Azərbaycan Respublikası adından QƏRAR Gəncə şəhəri İş № 2-1(114)-434/2025 02.05.2025 GƏNCƏ İNZİBATİ MƏHKƏMƏSİ Hakim Əliyeva Leyla Kamil qızının sədrliyi, Fərəcova Tamilla Məhərrəm qızının katibliyi, İddiaçı nümayəndəsi və vəkili Vəkil və cavabdehin nümayəndəsi X1 iştirakı ilə, İddiaçı (bundan sonra mətndə - iddiaçı) cavabdeh Daşınmaz Əmlakın Dövlət Kadastrı və Reyestri publik hüquqi şəxsin 3 saylı Gəncə Ərazi İdarəsinə (bundan sonra mətndə - cavabdeh) (üçüncü şəxs Göygöl rayonu Hacıməlik bələdiyyəsi) qarşı “mülkiyyət hüququnun daşınmaz əmlakın dövlət reyestrində qeydiyyata alınması” tələbinə dair işə məhkəmənin binasında açıq şifahi məhkəmə baxışı iclasında baxaraq aşağıdakı qərarı qəbul etdi. Təsviri hissə: Göygöl rayonu Hacıməlik bələdiyyəsinin 08 sentyabr 2014-cü il tarixli, 05 saylı qərarına əsasən həyətyanı torpaq sahəsindən fərdi yaşayış evinin tikintisi məqsədilə 0,08 ha torpaq sahəsinin İddiaçı satılması qərara alınmışdır. Torpaqların alqı-satqısına dair akt tərtib edilmiş, akt xx.xx.2014-ci il tarixdə Göygöl rayon torpaq şöbəsində 1149 nömrə ilə qeydiyyata alınmışdır. Dövlət Torpaq və Xəritəçəkmə Komitəsinin Göygöl rayon şöbəsi tərəfindən tərtib edilmiş rəyə əsasən Hacıməlik bələdiyyəsinin mülkiyyətinə aid olan fərdi ev tikintisi məqsədilə alqı-satqı yolu ilə satışa çıxarılan 800 kv.m və ya 0,08 hektar torpaq sahəsi ilə əlaqədar bildirilir ki, həmin torpaq sahəsi bələdiyyənin mülkiyyətinə aiddir və alqı-satqı predmeti olmaqla, uqodiyası KPİ keyfiyyət qrupuna aid olmaqla 100 ballı torpaq sahəsidir. Alqı-satqı yolu ilə satışa çıxarılan torpaq sahəsinin məqsədi təyinatı ərazinin yerquruluşu təsərrüfat planına, yaşayış məntəqələrinin baş planına, ərazinin planlaşdırılması və tikintisi layihələrinə uyğundur. Həmin yer başqa hüquqi və fiziki şəxslərin mülkiyyətinə verilməmişdir. Elektirik, rabitə, nəqliyyat, qaz. su. kanalizas yu və digər kommunikasiya xətlərinin mühafizə zolağına və sürüşmə zonasında yerləşmir. xx.xx.2014-ci il tarixli 03 nömrəli qəbz ilə müəyyən edilir ki, İddiaçı tərəfindən torpaq satışı ilə bağlı Göygöl rayonu Hacıməlik bələdiyyəsi hesabına 508 manat məbləğində ödəniş edilmişdir. İddiaçı torpaq sahəsi üzərində hüquqların qeydiyyata alınması ilə bağlı Daşınmaz Əmlakın Dövlət Kadastrı və Reyestri publik hüquqi şəxsinin 3 saylı Gəncə Ərazi İdarəsinə etdiyi müraciətinə idarənin xx.xx.2023-cü il tarixli 3-21-3-33/2- 11055/2023 nömrəli imtina məktubundan görünür ki, ərizəyə əlavə edilmiş sənədlərin araşdırılması zamanı qanunvericiliyin tələblərinə uyğun olmadığı, belə ki, Göygöl rayon Hacıməlik bələdiyyəsinin xx.xx.2014-cü il tarixli, 05 nömrəli qərarı və xx.xx.2014-cü il tarixli, 1149 saylı “Torpaqların alqı-satqısına dair” Aktının xx.xx.2007-ci il tarixindən sonra tərtib edildiyi müəyyən edilmişdir. Bu səbəbdən ərizənin icrası mümkün olmamışdır. Məlumat üçün bildirilir ki, “Bələdiyyə torpaqlarının idarə edilməsi haqqında” Azərbaycan Respublikası Qanununun 9.6-cı maddəsinə əsasən “Bələdiyyə torpaqlarının özgəninkiləşdirilməsi, icarəyə verilməsi müvafiq müqavilə ilə rəsmiləşdirilir”. Həmin Qanunun 6.2-ci maddəsinə uyğun olaraq yaşayış evinin inşa edilməsi məqsədilə torpaq sahəsinin ayrılması barədə “Bələdiyyənin qərarı və alqı-satqı (aktla tərtib edilmiş) müqaviləsi” tələb olunur. xx.xx.2007-ci il tarixindən sonra isə hərrac protokolu və hərracın nəticələrinə uyğun olaraq bağlanmış alqı-satqı müqaviləsi tələb olunur. İmtina ilə razılaşmayan iddiaçı cavabdehə qarşı iddia ərizəsi ilə məhkəməyə müraciət edərək Göygöl rayon Hacıməlik qəsəbəsində yerləşən 0,08 ha həyətyanı torpaq sahəsi üzərində mülkiyyət hüququnun daşınmaz əmlakın dövlət reyestrində qeydiyyata alınaraq bu barədə müvafiq çıxarışın verilməsi öhdəliyinin cavabdehin üzərinə qoyulmasını xahiş etmişdir. Cavabdeh iddiaya dair etirazını təqdim etmişdir. Etirazda imtina əsasları təkrarlanmış və əlavə olaraq qeyd edilmişdir ki, Göygöl rayonu, Hacıməlik bələdiyyəsinin xx.xx.2014-cü il tarixli, 05 saylı qərarı və xx.xx.2014-cü il tarixli, 1149 saylı “Torpaqların alqı-satqısına dair” Aktının xx.xx.2007-ci il tarixindən sonra tərtib edildiyi, o cümlədən müraciətə torpaq sahəsinə dair koordinat arayışı və ya yerqurluşu planı təqdim edilmədiyi, beləliklə təqdim edilən sənədlərin torpaq sahəsi üzərində hüquqların qeydiyyatı üçün əsas olmadığı müəyyən edilmişdir. Bu səbəbdən müraciətin icrası tərəfimizdən mümkün olmamışdır. Bununla yanaşı araşdırma zamanı, mübahisəli torpaq sahəsinin Ərazi İdarəsinin elektron xəritə məlumatlarına əsasən yaşayış məntəqələri torpağında, bələdiyyə mülkiyyətinə aid kəndin perspektiv inkişafı üçün nəzərdə tutulan torpaqlara düşdüyü aşkar edilmişdir. xx.xx.2025-ci il tarixli mütəxəssis rəyində məhkəmənin sualları aşağdakı şəkildə cavablandırılmışdır.
1. Göygöl rayon Haçıməlik bələdiyyəsinin 08 sentyabr 2014-cü il tarixli, 05 saylı qərarı ilə İddiaçı satılmış 0.08 ha torpaq sahəsinin naturada yerləşmə vəziyyəti və koordinatları (X və Y) əks olunmuş plan ölçü sənədi daxil olmuş iş materiallarında mövcud olmadığından, aparılan araşdırma zamanı, naturada təqdim olunan sahəyə əsaslanılmışdır, iddia olunaraq naturada təqdim olunan 0.08 ha torpaq sahəsinin yerləşdiyi ərazi, Göygöl rayonu Hacıməlik qəsəbəsi ərazisində aparılmış torpaq islahatına dair tərtib olunmuş 2004-cü ıl tarixli, ərazinin kompleks yerquruluşu layihəsinin elektron fayl materialında, kəndin yaşayış məntəqəsinin perespektiv inkişaf üçün nəzərdə tutan sahə və eyni zamanda örüş sahəsi olaraq göstərilmişdir. Həmin sahənin yerləşdiyi ərazi, Hacıməlik bələdiyyəsinin hüdudlarında bələdiyyə mülkiyyətinə verilmiş torpaqlara dair 2005-ci il tarixli yerquruluşu sxeminin (KOD ********) elektron fayl materialında, bələdiyyə mülkiyyətində olan, örüş sahəsi olaraq göstərilmişdir. Hal-hazırda, Torpaqların elektron kadastr uçotu informasiya sistemində (TEKUİS) və AZCAD məlumatlarında, naturada təqdim olunan 0.08 ha torpaq sahəsinin yerləşdiyi ərazi bələdiyyə mülkiyyətində olan, yaşayış məntəqələrinin torpaqları kateqoriyasına aid prespektiv inkişaf sahəsi, uqodiyası isə öruş olaraq göstərilmişdir. 2 Elektron kadastr bazası materiallarına istinadən, naturada təqdim olunan torpaq sahəsi üzərində, fiziki və huquqı şəxslərin hüquqlarını təsdiq edən sənəd (Çıxarış) qeydə alınmadığı müəyyən olundu. Torpaq sahəsi üzərində və hava məkanında kommunikasiya xəttləri müşahidə olunmamışdır. 3.Elektron baza materallarına istinadən sözügedən torpaq sahəsinin, mühafizə zonaları və qorunma zolaqlarında yerləşmə halı aşkarlanmamışdır.
4. Elektron kadastr bazası materiallarına istinadən, naturada təqdim olunan torpaq sahəsi üzərində, fiziki və hüquqi şəxslərin hüquqlarını təsdiq edən sənəd (Çıxarış) qeydə alınmadığı müəyyən olunmuşdur. 5.Naturad təqdim olunan 0.08 ha torpaq sahəsinin koordinatları rəyə əlavə edilmiş ortofoto görüntüsündə əks olunmuşdur. 6 Göygöl rayon Haçıməlık bələdiyyəsinin 08 sentyabr 2014-cü il tarixli, 05 saylı qərarı ilə İddiaçı satılmış 0.08 ha torpaq sahəsinin naturada yerləşmə vəziyyəti və koordinatları (X və Y) əks olunmuş plan ölçü sənədi daxil olmuş ış materiallarında mövcud olmadığından sualın cavablandırılması mümkün deyildir. Torpaq sahəsi üzərində tikili müşahidə olunmamışdır.
7. Göygöl rayon Haçıməlik bələdiyyəsinin 08 sentyabr 2014-cü il tarixli. 05 saylı qərarı ilə İddiaçı satılmış 0.08 ha torpaq sahəsinin naturada yerləşmə vəziyyəti və koordinatları (X və Y) əks olunmuş plan ölçü sənədi daxil olmuş iş materiallarında mövcud olmadığından sualın cavablandırılması mümkün deyildir.
8. Daxil olmuş iş materiallarında mövcud olan, Göygöl rayonu Haçıməlik bələdiyyəsinin yerqurluşu planından çıxarış (miqyas - 1:10000) sənədində. Haçıməlik qəsəbə ərazisinin müəyyən hissəsi əks olunmuşdur ki, naturada təqdim olunan sahə də, həmin planda göstərilən sahədə yerləşir. 9.Rəy hazırlanarkən, Göygöl rayonu Haçıməlik qəsəbəsi ərazisində aparılmış torpaq islahatına dair tərtib olunmuş 2004-cü il tarixli, ərazinin kompleks yerquruluşu layihəsinin elektron faylına, Haçıməlik bələdiyyəsinin hüdudlarında bələdiyyə mülkiyyətinə verilmiş torpaqlara dair 2005-cı il tarixli yerquruluşu sxeminin (KOD ********) elektron faylına. hüquqmüəyyənedici sənədlər barədə məlumatların qeyd olunduğu elektron kadastr bazasına. Torpaqların elektron kadastr uçotu informasiya sisteminə (TEKUİS) və AZCAD məlumatlarına istinad olunmuşdur. İddiaçı nümayəndəsi və vəkili Vəkil və cavabdehin nümayəndəsi X2 məhkəmə iclasına gəlmiş,üçüncü şəxs nümayəndəsinin iştirakını təmin etməmiş səbəbləri barədə məlumat təqdim etməmişdir. Məhkəmə İPM-in 62.3-cü maddəsinin tələblərinə müvafiq olaraq, işə şifahi məhkəmə baxış iclasına gəlməyən şəxslərin iştirakı olmadan işə baxılmasını mümkün hesab etmişdir. İddiaçı məhkəmə iclasında iddia tələbini müdafiə edərək təmin olunmasını xahiş etmişdir. İddiaçı vəkili Vəkil məhkəmə iclasında iddia tələbini müdafiə edərək təmin olunmasını xahiş etmişdir. İddiaçı vəkili Vəkil məhkəmə iclasında iddia tələbinin dəqiqləşdirilməsi barədə ərizə təqdim edərək Göygöl rayonu Hacıməlik bələdiyyəsinin xx.xx.2014-cü il tarixli,05 saylı qərarı ilə İddiaçı satılmış və hazırda Göygöl rayonu Hacıməlik qəsəbəsində yerləşən və faktiki istifadəsində olan 0,08 ha torpaq sahəsinə mülkiyyət hüququnun qeydə alınması və torpaq sahəsinə plan-ölçüsü sənədinin tərtib edilməsi vəzifəsinin cavabdehin üzərinə qoyulmasını xahiş etmiş, ərizə inzibati məhkəmə icraatına qəbul edilmişdir. Cavabdehin nümayəndəsi məhkəmə iclasında iddia tələbinə etiraz edərək təmin olunmamasını xahiş etmişdir.
Əsaslandırıcı hissə:
İddia mümkün iddiadır. Belə ki, iddiaçı iddia qaldırmaqda subyektiv hüquqa malik olmuş, iddia düzgün cavabdehə qarşı verilmiş, iddianın məhkəmə və ərazi aidiyyəti düzgün müəyyən olunmuşdur. İddiaçı Azərbaycan Respublikası İnzibati Prosessual Məcəlləsinin (bundan sonra İPM) 34-cü maddəsinə əsasən öhdəliyin icrası haqqında iddia qaldırmışdır. Məhkəmə işin faktiki hallarına və aşağıda qeyd olunan normalara əsasən iddianı əsaslı hesab edir. İşin hallarından görünür ki, Göygöl rayonu Hacıməlik bələdiyyəsinin 08 sentyabr 2014-cü il tarixli, 05 saylı qərar ilə həyətyanı məqsədilə 0,08 ha torpaq sahəsi iddiaçıya satılmışdır. Bununla bağlı tərəflər arasında “Torpaqların alqı-satqısına dair akt” bağlanmış, iddiaçı bələdiyyənin hesabına ödənişlər edilmişdir.. Hazırkı inzibati mübahisə mahiyyət etibarı ilə bələdiyyə qərarı ilə iddiaçıya satılmış torpaq sahəsinə hüququn qeydə alınmasından ibarətdir. Torpaq Məcəlləsinin 56-cı maddəsinə (həmin torpaq sahəsi satılan zaman qüvvədə olan redaksiyası) əsasən bələdiyyələrin ehtiyat fondunun özəlləşdirilə bilən torpaqları xüsusi mülkiyyətə satıla bilər. Bələdiyyələrin ehtiyat fondunun yaşayış məntəqələrinin perspektiv inkişafı üçün cəlb olunan torpaq sahələri, habelə kənd təsərrüfatına azyararlı və yararsız torpaqları özəlləşdirilə bilər. Özəlləşdirilməsi barədə qərar qəbul edilənədək bu torpaqlar ərazinin perspektiv inkişaf proqramına xələl gətirməmək şərtilə hüquqi və fiziki şəxslərin icarəsinə verilə bilər. Bələdiyyənin ərazisində daimi yaşayan və eyni zamanda ən azı beş il müddətində yaşayış yeri üzrə qeydiyyatda olan Azərbaycan Respublikası vətəndaşlarının mülkiyyətinə fərdi yaşayış evinin tikintisi üçün torpağın ayrılması istisna olmaqla, digər hallarda bələdiyyə torpaqları üzərində mülkiyyət və icarə hüquqları yalnız açıq torpaq hərracları və ya müsabiqələri vasitəsilə əldə edilə bilər. 68-ci maddəsində qeyd olunur ki, torpaq sahələri üzərində hüquqlar torpaq sahələrinin sərhədlərinin yerdə müəyyən edilməsindən, onların planı və ölçüsünün tərtib edilməsindən, torpaq sahələrinin verilməsi barədə müqavilənin bağlanmasından və onun müəyyən olunmuş qaydada dövlət qeydiyyatından keçirilməsindən sonra yaranır “Bələdiyyə torpaqlarının idarə edilməsi haqqında” Qanun: Maddə 6.1. Bələdiyyə mülkiyyətində olan torpaqlar Azərbaycan Respublikasının torpaq qanunvericiliyinə, “Bələdiyyələrin əraziləri və torpaqları haqqında” Azərbaycan Respublikasının Qanununa və torpaq münasibətlərini tənzimləyən digər normativ hüquqi aktlara uyğun olaraq mülkiyyətə, istifadəyə və icarəyə verilir. Maddə 6.2. Bələdiyyə mülkiyyətində olan torpaqların hər hansı hüquqla hüquqi və fiziki şəxslərə verilməsi bələdiyyələrin qərarı və tərəflər arasında bağlanmış müqavilə əsasında həyata keçirilir. Müqavilədə tərəflərin hüquqları və vəzifələri, torpaq sahəsinin hüquqi statusu, öhdəliklər, servitutlar və digər məhdudiyyətlər, müqaviləyə xitam verilməsinin əsasları və torpaqların istifadəsi və mühafizəsi üzrə başqa şərtlər nəzərdə tutulur. Maddə 6.5. Torpaq sahəsinin bələdiyyə mülkiyyətində olan müəssisə, idarə və təşkilatların istifadəsinə və ya fərdi yaşayış evinin tikintisi üçün Azərbaycan Respublikası vətəndaşının mülkiyyətinə verilməsi barədə, habelə hüquqi və fiziki şəxslərin mülkiyyətinə (icarəsinə) verilməsi məqsədilə hərracın (müsabiqənin) keçirilməsi barədə bələdiyyənin qərarı sahənin xüsusiyyətinə və torpağın ayrılma məqsədinə, mövcud texniki normalara, habelə yerquruluşu və şəhərsalma sənədlərinə uyğun olaraq müvafiq icra hakimiyyəti orqanlarının rəyi alındıqdan sonra qəbul edilir. Torpaqayırma sənədlərinin hazırlanması və razılaşdırılması qaydaları Azərbaycan Respublikasının Milli Məclisi tərəfindən təsdiq edilən əsasnamə ilə tənzimlənir. Maddə 9.1. Bələdiyyənin ərazisində daimi yaşayan və eyni zamanda ən azı beş il müddətində yaşayış yeri üzrə qeydiyyatda olan Azərbaycan Respublikası vətəndaşlarının mülkiyyətinə bu Qanunun 9.8-ci maddəsində müəyyən edilmiş məhdudiyyət nəzərə alınmaqla fərdi yaşayış evinin tikintisi üçün torpağın ayrılması, habelə Azərbaycan Respublikasının tərəfdar çıxdığı beynəlxalq müqavilələrdən irəli gələn öhdəlikləri yerinə yetirmək məqsədi ilə torpağın dövlət mülkiyyətinə və ya icarəsinə verilməsi istisna olmaqla, digər hallarda bələdiyyə torpaqları üzərində mülkiyyət və icarə hüquqları yalnız açıq torpaq hərracları və ya müsabiqələri vasitəsilə əldə edilə bilər. Maddə 9.2. Bələdiyyə torpaqlarının satışı ərazinin inkişaf planları, yerquruluşu, yaşayış məntəqələrinin baş planı və şəhərsalma sənədləri əsasında qanunvericiliklə müəyyən edilmiş qaydada yerli özünüidarə orqanları tərəfindən həyata keçirilir. Azərbaycan Respublikasının 15 mart 2002-ci il tarixli 274-İİQ saylı Qanunu ilə təsdiq edilmiş “Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında” Əsasnamə:
5. Bələdiyyələr öz ərazilərində bələdiyyə torpaqlarından həyətyanı sahə və kənd təsərrüfatı məqsədləri üçün, sənaye, nəqliyyat, rabitə və digər obyektlərin, fərdi yaşayış və bağ evlərinin, fərdi və kooperativ qarajların tikintisi, sahibkarlıq fəaliyyətini həyata keçirmək məqsədi ilə zəruri tikililərin inşası, habelə inzibati və çoxmənzilli çoxmərtəbəli binaların tikintisi üçün qanunvericiliyə və bu Əsasnamənin 2-4-cü bəndlərinə uyğun olaraq hüquqi və fiziki şəxslərin icarəsinə və Azərbaycan Respublikasının vətəndaşlarının və hüquqi şəxslərinin mülkiyyətinə, həmçinin bələdiyyələrin öz ehtiyaclarını və fəaliyyətlərini təmin etmək üçün torpaq sahəsi ayırırlar.
6. Bələdiyyələr bu Əsasnamənin 5-ci bəndində göstərilmiş məqsədlər üçün torpaq sahələrini ərazinin yerquruluşu-təsərrüfat planına, yaşayış məntəqəsinin baş planına, ərazinin planlaşdırılması və tikintisi layihələrinə uyğun olaraq ayırırlar.
7. Ərazinin planlaşdırılması və tikintisi layihələri olmadıqda, bu Əsasnamənin 5-ci bəndində göstərilmiş obyektlərin yerləşdirilməsi və ya tikintisi üçün, habelə fərdi yaşayış və bağ evlərinin, fərdi və kooperativ qarajların tikintisi zərurəti yarandığı hallarda yeni yaşayış məhəllələrinin salınması üçün bələdiyyələr torpaq sahələrinin seçilməsini və ayrılmasını dəqiqləşdirmək məqsədi ilə ərazinin yerquruluşu-təsərrüfat planı, yaşayış məntəqəsinin baş planı əsasında yaxın dövr üçün şəhərsalma və tikinti normalarına uyğun olaraq ərazinin planlaşdırılması və tikintisi layihələrinin hazırlanmasını və həyata keçirilməsini təşkil edirlər. Bələdiyyələr ərazinin planlaşdırılması və tikintisi layihələrini müvafiq icra hakimiyyəti orqanı ilə razılaşdırırlar. Müvafiq icra hakimiyyəti orqanı memarlıq planlaşdırma baxımından obyektlərin yerləşdirilməsinə təklif verə bilər. Torpaq sahəsinin bələdiyyə mülkiyyətində olan müəssisə, idarə və təşkilatların istifadəsinə və ya fərdi yaşayış evinin tikintisi üçün Azərbaycan Respublikası vətəndaşının mülkiyyətinə verilməsi barədə, habelə hüquqi və fiziki şəxslərin mülkiyyətinə (icarəsinə) verilməsi məqsədilə hərracın (müsabiqənin) keçirilməsi barədə bələdiyyənin qərarı sahənin xüsusiyyətinə və torpağın ayrılma məqsədinə, mövcud texniki normalara, habelə yerquruluşu və şəhərsalma sənədlərinə uyğun olaraq müvafiq icra hakimiyyəti orqanlarının rəyi alındıqdan sonra qəbul edilir. “Daşınmaz əmlakın dövlət reyestri haqqında” Azərbaycan Respublikası Qanununun 15-ci maddəsinin şərh edilməsinə dair Azərbaycan Respublikası Konstitusiya Məhkəməsi Plenumunun 28 mart 2017-ci il tarixli Qərarında qərara alınmışdır ki, Məsələ qanunvericilik qaydasında həll edilənədək torpaq sahəsi üzərində hüquqların dövlət qeydiyyatına alınması üçün təqdim edilən sənədlərdə torpağın kateqoriyası (məqsədli təyinatı) müvafiq icra hakimiyyəti orqanı tərəfindən müəyyən olunmuş kateqoriyaya uyğun gəlmədikdə, həmin torpaq üzərində hüquqların dövlət qeydiyyatından imtina edilə bilər. Hazırkı mübahisə üzrə cavabdeh orqan Göygöl rayon Hacıməlik bələdiyyəsinin xx.xx.2014-cü il tarixli, 05 nömrəli qərarı və xx.xx.2014-cü il tarixli, 1149 saylı “Torpaqların alqı-satqısına dair” Aktının xx.xx.2007-ci il tarixindən sonra tərtib edilməsinə istinad edərək iddiaçının müraciətinin təmin olunmasından imtina edir. Həmin arqumenti əsassız hesab edən məhkəmə qeyd edir ki, işdəki mütəxəssis rəyinə əsasən yaşayış məntəqələri torpaqları olmaqla,mülkiyyət növü bələdiyyə mülkiyyətinə aid torpaq sahəsi olması, iddiaçının faktiki istifadəsində olan torpaq sahəsinin digər şəxslərin mülkiyyətində və ya qanuni istifadəsində olan sahə ilə üst-üstə düşməməsini müəyyən edilmişdir. Göründüyü kimi, iddiaçının tələbinin təmin olunmamasına əsas verən hallar mövcud deyildir. «İnzibati icraat haqqında» Azərbaycan Respublikası Qanununun 19.1-ci maddəsinə əsasən inzibati icraat zamanı işin faktiki halları ilə əlaqədar fiziki və ya hüquqi şəxslər tərəfindən təqdim olunan sənədlər və dəlillər, onların həqiqətə uyğun olmadığı sübuta yetirilməyibsə, mötəbər hesab olunur. Belə olan halda iddiaçı hazırkı tələbində haqlı olmuşdur. Azərbaycan Respublikası İnzibati Prosessual Məcəlləsinin 68-ci maddəsinə əsasən məhkəmə mübahisə ilə bağlı iş üzrə inzibati məhkəmə icraatı nəticəsində onda yaranmış daxili inam əsasında qərar qəbul edir. Qərarda məhkəmənin mövqeyi üçün əsas olmuş səbəblər göstərilməlidir. Məhkəmə qərarı yalnız məhkəmə icraatında tədqiq olunmuş və barələrində proses iştirakçılarının öz mülahizələrini bildirmək imkanına malik olduqları faktlar və sübutlarla əsaslandırılmalıdır. Məhkəmə qərarı yalnız mübahisə ilə bağlı iş üzrə məhkəmə icraatında (şifahi məhkəmə baxışında) iştirak etmiş hakimlər (hakim) tərəfindən qəbul edilə və imzalana bilər. Nəticəvi hissə:
Məhkəmə yuxarıda göstərilənlərə əsasən və Azərbaycan Respublikası İnzibati Prosessual Məcəlləsinin 34, 68, 69, 75-ci və 85-ci maddələrini rəhbər tutaraq qərara aldı:
İddia təmin edilsin. Göygöl rayonu Hacıməlik bələdiyyəsinin xx.xx.2014-cü il tarixli,05 saylı qərarı ilə İddiaçı satılmış və hazırda Göygöl rayonu Hacıməlik qəsəbəsində yerləşən və onun faktiki istifadəsində olan 0,08 ha torpaq sahəsinə mülkiyyət hüququnun qeydə alınması və torpaq sahəsinə plan-ölçüsü sənədinin tərtib edilməsi öhdəliyi cavabdeh orqan “Daşınmaz Əmlakın Dövlət Kadastrı və Reyestri” publik hüquqi şəxsin 3 saylı Gəncə Ərazi İdarəsinin üzərinə qoyulsun. Qərardan şikayət verilmədiyi və ya proses iştirakçıları tərəfindən şikayətin geri götürüldüyü hallarda məhkəmə qərarı onun təqdim olunduğu gündən 30 (otuz) gün keçdikdən sonra qanuni qüvvəyə minir. Qərardan, onun tam formada təqdim olduğu gündən 30 (otuz) gün müddətində Gəncə İnzibati Məhkəməsi vasitəsi ilə Gəncə Apelyasiya Məhkəməsinə apelyasiya şikayəti verilə bilər.
Sədrlik edən Leyla Əliyeva