Gəncə İnzibati Məhkəməsi Qərar — İş №2-1(114)-2006/2020

Azərbaycan Respublikası adından QƏRAR Gəncə şəhəri İş № 2-1(114)-2006/2020 18.11.2020 GƏNCƏ İNZİBATİ MƏHKƏMƏSİ Gəncə İnzibati Məhkəməsinin hakimi Hüseynov Fikrət Cilingir oğlunun sədrliyi, Kərimov Elvin Cəfər oğlunun katibliyi ilə, İddiaçı cavabdeh Azərbaycan Respublikası Müdafiə Nazirliyi Gəncə rayonu Mənzil- İstismar Hissəsinə qarşı mənzil kirayə müqaviləsinin bağlanması ilə əlaqədar inzibati aktın qəbul edilməsi vəzifəsinin cavabdehin üzərinə qoyulması tələbinə dair işə məhkəmənin binasında, açıq məhkəmə iclasında baxaraq məhkəmə, aşağıdakı qərarı qəbul etdi. Təsviri hissə: İddiaçı cavabdeh Azərbaycan Respublikası Müdafiə Nazirliyi Gəncə rayonu Mənzil- İstismar Hissəsinə qarşı iddia ərizəsi ilə xx.xx.2020-cu il tarixdə Gəncə İnzibati Məhkəməsinə müraciət edərək, ünvan 1 ünvanında yerləşən 7 nömrəli mənzilə dair onun adına mənzilin kirayə müqaviləsinin bağlanması və maliyyə şəxsi hesab vərəqəsinin açılması vəzifəsinin cavabdehin üzərinə qoyulması barədə qərar çıxarılmasını xahiş etmişdir. Tələbi onunla əsaslandırılmışdır ki, Qazax şəhəri, 3 saylı hərbi şəhərcik, H. Arif küçəsi, bina 2, mənzil 7 Azərbaycan Respublikası Müdafiə Nazirliyi Gəncə rayonu Mənzil- İstismar Hissəsinin balansındadır. Mənzil 1 (bir) otaqlı olmaqla 20,0 kv.m yaşayış sahəsindən ibarətdir. 2002-ci il tarixdə N nömrəli hərbi hissə komandirinin rəsmi razılıq məktubu əsasında yerləşmişdir. Həmin vaxtdan bu günə kimi ailə üzvlərilə birlikdə adı çəkilən mənzildə yaşayırlar. xx.xx.2002-ci il tarixdən xx.xx.2004-cü il tarixədək N nömrəli hərbi hissənin N saylı hərbi şəhərciyinin zabit yataqxanasının növbətçisi vəzifəsində işləmişdir. İddiaçı sözügedən mənzilə dair onun adına kirayə müqaviləsinin bağlanması və maliyyə şəxsi hesab vərəqəsinin açılması üçün Gəncə rayon Mənzil-İstismar Hissəsinə dəfələrlə şifahi və yazılı müraciətlər etsə də, sonuncu bundan imtina etmişdir. İddiaçı xx.xx.2020-ci il tarixdə məhkəməyə ərizə təqdim edərək ünvan 1, mənzil 7 ünvanında yerləşən mənzilə dair onunla kirayə müqaviləsinin bağlanması ilə əlaqədar inzibati aktın qəbul edilməsi vəzifəsinin cavabdehin üzərinə qoyulması barədə qərar qəbul edilməsini xahiş etmiş, qeyd olunan ərizə məhkəməmənin xx.xx.2020-ci il tarixli qərardadı ilə icraata qəbul edilmişdir. Məhkəmə iclasının yeri və vaxtı barədə iş üzrə tərəflərə məlumat verilməsinə baxmayaraq iddiaçı gəlməmiş, cavabdeh isə nümayəndəsinin iştirakını təmin etməmiş, səbəbləri barədə məlumat verməmişdir. Məhkəmə Azərbaycan Respublikası İnzibati Prosessual Məcəllənin 62.3-cü maddəsinə əsasən işə tərəflərin iştirakı olmadan baxılmasını mümkün hesab etmişdir. Məhkəmə araşdırmasının predmetini təşkil etmişdir: -Qazax RİHB-nin Yuxarı Salahlı kənd İƏD üzrə nümayəndəliyinin xx.xx.2020-ci il tarixli, 11-21/618 nömrəli arayışından görünür ki, İddiaçı adına Qazax rayon Yuxarı Salahlı kəndində yasşayış evi və həyətyanı torpaq sahəsi yoxdur. -Azərbaycan Respublikası Müdafiə Nazirliyi N nömrəli hərbi hissənin xx.xx.2020-ci il tarixli, 50 nömrəli arayışında bildirilir ki, İddiaçı həqiqətən 2002-ci ildən müvəqqəti olaraq sənədsiz N nömrəli hərbi hissənin mənzil fonduna aid Qazax-3 nömrəli hərbi yaşayış şəhərciyində-ünvan 2 ünvanında yaşayır. -Qazax Rayon İcra Hakimiyyəti Mənzil İstismar Sahəsinin xx.xx.2020-ci il tarixli, 11- 17/647 nömrəli arayışından görünür ki, İddiaçı həqiqətən Qazax şəhəri Mənzil İstismar Sahəsinin balansında olan mənzildə yaşamamaqla onun adına komunal mənzil yoxdur. -Azərbaycan Respublikası Müdafiə Nazirliyi N nömrəli hərbi hissənin xx.xx.2018-ci il tarixli, 228 nömrəli arayışında bildirilir ki, İddiaçı xx.xx.2002-ci il tarixdən xx.xx.2004-cü il tarixədək N nömrəli hərbi hissənin N saylı hərbi şəhərciyinin zabit yataqxanasının növbətçisi vəzifəsində işləmişdir. -Azərbaycan Respublikası Müdafiə Nazirliyi Gəncə rayonu Mənzil-İstismar Hissəsinin xx.xx.2020-ci il tarixli 951 nömrəli məktubundan görünür ki, mövcud qanunvericiliyə əsasən yaşayış sahəsi ilə ilk novbədə zabit, gizir heyəti təmin edildiyindən və İddiaçı mülki şəxs olduğundan yaşadığı mənzilin onun adına sənədləşdirilməsindən imtina edilmişdir. Əsaslandırma hissəsi: Məhkəmə iş üzrə təqdim olunmuş sənədləri hərtərəfli araşdıraraq, mübahisə ilə bağlı inzibati məhkəmə icraatı nəticəsində onda yaranmış daxili inam əsasında hesab edir ki, iddia təmin edilməlidir. İddia mümkün iddiadır. Belə ki, baxılan iş Azərbaycan Respublikası İnzibati Prosessual Məcəllənin 1.1-ci maddəsində nəzərdə tutulmuş mənada inzibati mübahisədir ki, buna baxmaq səlahiyyəti inzibati məhkəmələrə aiddir. İddiaçı həmin Məcəllənin 33-cü maddəsinə əsasən məcburetmə haqqında iddia qaldırmışdır. İddia mümkün iddia olmaqla yanaşı mahiyyət baxımından da əsaslıdır. Belə ki, iş materialları ilə müəyyən olunur ki, iddiaçı xx.xx.2002-ci il tarixdən xx.xx.2004-cü il tarixədək N nömrəli hərbi hissənin N saylı hərbi şəhərciyinin zabit yataqxanasının növbətçisi vəzifəsində işləmişdir. Hazırda iddiaçı hərbi hissədə işlədiyi dövrdə və hazırda yaşadığı mənzilə dair onunla kirayə müqaviləsinin bağlanması məsələsinə baxılmasını tələb etsə də cavabdeh orqan “İnzibati İcraat haqqında” Qanunun tələblərinə zidd olaraq yaşayış sahəsi ilə ilk növbədə zabit, gizir heyətinin təmin edildiyini, iddiaçının isə mülki şəxs olduğunu əsas gətirərək onun ərizəsinin təmin edilməsindən imtina etməsi barədə məktubla cavab verməklə kifayətlənmişdir. Məhkəmə cavabdehin qeyd olunan imtinası ilə bağlı aşağıdakıların qeyd olunmasını zəruri hesab edir. “Hərbi qulluqçuların statusu haqqında” Azərbaycan Respublikası Qanununun:- -12.1-ci maddəsinə əsasən hərbi qulluqçunun (müddətli həqiqi hərbi xidmət hərbi qulluqçularından başqa) xidmət yerinə gəlməsindən ən geci 3 ay keçənədək ona və onunla birlikdə yaşayan ailə üzvlərinə Azərbaycan Respublikasının qanunvericiliyi ilə müəyyən edilmiş normalara uyğun gələn xidməti mənzil verilir. Xidməti mənzil Azərbaycan Respublikası Müdafiə Nazirliyinin, başqa mərkəzi icra hakimiyyəti orqanlarının və yerli icra hakimiyyəti başçılarının fondlarından ayrılır. Mövcud mənzil qanunvericiliyinin tələblərinə əsasən dövlət orqanları və bələdiyyələr öz səlahiyyətləri daxilində mənzil hüquqlarının həyata keçirilməsi üçün şərait yaradır və bu məqsədlə müəyyən edilmiş qaydada sosial kirayə müqavilələri əsasında və ya dövlət və ya bələdiyyə mənzil fondu yaşayış sahələrinin kirayə müqavilələri əsasında vətəndaşları yaşayış sahələri ilə təmin edir. Azərbaycan Respublikası Mənzil Məcəlləsinin:- -48.1-ci maddəsinə əsasən sosial kirayə müqavilələri əsasında bu Məcəllə ilə və digər qanunvericilik aktları ilə müəyyən edilmiş əsaslarla yaşayış sahələrinə ehtiyacı olan hesab edilən aztəminatlı vətəndaşlara, o cümlədən sosial müdafiəyə ehtiyacı olan aztəminatlı gənclərə dövlət və ya bələdiyyə mənzil fondunun yaşayış sahələri verilir. 62.1-ci maddəsinə əsasən yaşayış sahəsinin sosial kirayə müqaviləsi dövlət və ya bələdiyyə mənzil fondunun yaşayış sahəsinin verilməsi haqqında qərara əsasən yazılı formada bağlanır. “İnzibati İcraat haqqında” Azərbaycan Respublikası Qanununun:- -20.1-ci maddəsinə əsasən hər bir şəxsin onun hüquq və qanuni maraqlarına bilavasitə aid olan məsələlərlə bağlı inzibati orqana müraciət etmək, vəsatət vermək və ya inzibati orqandan məlumat əldə etmək hüququ vardır. -20.2. Qanunda başqa qayda nəzərdə tutulmamışdırsa, inzibati orqan onun səlahiyyətlərinə aid olan məsələlər üzrə müraciətlərə baxmağa, həmin müraciətlər üzrə müvafiq qərar qəbul etməyə və ya məlumat verməyə borcludur. -24.1. İnzibati orqan inzibati icraat zamanı işin düzgün həlli üçün əhəmiyyət kəsb edən bütün faktiki halları hərtərəfli, tam və obyektiv araşdırmağa borcludur. -28. fiziki və hüquqi şəxslərin ərizəsi inzibati icraatın başlanması üçün əsaslardan biridir. -57.4. Bu Qanunun 57.3-cü maddəsinə əsasən şifahi və ya digər anlaşılan formada (başa düşülən digər formada) qəbul edilmiş inzibati akt ünvanlandığı şəxsin və ya digər maraqlı şəxsin hüquq və qanunla qorunan maraqlarını məhdudlaşdırdıqda elan olunduğu vaxtdan 5 gün müddətində yazılı formada təsbit olunmalıdır: -61.1. Yazılı formada təsbit olunmuş inzibati akt yazılı şəkildə əsaslandırılmalıdır. -61.2. Əsaslandırma zamanı işin faktiki və hüquqi halları və bu halları təsdiq və ya rədd edən sübutlar, habelə inzibati akt qəbul edilərkən istinad olunan qanunlar və digər normativ hüquqi aktlar göstərilməlidir. -61.4. İnzibati orqan qəbul etdiyi aktı yalnız icraat zamanı tədqiq olunmuş faktlar və sübutlarla əsaslandırmağa borcludur. Qeyd olunan normaların məzmunundan göründüyü kimi inzibati orqan yaşayış sahəsinə ehtiyacı olan şəxsin müarciətinə əsasən inzibati icraat başlamalı, müraciəti ətraflı araşdırmalı və müvafiq qərar qəbul etməlidir. Buna baxmayaraq hazırki iş üzrə cavabdeh qeyd edilən tələblərə zidd olaraq heç bir araşdırma aparmadan iddiaçıya qısa məzmunlu məktubla cavab vermişdir. Beləliklə, məhkəmə yuxarıda qeyd edilən maddi hüquq normalarına, iş materiallarına və öz daxili inamına əsaslanaraq hesab edir ki, iddiaçının tələbi əsaslıdır. Azərbaycan Respublikası İnzibati-Prosessual Məcəlləsinin 68.1 maddəsininə əsasən məhkəmə mübahisə ilə bağlı iş üzrə inzibati məhkəmə icraatı nəticəsində onda yaranmış daxili inam əsasında qərar qəbul edir. Qərarda məhkəmənin mövqeyi üçün əsas olmuş səbəblər göstərilməlidir. N ə t i c ə v i h i s s ə: Qeyd olunanlara əsaslanaraq və Azərbaycan Respublikası İnzibati-Prosessual Məcəlləsinin 2, 33, 68, 69, 73, 75, 78, 81 və 85-ci maddələrini rəhbər tutaraq məhkəmə qərar aldı: İddia təmin edilsin. ünvan 1, mənzil 7 ünvanında yerləşən mənzilə dair İddiaçı ilə mənzil kirayə müqaviləsinin bağlanması ilə əlaqədar inzibati aktın qəbul edilməsi vəzifəsi Azərbaycan Respublikası Müdafiə Nazirliyi Gəncə rayonu Mənzil-İstismar Hissəsinin üzərinə qoyulsun. Qərardan şikayət verilmədiyi və ya proses iştirakçıları tərəfindən şikayətin geri götürüldüyü hallarda məhkəmə qərarı onun təqdim olunduğu gündən 30 (otuz) gün keçdikdən sonra qanuni qüvvəyə minir. Qərardan, onun tam formada təqdim olduğu gündən 30 (otuz) gün müddətində Gəncə İnzibati Məhkəməsi vasitəsi ilə Gəncə Apelyasiya Məhkəməsinə apelyasiya şikayəti verilə bilər. Sədrlik edən: Fikrət Hüseynov