Bakı Şəhəri Binəqədi Rayon Məhkəməsi Qərar — İş №3(001)-31/2022

Azərbaycan Respublikası adından QƏRAR Bakı şəhəri İş № 3(001)-31/2022 05.01.2022 BAKI ŞƏHƏRİ BİNƏQƏDİ RAYON MƏHKƏMƏSİ Hakim Rzayev Abbas Əhəd oğlunun sədrliyi, X4 iclas katibliyi, X1 iştirakı ilə X1 Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021-ci il tarixli qərardan verdiyi şikayətə Bakı şəhəri Binəqədi Rayon Məhkəməsinin iclasında açıq məhkəmə iclasında baxaraq MÜƏYYƏN ETDİM: X2 Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021 -ci il tarixli qərara əsasən 100 manat məbləğində cərimə olunması barədə qərarın ləğv edilməsini məhkəmədən xahiş etmişdir. Şikayətçi şikayətində göstərmişdir ki, 13 dekabr tarixində saat 9:00 radələrində Bakı şəhəri, Binəqədi rayonu, Azadlıq prospektində olan yerüstü keçiddə maska taxdığı halda, keçiddən çıxarkən 4-5 nəfər mülki geyimli, özlərini polis adlandıran şəxslər onun maska taxmadığını iddia edərək ona cərimə yazmışdır.Onda təngnəfəslik olduğuna görə, hətta yeyin yeriyərkən də boğulma halı olduğu üçün, maskanı eskalatordan piyada enərkən pilləkənlərdə çıxarmışdır.Yerüstü keçiddə eskalatorun işləmədiyinə görə, həm piyada qalxdığı üçün, həm də piyada düşdüyü üçün, boğulacaq qədər təngnəfəs olmuş və maskanı çıxarmağa məcbur olmuşdur.Polis olduğunu iddia edən şəxsə dəfələrlə keçiddə maska taxdığını, təngnəfəs olduğuna görə, pilləkənlərdə maskanı çıxarmağa məcbur olduğunu desə də, heç bir anlayış göstərmədən "mən səni keçiddən çıxanda maskasız gördüm" deyərək ona cərimə yazmışdır.Həmin şəxsdən özünü təqdim etməyini, hansı polis bölməsinin əməkdaşı olduğunu dəfələrlə soruşsa da, onunla kobud davranaraq polisin işinə mane olmamağı ondan tələb etmişdir.Bundan sonra, digər mülki geyimli "polislər" ora yaxınlaşmış və ona hədə-qorxu gələrək bölməyə aparacaqlarını bildirmişlər.Lakin heç bir "polis" əməkdaşı ona nə adını, nə də hansı bölmənin əməkdaşı olduqlarını deməmişdir. Bunun əvəzinə, çox kobudcasına, "gedəndə özün görərsən" deyə ona cavab vermişlər.Daha sonra, həmin "polislərdən" biri, onun şəxsi maşınına minib onu bölməyə aparmağa məcbur etmişdir.Lakin, o, etiraz etmiş və həmin "polis" ona "səni Doblo-da arxada reşotkada apararıq, ağlın başına gələr" deyib, telefonunu əlindən almağa çəhd etmişdir.PPX maşını gəldikdən sonra, onu maşının arxa qəfəs hissəsinə oturtmuş, telefonunu ondan almış və onunla bölməyə gedəcəyini bildirmişdirlər.Lakin, o, çöldə dayanmış və digər "polislərlə" zarafatlaşaraq "bəlkə başqa birini də apararıq" deyərək 20- 25 dəqiqə dayanmışdırlar.O, işə gecikdiyini dəfələrlə onlara bildirsə də, "bizim işimizə mane olma, ürəyimiz istəyəndə gedəcəyik" cavabı vermişdirlər.Yolda gedərkən, hansı bölməyə aparıldığını soruşsa da, "gedəndə görərsən" deyə onun üstünə qışqırmışdırlar.Həmin "polis" əməkdaşına "niyə onunla belə prinsip aparırlar" deyə soruşanda, "sən kimsən ee, sən mənim üçün heç kimsən" deyə cavab vermişdirlər. Məhkəmə iclasında çıxış edən X2 məhkəmə iclasında verdiyi izahatında şikayətində göstərilənləri nəzərə alaraq Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021-ci il tarixli qərarın ləğv edilməsini məhkəmədən xahiş etdi. İnzibati orqan Bakı şəhəri Binəqədi rayonu Polis İdarəsinin 5-ci PB-nə inzibati xəta haqqında işə baxılmasının vaxtı və yeri barədə qanunla müəyyən olunmuş qaydada məlumat verilmiş, lakin protokolu tərtib edən İdarənin nümayəndəsi məhkəməyə gəlməmiş, işə baxılmasının təxirəsalınması haqqında vəsatət verməmişdir. Buna görə də, Azərbaycan Respublikası İnzibati Xətalar Məcəlləsinin 112.1.4-cü maddəsinə əsasən İdarənin nümayəndəsinin iştirakı olmadan işə baxılmasını mümkün hesab edirəm. Məhkəmə şikayətçini dinləyib, iş materiallarını araşdırıb, sübutlara məcmu halda hüquqi qiymət verərək hesab edir ki, şikayət rədd edilməlidir. Belə ki, Bakı şəhəri Binəqədi rayon Polis İdarəsinin Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021 -ci il tarixli qərarına əsasən məlum olur ki, X5 Azərbaycan Respublikası İXM-nin 211.2-ci maddəsinə əsasən 100 manat cərimə edilmişdir. Azərbaycan Respublikası İnzibati Xətalar Məcəlləsinin 211.1-ci maddəsinə görə epidemya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslər iki yüz manatdan dörd yüz manatadək məbləğdə, vəzifəli şəxslər dörd min manatdan beş min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla bir ayadək müddətə inzibati həbs tətbiq olunur, hüquqi şəxslər beş min manatdan on bir min manatadək məbləğdə cərimə edilir. Azərbaycan Respublikası İXM-nin 211.2-ci maddəsinə əsasən epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər yüz manat məbləğində, vəzifəli şəxslər üç yüz manat məbləğində, hüquqi şəxslər altı yüz manat məbləğində cərimə edilir. Azərbaycan Respublikası İXM-nin 211.3-cü maddəsinə əsasən bu Məcəllənin 211.2-ci maddəsində nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər iki yüz manat məbləğində, vəzifəli şəxslər altı yüz manat məbləğində, hüquqi şəxslər min iki yüz manat məbləğində cərimə edilir. Azərbaycan Respublikası İXM-nin 61.1.6-cı maddəsinə əsasən barəsində inzibati xəta haqqında iş üzrə icraat aparılan şəxs inzibati xətalar haqqında iş üzrə qərardan şikayət vermək hüququna malikdir. Həmin Məcəllənin 128.2.3-cü maddəsinə əsasən inzibati xətalar haqqında işlər üzrə qərardan şikayət səlahiyyətli orqanın (vəzifəli şəxsin) qərarından - yuxarı səlahiyyətli orqana (vəzifəli şəxsə) və ya məhkəməyə verilir. Həmin Məcəllənin 130.1-ci maddəsinə əsasən bu Məcəllənin 126.1-ci maddəsində nəzərdə tutulmuş hallar istisna olmaqla, qərarın surəti bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan on gün müddətində inzibati xəta haqqında iş üzrə qərardan şikayət verilə bilər. Həmin Məcəllənin 130.2-ci maddəsinə əsasən Bu Məcəllənin 130.1-ci maddəsində nəzərdə tutulmuş müddət üzürlü səbəbdən buraxıldıqda, şikayət verən şəxsin vəsatəti ilə bu müddət hakim, səlahiyyətli orqan (vəzifəli şəxs) tərəfindən bərpa edilir. Həmin Məcəllənin 133.2.8-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim olunmuş materiallar əsasında yoxlanılır. Məhkəmə hesab edir ki, şikayət rədd edilməlidir.Belə ki, iş materiallarında olan Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021-ci il tarixli qərarı əsasında araşdırma zamanı X5 tərəfindən qanunun qeyd edilən tələblərinə tam əməl olunmamış, Azərbaycan Respublikası İXM-nin 211.2-ci maddəsininin tələbləri pozulmuş, qəbul edilmiş qərar düzgün qərara alınmışdır.Şikayətçi həmin inzibati qərarın qanunsuz olması barədə heç bir tutarlı səbəb göstərməmişdir.Belə ki, Azərbaycan Respublikası İXM-nin 211.2-ci maddəsinə əsasən epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər yüz manat məbləğində, vəzifəli şəxslər üç yüz manat məbləğində, hüquqi şəxslər altı yüz manat məbləğində cərimə edilir. Qaydalara əsasən məlum olur ki, tibbi maskadan düzgün istifadə edilməməsi də (məsələn: üz nahiyyəsinin, yəni-ağız və burun nahiyyəsinin natamam örtülməsi, maskanın aşağı çəkilməsi, çənədə saxlanılması və sair) İXM-nin 211-ci maddəsinin tərkibini yaradır.Buna görə də, məhkəmə hesab edir ki, X1 Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021-ci il tarixli qərarından verdiyi şikayət rədd edilməlidir. Yuxarıda göstərilənləri və Azərbaycan Respublikası İXM-nin 128 və 130-cu maddələrinin tələblərini rəhbər tutaraq, QƏRARA ALDİM: X1 Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş EPQ ******* saylı, 13.12.2021-ci il tarixli qərarın ləğv edilməsi və iş üzrə icraata xitam verilməsi barədə şikayət rədd edilsin. Qərarın surəti, təqdim edildiyi və ya alındığı gündən on gün müddətində qərardan Bakı şəhəri Binəqədi Rayon Məhkəməsi vasitəsilə Bakı Apellyasiya Məhkəməsinə şikayət və ya protest verilə bilər. Hakim: Abbas Rzayev