Bakı Şəhəri Binəqədi Rayon Məhkəməsi Qərar — İş №3(001)-1677/2022

Azərbaycan Respublikası adından QƏRAR Bakı şəhəri İş № 3(001)-1677/2022 07.06.2022 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Əmirəliyev Fərid Mübariz oğlunun sədrliyi, məhkəmənin məsləhətçisi (məhkəmə iclas katibi) Almazov Pərviz Məhərrəm oğlunun katibliyi, inzibati xəta haqqında protokol tərtib etmiş şəxs Bakı şəhəri Binəqədi rayon İcra şöbəsinin icra məmuru X2, zərərçəkmiş şəxs X1, barəsində inzibati xəta haqqında iş üzrə icraat aparılan şəxs Şəxs iştirakı ilə, xx.xx.1986-cı il tarixdə Bakı şəhərində doğulmuş, Azərbaycan Respublikasının vətəndaşı, ailəli, orta təhsilli, "xxxx" MMC-də sürücü işləyən, ünvan 1 ünvanında qeydiyyatda olmaqla, ünvan 2 ünvanında yaşayan, Şəxs barəsində Azərbaycan Respublikasının İnzibati Xətalar Məcəlləsinin (bundan sonra – İXM) 528.1-ci maddəsi ilə tərtib edilmiş inzibati xəta haqqında protokol əsasında toplanmış materiala məhkəmənin binasında, açıq məhkəmə iclasında baxaraq, məhkəmə müəyyən etdi: Məhkəmənin icraatına Bakı şəhəri Binəqədi rayon İcra Şöbəsi tərəfindən Şəxs barəsində İXM-in 528.1-cı maddəsi tərtib olunmuş xx.xx.2022-ci il tarixli, MN ******* nömrəli inzibati xəta haqqında protokol əsasında toplanmış material daxil olmuşdur. Məhkəmə iclasında inzibati xəta haqqında protokol tərtib etmiş şəxs X4 izahat verərək bildirmişdir ki, Ağdaş Rayon Məhkəməsinin xx.xx.2019-cu il tarixli, 2(014)-36/2019 nömrəli icra sənədinə əsasən cavabdeh Şəxs 27 avqust 2011-ci il tarixdə anadan olmuş X5 və 10 noyabr 2013-cü il tarixdə anadan olmuş X6 18 yaşına çatanadək onların saxlanılmaları üçün Həsənova (Kərimli) Günel Hidayət qızının xeyrinə hər ay hər uşaq üçün 100 manat, cəmi 200 manat alimentin tutulması qət edilmişdir. İcra sənədinin icrası ilə əlaqədar zəruri icra tədbirləri görülməsinə baxmayaraq, Şəxs icra sənədi üzrə borcunu tam icra etməmişdir. Şəxs may ayından "xxxx" MMC-də sürücü kimi işə düzəlmiş və yaranmış 4000 manat aliment borcunu hissə-hissə ödəyə biləcəyini bildirmişdir. Lakin zərərçəkmiş şəxs X3 yaranmış aliment borcunun ona hissə-hissə verilməsi ilə razı olmamışdır. Şəxs borcunu müxtəlif bəhanələrlə üzrsüz səbəbdən icra etmədiyi və icra məmurunun tələblərinə tabe olmadığı üçün sonuncu barəsində İXM-in 528.1-ci maddəsi ilə inzibati xəta haqqında protokol tərtib edilmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs bildirmişdir ki, Ağdaş Rayon Məhkəməsinin xx.xx.2019-cu il tarixli, 2(014)-36/2019 nömrəli icra sənədinə əsasən yaranmış borcunu tam şəkildə ömdəmyə imkanı yoxdur. Həmin icra sənədi üzrə onun 4000 borcu yaranmışdır. Boşandıqdan sonra yenidən ailə həyatı qurmuş və azyaşlı övladı dünyaya gəlmişdir. Qısa müddətdir ki, "xxxx" MMC-də sürücü sürücü işləyir və aylıq 462 manat əmək haqqı alır. Əgər ona müəyyən qədər vaxt verilərsə borcunu ödəyəcəkdir. Əvvəllər heç bir yerdə işləməmiş, ara-sıra nə iş olsa görüb ailəsinə çörək pulu gətirmişdir. Hazırda isə daimi iş yeri vardır və borcu ödəmək üçün əlindən gələni edəcəkdir. Maddi imkanı pis olduğu üçün aliment borcu yaranmış və əlindən gələni edib borcunu verə bilmədiyi üçün hazırda peşmançılıq keçirir. Ona görə də, məhkəmədən qeyd olunanları nəzərə alıb barəsində yüngül inzibati tənbeh tətbiq edilməsini xahiş etmişdir. Məhkəmə iclasında zərərçəkmiş şəxs X3 bildirmişdir ki, Şəxs Ağdaş Rayon Məhkəməsinin xx.xx.2019-cu il tarixli, 2(014)-36/2019 nömrəli icra sənədi üzrə olan borcu ödəməsindən başqa heç nə istəmir. uzun müddətdir ki, heç bir ödəniş etməmişdir. O borcunun tam şəkildə ödənilməsini istəyir. Ona görə də, məhkəmədən ədalətli qərar qəbul edilməsini xahiş etmişdir. İş materiallarında olan və məhkəmə iclasında tədqiq edilmiş: Ağdaş Rayon Məhkəməsinin xx.xx.2019-cu il tarixli, 2(014)-36/2019 nömrəli icra sənədindən görünür ki, Şəxs 27 avqust 2011-ci il tarixdə anadan olmuş X5 və 10 noyabr 2013-cü il tarixdə anadan olmuş X6 18 yaşına çatanadək onların saxlanılmaları üçün Həsənova (Kərimli) Günel Hidayət qızının xeyrinə hər ay hər uşaq üçün 100 manat, cəmi 200 manat alimentin tutulması qət edilmişdir. xx.xx.2021-ci il tarixli icraata başlamaq haqqında qərardan və bildirişdən görünür ki, Şəxs barəsində olan icra işi üzrə icraata başlanılmış və ona tələbin könüllü icrası barədə rəsmi bildiriş göndərilmişdir. 12787/2020-14-23 nömrəli icra işi üzrə portal çıxarışından görünür ki, Şəxs "xxxx" MMC-də sürücü sürücü işləyir və aylıq 462 manat əmək haqqı alır. xx.xx.2022-ci il tarixli, MN ******* nömrəli inzibati xəta haqqında protokoldan görünür ki, Ağdaş Rayon Məhkəməsinin xx.xx.2019-cu il tarixli, 2(014)-36/2019 nömrəli icra sənədinin icrası ilə bağlı Şəxs icra məmurunun qanuni tələblərinə tabe olmadığı üçün İXMin 528.1-ci maddəsində nəzərdə tutulmuş inzibati xətanı törətmişdir. Məhkəmə, proses iştirakçılarını dinləyib, inzibati xəta haqqında iş materiallarını nəzərdən keçirərək hesab edir ki, Şəxs barəsində İXM-in 528.1-ci maddəsi ilə olan inzibati xəta haqqında protokol əsaslıdır. Belə ki, məhkəmə iş üzrə toplanmış sübutlara və onların məcmusuna tam, hərtərəfli və obyektiv baxılmasına əsaslanmaqla belə nəticəyə gəlir ki, Şəxs İXM-in 528.1-ci maddəsində nəzərdə tutulmuş inzibati xətanın törədilməsində təqsirliliyi inzibati xəta haqqında protokol, protokol tərtib etmiş şəxsin, eləcə də şəxsin öz etirafedici izahatı ilə tam sübuta yetirilmiş və onun əməli düzgün olaraq həmin maddə ilə tövsif edilmişdir. Həmçinin Şəxs hərəkətlərinə münasibətdə əməlin inzibati xəta olmasını aradan qaldıran hallar, habelə inzibati məsuliyyətindən azad edilməsi üçün əsaslar yoxdur. Odur ki, Şəxs təqsiri tam sübuta yetirildiyinə görə inzibati məsuliyyətə cəlb edilməli və tənbeh edilməlidir. Məhkəmə barəsində inzibati icraat aparılan şəxs Şəxs törətmiş olduğu inzibati xətaya görə təyin ediləcək tənbehin növü ilə bağlı aşağıdakıları qeyd etməyi zəruri hesab edir. Şəxs əvvəllər maddi vəziyyətinin yaxşı olmaması, hazırda sürücü kimi işləməklə aylıq əmək haqqı alması, borcunu hissə-hissə ödəməyə razı olması və əməlindən peşmançılıq hissləri keçirməsi kimi xüsusatları nəzərə alaraq məhkəmə belə qənaətə gəlir ki, Şəxs barəsində təqsirli bilindiyi İXM-in 528.1-ci maddəsinin sanksiyası həddində cərimə növündə tənbeh tədbiri tətbiq etməklə inzibati tənbehin məqsədlərinə nail olmaq olar. Məhkəmə, inzibati xəta törətmiş şəxs Şəxs törətdiyi inzibati xətanı səmimi etiraf edərək əməlindən peşman olmasını onun məsuliyyətini yüngülləşdirən hal kimi nəzərə alır. Həmçinin qeyd edilməlidir ki, məhkəmədə Şəxs məsuliyyətini ağırlaşdıran hallar müəyyən edilməmişdir. İXM-in 2-ci maddəsinə əsasən Azərbaycan Respublikasının inzibati xətalar qanunvericiliyin vəzifələri insan və vətəndaş hüquqlarını və azadlıqlarını, onun sağlamlığını, əhalinin sanitariya-epidemioloji salamatlığını, ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. İXM-in 3-cü maddəsinə əsasən yalnız həmin Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. İXM-in 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İXM-in 12.1-ci maddəsinə əsasən həmin Məcəllə ilə qorunun ictimai münasibətlərə qəsd edən, hüquqa zidd olan, təqsirli sayılan (qəsdən və ya ehtiyatsızlıqdan törədilən) inzibati məsuliyyətə səbəb olan əməl (hərəkət və hərəkətsizlik) inzibati xəta hesab olunur. İXM-in 21-ci maddəsində göstərilir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. İXM-in 31.1-ci maddəsinə əsəsən inzibati xətaya görə tənbeh İnzibati Xətalar Məcəlləsinə uyğun olaraq tətbiq edilir. İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə, inzibati xətanın xarakterini, inzibati xəta törədən şəxsin şəxsiyyətini xarakterizə edən halları, onun təqsirinin dərəcəsini, məsuliyyətini yüngülləşdirən və ağırlaşdıran halların olmamasını nəzərə alaraq hesab edir ki, Şəxs İXM-in 528.1-ci maddəsində nəzərdə tutulmuş inzibati xətanı törətməkdə təqsirli bilinərək, barəsində inzibati cərimə növündə tənbeh tədbiri tətbiq edilməlidir. Yuxarıda göstərilənlərə əsasən və İXM-in 40, 43, 48-51, 73, 114, 128-130-cu maddələrini rəhbər tutaraq, məhkəmə qərara aldı: Şəxs Azərbaycan Respublikasının İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətməkdə təqsirli bilinib, 500 (beş yüz) manat məbləğində inzibati cərimə edilsin. Qərarın surəti rəsmi qaydada verildiyi gündən 10 (on) gün müddətində Azərbaycan Respublikasının İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Hakim: Fərid Əmirəliyev