Şirvan İnzibati Məhkəməsi Qərardad — İş №2-1(120)-2238/2022

Azərbaycan Respublikası adından QƏRARDAD İş № 2-1(120)-2238/2022 20.10.2022 ŞİRVAN İNZİBATİ MƏHKƏMƏSİ Hakim Hüseynova Amilya Aqil qızının sədrliyi, Məhkəmə iclas katibi Rzayev Rüfət İlham oğlunun katibliyi, İddiaçılar İddiaçı1 Fərhad qızının, İddiaçı2, Cavabdeh Daşınmaz Əmlakın Dövlət Reyestri Xidmətinin 6 saylı ərazi idarəsinin nümayəndəsi X1 iştirakları ilə, İddiaçılar İddiaçı1 Fərhad qızının və İddiaçı2 cavabdehlər Beyləqan rayon İcra Hakimiyyətinə və Daşınmaz Əmlakın Dövlət Reyestri Xidmətinin 6 saylı ərazi idarəsinə qarşı Beyləqan rayonu Dünyamalılar bələdiyyəsinin 10 may 2006-cı il tarixli, 11 saylı qərarına əsasən adambaşına düşən orta torpaq norması 0,63 ha olmaqla, cəmi 1,26 ha torpaq sahəsinin mülkiyyət hüququ əsasında adına rəsmləşdirilməsi üçün müvafiq sərəncamın və çıxarışın verilməsi öhdəliyinin cavabdehlərə həvalə edilməsi tələbinə dair iddia ərizəsi üzrə işə Şirvan şəhərində, məhkəmənin inzibati binasında hazırlıq icraatı ilə bağlı açıq məhkəmə iclasında baxaraq, müəyyən etdi: İddiaçılar İddiaçı1 Fərhad qızı və İddiaçı2 cavabdehlər Beyləqan rayon İcra Hakimiyyətinə və Daşınmaz Əmlakın Dövlət Reyestri Xidmətinin 6 saylı ərazi idarəsinə qarşı Beyləqan rayonu Dünyamalılar bələdiyyəsinin 10 may 2006-cı il tarixli, 11 saylı qərarına əsasən adambaşına düşən orta torpaq norması 0,63 ha olmaqla, cəmi 1,26 ha torpaq sahəsinin mülkiyyət hüququ əsasında adına rəsmləşdirilməsi üçün müvafiq sərəncamın və çıxarışın verilməsi öhdəliyinin cavabdehlərə həvalə edilməsi tələbi barədə qərar qəbul edilməsini xahiş etmişdirlər. İddiaçılar İddiaçı1 Fərhad qızı və İddiaçı2 məhkəmə iclasında ərizə təqdim edərək, iddia ərizəsinin və ona əlavə edilmiş sənədlərin baxılmadan geri qaytarılmasını məhkəmədən xahiş etdilər. Məhkəmə iddiaçıların “iddia ərizəsinin qaytarılması barədə” ərizəsini və iş materiallarını araşdıraraq hesab edir ki, iddia ərizəsi və ona əlavə olunmuş sənədlər geri qaytarılmalı və iş üzrə icraata xitam verilməlidir. Cavabdeh Daşınmaz Əmlakın Dövlət Reyestri Xidmətinin 6 saylı ərazi idarəsinin nümayəndəsi X2 iddia ərizəsinin geri qaytarılması barədə ərizəyə etiraz etməmişdir. Belə ki, Azərbaycan Respublikası İnzibati Prosessual Məcəlləsinin: - 15.2-ci maddəsinə əsasən inzibati məhkəmə icraatında tərəflər mübahisəyə baxılmasını barışıq sazişi ilə, iddiaçının iddiadan imtina etməsi ilə, cavabdehin iddianı qəbul etməsi ilə və ya hüquqi mübahisənin nizamlanması barədə müştərək bəyanatla sona çatdıra bilərlər. - 55.3-cü maddəsinə əsasən məhkəmənin tələbinə baxmayaraq, iddiaçı 30 gündən çox müddət ərzində ardıcıl olaraq iş üzrə məhkəmə icraatından yayındıqda, iddia geri götürülmüş sayılır. Belə hallarda məhkəmə iddianın geri götürülmüş sayılması barədə qərardad qəbul edir. - 55.5-ci maddəsinə əsasən iddiaçı iddiadan imtina etdikdə və ya iddia məhkəmə tərəfindən geri götürülmüş sayıldıqda, məhkəmə icraata xitam verilməsi barədə qərardad qəbul edir. Həmin qərardadda iddiadan imtina edilməsinin və ya iddianın geri götürülmüş sayılmasının bu Məcəllədə nəzərdə tutulmuş hüquqi nəticələri göstərilməlidir. Məhkəmənin həmin qərardadından şikayət verilə bilməz. Məhkəmə hesab edir ki, şərh olunan normativ hüquqi aktda iddiaçının ərizəsinə əsasən iddia ərizəsinin və əlavə olunmuş sənədlərin geri qaytarılması birbaşa nəzərdə tutulmasa da, inzibati mübahisənin onun iradəsinə uyğun olaraq sona çatdırılmasının mümkünlüyü təsbit olunmuşdur və iddiaçının (və ya nümayəndəsinin) belə ərizəsi faktiki olaraq onun mübahisə ilə bağlı marağının itməsi səbəbindən iddia ərizəsinin geri qaytarılması və iş üzrə icraata xitam verilməsi barədə qərardadın qəbul olunması ilə nəticələnə bilər. Başqa sözlə, iddiaçı öz aktiv hərəkəti ilə iradəsinə uyğun olaraq məhkəməyə iddia ərizəsinin qaytarılması barədə ərizə verdikdə, bu o anlama gəlir ki, iddiaçı iddia ərizəsinin məhkəmədə baxılmasını və iş üzrə qərarın qəbul edilməsini istəmir. Məhkəmə onu da qeyd edir ki, iddia ərizəsinin geri qaytarılması və bununla bağlı iş üzrə icraata xitam verilməsi həmin iddia ilə məhkəməyə yenidən müraciət olunmanı istisna etmir. Göstərilənlərə əsasən və Azərbaycan Respublikası İnzibati Prosessual Məcəlləsinin 55 və 80ci maddələrini rəhbər tutaraq, məhkəmə Qərara aldı: İddiaçılar İddiaçı1 Fərhad qızının və İddiaçı2 ərizəsi təmin olunsun. İddiaçılar İddiaçı1 Fərhad qızının və İddiaçı2 cavabdehlər Beyləqan rayon İcra Hakimiyyətinə və Daşınmaz Əmlakın Dövlət Reyestri Xidmətinin 6 saylı ərazi idarəsinə qarşı Beyləqan rayonu Dünyamalılar bələdiyyəsinin 10 may 2006-cı il tarixli, 11 saylı qərarına əsasən adambaşına düşən orta torpaq norması 0,63 ha olmaqla, cəmi 1,26 ha torpaq sahəsinin mülkiyyət hüququ əsasında adına rəsmləşdirilməsi üçün müvafiq sərəncamın və çıxarışın verilməsi öhdəliyinin cavabdehlərə həvalə edilməsi tələbinə dair iddia ərizəsi geri qaytarılsın və iş üzrə icraata xitam verilsin. İddiaçıya gələcəkdə eyni tərəflər arasında, eyni predmet barəsində və eyni əsaslar üzrə yenidən iddia ilə məhkəməyə müraciət etmək hüququ izah olunsun. Qərardaddan şikayət verilə bilməz. Hakim Amilya Hüseynova