları haqqında” Azərbaycan Respublikasının Qanununa uyğun olaraq Nazirliyin seçdiyi ixtisaslaşmış yerli, yaxud xarici hüquqi və ya fiziki şəxslərlə bağlanılan satınalma müqaviləsi əsasında həyata keçirilir.
3.4. Hər bir bazar araşdırmasına görə ödənilən dəstək məbləği 30 000 (otuz min) manatdan artıq ola bilməz.
3.5. Bazar araşdırmasının aparılması barədə Nazirliyin rəsmi internet saytında ümumi məlumat yerləşdirilir, həmin araşdırmanın nəticələri sifariş vermiş ixracatçıya və Azərbaycan Respublikasının qeyri-neft məhsullarının digər ixracatçılarına əvəzsiz olaraq təqdim edilir.
4.1. “Made in Azerbaijan” brendinin xarici bazarlarda təşviqi və marketinq fəaliyyətinin dəstəklənməsi aşağıdakı tədbirlərdən ibarətdir:
4.1.1. beynəlxalq sərgi və yarmarkalarda vahid ölkə stendi ilə iştirak;
4.1.2. beynəlxalq sərgi və yarmarkalarda fərdi qaydada iştirak;
4.1.3. dövlət mülkiyyətində olan və ya səhmlərinin (paylarının) nəzarət zərfi dövlətə məxsus olan hüquqi şəxslər vasitəsilə “Made in Azerbaijan” brendinin təşviqi;
4.1.4. xarici ölkələrdə fəaliyyət göstərən mağazalarda və ya mağaza şəbəkələrində, o cümlədən rüsumsuz ticarət (“duty free”) mağazalarında “Made in Azerbaijan” rəflərinin təşkili;
4.1.5. xarici ölkələrin ictimai yerlərində və mediasında “Made in Azerbaijan” brendinin təbliği.
4.2. Beynəlxalq sərgi və (və ya) yarmarkalarda vahid ölkə stendi ilə iştirak aşağıdakı qaydada həyata keçirilir:
4.2.1. növbəti ildə ixracatçıların iştirakı nəzərdə tutulan sərgi və (və ya) yarmarkaların siyahısı və həmin sərgi və (və ya) yarmarkalarda iştirak edəcək ixracatçıların maksimum sayı, Azərbaycan Respublikasının iqtisadi və ticarət əlaqələri, Azərbaycan məhsullarının ixrac potensialı, habelə ixracatçılardan daxil olmuş müraciətlər nəzərə alınmaqla, hər il mayın 1-dən gec olmayaraq Nazirlik tərəfindən müəyyən edilir və onun rəsmi internet saytında yerləşdirilir;
4.2.2. beynəlxalq sərgi və (və ya) yarmarkalarda vahid ölkə stendi ilə iştirakla bağlı təşkilati işləri (sərgi və (və ya) yarmarkanın keçiriləcəyi məkanda yerin icarəsi, stendin hazırlanması, dizaynı və quraşdırılması, nümayiş etdiriləcək məhsulların daşınması, marketinq və reklam xərcləri, iştirakçıların qeydiyyatı, habelə sərgi və (və ya) yarmarkada iştirakın təşkili ilə bağlı digər xərclər) Nazirlik həyata keçirir.
4.3. Bu Qaydaya əsasən vahid ölkə stendi ilə iştirak edilən beynəlxalq sərgi və yarmarkaların cəmi təqvim ili ərzində 10-dan (ondan) artıq ola bilməz.
4.4. Xarici ölkələrdə təşkil edilən sərgi və (və ya) yarmarkalarda fərdi qaydada iştirak etmiş ixracatçılara müvafiq dəstək məbləğinin bu Qaydaya müvafiq surətdə ödənilməsi barədə qərar onlardan daxil olmuş müraciətlər əsasında Nazirliyin təsdiq etdiyi meyarlara uyğun olaraq qəbul edilir.
4.5. Bu Qaydaya uyğun olaraq beynəlxalq sərgi və ya yarmarkada fərdi qaydada iştirakla bağlı ixracatçılara ödənilən dəstək məbləğinə həmin sərgi və ya yarmarkanın keçirildiyi məkanda yerin icarəsinə, stendin hazırlanması, dizaynı və quraşdırılmasına, nümayiş etdiriləcək məhsulların daşınmasına çəkilən xərclər daxildir.
4.6. Bu Qaydaya əsasən beynəlxalq sərgi və ya yarmarkada fərdi qaydada iştirak edən ixracatçılara ödənilən dəstək məbləği bu Qaydanın 4.5-ci bəndində nəzərdə tutulan işlərə görə çəkilən xərclərin 50 (əlli) faizini 10 (on) min manatdan artıq olmamaqla) təşkil edir.
4.7. Dövlət mülkiyyətində olan və ya səhmlərinin (paylarının) nəzarət zərfi dövlətə məxsus olan hüquqi şəxslər tərəfindən “Made in Azerbaijan” brendinin təşviqi onların xarici ölkələrdə yerləşən nümayəndəlik və filialları vasitəsilə həyata keçirilir.
4.8. Xarici ölkələrdə fəaliyyət göstərən mağazalarda və ya mağaza şəbəkələrində, o cümlədən rüsumsuz ticarət (“duty free”) mağazalarında “Made in Azerbaijan” rəflərinin təşkili aşağıdakı qaydada həyata keçirilir:
4.8.1. “Made in Azerbaijan” rəflərinin yerləşdirilməsi nəzərdə tutulan xarici ölkələrdə fəaliyyət göstərən mağazaların və ya mağaza şəbəkələrinin, o cümlədən rüsumsuz ticarət mağazalarının siyahısı, Azərbaycan Respublikasının iqtisadi və ticarət əlaqələri, Azərbaycan məhsullarının ixrac potensialı, habelə ixracatçılardan daxil olmuş müraciətlər nəzərə alınmaqla, Nazirlik tərəfindən müəyyən edilir və rəflərin yerləşdirilməsinə dair xarici ölkələrin müvafiq fiziki və hüquqi şəxsləri ilə razılaşma əldə edildikdən sonra Nazirliyin rəsmi internet saytında dərc edilir;
4.8.2. “Made in Azerbaijan” rəflərinin yerləşdirilməsi nəzərdə tutulan xarici ölkələrdə fəaliyyət göstərən mağazaların və ya mağaza şəbəkələrinin, o cümlədən rüsumsuz ticarət mağazalarının siyahısının müəyyənləşdirilməsi meyarlarını Nazirlik təsdiq edir;
4.8.3. bu Qaydaya uyğun olaraq “Made in Azerbaijan” rəflərinin yerləşdirilməsi nəzərdə tutulan xarici ölkələrdə fəaliyyət göstərən mağazaların və ya mağaza şəbəkələrinin, o cümlədən rüsumsuz ticarət mağazalarının sayı təqvim ili ərzində 5-dən (beşdən) artıq ola bilməz;
4.8.4. bu Qaydanın 4.8.1-ci yarımbəndinə uyğun olaraq müəyyən edilən xarici ölkələrdə fəaliyyət göstərən mağazalarda və ya mağaza şəbəkələrində, o cümlədən rüsumsuz ticarət mağazalarında yerləşdirilməsi nəzərdə tutulan məhsulların siyahısını Nazirlik müəyyən edir;
4.8.5. bu Qaydanın 4.8.1-ci yarımbəndinə uyğun olaraq müəyyən edilən xarici ölkələrdə fəaliyyət göstərən mağazalarda və ya mağaza şəbəkələrində, o cümlədən rüsumsuz ticarət mağazalarında “Made in Azerbaijan” rəfləri həmin mağaza və ya mağaza şəbəkələri sahibləri ilə Nazirlik arasında bağlanan müqavilə əsasında yerləşdirilir. Bu müqaviləni Nazirlik adından bağlamaq hüququ üçüncü şəxslərə verilə bilər.
4.9. Xarici ölkələrdə fəaliyyət göstərən mağazalarda və ya mağaza şəbəkələrində, o cümlədən rüsumsuz ticarət mağazalarında “Made in Azerbaijan” rəflərinin yerləşdirilməsi ilə bağlı ödənilən dəstək məbləğinə yerlərin icarəyə götürülməsi və idarə olunması, həmin rəflərdə yerləşdiriləcək malların daşınması və gömrük rəsmiləşdirilməsi xərcləri daxildir.
4.10. Xarici ölkələrin ictimai yerlərində və mediasında “Made in Azerbaijan” brendinin təbliği aşağıdakı qaydada həyata keçirilir:
4.10.1. “Made in Azerbaijan” brendi təşviq ediləcək xarici ölkələr, həmin ölkələrdə reklam yerləşdiriləcək ictimai yerlər və media subyektləri Nazirlik tərəfindən təsdiq edilən meyarlar əsasında müəyyən edilir;
4.10.2. “Made in Azerbaijan” brendi təşviq ediləcək xarici ölkələrin ictimai yerlərində və mediasında reklam yerləşdirilməsi Nazirliklə bağlanan müqavilə əsasında həyata keçirilir. Bu müqaviləni Nazirlik adından bağlamaq hüququ üçüncü şəxslərə verilə bilər.
4.11. Xarici ölkələrin ictimai yerlərində və mediasında “Made in Azerbaijan” brendinin təşviq edilməsi ilə bağlı ödənilən dəstək məbləğinə reklam kampaniyalarının hazırlanması və aparılması ilə bağlı xərclər daxildir. Bu kampaniyaların və onların aparılması strategiyasının hazırlanması “Dövlət satınalmaları haqqında” Azərbaycan Respublikasının Qanununa uyğun olaraq Nazirliyin seçdiyi ixtisaslaşmış hüquqi və ya fiziki şəxslərlə bağlanılan satınalma müqaviləsi əsasında həyata keçirilir.
5.1. Beynəlxalq sertifikatın alınmasına dəstək tədbirini müvafiq beynəlxalq sertifikatla əhatə olunan məhsulun (məhsulların) ixracatçılarının sifarişi əsasında və “Dövlət satınalmaları haqqında” Azərbaycan Respublikasının Qanununa uyğun olaraq Nazirliyin seçdiyi ixtisaslaşmış hüquqi və ya fiziki şəxslər həyata keçirirlər. Hər il fevralın 1-dək beynəlxalq sertifikatın alınmasına dəstəklə bağlı ixracatçılardan sifarişlərin qəbuluna dair elan verilir və müraciət edilməsi üçün ən azı 60 (altmış) günlük müddət müəyyən olunur.
5.2. Bu Qaydanın 5.1-ci bəndində nəzərdə tutulmuş dəstək tədbirindən bir ixracatçı eyni təqvim ili ərzində yalnız bir beynəlxalq sertifikatın alınması üçün faydalana bilər.
5.3. Bu Qaydanın 5.1-ci bəndində nəzərdə tutulmuş dəstək tədbiri çərçivəsində alınmasına dəstək verilən beynəlxalq sertifikatların siyahısını Nazirlik müəyyən edir və özünün rəsmi internet saytında yerləşdirir.
5.4. Hər bir ixracatçı üçün beynəlxalq sertifikatın alınmasına görə ödənilən dəstək məbləği çəkilən xərclərin 50 (əlli) faizini (60 000 (altmış min) manatdan artıq olmamaqla) təşkil edir.
5.5. Bu Qaydanın 5.1-ci bəndində nəzərdə tutulmuş dəstək tədbiri çərçivəsində beynəlxalq sertifikat əldə etmiş ixracatçı sertifikatla əhatə olunan məhsulu (məhsulları) sertifikatı əldə etdiyi tarixdən etibarən ixrac etməli və bu barədə məlumatları və sənədləri (Azərbaycan Respublikasından ixrac və digər dövlətə idxal gömrük bəyannamələrinin surətlərini) müvafiq ixrac əməliyyatlarının aparıldığı tarixdən etibarən 30 (otuz) gündən gec olmayaraq Nazirliyə təqdim etməlidir. İxracatçı beynəlxalq sertifikatla əhatə olunan məhsulun (məhsulların) ixracına dair məlumatları və sənədləri Nazirliyə təqdim etmədikdə və ya sertifikatın əldə olunduğu tarixdən 1 (bir) il ərzində sertifikatla əhatə olunan məhsulun (məhsulların) ixracını həyata keçirmədikdə, həmin sertifikatın əldə edilməsinə görə ödənilmiş dəstək məbləğini geri qaytarmalıdır.
6.1. Tədqiqat-inkişaf proqramları ixracatçıların sifarişi əsasında və “Dövlət satınalmaları haqqında” Azərbaycan Respublikasının Qanununa uyğun olaraq Nazirliyin seçdiyi ixtisaslaşmış yerli, yaxud xarici hüquqi və ya fiziki şəxslərlə bağlanılan satınalma müqaviləsi əsasında həyata keçirilir.
6.2. Tədqiqat-inkişaf proqramlarının təşkili ilə bağlı ixracatçılardan daxil olmuş sifarişlərin qiymətləndirilməsi meyarlarını Nazirlik müəyyən edir.
6.3. Hər bir tədqiqat-inkişaf proqramına görə ödənilən dəstək məbləği çəkilən xərclərin 50 (əlli) faizini (hər bir layihə üzrə 100 000 (yüz min) manatdan artıq olmamaqla) təşkil edir.
6.4. Təqvim ili ərzində keçirilən tədqiqat-inkişaf proqramlarının sayı 5-dən (beşdən) artıq ola bilməz.
7.1. Bu Qaydaya uyğun olaraq beynəlxalq sərgi və yarmarkalarda fərdi qaydada iştirakla bağlı dəstək məbləği aşağıdakı qaydada ödənilir:
7.1.1. beynəlxalq sərgi və yarmarkalarda fərdi qaydada iştirakı başa çatdığı tarixdən 30 (otuz) iş günü müddətində ixracatçı dəstək məbləğini əldə etmək məqsədi ilə “İnzibati icraat haqqında” Azərbaycan Respublikası Qanununun 29-cu və 30-cu maddələrində nəzərdə tutulmuş qaydada Nazirliyə ərizə təqdim edir;
7.1.2. ərizəyə görülmüş işi, göstərilmiş xidməti və ya icarə haqqını təsdiq edən sənədin (hesab-faktura (invoys), bağlanmış müqavilənin, vəsaitin ödənilməsini və ya xərcin çəkilməsini təsdiq edən sənədin əsli və ya notarial qaydada təsdiq olunmuş surəti, beynəlxalq sərgi və ya yarmarkada fərdi qaydada iştirakla bağlı yazılı, foto və ya video hesabat əlavə edilir;
7.1.3. Nazirlik ərizəyə və ona əlavə olunmuş sənədlərə “İnzibati icraat haqqında” Azərbaycan Respublikasının Qanununa uyğun olaraq 30 (otuz) iş günü müddətində və bu Qaydanın 4.4-cü bəndinə uyğun olaraq təsdiq edilmiş meyarlar əsasında baxır. Nazirlik ərizənin qeydiyyata alındığı tarixdən etibarən 2 (iki) iş günü müddətində ərizənin və ona əlavə edilmiş sənədlərin bu Qaydanın 7.1.1-ci və 7.1.2-ci yarımbəndlərinin tələblərinə uyğunluğunu yoxlayır. Ərizə və ona əlavə edilmiş sənədlər həmin yarımbəndlərin tələblərinə cavab vermədikdə, Nazirlik ərizə və ona əlavə olunmuş sənədlərdəki çatışmazlıqların aradan qaldırılması barədə bildirişi ərizəçiyə təqdim edir və ya sifarişli poçt göndərişi vasitəsilə göndərir və formal tələblərə əməl olunmamasının hüquqi nəticələrini ona izah edir. Bütün çatışmazlıqlar ərizəçiyə eyni zamanda bildirilməlidir;
7.1.4. ərizəçi həmin çatışmazlıqları məlumatı aldığı vaxtdan ən geci 10 (on) iş günü müddətində aradan qaldırmalıdır. Bu zaman ərizəyə baxılması ilə bağlı müddətin axımı dayandırılır. Çatışmazlıqların aradan qaldırılması barədə ərizəçinin müraciətindən sonra müddətin axımı bərpa olunur;
7.1.5. ixracatçıya dəstək məbləğinin ödənilməsi haqqında qərar qəbul edildiyi gündən 20 (iyirmi) iş günü müddətində Nazirlik dəstək məbləğini müraciət edən şəxsin bank hesabına köçürür;
7.1.6. dəstək məbləği manatla ödənilir. Xarici valyuta ilə çəkilmiş xərcin hesablanması ödənişi təsdiq edən sənədlərdə göstərilən tarixdə Azərbaycan Respublikasının Mərkəzi Bankı tərəfindən müəyyən olunmuş valyuta məzənnəsinə uyğun aparılır.
7.2. Bu Qaydanın 3-cü, 5-ci və 6-cı hissələrində, habelə 4.2-ci, 4.8-ci və 4.10-cu bəndlərində nəzərdə tutulmuş dəstək tədbirlərinə görə dəstək məbləği Nazirliklə dəstək tədbirini həyata keçirəcək şəxs arasında bağlanmış müqaviləyə əsasən ödənilir.
7.3. Dövlət mülkiyyətində olan və ya səhmlərinin (paylarının) nəzarət zərfi dövlətə məxsus olan hüquqi şəxslər vasitəsilə “Made in Azerbaijan” brendinin təşviqi ilə bağlı çəkilən xərclərə görə dəstək məbləği onların təqdim etdiyi hesablamalar və təsdiqedici sənədlər əsasında, sənədlər təqdim edildiyi gündən 20 (iyirmi) iş günü müddətində Nazirlik tərəfindən ödənilir.
8.1. 2017-ci ildə ixracatçıların vahid ölkə stendi ilə iştirakı nəzərdə tutulan beynəlxalq sərgi və (və ya) yarmarkaların siyahısı və həmin sərgi və (və ya) yarmarkalarda iştirak edəcək ixracatçıların maksimum sayı bu Qayda qüvvəyə mindiyi tarixdən 30 (otuz) gün müddətində Nazirlik tərəfindən müəyyən olunur və Nazirliyin rəsmi internet saytında yerləşdirilir.
8.2. Bu Qaydanın 8.1-ci bəndində nəzərdə tutulmuş siyahı və say müəyyən olunduqdan sonra 50 (əlli) iş günü müddətində 2017-ci ildə beynəlxalq sərgi və ya yarmarkalarda vahid ölkə stendi ilə iştirak edəcək ixracatçıların müəyyənləşdirilməsi üçün Nazirlik tərəfindən müsabiqə elan olunur və elan Nazirliyin rəsmi internet saytında yerləşdirilir.
Qeyri-neft sektoru üzrə ixrac edilmiş Azərbaycan mənşəli məhsullar (min manatla)
Avropa İttifaqı ölkələri üzrə
Digər xarici ölkələr üzrə
İxrac təşviqi şamil olunan ixrac edilmiş Azərbaycan mənşəli məhsullar (min manatla)
Azərbaycan mənşəli qeyri-neft məhsullarının ixracının stimullaşdırılması ilə bağlı dövlət büdcəsinin vəsaiti hesabına ödənilən xərclər (min manatla)
Xarici ölkələrə ixrac missiyalarının təşkili üzrə
Azərbaycan ərazisinə alıcı missiyalarının təşkili üzrə
Xarici bazarların araşdırılması və marketinq fəaliyyəti üzrə
“Made in Azerbaijan” brendinin xarici bazarlarda təşviqi üzrə
Beynəlxalq sertifikat alınması üzrə
İxracla əlaqəli tədqiqat-inkişaf proqram və layihələri üzrə
dövlət büdcəsinin vəsaiti hesabına ödənilən ixrac təşviqi xərcləri
Azərbaycan Biznesinin İnkişafı Fondunun vəsaitləri hesabına ixracyönümlü istehsala verilən güzəştli kreditlər (min manatla)
Qeyri-neft sektoru üzrə Azərbaycan mənşəli məhsulların ixracı nəticəsində ölkəyə daxil olmuş valyuta (min ABŞ dolları ilə)
Azərbaycan mənşəli ixracyönümlü məhsul və xidmətlərin xarici bazarlarda təşviqi məqsədi ilə müvafiq beynəlxalq tədbirlərdə ölkə ixracatçılarının iştirakının təmin edilməsi, habelə ixrac üçün potensial və perspektivli sayılan ölkələrdə həyata keçirilmiş (iştirak edilmiş) müvafiq sərgilər, forumlar və digər təşviqat tədbirləri barədə
Qeyri-neft sektoru üzrə ixrac olunmuş Azərbaycan mənşəli məhsul çeşidlərinin sayı
Qeyri-neft sektoru üzrə Azərbaycan mənşəli məhsulların ixrac olunduğu ölkələrin sayı
11 yanvar 2018-ci il tarixli 1784 nömrəli Azərbaycan Respublikası Prezidentinin Fərmanı (“Xalq” qəzeti, 12 yanvar 2018-ci il, № 7, Azərbaycan Respublikasının Qanunvericilik Toplusu, 2018-ci il, № 1, maddə 40)
27 noyabr 2018-ci il tarixli 374 nömrəli Azərbaycan Respublikası Prezidentinin Fərmanı (Azərbaycan Respublikasının Qanunvericilik Toplusu, 2018-ci il, № 11, maddə 2287)
30 may 2024-cü il tarixli 77 nömrəli Azərbaycan Respublikası Prezidentinin Fərmanı (Azərbaycan Dövlət İnformasiya Agentliyinin (AZƏRTAC-ın) rəsmi internet saytı, 30 may 2024-cü il, “Azərbaycan” qəzeti, 31 may 2024-cü il, № 113, Azərbaycan Respublikasının Qanunvericilik Toplusu, 2024-cü il, № 5, I kitab, maddə 529)
22 iyul 2025-ci il tarixli 448 nömrəli Azərbaycan Respublikası Prezidentinin Fərmanı (Azərbaycan Dövlət İnformasiya Agentliyinin (AZƏRTAC-ın) rəsmi internet saytı, 22 iyul 2025-ci il, “Xalq” qəzeti, 23 iyul 2025-ci il, № 150, Azərbaycan Respublikasının Qanunvericilik Toplusu, 2025-ci il, № 7, maddə 651)
FƏRMANA EDİLMİŞ DƏYİŞİKLİK VƏ ƏLAVƏLƏRİN SİYAHISI