Şəki İnzibati Məhkəməsi Qərardad — İş №2-1(116)-1386/2021

Azərbaycan Respublikası adından QƏRARDAD Şəki şəhəri İş № 2-1(116)-1386/2021 30.09.2021 ŞƏKİ İNZİBATİ MƏHKƏMƏSİ Hakim Musayev Vüqar Ələkbər oğlu İddiaçı Oğuz rayon “Kərimli kənd məscidi” dini icmasının cavabdehlər Cavabdeh1, Cavabdeh2, Cavabdeh3, Cavabdeh4 və Cavabdeh5 qarşı “məzarlıqdan çıxarılmış baş daşının əvvəlki yerinə bərpa edilməsi vəzifəsinin həvalə edilməsi” barədə iddia ərizəsi və ona əlavə edilmiş sənədlərə yazılı icraat qaydasında baxaraq müəyyən etdi: İddiaçı Oğuz rayon “Kərimli kənd məscidi” dini icması cavabdehlər Cavabdeh1 və qeyrilərinə qarşı məhkəməyə iddia ərizəsi ilə müraciət edərək “məzarlıqdan çıxarılmış baş daşının əvvəlki yerinə bərpa edilməsi vəzifəsinin həvalə edilməsi” tələbinə dair qərar qəbul edilməsini xahiş etmişdir. Məhkəmə tərəfindən 10.09.2021-ci il tarixdə iddiaçıya hüquqi yardım barədə məktub göndərilərək fiziki şəxslərə qarşı yönəlmiş hazırki mübahisəyə inzibati məhkəmə icraatı qaydasında deyil, mülki məhkəmə icraatı qaydasında Oğuz Rayon Məhkəməsində baxılmalı olması izah edilmişdir. İddiaçı Oğuz rayon “Kərimli kənd məscidi” dini icmasının sədri X1 27.09.2021-ci il tarixdə məhkəməyə ərizə təqdim edərək cavabdehlərin adına vergi ödəyicisinin eyniləşdirmə nömrəsinin olduğunu zənn etdiyini, məhkəmənin hüquqi yardımla bağlı məktubunu aldıqdan sonra Oğuz Rayon Məhkəməsinə müraciət etmək qərarına gəldiyini, buna görə də iddia ərizəsini və ona əlavə edilmiş sənədlərin geri qaytarılmasını xahiş etmişdir. Məhkəmə, iddiaçı tərəfindən imzalanmış ərizəni iş materialları ilə birgə araşdırıb hesab edir ki, iddiaçı hazırki işdə öz aktiv hərəkəti ilə, iradəsinə uyğun olaraq iddia tələbinə məhkəmədə baxılmasını və iş üzrə qərarın qəbul edilməsini arzu etmir. Belə olan halda məhkəmə tərəfindən iddianın geri götürülmüş sayılması barədə qərardad qəbul edilməli və iş üzrə icraata xitam verilməlidir. Azərbaycan Respublikasının İnzibati Prosessual Məcəlləsinin: 55.3-cü maddəsinə əsasən məhkəmənin tələbinə baxmayaraq, iddiaçı 30 gündən çox müddət ərzində ardıcıl olaraq iş üzrə məhkəmə icraatından yayındıqda, iddia geri götürülmüş sayılır. Belə hallarda məhkəmə iddianın geri götürülmüş sayılması barədə qərardad qəbul edir. 55.5-ci maddəsinə əsasən, iddiaçı iddiadan imtina etdikdə və ya iddia məhkəmə tərəfindən geri götürülmüş sayıldıqda, məhkəmə icraata xitam verilməsi barədə qərardad qəbul edir. Həmin qərardadda iddiadan imtina edilməsinin və ya iddianın geri götürülmüş sayılmasının bu Məcəllədə nəzərdə tutulmuş hüquqi nəticələri göstərilməlidir. Məhkəmənin həmin qərardadından şikayət verilə bilməz. İddiaçılara izah edilir ki, iddianın geri götürülmüş hesab edilməsi eyni tərəflər arasında, eyni predmet barəsində və eyni əsaslar üzrə yenidən iddia qaldırma imkanını istisna etmir. Qeyd olunanlara əsasən və Azərbaycan Respublikası İPM-nin 16.3, 55, 80-ci maddələrini rəhbər tutaraq, qərara aldı: İddiaçı Oğuz rayon “Kərimli kənd məscidi” dini icmasının cavabdehlər Cavabdeh1, Cavabdeh2, Cavabdeh3, Cavabdeh4 və Cavabdeh5 qarşı “məzarlıqdan çıxarılmış baş daşının əvvəlki yerinə bərpa edilməsi vəzifəsinin həvalə edilməsi” tələbinə dair iddiası geri götürülmüş sayılır və iş üzrə icraata xitam verilir. Qərardaddan surəti təqdim olunduğu vaxtdan 10 gün müddətində Şəki İnzibati Məhkəməsi (Şəki şəhəri, S.Mümtaz küçəsi 318) vasitəsilə Azərbaycan Respublikası Şəki Apelyasiya Məhkəməsinə apelyasiya şikayəti verilə bilər. Hakim Vüqar Musayev.