Bakı Şəhəri Binəqədi Rayon Məhkəməsi Qərar — İş №3(001)-3776/2021

Azərbaycan Respublikası adından QƏRAR Bakı şəhəri İş № 3(001)-3776/2021 05.11.2021 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Tağıyev Vüsal Adıgözəl oğlunun sədrliyi, məhkəmənin məsləhətçisi (məhkəmə iclas katibi) Mirzəyev Anar Əkrəm oğlunun katibliyi, şikayət vermiş şəxs X2 iştirakı ilə, X2 inzibati tənbeh edilməsinə dair Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş 14.10.2021-ci il tarixli, EPQ ******* nömrəli inzibati tənbeh vermə haqqında qərardan şikayətinə məhkəmənin binasında, açıq məhkəmə iclasında baxaraq, məhkəmə müəyyən etdi: X3 məhkəməyə müraciət edərək, barəsində Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş 14.10.2021-ci il tarixli, EPQ ******* nömrəli inzibati tənbeh vermə haqqında qərarın ləğv edilməsi barədə qərar qəbul edilməsini xahiş etmişdir. Məhkəmə iclasının yeri və vaxtı barədə lazımi qaydada məlumatlandırılmasına baxmayaraq, inzibati tənbeh vermə haqqında qərarı qəbul etmiş qurumun nümayəndəsi məhkəmə iclasında iştirak etməmişdir. Məhkəmə, qanunvericiliyin tələblərini rəhbər tutaraq inzibati tənbeh vermə haqqında qərarı qəbul etmiş qurumun nümayəndəsinin iştirakı olmadan işə baxılmanı mümkün hesab edir. Şikayət onunla əsaslandırılmışdır ki, Binəqədi Rayon Polis İdarəsinin 05-ci Polis Bölməsinin 14 oktyabr 2021-ci il tarixli, EPQ ******* nömrəli inzibati tənbeh vermə haqqında qərarı ilə fərdi sahibkar qismində barəsində Azərbaycan Respublikasının İnzibati Xətalar Məcəlləsinin 211.1-cı maddəsi ilə nəzərdə tutulmuş inzibati xətanı törətməsinə dair 3000 (üç min) manat məbləğində cərimə növündə inzibati tənbeh tədbiri tətbiq edilmişdir. O, Bakı şəhəri Binəqədi rayon Polis İdarəsinin 5-ci Polis Bölməsinin barəsində tərtib etdiyi 14 oktyabr 2021-ci il tarixli EPQ seriyalı ******* nömrəli inzibati tənbeh vermə haqqında qərarı qanunsuz və əsassız hesab edir. 14 oktyabr 2021-ci il tarixdə, axşam təxminən 20:15 radələrində ünvan 1 ünvanında fərdi sahibkarlıq fəaliyyətini həyata keçirdiyi ünvana 2 nəfər biri mülki geyimdə, digəri isə polis formasında olan şəxs kafeyə daxil olmuşdur. Həmin şəxslər özlərini təqdim etmədən birbaşa mətbəxə keçib, geriyə qayıdaraq onun 3000 manat cərimə olunmalı olduğunu bildirmişlər. Bu tapşırığı isə özünü İcra Hakimiyyətinin nümayəndəsi kimi təqdim edən şəxs bildirmişdir. O, hansı səbəbdən cərimə olunduğunu soruşduqda o, cavabında hansı səbəbdən qapıya adam qoyulmadığını bildirmişdir. O isə onlara həmin vaxt ayaqyolunda oluduğunu bildirərək pandemiya əleyhinə lazımi tədbirlərin görüldüyünü bildirmiş və əyani olaraq onlara göstərmişdir. Lakin nədənsə göstərilən şəxslər heç bir söz demədən onu cərimələmişlər. Bundan başqa, inzibati xəta haqqında protokol və qərar barəsində qanunsuz, əsassız və qərəzli tərtib olunmaqla yanaşı, təqsirləndirildiyi maddə də düzgün tövsif olunmamışdır. Halbuki, həmin maddənin dispaziyasında nə o qədər cərimə, nə də qapının ağzında adam qoyulmaması ilə bağlı cərimə nəzərdə tutulmamışdır. Ən əsası həmin polis əməkdaşının ona cərimə yazmaq kimi səlahiyyəti yox idi. Əgər doğurdan da onun hər hansı səhvi var idisə bu barədə qərarı Azərbaycan Respublikasının Daxili İşlər Nazirliyinin Binəqədi Rayon Polis İdarəsi qəbul edə bilərdi, nəinki polis Bölməsi. Digər tərəfdən onun vəzifəli şəxs olaraq epidamiya qaydalarını pozmağım nədə ehtiva olunur, bu bəlli deyil. Sadəcə olaraq hüquq mühafizə orqanı ona verilmiş səlahiyyətdən sui-istifadə edərək edərək hazırkı qərarı qəbul etmişdir. Nədə təqsirli bilinməsi nə protokolda, nə də qərarda öz əksini tapmışdır. Qərəzlilik isə ondan ibarətdir ki, cərimə yazılmazdan 3-4 gün əvvəl o, İcra Hakimiyyətinə çağırılaraq onlardan kitab alması tələb olunmuşdir. O isə yalnız 3-4 kitab ala biləcəyini bildirmişdir. Çünki ona təklif olunan kitabların ümumi dəyəri 540 manatdan çox olmuşdur. Halbuki o, göstərilən kafe ilə 5 ailəyə baxır. Onların maddi tələbatlarını təkbaşına ödəyir. Bu cərimə həmin ərazidə fəaliyyət göstərən sahibkarlara hədə-qorxu gəlmək məqsədi ilə atılmışdır. Cərimə o deməkdir ki, gələcəkdə onların bildirdikləri ilə oturub-durmasaq belə əsassız cərimələrlə üzləşəcəyinin göstəricisdidir. Məhkəmə iclasında X3 şikayətin məzmununa uyğun çıxış edib əlavə olaraq bildirmişdir ki, əsas şikayəti polis tərəfindən ona barəsində icraat aparılacağı barədə məlumat verilməməsidir. Hesab edir ki, barəsində aparılan inzibati xəta haqqında icraat üzrə onun heç bir təqsiri olmadığından saxta icraat aparılmış və bu səbəbdən ona məlumat verilməmişdir. Polis əməkdaşlarına ona cərimə yazılacağı təqdirdə etirazı olduğunu bildirmiş, lakin polislər ona heç bir söz demədən cərimələnməsi barədə qərar qəbul etmişlər. Sonradan cərimələnməsi barədə qərar qəbul edilməsindən məlumatı olmuşdur. Bu isə onu göstərir ki, onun hüquqları pozulur və özünü müdafiəsi üçün şərait yaradılmayaraq həm əsassız, həm də haqsız yerə cərimələnmiş olur. Ona görə də, məhkəmədən Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş 14.10.2021-ci il tarixli, EPQ ******* nömrəli inzibati tənbeh vermə haqqında qərarın ləğv edilərək iş üzrə icraata xitam verilməsini xahiş etmişdir. İş materiallarında olan və məhkəmədə tədqiq edilmiş: 14.10.2021-ci il tarixli, EXP ******* nömrəli inzibati xəta haqqında protokoldan görünür ki, X3 tərəfindən Azərbaycan Respublikasının İnzibati Xətalar Məcəlləsinin 211.1ci maddəsi ilə nəzərdə tutulmuş inzibati xəta törədilmişdir. 14.10.2021-ci il tarixli, EPQ ******* nömrəli inzibati tənbeh vermə haqqında qərardan görünür ki, X3 Azərbaycan Respublikasının İnzibati Xətalar Məcəlləsinin 211.1-ci maddəsi ilə təqsirli bilinib, 3000 manat məbləğində inzibati cərimə olunmuşdur. Məhkəmə, şikayəti və iş materiallarını tam, hərtərəfli və obyektiv şəkildə araşdıraraq hesab edir ki, X3 barəsində Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş 14.10.2021-ci il tarixli, EPQ ******* nömrəli inzibati tənbeh vermə haqqında qərar ləğv edilməli və inzibati xəta haqqında iş yenidən baxılması üçün onu qəbul etmiş orqana qaytarılmalıdır. Belə ki, iş materiallarından müəyyən edilmişdir ki, Bakı şəhəri Binəqədi rayon Polis İdarəsinin 5-ci PB tərəfindən baş vermiş hadisə üzrə tam, hərtərəfli və obyektiv araşdırma aparılmamışdır ki, bu da məhkəmədə işə baxılarkən X2 qeyd olunan inzibati xətanı törətməsinə şübhə yaradır. X1 şikayətində heç bir inzibati xəta törətmədiyini, polis əməkdaşlarına ona cərimə yazılacağı təqdirdə etirazı olduğunu bildirməsinə baxmayaraq, polislərin ona heç bir söz demədən cərimələnməsi barədə qərar qəbul etdiklərini, sonradan cərimələnməsi barədə qərar qəbul edilməsindən məlumatının olmasını göstərmişdir. Qeyd olunmalıdır ki, iş üzrə aparılan məhkəmə araşdırması zamanı şikayətdə göstərilənlər X3 barəsində aparılmış inzibati araşdırmanın ziddiyyətli olmasına dəlalət edir. Habelə müəyyən olunur ki, iş üzrə şəxsin təqsirli olmasına dəlalət edə biləcək sübut və əsas göstərilmədən, eləcə də ona barəsində icraat aparılacağı haqqında məlumat verilmədən, inzibati xəta haqqında aparılan araşdırmada iştirak edərək müvafiq sübutların təqdim edilməsi və araşdırmanın obyektiv aparılması məqsədi ilə şəxsin icraatda iştirak etməsi və müvafiq sübutu varsa təqdim etməsi üçün şərait yaradılmadan X3 barəsində natamam araşdırma aparmaqla inzibati tənbeh tədbiri tətbiq edilmişdir. Səlahiyyətli orqan tərəfindən isə qeyd olunan xüsusatlar üzrə qanunvericiliyin tələblərinə uyğun araşdırmanın aparılmamış olması və araşdırma zamanı şəxsin hüquqlarının təmin edilməməsi, eləcə də X2 izahatında göstərdiyi dəlilər məhkəmədə sonuncunun əməlində sözügedən inzibati xətanın tərkib əlamətlərinin olmasına şübhə yaradır. Bununla yanaşı, qeyd edilməlidir ki, iş üzrə toplanmış zəruri sübutların təqdim edilməsinə dair məhkəmə tərəfindən verilmiş sorğuya Bakı şəhəri Binəqədi rayon Polis İdarəsinin 5-ci PB heç bir cavab verməmiş, üstəlik qanunvericiliklə nəzərdə tutulmuş qaydada məlumatlandırılmasına baxmayaraq iş üzrə səlahiyyətli nümayəndəsinin məhkəmə iclasında iştirakını təmin etməmişdir. Halbuki, qanunvericiliyin tələblərinə əsasən inzibati xətanın baş verməsini, eləcə də şəxsin təqsirliliyini sübuta yetirmək səlahiyyətli orqanın üzərinə düşür və inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Bu isə onu göstərir ki, səlahiyyətli vəzifəli şəxs inzibati tənbeh vermə haqqında qərar qəbul edərkən səthi araşdırma aparmaqla şəxsin hüquqlarının pozulması ilə müşahidə olunan qərar qəbul etmişdir. Məhkəmə yuxarıda sadalanan hallardan belə qənaətə gəlmişdir ki, X3 barəsində olan inzibati iş üzrə səlahiyyətli orqanın gəldiyi nəticələr üzrə mühüm əhəmiyyət kəsb edən bütün faktiki hallar araşdırılmamış və Azərbaycan Respublikasının İnzibati Xətalar Məcəlləsi ilə müəyyən edilmiş tələblər işin hallarının hərtərəfli, tam və obyektiv araşdırılmasına maneə törədəcək dərəcədə pozulmuşdur. Azərbaycan Respublikasının İnzibati Xətalar Məcəlləsinin 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Azərbaycan Respublikasının İnzibati Xətalar Məcəlləsinin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Azərbaycan Respublikasının İnzibati Xətalar Məcəlləsinin 134.1.4-cü maddəsinə əsasən bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Azərbaycan Respublikasının İnzibati Xətalar Məcəlləsinin 135.1-ci maddəsinə əsasən inzibati xəta haqqında iş üzrə qərarın ləğv edilməsi və ya dəyişdirilməsi üçün əsaslar aşağıdakılardır: 135.1.1. hakimin, səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki halların araşdırılmaması; 135.1.6. bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması.. Beləliklə məhkəmə, şikayətçi X2 hüquqlarının tam təmin edilməsi məqsədi ilə hesab edir ki, X3 inzibati tənbeh olunmasına dair Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş 14.10.2021-ci il tarixli, EPQ ******* nömrəli inzibati tənbeh vermə haqqında qərar ləğv edilməli, iş üzrə Azərbaycan Respublikasının İnzibati Xətalar Məcəlləsi ilə nəzərdə tutulmuş proseduralara tam əməl edilməklə və işin bütün faktiki halları araşdırılmaqla yenidən baxılması üçün müvafiq səlahiyyətli orqana geri göndərilməlidir. Yuxarıda göstərilənləri və Azərbaycan Respublikasının İnzibati Xətalar Məcəlləsinin 128, 129, 133-137-ci maddələrinin tələblərini rəhbər tutaraq, məhkəmə qərara aldı: X2 inzibati tənbeh olunmasına dair Bakı şəhəri Binəqədi rayon Polis İdarəsinin 5-ci PB tərəfindən qəbul edilmiş 14.10.2021-ci il tarixli, EPQ ******* nömrəli inzibati tənbeh vermə haqqında qərar ləğv edilsin. İnzibati xəta haqqında iş yenidən baxılması üçün qərar Bakı şəhəri Binəqədi rayon Polis İdarəsinin 5-ci PB-nə göndərilsin. Qərarın surəti rəsmi qaydada verildiyi vaxtdan 10 (on) gün müddətində Azərbaycan Respublikasının İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Hakim: Vüsal Tağıyev