Bakı Şəhəri Binəqədi Rayon Məhkəməsi Qərar — İş №3(001)-2500/2024

Azərbaycan Respublikası adından QƏRAR Bakı şəhəri İş № 3(001)-2500/2024 16.04.2024 BAKI ŞƏHƏRİ BİNƏQƏDİ RAYON MƏHKƏMƏSİ Hakim Qurbanova Aygün Arzu qızının sədrliyi, X4 iclas katibliyi, Protokolu tərtib etmiş İnzibati orqan Binəqədi rayon Polis İdarəsinin 4-cü Polis Bölməsinin sahə rəisi, polis mayoru X5, Barəsində inzibati xəta haqqında iş üzrə icraat aparılan şəxs Şəxs, Müdafiəçi Bakı şəhəri 11 saylı Vəkil Bürosunun vəkili X2 iştirakı ilə, xx.xx.1991-ci ildə Bakı şəhərində doğulmuş, Azərbaycan Respublikasının vətəndaşı, azərbaycanlı, evli, orta təhsilli, taksi fəaliyyəti ilə məşğul olan, Bakı şəhəri, Binəqədi rayonu, 7-ci mkr,S.S.Axundov küç,ev 1 ünvanda qydiyyatda olan ünvan 2 ünvanında yaşayan Şəxs barəsində Azərbaycan Respublikası İXM-nin 535.1-ci maddəsi ilə inzibati xəta haqqında materiala Bakı şəhəri Binəqədi Rayon Məhkəməsinin binasında açıq məhkəmə iclasında baxaraq, MÜƏYYƏN ETDİM: Barəsində inzibati xəta haqqında iş üzrə icraat aparılan şəxs Şəxs xx.xx.2024-cü il tarixdə Binəqədi RPİ-nin DYPŞ-nin inzibati binasına daxil olaraq əməkdaşlara şantaj xarakterli ifadələrlə polisin iş rejimini pozmaqla qəsdən polisin iş otaqlarında polis əməkdaşlarına qarşı qeyri-etik ifadələr işlətmişdir. Buna görə də, Azərbaycan Respublikası Daxili İşlər Nazirliyi Bakı şəhəri Binəqədi RPİ-nin 4-cü Polis Bölməsinin sahə rəisi, polis mayoru X10 tərəfindən xx.xx.2024-cü il tarixdə, MN ******* saylı inzibati xəta haqqında protokol tərtib edilərək baxılması üçün Bakı şəhəri Binəqədi Rayon Məhkəməsinə təqdim olunmuşdur. Məhkəmə iclasında barəsində inzibati xəta haqqında icraat aparılan şəxs izahatında bildirmişdir ki, bacısı oğlu ona 13 aprel 2024-cü il tarixdə,saat 22:30-da zəng etmiş və onu polisin saxladığını,polisin adının Fərid olduğunu bildirmişdir.Bacısı oğlu polisin ona açarı ver bura deyərək,maşını alıb apardığını,avtoxuliqanlıqla bağlı barəsində sənədləşdirilmə aparıldığını bildirmişdir.Səhəri gün yəni xx.xx.2024-cü il tarixdə 8-ci otağa getmişdirlər. Onlardan 1500 manat və 45 manatda cəriməyə pul ödəmələrinin lazım olduğu bildirilmişdir. Rəisə getmiş və məsələni bildirmişdirlər. Rəis ona otaqdan çıx, ”sən niyə gəlmisən uşaq gələ bilər ancaq” “necə alıb pravasın” kimi ifadələr işlətmişdir. 02 körpə uşağı olduğunu, ll qrup xəstə anası olduğunu,günahının olmadığını, əgər mümkündürsə barəsində cərimə təyin edilməsini xahiş etmişdir. Məhkəmə iclasında çıxış edən Şəxs vəkili X6 materialın natamam olduğunu, yekun qərar çıxarılmasının mümkün olmadığını,işə xitam verib geri qaytarılmasını xahiş etmişdir. Məhkəmə iclasında çıxış edən Azərbaycan Respublikası Daxili İşlər Nazirliyi Bakı şəhəri Binəqədi RPİ-nin 4-cü Polis Bölməsinin əməkdaşı tərtib edilən protokola uyğun izahat verərək bildirdi ki, Şəxs xx.xx.2024-cü il tarixdə Binəqədi RPİ-nin DYPŞ-nin inzibati binasına daxil olaraq əməkdaşlara şantaj xarakterli ifadələrlə polisin iş rejimini pozmaqla qəsdən polisin iş otaqlarında polis əməkdaşlarına qarşı qeyri-etik ifadələr işlətmişdir.Bununla da, Şəxs barəsində Azərbaycan Respublikası İXM-nin 535.1-ci maddəsi inzibati protokol tərtib etmişdir. Buna görə də, barəsində inzibati tənbeh tətbiq olunmasını məhkəmədən xahiş etmişdir. Məhkəmə iclasında şahid qismində ifadə vermiş Binəqədi rayon Polis İdarəsinin Dövlət X19 YNH üzrə inspektoru X8 bildirmişdir ki, Şəxs ilə tanışlığı yoxdur.Şöbədə səsküy eşitmiş və şəxsdən soruşduqda kiminsə dayısı olduğunu və bacısı oğlunun qayda pozmadığını, yanlışlıq olduğunu bildirmişdir. Məhkəmə iclasında şahid qismində ifadə vermiş Binəqədi rayon Polis İdarəsinin Dövlət X20 mühafizəçi kimi çalışan X12 bildirmişdir ki, Şəxs öz maşını ilə bağlı aradabir gəlib gedirmiş və yaxınlaşaraq rəisi soruşmuşdur. Ona hal-hazırda rəisin olmadığı bildirilmiş və o, “mən özüm bilirəm nə edəcəm” deyərək səs-küy salmışdır .Rəis nə məsələ olduğunu soruşaraq şəxsi görmək istədiyini bildirmişdir. Şəxs “mən filankəsin qohumuyam”, ”mən pravanı pulla almışam, sən də pul verib rəis olmusan” tərzində ifadələr işlətmiş, maşının duracaqda nahaq yerə saxlanıldığını bildirmişdir. Maşının ona heç bir aidiyyatı olmamışdır. Məhkəmə iclasında şahid qismində ifadə vermiş X1 Tofiq Rafiq oğlunu tanımadığını,qardaşı oğlu maşını səkiyə vurmuş inzibati orqanın həyətinə bu səbəbdən gəldiyini bildirmişdir. Şəxs hansısa səbəbdən aqressiv danışmışdır və “qayının anasın ağladacam”, ”mən Binəqədi Tofiqəm”,”qoymayacam işləməyə” şəklində cümlələr işlətmişdir. Həyətdə gözləyəndə post patrul xidməti gəlmiş və ancaq Bölmənin həyətində olanları görmüşdür. İXM-nin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. İXM-nin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamaq inzibati xəta kimi müəyyən edilmişdir. Həmin xətaya görə inzibati cərimə və ya inzibati həbs nəzərdə tutulmuşdur. Beləliklə sadalananlara əsasən Şəxs həmin inzibati xətanı törətməsi onun barəsində tərtib olunmuş yuxarıda qeyd edilən inzibati xəta haqqında protokol, o cümlədən şahidin ifadəsi ilə İXM-nin 535.1-ci maddəsinə əsasən təqsiri tam sübuta yetirilir. İnzibati məsuliyyəti istisna edən və icraatı rədd edən hallar yoxdur. İXM-nin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir. İXM-nin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. İXM-nin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Elektron Məhkəmə İnformasiya Sistemindən əldə edilmiş məlumatdan görünür ki, Şəxs himayəsində xx.xx.2019-cu ildə doğulmuş X13, xx.xx.2021-ci il tarixdə doğulmuş X14 adlı iki uşağı vardır. Məhkəmə Şəxs himayəsində azyaşlı uşaqlarının olmasını onun məsuliyyətini yüngülləşdirən hal kimi nəzərə alır. Məhkəmə araşdırması zamanı onun əməlini ağırlaşdıran hallar müəyyən edilməmişdir. Məhkəmə törədilmiş inzibati xətaya görə ona İXM-nin 535.1-ci maddəsinin sanksiyada nəzərdə tutulmuş həbs növündə minimum həddə inzibati tənbeh verilməsini məqsədə müvafiq hesab edir. Azərbaycan Respublikasının İnzibati Xətalar Məcəlləsinin: 61.1.5-ci maddəsinə əsasən barəsində inzibati xəta haqqında iş üzrə icraat aparılan şəxsin işinə baxılarkən müdafiəçinin hüquqi yardımından istifadə etmək hüququ vardır. 66.3-cü maddəsinə əsasən maddi vəziyyətinə görə öz hesabına vəkil tutmaq imkanı olmadıqda, inzibati qaydada tutulmuş şəxsə hüquqi yardım dövlətin vəsaiti hesabına göstərilir. Belə halda vəkil öz vəzifələrini yerinə yetirməkdən imtina edə bilməz. “Müdafiəçilərə, tərcüməçilərə, mütəxəssislərə və ekspertlərə ödənilməli olan məbləğlərin miqdarı haqqında” Azərbaycan Respublikası Nazirlər Kabinetinin 202 saylı 03 may 2018-ci il tarixli qərarına əsasən hüquqi yardımın göstərilməsinə görə müdafiəçiyə ödənilən haqq hər iş saatı üçün 6 manat müəyyən edilmişdir. Məhkəmə işin həcmini nəzərə alaraq hesab edir ki, X6 müdafiəçi qismində məhkəmə iclasında iştirak edərək ümumilikdə inzibati xəta törətmiş şəxsin hüquqlarının müdafiəsinə 06 saat vaxt sərf etmişdir. Ona görə də, məhkəmə hesab edir ki, Şəxs göstərdiyi hüquqi yardıma görə Bakı şəhəri 11 saylı Vəkil Bürosunun vəkili X3 Azərbaycan Respublikası dövlət büdcəsi vəsaiti hesabına 36 manat ödənilməli və hüquqi yardımın ödənilməsinin icrası Azərbaycan Respublikası Vəkillər Kollegiyasına həvalə edilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 206 və 535-ci və 110-115-ci maddələrini rəhbər tutaraq, QƏRARA ALDİM: Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə təqsirli bilinərək, 08 (səkkiz) gün müddətinə inzibati həbs edilsin. Həbsetmənin əvvəli xx.xx.2024-cü il tarixindən hesablansın. Qərar dərhal icra edilsin. Şəxsin inzibati həbsin icrası yerinə çatdırılması Bakı şəhəri Binəqədi rayon Polis İdarəsi 4-cü Polis Bölməsinə həvalə edilsin. Şəxs göstərdiyi 06 saat hüquqi yardıma görə Bakı şəhəri 11 saylı Vəkil Bürosunun vəkili X3 Azərbaycan Respublikası dövlət büdcəsi vəsaiti hesabına 36 (otuz altı) manat ödənilsin və hüquqi yardımın ödənilməsinin icrası Azərbaycan Respublikasının Vəkillər Kollegiyasına həvalə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Binəqədi Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən: Aygün Qurbanova