Şirvan İnzibati Məhkəməsi Qərardad — İş №2-1(120)-526/2020

Azərbaycan Respublikası adından QƏRARDAD İş № 2-1(120)-526/2020 04.09.2020 ŞİRVAN İNZİBATİ MƏHKƏMƏSİ Hakim Həsənov Samir Firdusi oğlunun sədrliyi, Məhkəmə iclasının katibi X1 iştirakı ilə, İddiaçı "xxxx" Məhdud Məsuliyyətli Cəmiyyətinin cavabdeh Azərbaycan Respublikası Vergilər Nazirliyi 6 saylı Ərazi Vergilər Baş idarəsinə qarşı “xx.xx.2019-cu il tarixli, **********193812 saylı qərarın ləğv edilməsi” tələbinə dair iddia ərizəsi üzrə işə Şirvan şəhərində Şirvan İnzibati Məhkəməsinin binasında açıq məhkəmə iclasında baxaraq, MÜƏYYƏN ETDİ: İddiaçı "xxxx" Məhdud Məsuliyyətli Cəmiyyətinin cavabdeh Azərbaycan Respublikası Vergilər Nazirliyi 6 saylı Ərazi Vergilər Baş idarəsinə qarşı “xx.xx.2019-cu il tarixli, **********193812 saylı qərarın ləğv edilməsi” tələbinə dair iddia ərizəsi ilə məhkəməyə müraciət etmişdir. İddia ərizəsi inzibati mübahisə kimi qeydiyyata alınaraq, məhkəməyə daxil olduğu gündən icraata qəbul edilmiş sayılmışdır. İddiaçı "xxxx" Məhdud Məsuliyyətli Cəmiyyətinin nümayəndəsi 28 iyul 2020-ci il tarixdə məhkəmənin dəftərxanasına ərizə təqdim edərək, iddia ərizəsinin icraatına xitam verilməsini xahiş etmişdir. Məhkəmə iddiaçının nümayəndəsinin ərizəsini nəzərə alıb, iş materiallarını araşdıraraq hesab edir ki, iddia mümkün sayılmamalı, iddia ərizəsi və ona əlavə olunmuş sənədlər iddiaçının nümayəndəsinə geri qaytarılmalıdır. Belə ki, Azərbaycan Respublikası İnzibati Prosessual Məcəlləsinin 1.2-ci maddəsinə əsasən bu Məcəllə ilə başqa qayda müəyyən edilmədiyi və bu Məcəllə ilə nəzərdə tutulmuş prosessual prinsiplərə zidd olmadığı hallarda, inzibati mübahisələrə dair işlər üzrə məhkəmə icraatında Azərbaycan Respublikası Mülki Prosessual Məcəlləsinin müddəaları tətbiq oluna bilər. Azərbaycan Respublikası İnzibati Prosessual Məcəlləsi iddiaçının vəsatətinə əsasən iddia ərizəsinin qaytarılması ilə bağlı hər hansı qaydanı müəyyən etmədiyindən, məhkəmə hazırki vəziyyətdə məsələnin nizama salınması üçün Azərbaycan Respublikası Mülki Prosessual Məcəlləsinin müddəalarının tətbiq edilməsini zəruri hesab edir. «Normativ hüquqi aktlar haqqında» Azərbaycan Respublikası Konstitusiya Qanununun 13.1 və 13.2-ci maddələrinə əsasən konkret ictimai münasibətləri tənzimləyən qanunvericilik normaları olmadıqda hüququn analogiyasından və ya qanunun analogiyasından istifadə oluna bilər. Əvvəlcə qanunun analogiyasından istifadə olunur. Konkret ictimai münasibətləri tənzimləyən qanunvericilik normaları olmadıqda həmin ictimai münasibətlərə oxşar ictimai münasibətləri tənzimləyən qanunvericilik normaları tətbiq edilir. Azərbaycan Respublikası Mülki Prosessual Məcəlləsinin 170.1-ci maddəsinin tələbinə görə bu Məcəllənin 254, 255, 261.0.1-261.0.3-cü və 261.0.6-261.0.8-ci maddələrində göstərilən əsaslar olduqda, məhkəmə baxışına hazırlığın icraatı dayandırıla və ya xitam edilə bilər, yaxud iddiaçının vəsatəti ilə ərizə qaytarıla bilər. Azərbaycan Respublikası İnzibati Prosessual Məcəlləsinin 35.1-ci maddəsinə əsasən bu Məcəllədə başqa qayda nəzərdə tutulmamışdırsa, iddiaçının iddia ərizəsindən inzibati aktın qəbul edilməsi və ya qəbul edilməsindən imtina olunması, yaxud inzibati orqanın hərəkəti və ya hərəkətsizliyi nəticəsində onun hüquqlarının və qanunla qorunan maraqlarının pozulduğunu əsaslandırdığı hallarda mübahisələndirmə haqqında, məcburetmə haqqında, öhdəliklərin icrası haqqında və ya müəyyən hərəkətləri etməkdən çəkinməyə dair iddia mümkün sayılır. Göründüyü kimi qanuna əsasən müəyyən növ inzibati iddia onun mümkünlüyü haqqında şərt yerinə yetirildiyi halda mümkün sayılır. Məhkəmədə mülki (inzibati mübahisələrin) işlərin başlanması bir qayda olaraq məhkəməyə müraciət etmiş şəxsin bilavasitə iradəsinin ifadəsi olduğuna görə, icraatın sonradan davam etdirilib-etdirilməməsi də məhz iddiaçının iradəsindən asılıdır. İddiaçının iddia ərizəsinin icraatına xitam verilməsini tələb etməsi, həmin tələb üzrə icraatın davam etdirilməsini lüzumsuz edir. Bununla belə məhkəmə qeyd edir ki, iddianın mümkün sayılmaması ilə icraata xitam verilmənin müxtəlif hüquqi nəticələri olur. Belə ki, iddianın mümkün sayılmamasından fərqli olaraq, iddiadan imtina edilməsi ilə əlaqədar işin icraatına xitam verildikdə, eyni tərəflər arasında, eyni predmet haqqında və eyni əsaslar üzrə mübahisə barəsində məhkəməyə müraciət edilməsinə yol verilmir. Onu da nəzərə almaq lazımdır ki, iddiaçı iddiadan imtina etdiyi halda iş üzrə icraata xitam verilir. İddiaçı tərəfindən məhkəməyə ünvanlanmış ərizədə icraata xitam verilməsi xahiş olunsa da, iddiadan imtina edilməsi barədə qeyd yoxdur. Buna baxmayaraq məhkəmə həmin ərizə ilə iddiaçının icraatın davam etdirilməməsini, yəni iddia tələbinə məhkəmədə baxılmamasını ifadə edən iradəsinin olduğunu müəyyən edir. İddiaçının nümayəndəsi məhkəmə iclasında iştirak etmədiyindən və icraata xitam verilmənin hüquqi nəticələrinin ona izah edilməsi mümkün olmadığından, iddiaya mahiyyəti üzrə baxılmasında marağı olmadığından və gələcəkdə iddiaçının çətinliklərlə rastlaşmaması səbəbindən məhkəmə iş üzrə iddianı qeyri mümkün hesab edir. Azərbaycan Respublikası İnzibati Prosessual Məcəlləsinin 35.1-ci maddəsinə əsasən iddianın mümkün sayılmaması barədə məhkəmə qərardad qəbul edir. Həmin qərardaddan yuxarı məhkəməyə şikayət verilə bilər. Beləliklə, məhkəmə hesab edir ki, iddiaçı "xxxx" Məhdud Məsuliyyətli Cəmiyyətinin cavabdeh Azərbaycan Respublikası Vergilər Nazirliyi 6 saylı Ərazi Vergilər Baş idarəsinə qarşı “xx.xx.2019-cu il tarixli, **********193812 saylı qərarın ləğv edilməsi” tələbinə dair iddiası mümkün sayılmamalı, iddia ərizəsi və ona əlavə olunmuş sənədlər iddiaçıya geri qaytarılmalıdır. Şərh olunanlara əsasən və Azərbaycan Respublikası İnzibati Prosessual Məcəlləsinin 35, 50 və 80-cı maddələrini, həmçinin Azərbaycan Respublikası Mülki Prosessual Məcəlləsinin 170-cı maddəsini rəhbər tutaraq məhkəmə QƏRARA ALDİ: İddiaçı "xxxx" Məhdud Məsuliyyətli Cəmiyyətinin cavabdeh Azərbaycan Respublikası Vergilər Nazirliyi 6 saylı Ərazi Vergilər Baş idarəsinə qarşı “xx.xx.2019-cu il tarixli, **********193812 saylı qərarın ləğv edilməsi”tələbinə dair iddiası mümkün sayılmasın, iddia ərizəsi və ona əlavə olunmuş sənədlər iddiaçıya geri qaytarılsın. Qərardaddan, onun rəsmi qaydada verildiyi gündən 10 (on) gün müddətində Şirvan İnzibati Məhkəməsi vasitəsi ilə Şirvan Apelyasiya Məhkəməsinə apelyasiya şikayəti verilə bilər. Hakim Samir Həsənov