Bakı Şəhəri Binəqədi Rayon Məhkəməsi Qərardad — İş №3(001)-3091/2025

Azərbaycan Respublikası adından QƏRARDAD Bakı şəhəri İş № 3(001)-3091/2025 02.05.2025 BAKI ŞƏHƏRİ BİNƏQƏDİ RAYON MƏHKƏMƏSİ Hakim Ağayev Elçin Zəkəriyə oğlu, X1 Hamzanın Azərbaycan Respublikasına daxil olmağa qoyulmuş məhdudiyyətin götürülməsi barədə verdiyi şikayətin icraata qəbulu məsələsinə baxaraq, M Ü Ə Y Y Ə N E T D İ M: Bakı şəhəri Binəqədi Rayon Məhkəməsinə X1 Hamzanın Azərbaycan Respublikasına daxil olmağa qoyulmuş məhdudiyyətin götürülməsi barədə verdiyi şikayət daxil olmuşdur. Şikayəti nəzərdən keçirərək hesab edirəm ki, aşağıda göstərilənlərə görə şikayət icraata qəbul edilmədən geri qaytarılmalıdır. Belə ki, şikayətin məzmunundan və Azərbaycan Respublikası Dövlət Miqrasiya Xidmətinin xx.xx.2025-ci il tarixli MN № ******* nömrəli qərarından görünür ki, X1 Hamza ölkə hüdudlarından kənara inzibati qaydada çıxarılmaqla 400 manat cərimə edilmişdir. Azərbaycan Respublikası İnzibati Xətalar Məcəlləsinin: 130.1-ci maddəsinə görə bu Məcəllənin 126.1-ci maddəsində nəzərdə tutulmuş hallar istisna olmaqla, qərarın surəti bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan on gün müddətində inzibati xəta haqqında iş üzrə qərardan şikayət verilə bilər. 126.1-ci maddəsinə görə barəsində inzibati xəta haqqında iş üzrə qərar qəbul edilmiş şəxs yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydaları əleyhinə olan inzibati xətaların törədilməsinə görə inzibati tənbeh tətbiq etmə haqqında qərar ona bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan 20 (iyirmi) gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. Şikayət şəxsən verilə və ya poçt, yaxud internet vasitəsilə göndərilə bilər. 130.2-ci maddəsinə görə bu Məcəllənin 130.1-ci maddəsində nəzərdə tutulmuş müddət üzrlü səbəblər nəticəsində buraxıldıqda, şikayət verən şəxsin vəsatəti ilə bu müddət hakim, səlahiyyətli orqan (vəzifəli şəxs) tərəfindən bərpa edilə bilər. Şikayətdən görünür ki, X1 Hamza xx.xx.2025-ci il tarixli MN № ******* nömrəli inzibati tənbeh vermə haqqında qərardan məhkəməyə şikayəti müddət ötdükdən sonra vermiş, verdiyi şikayətə müddətin bərpası üçün vəsatət əlavə etməmişdir. Bundan başqa, Azərbaycan Respublikası Dövlət Miqrasiya Xidmətinin xx.xx.2025-ci il tarixli MN № ******* nömrəli qərarından görünür ki, X1 Hamzanın Azərbaycan Respublikasında yaşayış yeri Bakı şəhəri, Nəsimi rayonu, Ak.Mirqasımov küçəsi, ev 29, mənzil 7 olmuşdur. Azərbaycan Respublikası Konstitusiya Məhkəməsi Plenumunun “Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair” 04 noyabr 2020-ci il tarixli Qərarındakı hüquqi mövqeyinə görə səlahiyyətli orqanın (vəzifəli şəxsin) qərarından məhkəməyə şikayət həmin Məcəllənin 110.1-ci maddəsində müəyyən olunmuş qaydaya uyğun olaraq inzibati xətanın törədildiyi və yaxud barəsində qərar çıxarılmış şəxsin vəsatətinə əsasən onun yaşadığı yer üzrə verilə bilər. Belə olan halda aydın olur ki, X1 Hamza sözügedən şikayətlə inzibati xətanın törədildiyi və yaşadığı eyni yer üzrə məhkəməyə müraciət etməli idi. Göstərilənlərə əsasən məhkəmə hesab edir ki, X1 Hamzanın mahiyyət etibarilə Azərbaycan Respublikası Dövlət Miqrasiya Xidmətinin xx.xx.2025-ci il tarixli MN № ******* nömrəli qərarından verdiyi şikayət yuxarıda sadalanmış səbəblərə görə geri qaytarılmalı, ona qərarda göstərilmiş nöqsanları aradan qaldırmaqla yenidən müvafiq məhkəməyə şikayət vermək hüququ izah edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 130-137-ci maddələrini rəhbər tutaraq, Q Ə R A R A A L D İ M: X1 Hamzanın Azərbaycan Respublikası Dövlət Miqrasiya Xidmətinin xx.xx.2025-ci il tarixli MN № ******* nömrəli qərarından verdiyi şikayət geri qaytarılsın. X1 Hamzaya izah edilsin ki, qərardadda göstərilmiş nöqsanları aradan qaldırmaqla (müddətin bərpasına dair vəsatət verməklə) yenidən müvafiq məhkəməyə şikayət verə bilər. Qərardaddan şikayət verilə bilməz. Sədrlik edən Elçin Ağayev