Bakı Şəhəri Binəqədi Rayon Məhkəməsi Qərar — İş №3(001)-3650/2022

Azərbaycan Respublikası adından QƏRAR Bakı şəhəri İş № 3(001)-3650/2022 06.12.2022 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Kərimova Mahirə Nəzər qızının sədrliyi, Məhkəmənin məsləhətçisi (məhkəmə iclas katibi) Rəhimov Elçin Əhəd oğlunun katibliyi, X1 iştirakı ilə, X1 Bakı şəhəri Binəqədi RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı qərardan verdiyi şikayətə Binəqədi Rayon Məhkəməsi binasında, açıq məhkəmə iclasında baxaraq, məhkəmə, MÜƏYYƏN ETDİ: Bakı şəhəri Binəqədi RPİ-nin DYPŞ tərəfindən xx.xx.2022-ci il tarixli, TP ******* saylı qərar qəbul edilmişdir. X2 həmin qərarın ləğv edilməsi ilə bağlı Binəqədi Rayon Məhkəməsinə şikayət təqdim etmişdir. X4 şikayət ərizəsini onunla əsaslandırmışdır ki, Bakı şəhəri Binəqədi RPİ-nin DYPŞ tərəfindən faktlara əsaslanmadan onun barəsində qeyd edilən qərar çıxarılmış, onun hüquqları kobud surətdə pozulmuş, eyni zamanda onun avtomobilinə dəyən ziyan ödənilməmişdir. 22 sentyabr 2022-ci il tarixdə idarə etdiyi “MERCEDES BENZ C180” minik markalı ** TJ *** dövlət qeydiyyat nişanlı avtomobil ilə işə gedərkən səhər saat 06:50 radələrində Binəqədi rayonu, Novxanı yolu üzərində yerləşən “Lukoyl” yanacaq doldurma məntəqəsinə daxil olarkən qırmızı rəngli “TOYOTA RAV4” markalı, ** DK *** dövlət qeydiyyat nişanlı avtomobil 2 zolaqlı yolda qırmızı işıqda dayanmış çoxlu sayda avtomobili onların sağ tərəfindən yolun səki hissəsi ilə iti sürətlə irəliləyərək onun idarə etdiyi avtomobili vuraraq həm onların həyatını təhlükə altında qoymuş, həm də avtomobilinə ciddi ziyan vurmuşdur. Toyotanın sürücüsü şokda olduğundan bir neçə dəqiqə avtomobilindən enməmiş, sonra sonuncu fikirli olduğu üçün bu qəzanı törətdiyini bildirmişdir. O, yolun bu hissəsindən o biri hissəsinə yol hərəkət nişanlarına uyğun hərəkət etmiş, 2 zolaqda dayanmış avtomobillərin sürücülərindən icazə ala-ala dönmə işığını yandıraraq iki zolağın ikisini də keçib yanacaq doldurma məntəqəsinə giriş edən zaman bu qəzaya uğramışdır. Ona icazə verən avtomobillər qırmızı işıqda dayanmışdılar. O, hadisə yerinə DYPŞ əməkdaşı və sığorta əməkdaşı dəvət etmişdir. O, DYPŞ əməkdaşına hadisənin şəkilini çəkməsini tələb etmiş, özü də telefonla şəkillər çəkmişdir.Yanacaq doldurma məntəqəsinin 3 video kamerası və işıqforun kamerasının görüntüləri işə əlavə olunmamışdır. Eyni zamanda qadın sürücü bildirmişdir ki, onun avtomobilində videoreqistrator olmuş və hadisəni qeyd etmişdir. Şikayətçinin fikrincə, qadın sürücü hardasa vəzifədə işləyir və bundan istifadə edərək işi öz xeyrinə həll etmişdir. Belə ki, əgər toyota markalı avtomobil 2 zolağın hər hansı biri ilə irəliləmiş olsaydı, günahkar o ola bilərdi, lakin, o, yolun səkisi ilə dayanmış avtomobillərin sağ tərəfindən irəlilədiyindən günahkar həmin avtomobilin sürücüsündə olmuşdur. Bundan əlavə DYPŞ-nin əməkdaşından ona zəng vuraraq bildirilmişdi ki, Toyota markalı avtomobil “Lukoyl” yanacaq doldurma məntəqəsindən çıxırmış, hadisə isə yanacaq doldurma məntəqəsinin girişində olmuşdur. Şəkillərdən də göründüyü kimi Toyota markalı avtomobil üzü “Lukoyl” yanacaq doldurma məntəqəsinə tərəf dayanmışdır. Ona görə də Bakı şəhəri Binəqədi RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı qərarın ləğv edilməsini məhkəmədən xahiş etmişdir. Bakı şəhəri Binəqədi RPİ-nin DYPŞ-nə inzibati xəta haqqında işə baxılmanın vaxtı və yeri barədə qanunla müəyyən olunmuş qaydada məlumat verilmiş, lakin Bakı şəhəri Binəqədi RPİ-nin DYPŞ-in nümayəndəsi məhkəməyə gəlməmiş və işə baxılmanın təxirə salınması haqqında vəsatət verməmişdir. Məhkəmə, Azərbaycan Respublikasının İnzibati Xətalar Məcəlləsinin 112.1.4-cü maddəsinə əsasən Bakı şəhəri Binəqədi rayon DYPŞ-in nümayəndəsinin iştirakı olmadan işə baxılmanı mümkün hesab edir. Məhkəmə iclasında şikayətçi X4 ərizəsində qeyd etdiyi xüsusatları təkrarlayaraq əlavə olaraq qeyd etmişdir ki, Bakı şəhəri Binəqədi RPİ-nin DYPŞ tərəfindən protokol tərtib edilərkən ona huquq, vəzifələri izah olunmamış, ona protokol verilməmiş, qərar qəbul olunarkən məlumat verilməmişdir. O, Bakı şəhəri Binəqədi RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı qərarın ləğv edilməsini, onun hüquqlarının təmin olunmasını məhkəmədən xahiş etmişdir. Məhkəmə iş materiallarını araşdırıb, sübutlara məcmu halda hüquqi qiymət verərək hesab edir ki, həmin şikayət təmin olunmalıdır. Belə ki, Bakı şəhəri Binəqədi RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı qərarından məlum olur ki, X4 barəsində xx.xx.2022-ci il tarixdə Azərbaycan Respublikası İXM-nin 327.1-ci maddəsi ilə inzibati tənbeh tədbiri kimi cərimə tətbiq edilmişdir. Qeyd edilən qərardan verilmiş şikayətə məhkəmə tərəfindən baxılarkən müəyyən edilmişdir ki, X4 barəsində Polis İdarəsində aparılan inzibati iş üzrə icraat zamanı Azərbaycan Respublikasının İnzibati Xətalar Məcəlləsi ilə müəyyən edilmiş tələblər işin hallarının hərtərəfli, tam və obyektiv araşdırılmasına maneə törədəcək dərəcədə pozulmuşdur. Belə ki, inzibati tənbeh vermə haqqında qərar Azərbaycan Respublikasının İnzibati Xətalar Məcəlləsinin 61.3-cü maddəsinin tələbləri pozularaq işə baxılmasının vaxtı və yeri haqqında barəsində inzibati xəta haqqında iş üzrə icraat aparılan şəxsə lazımi qaydada məlumat verilmədən qəbul edilmiş və nəticədə, sonuncu inzibati xəta haqqında iş üzrə bütün materiallarla tanış olmaq, izahat vermək, sübutlar təqdim etmək, vəsatət və etirazlar vermək kimi hüquqlarından məhrum edilmişdir. Azərbaycan Respublikasının İnzibati Xətalar Məcəlləsinin: 61.3-cü maddəsinə əsasən inzibati xəta haqqında işə barəsində inzibati xəta haqqında iş üzrə icraat aparılan şəxsin iştirakı ilə baxılır. Həmin işə şəxsin iştirakı olmadan, yalnız o hallarda baxılır ki, işə baxılmasının yeri və müddətinin ona vaxtında bildirilməsi barədə məlumat olsun və ya işə baxılmasını təxirə salmaq haqqında ondan vəsatət daxil olmasın, yaxud belə vəsatət rədd edilmiş olsun. 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Göstərilənlərə əsasən məhkəmə belə nəticəyə gəlir ki, Bakı şəhəri Binəqədi RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı inzibati tənbeh vermə haqqında qərar qəbul edilərkən yuxarıda qeyd edilən prosessual pozuntulara yol verilməsi Azərbaycan Respublikasının İnzibati Xətalar Məcəlləsinin tələblərinin işin hallarının hərtərəfli, tam və obyektiv araşdırılmasına maneçilik törədəcək dərəcədə pozulması kimi qiymətləndirilməlidir. Həmin Məcəllənin 134.1.4-cü maddəsinə əsasən inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Həmin Məcəllənin 135.1.6-cı maddəsinə əsasən isə bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsaslardır. Beləliklə, məhkəmə hesab edir ki, şikayət təmin edilməli, Bakı şəhəri RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı inzibati xəta haqqında iş üzrə qərarı ləğv edilməli və qeyd olunan inzibati xəta haqqında iş Azərbaycan Respublikasının İnzibati Xətalar Məcəlləsinin tələblərinə əməl edilməklə baxılması üçün Bakı şəhəri Binəqədi RPİ-nin DYPŞ-nə göndərilməlidir. Yuxarıda göstərilənlərə əsasən və Azərbaycan Respublikasının İXM-nin 133-137-ci maddələrini rəhbər tutaraq, məhkəmə QƏRARA ALDİ: Şikayət təmin olunsun. Bakı şəhəri Binəqədi RPİ-nin DYPŞ tərəfindən qəbul edilmiş xx.xx.2022-ci il tarixli, TP ******* saylı inzibati xəta haqqında iş üzrə qərarı ləğv edilsin və qeyd olunan inzibati xəta haqqında iş baxılması üçün Bakı şəhəri Binəqədi RPİ-nin DYPŞ-nə göndərilsin. Qərardan 10 (on) gün müddətində Binəqədi rayon Məhkəməsi vasitəsi ilə Bakı şəhər Apellyasiya məhkəməsinə şikayət və protest verilə bilər. Hakim: Mahirə Kərimova