Bakı Şəhəri Binəqədi Rayon Məhkəməsi Qərar — İş №3(001)-3603/2023

Azərbaycan Respublikası adından QƏRAR Bakı şəhəri İş № 3(001)-3603/2023 18.09.2023 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Bağırov Zamiq Rəşid oğlunun sədrliyi, məhkəmənin məsləhətçisi (məhkəmə iclas katibi) Hümbətov Məmmədəli Qafqaz oğlunun katibliyi, inzibati xəta haqqında protokol tərtib etmiş şəxs Bakı şəhəri Binəqədi rayon icra şöbəsinin böyük icra məmuru X3, zərər çəkmiş şəxs X1, barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1986-ci il tarixdə Bakı şəhərində anadan olmuş, Azərbaycan Respublikasının vətəndaşı, "xxxx" Məhdud Məsuliyyətli Cəmiyyətində sürücü vəzifəsində çalışan, ünvan 1 ünvanında qeydiyyatda olmaqla ünvan 2 ünvanında yaşayan Şəxs Azərbaycan Respublikasının İnzibati Xətalar Məcəlləsinin (bundan sonra - İXM) 528.1-ci maddəsində nəzərdə tutulan inzibati xətanı törətməsi haqqında Bakı şəhəri Binəqədi rayon İcra şöbəsindən daxil olmuş inzibati xəta haqqında materiala məhkəmənin binasında, açıq məhkəmə iclasında baxaraq, məhkəmə müəyyən etdi: Bakı şəhəri Binəqədi rayon İcra şöbəsindən Şəxs İXM-in 528.1-ci maddəsində nəzərdə tutulmuş inzibati xətanı törətməsinə dair xx.xx.2023-cü il tarixli, MN ******* nömrəli inzibati xəta haqqında protokol və ona əlavə edilmiş sənədlər baxılması üçün aidiyyəti üzrə məhkəməyə göndərilmişdir. Məhkəmə iclasında inzibati xəta haqqında protokol tərtib etmiş Binəqədi rayon İcra Şöbəsinin böyük icra məmuru, X4 izahatında bildirmişdir ki, Bakı şəhəri Binəqədi Rayon Məhkəməsinin xx.xx.2015-ci il tarixli, 2(001)-2516/2015 saylı və Binəqədi Rayon Məhkəməsinin xx.xx.2021-ci il tarixli, 2(001)-7524/2021 saylı icra sənədləri üzrə Şəxs icra məmurunun qanuni tələblərinə riayət etməmişdir. Belə ki, barəsində inzibati xəta haqqında iş üzrə icraat aparılan şəxs məhkəmə qətnamələrini qərəzli olaraq icra etmir. Odur ki, icra sənədləri üzrə hal-hazırda 17851 AZN pul yığılmış borcu vardır. Göstərilənlərə əsasən Şəxs barəsində İXM-nin 528.1-ci maddəsi ilə xx.xx.2023-cü il tarixli, MN ******* nömrəli inzibati xəta haqqında protokol tərtib olunmuşdur. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək bildirmişdir ki, o, məhkəmə qətnaməsinin icrasının zəruriliyini dərk edir. Lakin ikinci nikahdan 4 və 7 yaşlarında iki övladı vardır. Hazırda 2000 AZN ödəniş etmək iqtidarındır. Həmin vəsaiti qohum tanışlarından borc alaraq ödəyə bilər. Həmçinin əvvəllər aliment borcunu işsizlik səbəbindən ödəyi bilmirdi. Lakin artıq 15 gün bundan əvvəl yeni işə düzəlmişdir və aylıq 350 AZN ödəniş etməyi mümkündür. İndiyə qədər rəsmi işə düzələ bilməməyinin səbəbi də tələbkarın ondan şikayət etməsi olmuşdur. Belə ki, o həm ata evi olan ünvan 1 ünvanında, həm də ünvan 3. Onun barəsində aliment borcuna görə axtarış elan edilmişdir ki, bu da onun rəsmi iş yeri tapıb işləməsinə maneələr yaratmışdır. İkinci nigahdan da iki aşyaşlı uşağı olduğundan məcbur günəmuzd işləmişdir. Artıq rəsmi işə düzəlmişdir. Ümumi aliment borcundan 2000 manat ödəmişdir. Bundan sonrakı ödənişləri və əvvəlki borclarını da hissə hissə hər ay ödəyəcəkdir. Həmçinin aliment ödənişin əmək haqqında yönləndirilməsinə də heç bir etirazının olmadığını bildirmişdir. İkinci nigahdan da himayəsində iki azyaşlı övladının olmasını, bugunədək alimet borcunu ödəyə bilməməsinin səbəbi kimi iş tapa bilməməməsinin olmasını, aliment borcundan hazırda iki min manat ödəniş etməsini nəzərə alaraq məhkəmədən barəsində aparılan inzibati xəta haqqında iş üzrə icraata xitam verilməsini xahiş etmiş və tələbkara 2000 manat ödəməsini təsdiq edən qəbzin surətini təqdim etmişdirdir. Məhkəmə iclasında zərər çəkən şəxs X2 məhkəməyə yazılı ərizə təqdim edərək bildirmişdir ki, icra sənədi üzrə Şəxs onun xeyrinə 2000 AZN ödənmişdir. Hazırda barəsində inzibati xəta haqqında iş üzrə icraat aparılan şəxslə ödəniş barədə razılaşdıqlarından hazırda heç bir şikayət və tələbi yoxdur. İş materiallarına əlavə olunmuş və məhkəmədə tədqiq edilmiş: xx.xx.2023-cü il tarixli, MN ******* nömrəli inzibati xəta haqqında protokoldan görünür ki, Şəxs barəsində İXM-in 528.1-ci maddəsi ilə inzibati xəta haqqında protokol tərtib edilmişdir. Bakı şəhəri Binəqədi Rayon Məhkəməsinin xx.xx.2015-ci il tarixli, 2(001)-2516/2015 saylı icra sənədindən görünür ki, Şəxs hər ay aylıq qazancının və digər gəlirlərinin ¼ hissəsi miqdarında aliment tutularaq X5 (icra sənədində soyadı İbadullayeva kimi göstərilmişdir) qızına ödənilməlidir. xx.xx.2017-ci il tarixli “İcraata başlamaq haqqında” qərardan görünür ki, Bakı şəhəri Binəqədi Rayon Məhkəməsinin xx.xx.2015-ci il tarixli, 2(001)-2516/2015 saylı icra sənədinə əsasən icraata başlanmışdır. Bakı şəhəri Xəzər Rayon Məhkəməsinin xx.xx.2022-ci il tarixli, 3(003)-591/2022 saylı qərarından görünür ki, Şəxs Bakı şəhəri Binəqədi Rayon Məhkəməsinin xx.xx.2015ci il tarixli, 2(001)-2516/2015 saylı icra sənədini qərəzli olaraq icra etmədiyinə görə 10 gün müddətinə inzibati həbs edilmişdir. Bakı şəhəri Binəqədi Rayon Məhkəməsinin xx.xx.2021-ci il tarixli, 2(001)-7524/2021 saylı icra sənədindən görünür ki, Şəxs hər ay 175 manat sabit pul məbləğində aliment tutularaq X5 (icra sənədində soyadı İbadullayeva kimi göstərilmişdir) qızına ödənilməlidir. xx.xx.2021-ci il tarixli “İcraata başlamaq haqqında” qərardan görünür ki, Bakı şəhəri Binəqədi Rayon Məhkəməsinin xx.xx.2021-ci il tarixli, 2(001)-7524/2021 saylı icra sənədinə əsasən icraata başlanmışdır. xx.xx.2023-cü il tarixli 1974 saylı qəbzin sürətindən görünür ki, X1 hesabına 2000,00 manat vəsait köçürülmüşdür. Zərər çəkən şəxs X1 məhkəməyə təqdim etdiyi ərizədən görünür ki, Şəxs tərəfindən ona 2000 AZN ödəniş edilmişdir. Aralarında ödənişlə bağlı razılıq olmuşdur, halhazırda heç bir şikayət və tələbi yoxdur. xx.xx.2023-cü il tarixli “AzeMis” elektron informasiya sistemindən olan çıxarışdan görünür ki, Şəxs "xxxx" Məhdud Məsuliyyətli Cəmiyyətində sürücü vəzifəsində çalışır. Məhkəmə, proses iştirakçılarının fikirlərini dinləyib, habelə inzibati xəta haqqında işin materiallarını nəzərdən keçirərək hesab edir ki, Şəxs barəsində İXM-in 528.1-ci maddəsi ilə başlanılmış inzibati xəta haqqında icraata xitam verilməlidir. Belə ki, İXM-in 528.1-ci maddəsi ilə inzibati məsuliyyət məhkəmə və digər orqanların qərarlarının icrası ilə əlaqədar icra məmurlarının qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə nəzərdə tutulmuşdur. Məhkəmə iclasında isə Bakı şəhəri Binəqədi Rayon Məhkəməsinin xx.xx.2015-ci il tarixli, 2(001)-2516/2015 saylı və Binəqədi Rayon Məhkəməsinin və xx.xx.2021-ci il tarixli, 2(001)-7524/2021 saylı icra sənədləri üzrə Şəxs tərəfindən icra məmurunun qanuni tələblərinin yerinə yetirilməməsi və ya icra məmuru tərəfindən müəyyən olunmuş müddətdə borclunu müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsi sübuta yetirilə bilməmişdir. Belə ki, Şəxs aliment ödənişinin əmək haqqına yönləndirilməsinə heç bir etirazı yoxdur. Bununla yanaşı, məhkəmə iclasında zərər çəkmiş şəxsə borcundan 2000 Azn ödəniş etmişdir. İndiyədək olamn aliment borcunu işsiz olduğu üçün ödəyə bilməmişdir. Qeyd olunanlar Şəxs icra sənədini üzrsüz səbəbdən icra etməməsini istisna edir. Ona görə də, məhkəmə Şəxs əməlində İXM-in 528.1-ci maddəsinin tərkib əlamətlərinin olmamasını nəzərə alaraq onun barəsində başlanılmış inzibati xəta haqqında iş üzrə icraata xitam verilməsi qənaətinə gəlmişdir. Belə ki, İXM-in 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir. İXM-in 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İXM-in 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. İXM-in 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Bütün bunlarla yanaşı qanunvericiliyin tələblərini rəhbər tutaraq məhkəmə qeyd edir ki, inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etməkdən ötrü hakimin əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Belə ki, İXM-in 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Habelə, İXM-in 12.1-ci maddəsinə uyğun olaraq bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. İXM-in 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. İXM-in 105.1-ci maddəsinə əsasən İnzibati Xətalar Məcəlləsinin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. İXM-in 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Beləliklə məhkəmə, yuxarıda sadalanan halları nəzərə alıb, qanunvericiliyin tələblərini rəhbər tutaraq hesab edir ki, Bakı şəhəri Binəqədi rayon İcra Şöbəsi tərəfindən tərtib olunmuş xx.xx.2023-cü il tarixli, MN ******* nömrəli inzibati xəta haqqında protokola dair Şəxs əməlində İXM-in 528.1-ci maddəsinin tərkibi olmadığından inzibati xəta haqqında iş üzrə icraata xitam verilməlidir. Göstərilənlərə əsasən və İXM-in 53, 84, 105, 114, 128-130-cu maddələrini rəhbər tutaraq, məhkəmə qərara aldı: Bakı şəhəri Binəqədi rayon İcra Şöbəsi tərəfindən tərtib olunmuş xx.xx.2023-cü il tarixli, MN ******* nömrəli inzibati xəta haqqında protokola dair Şəxs əməlində Azərbaycan Respublikasının İnzibati Xətalar Məcəlləsinin 528.1-ci maddəsinin tərkibi olmadığından inzibati xəta haqqında iş üzrə icraata xitam verilsin və o qeyd edilən əməli törətməkdə təqsirsiz hesab edilsin. Qərarın surəti rəsmi qaydada verildiyi gündən 10 (on) gün müddətində Azərbaycan Respublikasının İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Hakim: Zamiq Bağırov