Naxçıvan Muxtar Respublikasının İnzibati Məhkəməsi Qərardad — İş №2-1(122)-1069/2023

Azərbaycan Respublikası adından QƏRARDAD Naxçıvan şəhəri İş № 2-1(122)-1069/2023 18.09.2023 NAXÇIVAN MUXTAR RESPUBLİKASININ İNZİBAT MƏHKƏMƏSİ Hakim Muradov Hicran Xasay oğlunun sədrliyi, Məmmədov Kamal Cahangir oğlunun katibliyi ilə, İddiaçı Ordubad Rayon İcra Hakimiyyətinə qarşı "ona məxsus Başdizə kənd çayxanasının sökülməsi ilə əlaqədar ona vurulmuş zərərin dəyərinə uyğun əvəzləşdirilməsi və ya kompensasiya edilməsinə görə 15000 (on beş min) manat və sökülən gündən məhkəmə qərarı çıxan günədək əldən çıxmış fayda qismində 100000 (yüz min ) manat ödənilməsi və mənəvi-psixoloji ziyana görə cavabdehdən 10000 (on min) manat olmaqla, cəmi 125000 (yüz iyirmi beş min)manat pulun ona ödənilməsi tələbi”nə dair inzibati işə Naxçıvan Muxtar Respublikası İnzibati Məhkəməsinin binasında açıq məhkəmə iclasında baxaraq, m ü ə y y ə n e t d i: İddiaçı iddia ərizəsi ilə məhkəməyə müraciət edərək ona məxsus Başdizə kənd çayxanasının sökülməsi ilə əlaqədar ona vurulmuş zərərin dəyərinə uyğun əvəzləşdirilməsi və ya kompensasiya edilməsinə görə 15000 (on beş min) manat və sökülən gündən məhkəmə qərarı çıxan günədək əldən çıxmış fayda qismində 100000 (yüz min ) manat ödənilməsi və mənəvipsixoloji ziyana görə cavabdehdən 10000 (on min) manat olmaqla, cəmi 125000 (yüz iyirmi beş min)manat pulun ona ödənilməsi öhdəliyinin cavabdeh Ordubad Rayon İcra Hakimiyyətinin üzərinə qoyulması barədə qərar qəbul edilməsini xahiş etmişdir. Azərbaycan Respublikasının İnzibati Prosessual Məcəlləsinin (bundan sonra – İPM) 45.4cü maddəsinə əsasən iddia ərizəsi məhkəməyə daxil olduğu gündən icraata qəbul edilmişdir. İddia ərizəsi məhkəmənin icraatına qəbul edildikdən sonra İPM-in 49-cu maddəsinə uyğun olaraq, işin hazırlıq icraatına başlanılmış və hazırlıq icraatı ilə bağlı məhkəmə iclası 18 sentyabr 2023-cü il tarixə təyin edilmişdir. İddiaçı məhkəməyə 04 sentyabr 2023-cü il tarixli notarial qaydada təsdiq olunmuş ərizə göndərərək Ordubad Rayon İcra Hakimiyyətinə qarşı Başdizə kənd çayxanasının sökülməsi ilə əlaqədar ona vurulmuş zərərin dəyərinə uyğun əvəzləşdirilməsi və ya kompensasiya edilməsinə görə 15000 manat və sökülən gündən məhkəmə qərarı çıxan günədək əldən çıxmış fayda qismində 100000 manat ödənilməsi və mənəvi-psixoloji ziyana görə cavabdehdən 10000 manat olmaqla, cəmi 125000 manat pulun ona ödənilməsi ilə bağlı 2-1(122)-1069/2023 nömrəli iş üzrə iddia qaldırdığını, cavabdeh tərəfindən Başdizə kəndində çayçının yenidən bərpa edilməsi üçün 51 kv.metr torpaq sahəsi ilə təmin olduğu üçün iddiadan imtina etdiyini, iddiadan imtina etməyinin hüquqi nəticələrinin ona izah edildiyini bildirib, məhkəmədən iddiadan imtina barədə ərizəni qəbul edib iş üzrə icraata xitam verilməsini xahiş etmişdir. Məhkəmə iclasının yeri və vaxtı barədə tərəflərə lazımi qaydada məlumat verilməsinə baxmayaraq, onlar heç bir üzrlü səbəb göstərmədən məhkəmə iclasında iştirak etməmişdirlər. Məhkəmə tərəflərin iştirakı olmadan işə baxılmasını mümkün hesab etmişdir. Məhkəmə iddiaçının 04 sentyabr 2023-cü il tarixli ərizəsini nəzərdən keçirərək belə qənaətə gəlir ki, iddiaçının ərizəsi təmin edilməli və iş üzrə icraata xitam verilməlidir. Belə ki, Azərbaycan Respublikasının İnzibati Prosessual Məcəlləsinin: - 55.1-ci maddəsinə əsasən məhkəmə qərarı qanuni qüvvəyə minənə qədər iddiaçı iddiadan imtina etməyə haqlıdır. - 55.4-cü maddəsinə əsasən iddiadan imtina edilməsi eyni tərəflər arasında, eyni predmet barəsində və eyni əsaslar üzrə yenidən iddia qaldırma imkanını istisna edir. - 55.5-ci maddəsinə əsasən iddiaçı iddiadan imtina etdikdə və ya məhkəmə tərəfindən geri götürülmüş sayıldıqda, məhkəmə icraata xitam verilməsi barədə qərardad qəbul edir. Həmin qərardadda iddiadan imtina edilməsinin və ya iddianın geri götürülmüş sayılmasının bu Məcəllədə nəzərdə tutulmuş hüquqi nəticələri göstərilməlidir. Məhkəmənin həmin qərardadından şikayət verilə bilməz. Beləliklə, məhkəmə hesab edir ki, İddiaçı cavabdeh Ordubad Rayon İcra Hakimiyyətinə qarşı "ona məxsus Başdizə kənd çayxanasının sökülməsi ilə əlaqədar ona vurulmuş zərərin dəyərinə uyğun əvəzləşdirilməsi və ya kompensasiya edilməsinə görə 15000 (on beş min) manat və sökülən gündən məhkəmə qərarı çıxan günədək əldən çıxmış fayda qismində 100000 (yüz min ) manat ödənilməsi və mənəvi-psixoloji ziyana görə cavabdehdən 10000 (on min) manat olmaqla, cəmi 125000 (yüz iyirmi beş min)manat pulun ona ödənilməsi tələbi”nə dair iddiası üzrə İddiaçı 04 sentyabr 2023-cü il tarixli ərizəsi təmin edilməli və iş üzrə icraata xitam verilməlidir. Yuxarıda qeyd olunanları və İPM-in 55.1, 55.4, 55.5, 80 və 83-cü maddələrini rəhbər tutaraq, məhkəmə q ə r a r a a l d ı: İddiaçı 04 sentyabr 2023-cü il tarixli ərizəsi təmin edilsin. İddiaçı cavabdeh Ordubad Rayon İcra Hakimiyyətinə qarşı "ona məxsus Başdizə kənd çayxanasının sökülməsi ilə əlaqədar ona vurulmuş zərərin dəyərinə uyğun əvəzləşdirilməsi və ya kompensasiya edilməsinə görə 15000 (on beş min) manat və sökülən gündən məhkəmə qərarı çıxan günədək əldən çıxmış fayda qismində 100000 (yüz min ) manat ödənilməsi və mənəvipsixoloji ziyana görə cavabdehdən 10000 (on min) manat olmaqla, cəmi 125000 (yüz iyirmi beş min)manat pulun ona ödənilməsi tələbi”nə dair iş üzrə icraata xitam verilsin. Qərardaddan şikayət verilə bilməz. SƏDRLİK EDƏN: HİCRAN MURADOV