Bakı Şəhəri Binəqədi Rayon Məhkəməsi Qərar — İş №3(001)-1538/2023

Azərbaycan Respublikası adından QƏRAR Bakı şəhəri İş № 3(001)-1538/2023 25.04.2023 BAKI ŞƏHƏRİ BİNƏQƏDİ RAYON MƏHKƏMƏSİ Hakim Ağayev Elçin Zəkəriyə oğlunun sədrliyi, Həsənzadə Fuad Fərhad oğlunun katibliyi, İnzibati xəta haqqında protokol tərtib etmiş Binəqədi rayon Polis İdarəsinin 43-cü PB-in polis sahə rəisi, polis baş leytenantı X1, Barəsində inzibati xəta haqqında protokol tərtib edilmiş şəxs Şəxs iştirakı ilə, xx.xx.1990-cı ildə Qəbələ rayonunda doğulmuş, Azərbaycan Respublikası vətəndaşı, evli, orta təhsilli, fərdi əməklə məşğul olan, Qəbələ rayonu Zirix kəndində qeydiyyatda olmaqla Bakı şəhəri, Sabunçu rayonu, Şuşa qəsəbəsi, nömrəsiz evdə yaşayan Şəxs barəsində Azərbaycan Respublikası İnzibati Xətalar Məcəlləsinin 535.1-ci maddəsi ilə Bakı şəhəri Binəqədi RPİ-in 43-cü PB-dən daxil olmuş inzibati xəta haqqında materiala baxaraq, məhkəmə MÜƏYYƏN ETDİ: İnzibati xəta haqqında materialdan görünür ki, Şəxs 24 aprel 2023-cü il tarixdə saat 17 radələrində Bakı şəhəri Binəqədi rayonu Novxanı qəsəbəsində Binəqədi RPİ-in 43-cü PB-in əməkdaşlarının qanuni tələblərinə qəsdən tabe olmamışdır. Qeyd olunanlara əsasən Şəxs barəsində Binəqədi rayon Polis İdarəsinin 43-cü PB-in polis sahə rəisi, polis baş leytenantı X2 tərəfindən MN seriyalı № ******* nömrəli xx.xx.2023-cü il tarixli inzibati xəta haqqında protokol tərtib edilmiş və baxılması üçün Bakı şəhəri Binəqədi Rayon Məhkəməsinə göndərilmişdir. Məhkəmədə inzibati xəta haqqında protokol tərtib etmiş şəxs Binəqədi rayon Polis İdarəsinin 43-cü PB-in polis sahə rəisi, polis baş leytenantı X2 inzibati xəta haqqında protokolu müdafiə edərək bildirdi ki, Şəxs Bakı şəhəri Binəqədi rayonu Novxanı qəsəbəsində dəmir qırıntılarının yığılıb satılması işi ilə məşğul olur. Ərazidəki bağ evlərinin həyətyanı sahələrindən edilmiş oğurluq faktları ilə bağlı həmin ərazidə xidmət aparan polis əməkdaşları 24 aprel 2023-cü il tarixdə saat 17 radələrində Bakı şəhəri Binəqədi rayonu Novxanı qəsəbəsində ona yaxınlaşaraq özünü təqdim etməsini, yaşayış yeri barədə məlumat verməsini tələb etsələr də, Binəqədi RPİ-in 43-cü PB-in əməkdaşlarına müqavimət göstərmiş, özünü təqdim etməkdən imtina etmiş, nəticə etibarilə polis əməkdaşlarının qanuni tələblərinə qəsdən tabe olmamışlar. Qeyd olunanlara əsasən onun barəsində inzibati xəta haqqında protokol tərtib edilmiş və baxılması üçün Bakı şəhəri Binəqədi Rayon Məhkəməsinə göndərilmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə özünü təqsirli bilərək izahatında göstərmişdir ki, Bakı şəhəri Binəqədi rayonu Novxanı qəsəbəsində dəmir qırıntılarının yığılıb satılması işi ilə məşğul olur. 24 aprel 2023-cü il tarixdə saat 17 radələrində Bakı şəhəri Binəqədi rayonu Novxanı qəsəbəsində dəmir axtararkən bir neçə nəfər mülki geyimli şəxslər ona yaxınlaşaraq özlərini təqdim etmiş, ondan da özünü təqdim etməsini xahiş etmişlər. Həmin şəxslər polis geyimində olmadıqları üçün onlara inanmamış, aralarında mübahisə yaranmışdır. Mübahisə zamanı Binəqədi RPİ-in 43-cü PB-in əməkdaşlarına müqavimət göstərmiş, özünü təqdim etməkdən imtina etmişdir. Əməlindən peşmandır. İlk dəfə inzibati xəta törətdiyini nəzərə alıb cərimə növündə tənbeh edilməsini xahiş etmişdir. Məhkəmə iş üzrə toplanmış sübutların və onların məcmusunun tam, hərtərəfli və obyektiv baxılmasına əsaslanmaqla belə nəticəyə gəlir ki, Şəxs Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanın törədilməsində təqsirliliyi özünün izahatı ilə yanaşı, inzibati xəta haqqında protokol və ona əlavə edilmiş digər sübutlarla tam sübuta yetirilmiş və onun əməli düzgün olaraq İXM-in 535.1-ci maddəsi ilə tövsif edilmişdir. Şəxs hərəkətlərinə münasibətdə əməlin inzibati xəta olmasını aradan qaldıran hallar, həmçinin inzibati məsuliyyətdən azad edilməsi üçün əsaslar yoxdur. Odur ki, təqsiri tam sübuta yetirildiyinə görə Şəxs inzibati məsuliyyətinə cəlb edilməli və tənbeh edilməlidir. Məhkəmə Şəxs inzibati tənbeh təyin etmək məsələsini həll edərkən qanunun aşağıdakı prinsip və müddəalarını rəhbər tutur. Azərbaycan Respublikası İXM-in 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. Məhkəmə inzibati tənbeh tətbiq edərkən xətanın xarakteri, inzibati xəta törədən səxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alır. Məhkəmə Şəxs ilk dəfə inzibati məsuliyyətə cəlb edildiyi onun məsuliyyətini yüngülləşdirən hallar kimi müəyyən edir. Məhkəmə Şəxs məsuliyyətini ağırlaşdıran hal müəyyən etmir. Məhkəmə Şəxs ilk dəfə inzibati məsuliyyətə cəlb olunduğunu nəzərə alaraq hesab edir ki, ona inzibati cərimə növündə inzibati tənbeh təyin etməklə tənbehin məqsədlərinə nail olmaq olar. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 114-cü maddəsini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə təqsirli bilinib 200 (iki yüz) manat cərimə edilsin. Qərarın surəti rəsmi qaydada verildiyi vaxtdan 10 (on) gün müddətində qərarı qəbul etmiş hakim vasitəsilə Bakı Apelyasiya Məhkəməsinə şikayət verilə bilər. Hakim Elçin Ağayev