Bakı Şəhəri Binəqədi Rayon Məhkəməsi Qərar — İş №3(001)-3856/2024

Azərbaycan Respublikası adından QƏRAR Bakı şəhəri İş № 3(001)-3856/2024 26.06.2024 BAKI ŞƏHƏRİ BİNƏQƏDİ RAYON MƏHKƏMƏSİ Hakim Qurbanova Aygün Arzu qızının sədrliyi, X1 iclas katibliyi, Protokolu tərtib etmiş İnzibati orqan Binəqədi rayon Polis İdarəsinin 40-cı Polis Bölməsinin sahə inspektoru, polis baş leytenantı X6, Barəsində inzibati xəta haqqında iş üzrə icraat aparılan şəxs Şəxs, Müdafiəçi Bakı şəhəri 11 saylı Vəkil Bürosunun vəkili X2 iştirakı ilə, Şəxs barəsində Azərbaycan Respublikası İnzibati Xətalar Məcəlləsinin 510 və 535.1-ci maddələri ilə Azərbaycan Respublikası Daxili İşlər Nazirliyinin Binəqədi Rayon Polis İdarəsinin 40-cı Polis bölməsindən daxil olmuş inzibati xəta haqqında işə baxaraq, MÜƏYYƏN ETDİ: Şəxs xx.xx.2024-cü il tarixdə təxminən saat 17:30 radələrində BBAK-da orada işləyən əməkdaşlarla mübahisə edib nalayiq söyüşlər söyüb və onu sakitləşdirməyə çalışan polis əməkdaşlarının qanuni tələbinə əməl etməmiş və hərəkətlərinə davam etmişdir. Bununla da o, İXM-in 510 və 535.1-ci maddələrində nəzərdə tutulmuş inzibati xətanı törətmişdir. Onun barəsində Binəqədi rayon Polis İdarəsinin 40-cı Polis Bölməsi tərəfindən xx.xx.2024-cü il tarixli, MN ******* saylı inzibati xəta haqqında protokol tərtib olunmuşdur. Protokol tərtib etmiş Binəqədi rayon Polis İdarəsinin 40-cı Polis Bölməsinin əməkdaşı məhkəməyə verdiyi izahatında bildirdi ki, Şəxs xx.xx.2024-cü il tarixdə təxminən saat 17:30 radələrində BBAK-da nalayiq ifadələr işlətdiyi üçün yaxınlaşıb onu sakitçiliyə dəvət etsələr də,buna məhəl qoymamış və polisin qanuni tələbinə qəsdən tabe olmama inzibati xətasını törətmişdir. Şəxs məhkəməyə verdiyi izahatında bildirdi ki, xx.xx.2024-cü il tarixdə yaşadığı ünvanda spirtli içki qəbul etmişdir.Qeyd olunan tarixdə günorta saatlarında Bakı şəhəri,Binəqədi rayonunda yerləşən “Bakı Beynəlxalq Avtovağzal Kompleksinin” yaxınlığında adını bilmədiyi kafeyə gəlmişdir.Həmin kafedə yemək yeyib spirtli içki qəbul etmişdir. Bir qədər sonra həmin kafedən çıxıb “Bakı Beynəlxalq Avtovağzal Kompleksinə” gəlmişdir.Ora gəlməkdə məqsədi Tovuz rayonuna bacısı oğlunun toy mərasiminə getmək olmuşdur.Lakin spirtli içkinin təsirindən orada olan BBAK-ın kassasında olan əməkdaşla biletə görə sözlə mübahisə etmişdir.Bu zaman ora mühafizəçilər gəlmişdir və bu barədə polisə məlumat vermişdir.Polis əməkdaşları gəldikdən sonra o, qəzəblənərək onlarla da sözlə mübahisə etməyə başlamışdır və spirtli içkinin təsirindən ünvansız nalayiq ifadələr işlətməyə başlamışdır.Etdiyi əməldən peşman olduğunu bildirərək,bir daha belə hallara yol verməyəcəyini bildirmişdir.Səmimi peşmanlığının qəbul edilməsini və ona yüngül inzibati tənbeh verilməsini xahiş etmişdir. Barəsində inzibati xətalar haqqında iş üzrə icraat aparılan şəxsin vəkili izahatında hüquqlarını müdafiə etdiyi şəxs Şəxs barəsində iş üzrə icraata xitam verilməsini xahiş etmişdir. Məhkəmə iclasında şahid qismində dindirilmiş X7 izahatında bildirmişdir ki,xx.xx.2024-cü il tarixdə BBAK-da mühafizə xidmətində olarkən əvvəllər tanımadığı bir şəxs spirtli içki qəbul edib kassada bilet satan xanımla mübahisə etmişdir.Ünvansız uca səslə nalayiq ifadələr işlətmişdir.Həmin şəxsə yaxınlaşaraq ictimai yerlərdə nalayiq ifadələr işlətməməsini,səbirli,təmkinli olmasını söyləmişdir. Buna baxmayaraq vətəndaş tabesizlik göstərərək asayişi pozmuşdur.O, dərhal ərazinin polis əməkdaşlarına bu barədə məlumat vermişdir. PPX-nin əməkdaşları ilə o, bu şəxsi polisə təhvil vermişdir.Həmin şəxs barəsində qanuni tədbir görülməsini xahiş etmişdir. Məhkəmə iclasında şahid qismində dindirilmiş Bakı şəhəri Binəqədi Rayon Polis İdarəsinin Post patrul xidməti bölüyü polis nəfəri,polis serjantı X8 izahatında bildirmişdir ki,xx.xx.2024-cü il tarixdə saat 17:30 radələrində Avtovağzal istiqamətində xidmət aparan zaman vağzal mühafizə xidmətindən mobil telefon vasitəsilə məlumat verilmişdir ki,platforma adlandırılan ərazidə kassa 2-nin qarşısında problemli vətəndaşın olduğu onlara bildirilmişdir.Əraziyə yaxınlaşaraq həmin şəxsin ictimai yerdə nalayiq ifadələr işlətməsi aşkar olunmuşdur.Mühafizə xidməti vətəndaşı sakit olmağa dəvət etsə də, həmin şəxs öz hərəkətlərini davam etdirmişdir.Polis əməkdaşları həmin şəxsi intizama dəvət etsələr də həmin şəxs küçə söyüşləri ilə BBAK-nin işçilərini və rəhbərliyini təhqir etmişdir. Məhkəmə iclasında şahid qismində dindirilmiş Bakı şəhəri Binəqədi Rayon Polis İdarəsinin Post patrul xidməti bölüyü polis nəfəri,polis serjantı X4 izahatında bildirmişdir ki, xx.xx.2024-cü il tarixdə təxminən saat 17:30 radələrində BBAK-da orada işləyən əməkdaşlarla mübahisə edib nalayiq söyüşlər söyüb və onu sakitləşdirməyə çalışan polis əməkdaşlarının qanuni tələbinə əməl etməmiş və hərəkətlərinə davam etmişdir. İXM-in 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. İXM-in 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlər inzibati xəta kimi müəyyən edilmişdir. Həmin xətaya görə inzibati cərimə və ya inzibati həbs nəzərdə tutulmuşdur. İXM-in 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir. İXM-in 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Beləliklə sadalananlara əsasən Şəxs həmin inzibati xətanı törətməsi onun barəsində tərtib olunmuş yuxarıda qeyd edilən inzibati xəta haqqında protokol, özünün məhkəməyə verdiyi izahatı ilə İXM-in 510-cu maddəsinə əsasən təqsiri sübuta yetirilir. İnzibati məsuliyyəti istisna edən və icraatı rədd edən hallar yoxdur. İXM-in 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamaq inzibati xəta kimi müəyyən edilmişdir. Həmin xətaya görə inzibati cərimə və ya inzibati həbs nəzərdə tutulmuşdur. Beləliklə sadalananlara əsasən, Şəxs həmin inzibati xətanı törətməsi onun barəsində tərtib olunmuş yuxarıda qeyd edilən inzibati xəta haqqında protokol ilə İXM-nin 535.1-ci maddəsinə əsasən təqsiri tam sübuta yetirilir. İnzibati məsuliyyəti istisna edən və icraatı rədd edən hallar yoxdur. İş materiallarındakı xx.xx.2024-cü il tarixli protokola əsasən Şəxs xx.xx.2024-cü il, saat 21:45-də tutulmuşdur. xx.xx.2024-cü il tarixli, ******* saylı “Sərxoşluq vəziyyətinin tibbi müayinəsi” aktında Şəxs orta alkoqol sərxoşluğu vəziyyətinin olduğu müəyyən olunmuşdur. İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə törədilmiş inzibati xətaya görə, təqsirləndirilən şəxsin əməlindən peşman olmasını, ilk dəfə inzibati xəta törətməsini nəzərə alaraq İXM-nin 510 və 535.1-ci maddələrinin sanksiyasında nəzərdə tutulmuş cərimə növündə inzibati tənbeh verilməsini məqsədə müvafiq hesab edir. Azərbaycan Respublikasının İnzibati Xətalar Məcəlləsinin: 61.1.5-ci maddəsinə əsasən barəsində inzibati xəta haqqında iş üzrə icraat aparılan şəxsin işinə baxılarkən müdafiəçinin hüquqi yardımından istifadə etmək hüququ vardır. 66.3-cü maddəsinə əsasən maddi vəziyyətinə görə öz hesabına vəkil tutmaq imkanı olmadıqda, inzibati qaydada tutulmuş şəxsə hüquqi yardım dövlətin vəsaiti hesabına göstərilir. Belə halda vəkil öz vəzifələrini yerinə yetirməkdən imtina edə bilməz. “Müdafiəçilərə, tərcüməçilərə, mütəxəssislərə və ekspertlərə ödənilməli olan məbləğlərin miqdarı haqqında” Azərbaycan Respublikası Nazirlər Kabinetinin 202 saylı 03 may 2018-ci il tarixli qərarına əsasən hüquqi yardımın göstərilməsinə görə müdafiəçiyə ödənilən haqq hər iş saatı üçün 6 manat müəyyən edilmişdir. Məhkəmə işin həcmini nəzərə alaraq hesab edir ki, X5 müdafiəçi qismində məhkəmə iclasında iştirak edərək ümumilikdə inzibati xəta törətmiş şəxsin hüquqlarının müdafiəsinə 05 saat vaxt sərf etmişdir. Ona görə də, məhkəmə hesab edir ki, Şəxs göstərdiyi hüquqi yardıma görə Bakı şəhəri 11 saylı Vəkil Bürosunun vəkili X3 Azərbaycan Respublikası dövlət büdcəsi vəsaiti hesabına 30 manat ödənilməli və hüquqi yardımın ödənilməsinin icrası Azərbaycan Respublikası Vəkillər Kollegiyasına həvalə edilməlidir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 48-51, 114, 128-130-cu maddərini rəhbər tutaraq, QƏRARA ALDİ: Şəxs Azərbaycan Respublikası İnzibati Xətalar Məcəlləsinin 510-cu və 535.1-ci maddələri ilə təqsirli bilinərək, 100 (yüz) manat məbləğində cərimə növündə inzibati tənbeh təyin edilsin. Şəxs inzibati qaydada tutulmadan azad edilsin. Şəxs göstərdiyi 05 saat hüquqi yardıma görə Bakı şəhəri 11 saylı Vəkil Bürosunun vəkili X3 Azərbaycan Respublikası dövlət büdcəsi vəsaiti hesabına 30 (otuz) manat ödənilsin və hüquqi yardımın ödənilməsinin icrası Azərbaycan Respublikasının Vəkillər Kollegiyasına həvalə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Binəqədi Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən Aygün Qurbanova