Sumqayıt İnzibati Məhkəməsi Qərardad — İş №2-1(118)-1482/2021

Azərbaycan Respublikası adından QƏRARDAD Sumqayıt şəhəri İş № 2-1(118)-1482/2021 23.07.2021 SUMQAYIT İNZİBATİ MƏHKƏMƏSİ Hakim Mirzəyeva Leyla Eytibar qızının sədirliyi ilə, Davudova Nigar Şaban qızının katibliyi ilə, İddiaçı nümayəndə və vəkili X1 iştirakı ilə, İddiaçı cavabdeh Azərbaycan Respublikası Quba Rayon İcra Hakimiyyətinə qarşı “cavabdehdən maddi ziyana görə 61 800 (altmış bir min səkkiz yüz) manat, (yəni, mülkiyyətində olan Quba şəhəri, 31-ci məhəllə ünvanında yerləşən, 28,10 kv.metr olan qeyri-yaşayış sahəsinin 0,0040 ha torpaq sahəsi ilə birlikdə olan dəyəri 41 400 (qırx bir min dörd yüz) manat və 2016-cı il iyun ayı tarixindən hazırki dövrədək icarə dəyəri 51 ay x 400 manat (əldən çıxmış fayda) 20 400 (iyirmi min dörd yüz) manat, mənəvi zərərə görə isə 10 000 (on min) manat məbləğində pul vəsaitinin onun xeyrinə tutulması” tələbinə dair inzibati mübahisəyə Sumqayıt İnzibati Məhkəməsinin inzibati binasında, açıq məhkəmə iclasında baxaraq, MÜƏYYƏN ETDİ: İddiaçı cavabdeh Azərbaycan Respublikası Quba Rayon İcra Hakimiyyətinə qarşı iddia qaldıraraq, “cavabdehdən maddi ziyana görə 61 800 (altmış bir min səkkiz yüz) manat, (yəni, mülkiyyətində olan Quba şəhəri, 31-ci məhəllə ünvanında yerləşən, 28,10 kv.metr olan qeyri-yaşayış sahəsinin 0,0040 ha torpaq sahəsi ilə birlikdə olan dəyəri 41 400 (qırx bir min dörd yüz) manat və 2016-cı il iyun ayı tarixindən hazırki dövrədək icarə dəyəri 51 ay x 400 manat (əldən çıxmış fayda) 20 400 (iyirmi min dörd yüz) manat, mənəvi zərərə görə isə 10 000 (on min) manat məbləğində pul vəsaitinin onun xeyrinə tutulması”na dair qərar qəbul edilməsini məhkəmədən xahiş etmişdir. Azərbaycan Respublikası İnzibati Prosessual Məcəlləsinin 13-cü maddəsinə əsasən məhkəmə qaldırılan iddialarda yol verilən formal xətaların aradan qaldırılmasında, aydın olmayan iddia tələblərinin dəqiqləşdirilməsində, yanlış iddia növlərinin münasibləri ilə əvəz olunmasında, natamam faktiki məlumatların tamamlanmasında, eləcə də işin hallarının müəyyənləşdirilməsi və qiymətləndirilməsi baxımından əhəmiyyət kəsb edən izahatların təqdim olunmasında proses iştirakçılarına yardım etməyə borcludur. İddiaçı həmin normaya uyğun olaraq hüquqi yardım olunması üçün məhkəməyə dəvət olunmuş, məhkəmə iclasında onun tələbi aydınlaşdırılmış və ona iddiaya inzibati məhkəmə icraatı qaydasında baxılması üçün ilk öncə cavabdeh inzibati orqana müraciət etməli olduğu, cavabdeh tərəfindən müraciətinin təmin olunmasından imtina edildiyi və ya hərəkətsizlik göstərildiyi təqdirdə məhkəməyə müraciət etməsi izah edilmişdir. Məhkəmə iclasında iştirak edən İddiaçı nümayəndə və vəkili X2 ərizə təqdim edərək, iddia ərizəsinin və ona əlavə olunmuş sənədlərin geri qaytarılmasını məhkəmədən xahiş etdi. Azərbaycan Respublikası İnzibati Prosessual Məcəlləsinin 80.1-ci maddəsinə əsasən həmin Məcəlləyə əsasən barəsində məhkəmə qaydasında şikayət verilə bilən, habelə hüquqi müdafiə vasitələrindən istifadə qaydalarını və müddətini müəyyən edən məhkəmə qərardadları mütləq əsaslandırılmalıdır. Məhkəmə hesab edir ki, inzibati məhkəmə icraatının mahiyyəti və məqsədi fiziki və hüquqi şəxslərlə inzibati akt qəbul etmək səlahiyyəti olan orqanlar arasında yaranmış mübahisənin həllindən ibarətdir. İnzibati məhkəmə icraatı qaydasında işə baxıla bilməsi üçün ilk növbədə iddiaçı ilə inzibati orqan arasında mübahisə olmalı və iddiaçının həmin mübahisəni inzibati məhkəmə icraatı qaydasında davam etdirmək iradəsi mövcud olmalıdır. Lakin hazırkı işdə iddiaçının nümayəndə və vəkilinin ərizənin geri qaytarılmasını xahiş etməsi onun bu iradəsinin olmadığını göstərir. Buna görə də məhkəmə hesab edir ki, iddia ərizəsi və ona əlavə edilmiş sənədlər geri qaytarılmalıdır. Yuxarıda göstərilənlərə əsasən məhkəmə, QƏRARA ALDİ: İddia ərizəsi və ona əlavə edilmiş sənədlər iddiaçıya geri qaytarılsın. Qərardaddan 10 gün müddətində Sumqayıt İnzibati Məhkəməsi vasitəsi ilə Sumqayıt şəhəri, Səməd Vurğun küçəsi 120 ünvanında yerləşən Sumqayıt Apellyasiya Məhkəməsinə şikayət verilə bilər. Hakim Leyla Mirzəyeva