Şəki İnzibati Məhkəməsi Qərar — İş №2-1(116)-1190/2020

Azərbaycan Respublikası adından QƏRAR Şəki şəhəri İş № 2-1(116)-1190/2020 06.08.2020 ŞƏKİ İNZİBATİ MƏHKƏMƏSİ hakim Qasımov Vidadi Kamal oğlunun sədrliyi, məhkəmə iclasının katibi X1, İddiaçı iştirakı ilə İddiaçı cavabdeh Azərbaycan Respublikası Əmək və X3 Nazirliyi tabeliyində Dövlət X4 publik hüquqi şəxsin Oğuz rayon filialına qarşı "xx.xx.2016-cı ildən xx.xx.2019-cu ilədək olan müddət üçün sosial müavinət, xx.xx.2019-cu ildən xx.xx.2019-cu ilədək olan müddət üçün Azərbaycan Respublikası Prezidentinin təqaüdünün hesablanıb ödənilməsi öhdəliyinin cavabdehin üzərinə qoyulması" tələbinə dair işə məhkəmənin binasında açıq şifahi məhkəmə baxışı iclasında baxaraq aşağıdakı qərarı qəbul etdi. Təsviri hissə: İddiaçı Azərbaycan Respublikası Müdafiə Nazirliyinin Şəxsi Heyət Baş İdarəsi tərəfindən xx.xx.2019-cu il tarixli 086201 nömrəli müharibə veteranı vəsiqəsi verilmiş və həmin tarixdən etibarən ona "Müharibə veteranlarına Azərbaycan Respublikası Prezidentinin təqaüdü" ödənilməyə başlanmışdır. Bundan sonra iddiaçı xx.xx.2016-cı ildən xx.xx.2019-cu ilədək olan müddət üçün sosial müavinət, xx.xx.2019-cu ildən xx.xx.2019-cu ilədək olan müddət üçün Azərbaycan Respublikası Prezidentinin təqaüdünün hesablanıb ödənilməsi məqsədilə cavabdehə müraciət etmiş, lakin sonuncu xx.xx.2020-ci il tarixli **********3 nömrəli məktubla bildirmişdir ki, müharibə veteranı vəsiqəsi verildiyi gündən ona Prezident təqaüdü təyin edilmişdir. Bundan sonra iddiaçı hazırkı iddia ərizəsi ilə məhkəməyə müraciət etmişdir. O, öz tələbini belə əsaslandırmışdır ki, xx.xx.1993-cü ildən xx.xx.1993-cü ilədək Azərbaycan Respublikası Milli Ordusunun N nömrəli hərbi hissəsinin, xx.xx.1993-cü ildən xx.xx.1994-cü ilədək Milli Ordunun N nömrəli hərbi hissəsinin tərkibində Füzuli, Ağdam, Zəngilan və Qubadlı rayonu ərazisində gedən döyüşlərdə iştirak etmiş, müharibə veteranı vəsiqəsi isə ona xx.xx.2019-cu ildə verilmişdir. Cavabdeh iddiaya yazılı etiraz bildirməmişdir. Cavabdehə şifahi məhkəmə baxışının vaxtı və yeri barədə lazımi qaydada məlumat verilməsinə baxmayaraq, nümayəndəsinin iştirakını təmin etmədiyinə görə işə onun iştirakı olmadan baxıldı. Mübahisənin həlli üçün aşağıdakı sənədlər məhkəməyə təqdim olunmuşdur: - İşdə olan, Azərbaycan Respublikası Müdafiə Nazirliyinin Şəxsi Heyət Baş İdarəsi tərəfindən verilmiş xx.xx.2019-cu il tarixli 086201 nömrəli vəsiqədən görünür ki, İddiaçı müharibə veteranları üçün Azərbaycan Respublikasının qanunvericiliyi ilə müəyyən edilmiş güzəşt və imtiyazlardan istifadə etmək hüquqununa malikdir. - İşdə olan, Azərbaycan Respublikası Əmək və X3 Nazirliyi tabeliyində Dövlət X4 publik hüquqi şəxsin Oğuz rayon filialının xx.xx.2020-ci il tarixli **********3 nömrəli imtina məktubundan görünür ki, müharibə veteranı vəsiqəsi verildiyi gündən iddiaçıya Prezident təqaüdü təyin edilmişdir. Əsaslandırma hissəsi: Azərbaycan Respublikası İnzibati Prosessual Məcəlləsinin 34.1-ci maddəsinə əsasən, öhdəliyin icrası haqqında iddia vasitəsi ilə iddiaçı cavabdehdən inzibati aktın qəbul edilməsi ilə bağlı olmayan (inzibati aktın qəbul edilməsinə yönəlməyən) müəyyən hərəkətlərin edilməsini tələb edə bilər. İddia öhdəliyin icrası haqqında olmaqla mümkün iddiadır. Aşağıdakı hallara görə məhkəmə iddianı əsaslı hesab etmədi. İşdən göründüyü kimi, iddiaçı iki ayrı-ayrı ödənişin cavabdehdən alınmasını tələb edir: 1) xx.xx.2016-cı ildən xx.xx.2019-cu ilədək olan müddət üçün sosial müavinət, 2) xx.xx.2019-cu ildən xx.xx.2019-cu ilədək olan müddət üçün "Müharibə veteranlarına Azərbaycan Respublikası Prezidentinin təqaüdü". Tələbin birinci hissəsi ilə əlaqədar məhkəmə aşağıdakıları qeyd edir. İşin hallarından müəyyən olunduğu kimi, iddiaçıya müharibə veteranı vəsiqəsinin verildiyi tarixdən etibarən cavabdeh tərəfindən müharibə veteranları üçün nəzərdə tutulan 80 manat məbləğində Azərbaycan Respublikası Prezidentinin təqaüdü təyin olunmaqla ödənilməsi həyata keçirilir. Mübahisənin birinci hissəsi isə "Müharibə veteranlarına Azərbaycan Respublikası Prezidentinin təqaüdü"nün təsis edilməsi haqqında" Azərbaycan Respublikası Prezidentinin xx.xx.2019-cu il tarixli 641 nömrəli Fərmanı qəbul olunanadək qanunvericilikdə müharibə veteranları üçün nəzərdə tutulmuş sosial müavinətin iddiaçıya əvvəlki müddət üzrə ödənilməsinin mümkünlüyü ilə bağlıdır. "Müharibə veteranlarına Azərbaycan Respublikası Prezidentinin təqaüdü"nün təsis edilməsi haqqında" Azərbaycan Respublikası Prezidentinin xx.xx.2019-cu il tarixli 641 nömrəli Fərmanına əsasən, "Müharibə veteranlarına Azərbaycan Respublikası Prezidentinin təqaüdü" təsis edilmiş, onun aylıq məbləği 80 manat müəyyən olunmuş, eləcə də Fərmanın 2019-cu il aprelin 1-dən tətbiq ediləcəyi təsbit edilmişdir. Həmin Fərmanın 2.1.1-ci bəndinə əsasən, sözügedən təqaüd 2019-cu il aprelin 1-dək kommunal, nəqliyyat və digər xidmətlərə görə sosial müavinət alan şəxslərə həmin sosial müavinətin əvəzinə, əmək pensiyası alan və döyüşən ordunun tərkibində xidmət etmiş müharibə iştirakçılarına (Böyük Vətən müharibəsi iştirakçıları istisna olmaqla), habelə döyüş əməliyyatı aparılan ölkədə hərbi xidmət borcunu yerinə yetirmiş hərbi qulluqçulara əmək pensiyasının sığorta hissəsinə əlavə əvəzinə verilir. Həmin Fərmanın 2.1.2-ci maddəsinə əsasən, dövlət büdcəsində Azərbaycan Respublikasının Əmək və X3 Nazirliyinə nəzərdə tutulmuş xərclər hesabına həmin nazirlik tərəfindən ödənilir. Bundan başqa, ""Sosial müavinətlərin məbləğinin artırılması haqqında" Azərbaycan Respublikası Prezidentinin xx.xx.2013-cü il tarixli 973 nömrəli Fərmanında dəyişiklik edilməsi barədə" Azərbaycan Respublikası Prezidentinin xx.xx.2019-cu il tarixli 640 nömrəli Fərmanına əsasən, "Sosial müavinətlərin məbləğinin artırılması haqqında" Azərbaycan Respublikası Prezidentinin xx.xx.2013-cü il tarixli 973 nömrəli Fərmanının, Azərbaycan Respublikasının ərazi bütövlüyü uğrunda aparılan döyüş əməliyyatlarında iştirak etdiyinə görə müharibə veteranı adı almış şəxslərə 55 manat məbləğində sosial müavinət verilməsini nəzərdə tutan 1.1.7-ci yarımbəndi ləğv edilmişdir. Azərbaycan Respublikası Prezidentinin yuxarıda göstərilən xx.xx.2019cu il tarixli 640 nömrəli Fərmanının 3-cü bəndinə əsasən, bu Fərman 2019-cu il aprelin 1-dən tətbiq edilir. Beləliklə, xx.xx.2019-cu ildə qüvvəyə minmiş qanunvericilikdəki yeni tənzimləmələrə görə, müharibə veteranlarına əvvəllər verilən sosial müavinətin əvəzinə Azərbaycan Respublikası Prezidentinin təqaüdü təsis edilmiş, bununla da, qeyd olunan tarixdən sonra müharibə veteranı adı və vəsiqəsi almış şəxslərə ünvanlı ödəniş kimi müavinət yox, Azərbaycan Respublikası Prezidentinin təqaüdü verilməyə başlanılmışdır. Odur ki, müharibə veteranlarına aylıq verilməsi nəzərdə tutulmuş bu vəsait artıq sosial müavinət statuslu ödəniş deyildir və müvafiq olaraq həmin ödənişə münasibətdə "Sosial müavinətlər haqqında" Qanunun müddəaları tətbiq olunmaqla əvvəlki üç il üçün ödəmələrin aparılması yolverilməzdir. Qeyd olunan hüquqi mövqe oxşar mübahisə ilə bağlı 2-1(102)- 1133/2020 nömrəli başqa bir inzibati işdə Azərbaycan Respublikası Ali Məhkəməsinin xx.xx.2020-ci il tarixli qərarında ifadə edilmişdir. Ona görə də məhkəmə bu qənaətə gəldi ki, cavabdeh iddiaçıya veteran vəsiqəsi aldığı gündən əvvəlki müddət üçün müavinət ödəməməkdə haqlı olmuşdur. Bu səbəbdən də iddia həmin hissədə təmin edilməməlidir. İddia tələbinin ikinci hissəsi ilə bağlı isə məhkəmə aşağıdakıları qeyd edir. Yuxarıda göstərildiyi kimi, "Müharibə veteranlarına Azərbaycan Respublikası Prezidentinin təqaüdü"nün təsis edilməsi haqqında" Azərbaycan Respublikası Prezidentinin xx.xx.2019-cu il tarixli 641 nömrəli Fərmanına əsasən, "Müharibə veteranlarına Azərbaycan Respublikası Prezidentinin təqaüdü" təsis edilmiş, onun aylıq məbləği 80 manat müəyyən olunmuş, eləcə də Fərmanın 2019-cu il aprelin 1-dən tətbiq edilməsi qərara alınmışdır. Nə həmin Fərmanda, nə də digər qanunvericilik aktlarında Azərbaycan Respublikası Prezidentinin təqaüdünün əvvəlki müddətlər üçün də verilməli olması müəyyən edilməmişdir. Ona görə də məhkəmə bu qənaətə gəldi ki, iddia tələbi ikinci hissədə də təmin edilməməlidir. Nəticəvi hissə: Yuxarıda qeyd olunanlara əsasən, məhkəmə qərara aldı: İddiaçı cavabdeh Azərbaycan Respublikası Əmək və X3 Nazirliyi tabeliyində Dövlət X4 publik hüquqi şəxsin Oğuz rayon filialına qarşı "xx.xx.2016-cı ildən xx.xx.2019-cu ilədək olan müddət üçün sosial müavinət, xx.xx.2019-cu ildən xx.xx.2019-cu ilədək olan müddət üçün Azərbaycan Respublikası Prezidentinin təqaüdünün hesablanıb ödənilməsi öhdəliyinin cavabdehin üzərinə qoyulması" tələbinə dair iddiası təmin edilməsin. Qərardan, onun rəsmi təqdim edildiyi vaxtdan tərəflər 30 gün müddətində Şəki İnzibati Məhkəməsi (Şəki şəhəri S.Mümtaz küçəsi 1) vasitəsi ilə Şəki Apelyasiya Məhkəməsinin İnzibati Kollegiyasına apelyasiya şikayəti verə bilərlər. Qərar, onun rəsmi təqdim edildiyi vaxtdan 30 gün müddətində apelyasiya şikayəti verilmədiyi və ya proses iştirakçıları tərəfindən şikayətin geri götürüldüyü hallarda məhkəmə qərarı onun təqdim olunduğu gündən 30 gün keçdikdən sonra qanuni qüvvəyə minir. Sədrlik edən Vidadi Qasımov.