Bakı Şəhəri Binəqədi Rayon Məhkəməsi Qərar — İş №3(001)-2071/2021

Azərbaycan Respublikası adından QƏRAR Bakı şəhəri İş № 3(001)-2071/2021 21.05.2021 BAKI ŞƏHƏRİ BİNƏQƏDİ RAYON MƏHKƏMƏSİ Hakim Məmmədov Vüqar Nemət oğlunun sədrliyi, Məhkəmə iclas katibi Almazov Pərviz Məhərrəm oğlunun katibliyi, Zərərçəkmiş şəxs X1, Barəsində inzibati xəta haqqında icraat aparılan Şəxs iştirakları ilə, xx.xx.1986-cı il tarixdə Bakı şəhərində doğulmuş, Azərbaycan Respublikasının vətəndaşı, ünvan 1 ünvanında qeydiyyatda olan Şəxs Azərbaycan Respublikası İnzibati Xətalar Məcəlləsinin 334.3-cü maddəsi ilə müəyyən olunmuş inzibati xətaları törətməsinə dair Azərbaycan Respublikası Daxili İşlər Nazirliyi Binəqədi Rayon Polis İdarəsindən daxil olmuş inzibati xəta haqqında materiala Binəqədi Rayon Məhkəməsinin inzibati binasında baxaraq, MÜƏYYƏN ETDİM: Şəxs 27.01.2021-ci il tarixdə «Opel» markalı, **-TU-*** dövlət qeydiyyat nişanlı nəqliyyat vasitəsini sürücülük hüququ olmadan və sərxoş vəziyyətdə idarə etmişdir. Bununla əlaqədar olaraq Şəxs barəsində Azərbaycan Respublikası İnzibati Xətalar Məcəlləsinin 334.3-cü maddəsində nəzərdə tutulmuş inzibati xəta törətməsinə dair İnzibati xəta haqqında AP №0197276 saylı protokol tərtib olunmuşdur. Azərbaycan Respublikası Daxili İşlər Nazirliyi Binəqədi Rayon Polis İdarəsinə inzibati xəta haqqında işə baxılmasının vaxtı və yeri barədə qanunla müəyyən olunmuş qaydada məlumat verilmiş, İdarənin nümayəndəsi məhkəməyə gəlməmiş, işə baxılmasının təxirə salınması haqqında vəsatət verməmişdir. Azərbaycan Respublikası İnzibati Xətalar Məcəlləsinin 112.1.4-cü maddəsinə əsasən inzibati xəta haqqında işə, İdarənin nümayəndəsinin iştirakı olmadan baxılmasını mümkün hesab edirəm. Məhkəmə iclasında iştirak edən zərərçəkmiş şəxs X2 izahatında göstərmişdir ki, barəsində inzibati xəta haqqında icraat aparılan Şəxs ilə barışmışlar, ona dəymiş ziyan ödənilimşdir. Məhkəmə iclasında iştirak edən barəsində inzibati xəta haqqında icraat aparılan Şəxs izahatında göstərmişdir ki, o, 27.01.2021-ci il tarixdə «Opel» markalı, **-TU-*** dövlət qeydiyyat nişanlı nəqliyyat vasitəsini sürücülük hüququ olmadan və sərxoş vəziyyətdə idarə etmişdir. Əməlindən peşmandır, bir daha spirtli içki qəbul edib avtomobil idarə etməyəcəkdir. Zərərçəkmiş şəxsə dəymiş ziyanı ödəmiş və onunla barışmışdır. İş materiallarında olan 27.01.2021-ci il tarixli AP №0197276 saylı inzibati xəta haqqında protokoldan görünür ki, Şəxs M.Aslanov küçəsində “Toyota” markalı **-AG-*** dövlət qeydiyyat nömrəli avtomobilin sol yan hissəsinə dəyərək toqquşmuşlar. Sürücü avtomobili sürücülük hüququ olmadan və sərxoş halda etmişdir. İş materiallarında olan sərxoşluq vəziyyətini müəyyən etmək üçün xüsusi texniki vasitədən istifadə etmək haqqında protokoldan görünür ki, Şəxs protokolda qeyd apararaq göstərmişdir ki, o, spirtli içki qəbul etmişdir, birdə spirtli içki qəbul edib avtomobil idarə etməyəcək, alkotertrin nəticəsi ilə razıdır. Azərbaycan Respublikası İnzibati Xətalar Məcəlləsinin 334.3-cü maddəsinə əsasən bu Məcəllənin 334.1-ci maddəsində nəzərdə tutulmuş xətanın törədilməsi və yol hərəkəti qaydalarının pozulması nəticəsində zərər çəkmiş şəxsin sağlamlığına yüngül bədən xəsarətinin yetirilməsinə və ya zərər çəkmiş şəxsə maddi zərər vurulmasına görə səkkiz yüz manat məbləğində cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir aydan iki ayadək müddətə inzibati həbs tətbiq olunur. Hesab edirəm ki, Şəxs 27.01.2021-ci il tarixdə «Opel» markalı, **-TU-*** qeydiyyat nişanlı nəqliyyat vasitəsini idarə etmək hüququ olmadan, sərxoş halda idarə etməsi iş materialları ilə tam sübuta yetirilir. Məhkəmə Şəxs ilk dəfə Azərbaycan Respublikası İXM-in 334.3-cü maddəsində nəzərdə tutulan inzibati xətanı törətdiyini, vurulmuş ziyanı ödədiyini, zərərçəkmiş şəxsin ona qarşı şikayət və tələbinin olmamasını nəzərə alaraq barəsində inzibati cərimə tənbeh tədbiri tətbiq edilməsini məqsədəmüvafiq hesab edir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 110, 114-117, 128-131-ci maddələrini rəhbər tutaraq, Qərara aldım: Şəxs Azərbaycan Respublikası İnzibati Xətalar Məcəlləsinin 334.3-cü maddəsində nəzərdə tutulmuş inzibati xətanı törətməkdə təqsirli bilinərək 800 (səkkiz yüz) manat miqdarında inzibati qaydada cərimə edilsin. Qərarın surəti təqdim edildiyi və ya alındığı gündən 10 gün müddətində Bakı Apellyasiya Məhkəməsinə şikayət və ya protest verilə bilər. Hakim: Vüqar Məmmədov