Şirvan İnzibati Məhkəməsi Qərardad — İş №2-1(120)-1472/2020

Azərbaycan Respublikası adından QƏRARDAD İş № 2-1(120)-1472/2020 29.09.2020 ŞİRVAN İNZİBATİ MƏHKƏMƏSİ Hakim Həsənov Samir Firdusi oğlunun sədrliyi, Məhkəmə iclas katibi X1 iştirakı ilə, İddiaçı Lənkəran şəhər İşıqlandırma Müəssisəsinin cavabdeh "xxxx" Açıq Səhmdar Cəmiyyətinə qarşı “aktların etibarsız hesab edilməsi və həmin aktlar əsasında yaranmış borcun silinməsi” tələbinə dair inzibati işə Şirvan şəhərində Şirvan İnzibati Məhkəməsində açıq məhkəmə iclasında baxaraq, müəyyən etdi: İddiaçı Lənkəran şəhər İşıqlandırma Müəssisəsi cavabdeh "xxxx" Açıq Səhmdar Cəmiyyətinə qarşı aktların etibarsız hesab edilməsi və həmin aktlar əsasında yaranmış borcun silinməsi tələbinə dair qərar çıxarılmasını xahiş etmişdir. İddia ərizəsi inzibati mübahisə kimi qeydiyyata alınaraq, məhkəməyə daxil olduğu gündən icraata qəbul edilmiş sayılmışdır. Məhkəmə iş materiallarını araşdıraraq, hesab edir ki, iddia mümkün sayılmamalıdır. Belə ki, iddia ərizəsinin məzmunundan, məlum olmuşdur ki, həmin mübahisə kommersiya mübahisələri üzrə məhkəmə icraatına aiddir və inzibati icraat qaydasında baxıla bilməz. Azərbaycan Respublikasının İPM-in 35.1-ci maddəsinə əsasən bu Məcəllədə başqa qayda nəzərdə tutulmamışdırsa, iddiaçının iddia ərizəsində inzibati aktın qəbul edilməsi və ya qəbul edilməsindən imtina olunması, yaxud inzibati orqanın hərəkəti və ya hərəkətsizliyi nəticəsində onun hüquqlarının və qanunla qorunan maraqlarının pozulduğunu əsaslandırdığı hallarda mübahisələndirmə haqqında, məcburetmə haqqında, öhdəliklərin icrası haqqında və ya müəyyən hərəkətləri etməkdən çəkinməyə dair iddia mümkün sayılır. Qeyd edilən normanın tələbinə görə istənilən növ inzibati məhkəmə icraatı qaydasında baxılmalı olan iddia yalnız onun mümkünlüyü haqqında şərt yerinə yetirildiyi halda yolveriləndir. İddianın əsaslı hesab edilərək məhkəmə tərəfindən mümkün sayılması üçün əsas şərtlər - tələbin iddia müddətinə dair normalara riayət edilməklə və iddiaya cavab verməli olan inzibati orqana qarşı yönəlməsi, iddiaçının pozulması ehtimal olunan subyektiv hüququnun mövcudluğunun konstitusiyadan, ümumi (publik) hüquq sahəsində qüvvədə olan qanunlardan və qanun qüvvəli aktlardan irəli gəlməsidir. İddiaçıya izah edilir ki, o, hazırki iddia ərizəsini və ona əlavə edilmiş sənədləri aidiyyəti üzrə baxılması üçün “Elektron məhkəmə” informasiya sistemində yaradılan elektron kabinet vasitəsilə Şirvan Kommersiya Məhkəməsinə təqdim edə bilər. “Azərbaycan Respublikası Mülki Prosessual Məcəlləsində dəyişiklik edilməsi haqqında” xx.xx.2018-ci il tarixli Qanunu ilə Azərbaycan Respublikası Mülki Prosessual Məcəlləsinə əlavə edilən 10-1.3-cü maddəsinə əsasən kommersiya mübahisələri üzrə məhkəmə icraatı, o cümlədən ərizə, şikayət və digər sənədlərin göndərilməsi, qəbulu, habelə məhkəmə sənədlərinin məhkəməyə və proses iştirakçılarına çatdırılması “Elektron məhkəmə” informasiya sistemində yaradılan elektron kabinet vasitəsilə həyata keçirilir. Həmin Qanunla Azərbaycan Respublikası Mülki Prosessual Məcəlləsinə əlavə edilən 135.8-ci maddəsinin tələbinə görə kommersiya mübahisələri üzrə işdə iştirak edən şəxslərin məhkəmə sənədləri onların “Elektron məhkəmə” informasiya sistemində yaradılmış “elektron kabinet”lərində yerləşdirilir və onlara bu barədə məlumat həmin sistem vasitəsilə elektron qaydada (elektron poçt, SMS və s. vasitəsilə) çatdırılır. Azərbaycan Respublikası İnzibati Prosessual Məcəlləsinin 13-cü maddəsinə əsasən məhkəmə qaldırılan iddialarda yol verilən formal xətaların aradan qaldırılmasında, aydın olmayan iddia tələblərinin dəqiqləşdirilməsində, yanlış iddia növlərinin münasibləri ilə əvəz olunmasında, natamam faktiki məlumatların tamamlanmasında, eləcə də işin hallarının müəyyənləşdirilməsi və qiymətləndirilməsi baxımından əhəmiyyət kəsb edən izahatların təqdim olunmasında proses iştirakçılarına yardım etməyə borcludur. Həmin Məcəllənin 48.1-ci maddəsinə əsasən, sədrlik edən hakim bütün formal xətaların aradan qaldırılmasına, qeyri-müəyyən ifadələrin aydınlaşdırılmasına, işin mahiyyəti üzrə vəsatətlərin verilməsinə, natamam faktiki məlumatların tamamlanmasına, prosesin sonrakı mərhələlərində işin hallarının tam müəyyənləşdirilməsi və obyektiv qiymətləndirilməsi üçün əhəmiyyət kəsb edən bütün yazılı izahatların təqdim olunmasına yardım etməlidir. Məhkəmə tərəfindən iddiaçıya 02 sentyabr 2020-ci il tarixli, 2-1(120)-1472/2020 nömrəli məktubla hüquqi yardım edilərək, hazırkı mübahisənin kommersiya mübahisəsi olduğu və hazırkı tələblə bağlı iddia ərizəsini və ona əlavə edilmiş sənədləri aidiyyəti üzrə baxılması üçün “Elektron məhkəmə” informasiya sistemində yaradılan elektron kabinet vasitəsilə Şirvan Kommersiya Məhkəməsinə təqdim edilməsi hüququ izah olunmuşdur. Azərbaycan Respublikasının İPM-in 35.3-cü maddəsinə əsasən iddianın mümkün sayılmaması barədə məhkəmə qərardad qəbul edir. Həmin qərardaddan yuxarı məhkəməyə şikayət verilə bilər. Beləliklə, məhkəmə hesab edir ki, bu cür iddia tələbinə inzibati məhkəmədə baxılması inzibati prosessual qanunvericiliyin prinsiplərinə zidd olduğundan Lənkəran şəhər İşıqlandırma Müəssisəsinin iddiası mümkün sayılmamalıdır. Göstərilənləri nəzərə alaraq və Azərbaycan Respublikasının İPM-in 35, 80, 83 və 85ci maddələrinə əsasən məhkəmə qərara aldı: İddiaçı Lənkəran şəhər İşıqlandırma Müəssisəsinin cavabdeh X3 Cəmiyyətinə qarşı “aktların etibarsız hesab edilməsi və həmin aktlar əsasında yaranmış borcun silinməsi” tələbinə dair iddiası mümkün sayılmasın. Qərardaddan, onun rəsmi qaydada verildiyi gündən 10 (on) gün müddətində Şirvan İnzibati Məhkəməsi vasitəsilə Şirvan Apelyasiya Məhkəməsinə şikayət verilə bilər. Hakim Samir Həsənov