Azərbaycan Respublikası adından QƏRAR Şəki şəhəri İş № 2-1(116)-824/2022 28.07.2022 ŞƏKİ İNZİBATİ MƏHKƏMƏSİ Hakim Musayev Vüqar Ələkbər oğlunun sədrliyi, məhkəmə iclas katibi Məmmədova Aynur Əhəd qızının katibliyi, iddiaçının nümayəndəsi və vəkili Qanuni nümayəndə, cavabdehin nümayəndəsi X1 iştirakı ilə, İddiaçı cavabdeh Daşınmaz Əmlakın Dövlət Kadastrı və Reyestri” X15 9 saylı Qəbələ Ərazi İdarəsinə qarşı “RX ******* nömrəli çıxarışa düzəliş edilərək X2 adının həmin çıxarışdan çıxarılması öhdəliyinin cavabdehin üzərinə qoyulması” tələbinə dair inzibati işə məhkəmənin binasında, açıq, şifahi məhkəmə baxışı iclasında baxaraq məhkəmə aşağıdakı qərarı qəbul etdi: Təsviri hissə: İddiaçı cavabdeh Azərbaycan Respublikası Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 9 saylı Qəbələ Ərazi İdarəsinə qarşı məhkəməyə iddia ərizəsi ilə müraciət edərək “JN-286F kod 40724028 nömrəli “Torpağın mülkiyyətə verilməsinə dair” şəhadətnamədə və onun əsasında verilmiş RX seriyalı ******* nömrəli çıxarışda düzəliş edilməsi, X2 adının yerinə İddiaçı adının yazılması öhdəliyinin cavabdehin üzərinə qoyulması” barədə qərar qəbul edilməsini xahiş etmişdir. Daha sonra, iddiaçı, tələbini dəqiqləşdirərək “JN-286F kod 40724028 nömrəli “Torpağın mülkiyyətə verilməsinə dair” şəhadətnamədə və onun əsasında verilmiş RX seriyalı ******* nömrəli çıxarışda düzəliş edilməsi, X2 adının RX seriyalı ******* nömrəli çıxarışdan çıxarılması öhdəliyinin qoyulması barədə qərar qəbul edilməsini xahiş etmişdir. Məhkəmə iclasında iddiaçının nümayəndəsi tələbi dəqiqləşdirərək “RX ******* nömrəli çıxarışa düzəliş edilərək X2 adının həmin çıxarışdan çıxarılması öhdəliyinin cavabdehin üzərinə qoyulması” barədə qərar qəbul edilməsini xahiş etmişdir. Məhkəmənin xx.xx.2022-ci il tarixli iclas protokolunun qərardadı ilə dəqiqləşdirilmiş iddia ərizəsi icraata qəbul edilmiş, həmçinin, cavabdeh Daşınmaz Əmlakın Dövlət Reyestri Xidmətinin 9 saylı Qəbələ Ərazi İdarəsi – hüquq varisi: “Daşınmaz Əmlakın Dövlət Kadastrı və Reyestri” X15 9 saylı Qəbələ Ərazi İdarəsi ilə əvəz edilmişdir. Məhkəmənin xx.xx.2022-ci il tarixli 2-1(116)-824/2022 nömrəli qərardadı ilə X4 üçüncü şəxs qismində inzibati məhkəmə icraatına cəlb edilmişdir. İşin qısa mahiyyəti ondan ibarətdir ki, iddiaçı, İsmayıllı rayon AİK-nın xx.xx.1998-ci il tarixli 63 saylı qərarı ilə ona və X18ya 0.21 ha torpaq sahəsinin ayrılmasını, bununla bağlı torpaq payı almaq hüququ olan subyektlər siyahısında müvafiq qeydlərin olmasını bildirərək, müvafiq şəhadətnaməyə və onun əsasında tərtib edilmiş, Seriya RX ******* nömrəli DƏDR-dən Çıxarışa düzəliş edilməsi, üçüncü şəxs X2 adının həmin sənədlərdən çıxarılması üçün cavabdeh orqana müraciət etmiş, lakin cavabdeh orqan müraciətin təmin edilməsindən imtina etmişdir. Buna görə də hazırkı inzibati mübahisə yaranmışdır. İddiaçı, tələb hüququnu İsmayıllı rayon AİK-nın xx.xx.1998-ci il tarixli 63 saylı qərarı ilə təsdiq edilmiş subyektlər siyahısında özünün və anasının adının olması ilə, həmçinin qardaşı İlham Hüseynovun 1980-cı ildən anasının təsərrüfatından qeydiyyatdan çıxaraq öz təsərrüfatına qeydiyyata düşməsi və həmin torpaq sahəsinə heç bir aidiyyətinin olmamas, həmçinin şəhadətnamədə qardaşının adının texniki səhv nəticəsində qeyd edilməsi ilə əsaslandırmışdır. Cavabdeh orqan, iddia tələbinə etirazında qeyd etmişdir ki, JN-286F saylı Şəhadətnamə əsasında verilmiş, 0.21 ha torpaq sahəsi və həmin torpaq sahəsində yerləşən fərdi yaşayış evi vahid daşınmaz əmlak kimi dövlət qeydiyyatına alınaraq (fərdi yaşayış evi tam, torpaq ümumi birgə) çıxarış və texniki pasport verilmişdir.buna görə də müraciətin icrası mümkün olmamışdır. Göstərilənlər nəzərə alınaraq məhkəmədən iddianın təmin edilməməsi xahiş edilmişdir. Üçüncü şəxs iddia tələbinə etirazda qeyd etmişdir ki, o, İsmayıllı rayonunda yaşayır, anası X13 kəndində 7 dekabr 1998-ci ildə 63 saylı qərara əsasən 21 hektar torpaq sahəsi ayrılmışdır. Həmin torpaq sahəsi anasının mülkiyyətində olmuşdur. Lakin, anası sağlığında həmin torpaq sahəsini DƏDRX-nin 9 saylı Qəbələ Ərazi İdarəsində onun adına keçirmişdir (bağışlama yolu ilə). 21 hektar torpaq sahəsinə ona çıxarış verilmişdir. X18 xx.xx.2013-cü ildə Bakı şəhərində, onunla birgə yaşadığı mənzildə vəfat etmişdir. Qardaşı İddiaçı anası ilə küsülü olmuş, ona məlum olmayan yollarla 21 hektar torpaq sahəsinin yarı hissəsini onun razılığı olmadan öz adına keçirmişdir. İddiaçının, müvafiq şəhadətnamədə texniki səhvin olması ilə bağlı bildirdikləri ilə razılaşmır, odur ki, məhkəmədən iddia tələbinin rədd edilməsi barədə qərar qəbul edilməsini xahiş etmişdir. Məhkəmə iclasında iddiaçının nümayəndəsi, iddia ərizəsi ilə eyni məzmunlu izahat verərək məhkəmədən iddianın təmin edilməsini xahiş etdi. Məhkəmə iclasında cavabdehin nümayəndəsi iddia tələbinə etirazla eyni məzmunlu izahat verərək məhkəmədən iddianın təmin edilməməsini xahiş etdi. İddia tələbinə dair məzmunu aşağıda qeyd edilmiş sənədlər məhkəməyə təqdim olunmuşdur. Həmin sənədlərin məzmununa istinad olunur. Onlar məhkəmə araşdırmasının predmetini təşkil etmişlər: - Seriya RX ******* nömrəli DƏDR-dən Çıxarışdan görünür ki, İsmayıllı rayonu cülyan kəndində, 0.21 ha torpaq sahəsində daşınmaz əmlaka münasibətdə İddiaçı yerləşən fərdi yaşayış evi tam, torpaq ümumi birgə, X2 torpaq ümumi birgə olmaqla, paylarla bağlı qeydiyyatı aparılmışdır. - cavabdehin xx.xx.2021-ci il tarixli imtina məktubundan görünür ki, iddiaçı, hazırki iddia tələbi ilə məhkəməyə müraciət etməzdən əvvəl, anoloji tələblə cavabdeh orqana müraciət etmiş, lakin cavabdeh orqan müraciətin təmin edilməsindən imtina etmişdir. - İsmayıllı rayon İH-nin Cülyan kənd İƏD üzrə nümayəndəsinin xx.xx.2021-ci il tarixli, 239 №-li arayışından görünür ki, aqrar islahat aparılan zaman torpaq payı almaq hüququ olan vətəndaşların siyahısında X9 və İddiaçı adları qeyd edilmişdir. - JN-286F, kod 40724028 nömrəli “Torpağın mülkiyyətə verilməsinə dair” Şəhadətnamədən görünür ki, İsmayıllı rayon AİK-nın xx.xx.1998-ci il tarixli 63 saylı qərarı ilə X9 və X3 həyətyanı məqsədilə 0.21 ha torpaq sahəsinin ayrıldığı qeyd edilmişdir. - xx.xx.2015-ci il tarixli “Qanun üzrə vərəsəlik hüququ haqqında” Şəhadətnamədən görünür ki, X5 vərəsəsi İddiaçı miras əmlakdan irs almışdır. Miras əmlak mərhumun adına seriya nömrəsi RX № ******* olan çıxarışa əsasən İsmayıllı rayon Cülyan kəndində yerləşən fərdi yaşayış evindən və 0.21 ha həyətyanı torpaq sahəsinin mərhuma çatan hissəsindən ibarətdir. - "xxxx" MMC-nin xx.xx.2022-ci il tarixli məktubuna əlavə edilmiş, İsmayıllı rayonu Cülyan kəndi üzrə torpaq payı almaq hüquq olan subyektlər siyahısından çıxarışdan görünür ki, 69 sıra nömrəsinin qarşısında X9 və İddiaçı adı qeyd edilmiş, qaytanlanmış kitabda həyətyanı torpaq sahəsi 0.25 (faktiki 0.29) olmaqla qeydiyyat aparılmışdır. Eyni zamanda 267 sıra nömrəsinin qarşısında X4, X10, X12, X14 və X6 adları qeyd edilmiş, qaytanlanmış kitabda həyətyanı sahəsi 0.06, (faktiki 0.13) olmaqla qeydiyyat aparılmışdır. - İsmayıllı rayon Dövlət arxivi tərəfindən təqdim edilmiş, 1995-1996-cı illər üzrə təsərrüfatbaşına kitabdan çıxarışlardan görünür ki, 0.25 ha torpaq sahəsinin qeyd olunduğu təsərrüfatın 710 №-li şəxsi hesabında təsərrüfat başçısı Saray Hüseynova, İddiaçı və digər ailə üzvləri qeyd edilmişdir. İlham Hüseynovun adı ailə üzvlərinin siyahısında yoxdur. İlham Hüseynovun və ailə üzvlərinin adları isə təsərrüfatın 773 №-li şəxsi hesabında qeyd edilmişdir və 5 nəfər ailə üzvü ilə birlikdə faktiki istifadədə olan torpaq sahəsi 0.06 ha olaraq qeyd edilmişdir. Əsaslandırma hissəsi: Tərəflər məhkəmə iclasının yeri və vaxtı barədə lazımi qaydada xəbərdar edilmələrinə baxmayaraq, üçüncü şəxs məhkəmə iclasında iştirak etməmişdir. Tərəflər, təqdim edilmiş məhkəmə bildirişində şifahi məhkəmə baxışı iclasına gəlmədikləri halda işə baxılmasının və iş üzrə qərar qəbul edilməsinin mümkünlüyü barədə (Azərbaycan Respublikası İnzibati Prosessual Məcəlləsinin 62.3-cü maddəsi) xəbərdar edildiyindən, məhkəmə hazırki işə üçüncü şəxsin iştirakı olmadan baxaraq qərar qəbul edə bilmişdir. İPM-in 2.2.3-cü maddəsinə görə hazırkı iddia növü öhdəliyin icrası haqqında iddiadır. İddiaçı, torpaq sahəsi üzərində mülkiyyət hüququnun qeydə alınmasını xahiş etmiş, cavabdeh müraciəti təmin etməmişdir. Odur ki, iddiaçı inzibati məhkəmə icraatı qaydasında onun mülkiyyət hüququnun qeydə alınmasının cavabdehə həvalə edilməsi barədə öhdəlik qoyulmasını xahiş etmişdir. Öhdəliyin icrası haqqında iddia vasitəsi ilə iddiaçı cavabdehdən inzibati aktın qəbul edilməsi ilə bağlı olmayan (inzibati aktın qəbul edilməsinə yönəlməyən) müəyyən hərəkətlərin edilməsini tələb edə bilər (İPM-in 34.1-ci maddəsinin birinci cümləsi). İddia mümkünlük şərtlərinə cavab verir. İddiaçı cavabdehə müraciət etmiş və imtina cavabı almışdır, iddia düzgün cavabdehə qarşı verilmiş, iddia qaldırmaqda iddiaçı subyektiv hüquqa malik olmuşdur. Həmçinin, iddia əsaslıdır. AR İPM-in 14.2-ci maddəsinə əsasən inzibati orqanın inzibati aktın qəbul edilməsi ilə əlaqədar olmayan və bilavasitə şəxsin hüquq və azadlıqlarını pozan qanunsuz müdaxiləsindən müdafiəyə dair iddialar üzrə belə müdaxiləni zəruri edən faktiki şərtlərin mövcudluğunu sübut etmək vəzifəsi müvafiq inzibati orqanın üzərinə düşür. Buna görə də məhkəmə tərəfindən inzibati orqanın hərəkətinin qanuniliyi araşdırılmışdır. «Daşınmaz əmlakın dövlət reyestri haqqında» Qanunun giriş hissəsinin və 2.1-ci maddəsinin mənasına görə, qeydiyyat orqanı daşınmaz əmlaka hüquq vermə məsələsini həll etmir, hüququn yaranmasına əsas verən hüquqi faktlar Qanunun 8-ci maddəsində sadalanan sənədlərdə əksini tapmış məlumatlar əsasında şəxsin hüquqlarını qeydiyyata alır. Azərbaycan Respublikası Konstitusiya Məhkəməsinin “Daşınmaz əmlakın dövlət reyestri haqqında” Azərbaycan Respublikası Qanununun 2.1-ci və Azərbaycan Respublikası İnzibati Prosessual Məcəlləsinin 2.2 və 2.2.1-ci maddələrinin şərh edilməsinə dair xx.xx.2014-cü il tarixli qərarında da göstərildiyi kimi, DƏDRX inzibati orqan hesab edilsə də, onun tərəfindən əmlaka mülkiyyət hüququnu tanıyan qeydiyyatın aparılması və müvafiq çıxarışın verilməsi “passiv legitimləşdirmə” fəaliyyətini nəzərdə tutur. İddiaçı, İsmayıllı rayon AİK-nın xx.xx.1998-ci il tarixli 63 saylı qərarını yox, cavabdeh orqanın, müvafiq şəhadətnamənin hazırlanmasında ifadə olunan faktiki xarakterli hərəkətlərini mübahisələndirir. Belə ki, iddiaçı hesab edir ki, cavabdeh orqan üçüncü şəxsin adını müvafiq şəhadətnaməyə və çıxarışa daxil edərkən torpaq payı almaq hüququ olan vətəndaşların siyahısını nəzərə almalı və şəhadətnaməyə məhz həmin siyahıda adları göstərilən şəxsləri daxil etməli idi. Belə ki, “Torpaq islahatı haqqında” haqqında Qanunun 9-cu maddəsinə əsasən vətəndaşların qanuni istifadəsindəki fərdi yaşayış evlərinin, həyətyanı sahələrin, fərdi, kollektiv və kooperativ bağların, dövlət bağçılıq təsərrüfatının idarəçiliyindəki bağların altında olan torpaqlar qanunvericiliklə müəyyən olunmuş qaydada əvəzsiz olaraq onların mülkiyyətinə verilir. Həmin Qanunun 10-cu maddəsinə əsasən həyətyanı sahələr və bağlar altında olan torpaqlar vətəndaşların mülkiyyətinə onların qanuni istifadəyə və ya icarəyə götürdükləri ölçüdə verilir. Göründüyü kimi qanunvericilik torpaq islahatı aparılan zaman vətəndaşların qanuni istifadəsindəki torpaq sahələrinin əvəzsiz olaraq onların mülkiyyətinə verilməsini, həm də qanuni istifadəyə və ya icarəyə götürdükləri ölçüdə verilməsini birmənalı olaraq müəyyən etmişdir. Həmin Qanunun 12-ci maddəsinə əsasən sovxoz və kolxozların özəlləşdirilən torpaqlarından pay almaq hüququ olan subyektlər aşağıdakılardır: 1) sovxoz və kolxozlarda daimi işləyən şəxslər; 2) bu Qanun qüvvəyə mindiyi günədək daimi yaşayış yeri sovxozun və kolxozun ərazisində olan şəxslər; 3) sovxoz və kolxozlardan təqaüdə çıxmış və müvafiq rayonun (şəhərin) ərazisində yaşayan şəxslər; 4) sovxozun və ya kolxozun ərazisindən həqiqi müddətli hərbi qulluğa çağırılmış və müvəqqəti qaib olmuş şəxslər; 5) bu Qanun qüvvəyə mindiyi günədək sovxozun və ya kolxozun ərazisində yaradılmış və təyinatına uyğun fəaliyyət göstərən təsərrüfatlararası müəssisələrin, kooperativlərin, kiçik müəssisələrin, kəndli (fermer) təsərrüfatlarının və digər kənd təsərrüfatı istehsalı müəssisələrinin təsisçiləri və əsas iş yeri həmin müəssisələr olan şəxslər.
2. Torpaq payı almaq hüququ olanların siyahısı təsdiq edilənədək özbaşına zəbt etdikləri torpaqları geri qaytarmayan şəxslər həmin siyahıya daxil edilmirlər. Zəbt edilmiş torpaqlar qanunvericiliklə müəyyən edilən qaydada geri qaytarılır. Torpaq islahatı aparılan zamanı qüvvədə olmuş, Azərbaycan Respublikası Prezidentinin 1997-ci il 10 yanvar tarixli, 534 nömrəli Fərmanı ilə təsdiq edilən “Sovxoz, kolxoz və digər kənd təsərrüfatı müəssisələrinin torpaqlarının özəlləşdirilməsi (xüsusi hallar nəzərə alınmaqla) haqqında” Əsasnamə: ...
2. Yerli aqrar islahatı komissiyası dövlət yerquruluşu xidməti ilə birlikdə təsərrüfatın ərazisində dövlət mülkiyyətində saxlanılacaq, bələdiyyə mülkiyyətinə veriləcək və özəlləşdiriləcək torpaqları yer üzərində (naturada) müəyyənləşdirir.
3. Yerli aqrar islahatı komissiyası Dövlət Torpaq və Xəritəçəkmə Komitəsinin orqanları ilə birlikdə təsərrüfat üzrə torpaq payı almaq hüququ olan subyektlərin sayını və hər bir subyektə düşən orta torpaq payının ölçüsünü müəyyən edir.
4. Torpaq payı naturada pay almaq hüququ olan şəxslərin (ailənin) xüsusi mülkiyyətinə verilir.
5. Bu Əsasnamənin 2-ci və 3-cü bəndlərində göstərilən işlər başa çatdırıldıqdan sonra qanunvericiliyə müvafiq təsdiq edilmiş kompleks yerquruluşu layihələrinə uyğun olaraq yerquruluşu orqanları yer üzərində (naturada) torpaq sahələrini ayırır, püşkatma yolu ilə vətəndaşlar arasında müəyyənləşdirir və torpağa mülkiyyət və istifadə hüququna dair müəyyən edilmiş formada sənədlər hazırlayır və vətəndaşlara verir. Bu sənədlər Azərbaycan Respublikası Dövlət Torpaq və Xəritəçəkmə Komitəsində və Naxçıvan Muxtar Respublikası Dövlət Torpaq Komitəsində qeydiyyatdan keçirilir və vətəndaşlara təqdim olunur. Yuxarıda qeyd olunmuş normaların məzmunundan göründüyü kimi, yerli aqrar islahatı komissiyası dövlət yerquruluşu xidməti ilə birlikdə ilk öncə təsərrüfat üzrə torpaq payı almaq hüququ olan subyektlərin sayını və hər bir subyektə düşən orta torpaq payının ölçüsünü müəyyən etmişdir. İşdə olan torpaq payı almaq hüququ olan subyektlər siyahısından göründüyü kimi, üçüncü şəxsə 5 nəfər ailə üzvü ilə birlikdə torpaq sahəsinin ayrılması ilə bağlı subyektlər siyahısında müvafiq qeydlər olmasına baxmayaraq, onun adı, X7 və iddiaçıya verilməsi nəzərdə tutulan torpaq sahəsinə dair siyahıda olmamışdır. Məhz həmin siyahı tərtib edildikdən sonra, kompleks yerquruluşu layihələrinə uyğun olaraq yerquruluşu orqanları yer üzərində (naturada) torpaq sahələrinin ayrılmasını, torpağa mülkiyyət və istifadə hüququna dair müəyyən edilmiş formada sənədlər hazırlanmasını həyata keçirmiş, hazırlanmış sənədləri vətəndaşlara təqdim etmişlər. Üçüncü şəxsin adı X7 və iddiaçıya verilməsi nəzərdə tutulan torpaq sahəsinə dair siyahıda olmadığı halda, tərtib edilmiş, JN-286F, kod 40724028 nömrəli “Torpağın mülkiyyətə verilməsinə dair” Şəhadətnaməyə onun adı daxil edilmişdir. Odur ki, üçüncü şəxsin adının JN-286F, kod 40724028 nömrəli Şəhadətnaməyə daxil edilməsi qanunvericiliyin tələbinə uyğun olmamış və şəhadətnamənin məzmununun təhrif edilməsinə səbəb olmuşdur. Belə ki, aqrar islahat komissiyasının təsdiq etdiyi subyektlər siyahısında iddia olunan torpaq sahəsinə aidiyyəti olmayan şəxsin adının həmin şəhadətnaməyə daxil edilməsi, iddiaçının mülkiyyət hüququnun pozulmasına səbəb olmuşdur. Hazırda düzəliş edilməsi tələb edilən, RX ******* nömrəli çıxarış, JN-286F nömrəli şəhadətnamə əsasında verildiyindən, həmin çıxarışda üçüncü şəxsin adının olması yuxarıda məzmununa istinad olunmuş normaların tələblərinə zidd olmuşdur. Üçüncü şəxsin adının müvafiq şəhadətnaməyə düzgün olmayaraq daxil edilməsi, qərarın təsviri hissəsində məzmununa istinad edilmiş təsərrüfatbaşına kitablardan çıxarışlarla da biribaşa sübut olunur. Belə ki, üçüncü şəxsin təsərrüfat başçısı olaraq qeyd edildiyi təsərrüfatın 773 №-li şəxsi hesabında 5 nəfər ailə üzvü ilə birlikdə faktiki istifadədə olan torpaq sahəsi 0.06 ha olaraq qeyd edilmişdir. İşdə olan, İsmayıllı rayonu Cülyan kəndi üzrə torpaq payı almaq hüquq olan subyektlər siyahısından çıxarışda da 267 sıra nömrəsinin qarşısında X2 adının qarşısında (5 nəfər ailə üzvü ilə birlikdə), qaytanlanmış kitabda həyətyanı sahəsi 0.06 olmaqla qeydiyyat aparılmışdır və üçüncü şəxsə münasibətdə təsdiq edilmiş subyektlər siyahısı 0.06 ha torpaq sahəsinə aid olmuşdur. İddiaçıya münasibətdə isə müəyyən edilir ki, 0.25 ha torpaq sahəsinin qeyd olunduğu təsərrüfatın 710 №-li şəxsi hesabında təsərrüfat başçısı Saray Hüseynova, İddiaçı və digər ailə üzvləri qeyd edilmişdir. İsmayıllı rayonu Cülyan kəndi üzrə torpaq payı almaq hüquq olan subyektlər siyahısında 69 sıra nömrəsinin qarşısında X9 və İddiaçı adının qeyd edilərək, qaytanlanmış kitabda həyətyanı torpaq sahəsi 0.25 ha olmaqla qeydiyyat aparılmış və məhz həmin torpaq sahəsinə münasibətdə subyektlər siyahısı təsdiq edilmişdir. Buna görə də, məhkəmə hesab edir ki, iddiaçı, haqlı olaraq RX ******* nömrəli çıxarışdan üçüncü şəxsin adının çıxarılmasını cavabdeh orqandan tələb etmişdir. Daşınmaz əmlakın dövlət reyestri haqqında” Qanun: Maddə 2.1. Daşınmaz əmlaka mülkiyyət və digər əşya hüquqlarının dövlət qeydiyyatı Azərbaycan Respublikasının Mülki Məcəlləsinə uyğun olaraq daşınmaz əmlaka hüquqların əmələ gəlməsinin, məhdudlaşdırılmasının (yüklülüyünün) başqasına keçməsinin və bu hüquqlara xitam verilməsinin dövlət tərəfindən tanınması və təsdiq edilməsi barədə hüquqi aktdır. İşin araşdırılmış hallarından görünür ki, “Daşınmaz əmlakın dövlət reyestri haqqında” Qanunda imtina üçün nəzərdə tutulan hallardan heç biri hazırkı işdə mövcud deyil və cavabdeh öz imtinasını hər hansı bir maddi hüquq norması ilə əsaslandırmamışdır. Halbuki, “İnzibati icraat haqqında” Qanunun 11.1-ci maddəsinə əsasən, inzibati orqanlar qanunun tələblərinə riayət etməyə borcludurlar və həmin Qanunun 24.1-ci maddəsinə əsasən, inzibati orqan inzibati icraat zamanı işin düzgün həlli üçün əhəmiyyət kəsb edən bütün faktiki halları hərtərəfli, tam və obyektiv araşdırmağa borcludur. İnzibati İcraat haqqında” Azərbaycan Respublikası Qanununu: 11.1. İnzibati orqanlar qanunun tələblərinə riayət etməyə borcludurlar. 11.2. İnzibati orqanlar yalnız qanunla nəzərdə tutulmuş hallarda və qaydada şəxsin hüquq və azadlıqlarına müdaxilə edə bilərlər.
17. fiziki və ya hüquqi şəxslərin hüquqi statusuna (prinsipial hərəkət azadlığına) hər hansı müdaxiləni nəzərdə tutan tədbirlər inzibati orqanın güddüyü qanuni məqsədə mütənasib olmalı, həmin məqsədə çatmaq üçün öz məzmunu, yeri, vaxtı və əhatə etdiyi şəxslərin dairəsi baxımından zəruri və yararlı olmalıdır. Azərbaycan Respublikası İnzibati Prosessual Məcəlləsi: 34.1.öhdəliyin icrası haqqında iddia vasitəsi ilə iddiaçı cavabdehdən inzibati aktın qəbul edilməsi ilə bağlı olmayan (inzibati aktın qəbul edilməsinə yönəlməyən) müəyyən hərəkətlərin edilməsini tələb edə bilər. 52.məhkəmə iddia ərizəsinin ifadə tərzi ilə bağlı olmasa da, iddia tələbindən kənara çıxmağa haqlı deyildir. 69.5. məhkəmə qərarının nəticəvi hissəsində, məhkəmənin gəldiyi nəticə, prosessual xərclər və həmin qərara qarşı hüquqi müdafiə vasitələrindən istifadə qaydası və müddəti göstərilməlidir. 68.1. məhkəmə mübahisə ilə bağlı iş üzrə inzibati məhkəmə icraatı nəticəsində onda yaranmış daxili inam əsasında qərar qəbul edir. Qərarda məhkəmənin mövqeyi üçün əsas olmuş səbəblər göstərilməlidir. 68.2. məhkəmə qərarı yalnız məhkəmə icraatında tədqiq olunmuş və barələrində proses iştirakçılarının öz mülahizələrini bildirmək imkanına malik olduqları faktlar və sübutlarla əsaslandırılmalıdır. 69.5. məhkəmə qərarının nəticəvi hissəsində, məhkəmənin gəldiyi nəticə, prosessual xərclər və həmin qərara qarşı hüquqi müdafiə vasitələrindən istifadə qaydası və müddəti göstərilməlidir. 108.1. Prosessual xərclər məhkəmə xərclərindən (dövlət rüsumlarından və digər ödəmələrdən) və hüquqi müdafiə ilə bağlı proses iştirakçısının çəkdiyi, onun şikayəti üzrə şikayət instansiyasında icraatla əlaqədar xərclər də daxil olmaqla, zəruri xərclərdən ibarətdir. 108.2. Dövlət rüsumları, vəkilin və ya nümayəndənin haqqı və digər xərclər qanunvericiliyə uyğun olaraq ödənilməlidir. Qanunvericilikdə həmin ödəmələrin məbləğinin müəyyən edilmədiyi hallarda, məhkəmə özü ağlabatan məbləğ təyin edir.
Nəticəvi hissə:
Məhkəmə yuxarıda göstərilənlərə əsasən və Azərbaycan Respublikası İnzibati Prosessual Məcəlləsinin 68, 69, 73, 75, 85-ci maddələrini rəhbər tutaraq
qərara aldı:
İddia təmin edilir. Cavabdeh “Daşınmaz Əmlakın Dövlət Kadastrı və Reyestri” X15 9 saylı Qəbələ Ərazi İdarəsinin üzərinə RX ******* nömrəli çıxarışa düzəliş edilərək, X2 adının həmin çıxarışdan çıxarılması öhdəliyi qoyulur. Qərardan onun rəsmi təqdim edildiyi vaxtdan tərəflər 30 (otuz) gün müddətində Şəki İnzibati Məhkəməsi (Şəki şəhəri, Salman Mümtaz küçəsi 318) vasitəsi ilə Şəki Apellyasiya Məhkəməsinin İnzibati Kollegiyasına apellyasiya şikayəti verə bilərlər. Qərar onun rəsmi təqdim edildiyi vaxtdan 30 (otuz) gün müddətində apellyasiya şikayəti verilmədiyi və ya proses iştirakçıları tərəfindən şikayətin geri götürüldüyü hallarda məhkəmə qərarı onun təqdim olunduğu gündən 30 gün keçdikdən sonra qanuni qüvvəyə minir.
Hakim Vüqar Musayev.