Bakı Şəhəri Binəqədi Rayon Məhkəməsi Qərar — İş №3(001)-4485/2025

Azərbaycan Respublikası adından QƏRAR Bakı şəhəri İş № 3(001)-4485/2025 10.07.2025 BAKI ŞƏHƏRİ BİNƏQƏDİ RAYON MƏHKƏMƏSİ Hakim Ağayev Elçin Zəkəriyə oğlunun sədrliyi, Məhkəmə iclas katibi X4 Novruz oğlunun katibliyi, Şikayət verən X1 iştirakı ilə, X1 Azərbaycan Respublikası DİN Baş Dövlət Yol Polis İdarəsinin xx.xx.2025-ci il tarixli EQ 27585372 nömrəli inzibati tənbeh vermə haqqında qərarından verdiyi şikayətə baxaraq, məhkəmə M Ü Ə Y Y Ə N E T D İ: Şikayət verən X2 məhkəməyə şikayətlə müraciət edərək, barəsində tərtib edilmiş xx.xx.2025-ci il tarixli EQ 27585372 nömrəli İnzibati tənbeh vermə haqqında elektron qərarın ləğv edilməsini məhkəmədən xahiş etmişdir. Məhkəmə iclasında X2 şikayətini onunla əsaslandırmışdır ki, xx.xx.2025-ci tarixində elektron qaydada aldığı qərara əsasən özünə məxsus “LEXUS LX-470” markalı, **-CE- *** dövlət qeydiyyat nişanlı olan avtomobili ilə saat 13:43-də yolun hərəkət hissəsində kənarda ikinci və üçüncü cərgədə durmasına görə AR İXM-in 346.4-cü maddəsində nəzərdə tutulmuş inzibati xətaya görə ona 50 manat cərimə tətbiq edilmişdir. O, bu barədə məlumat alandan dərhal sonra DİN Baş Dövlət Yol Polis İdarəsinə müraciət edərək bildirmişdir ki, o, yaşadığı binanın qarşısında özünü pis hiss etdiyinə görə avtomobili tərk etmiş, yoldaşının ona dərman gətirməsini gözləmişdir. Bu səbəbdən faktın araşdırılmasını xahiş etmişdir. Həmin yolda qadağanedici heç bir yol nişanı və zolaqları olmadığına görə hesab edir ki, mübahisələndirilən qərar əsassız olaraq qəbul edilmişdir. Məhkəmə iclasının vaxtı və yeri barədə rəsmi qaydada məlumatlandırılmış Azərbaycan Respublikası DİN Baş Dövlət Yol Polis İdarəsinin nümayəndəsi məhkəmə iclasında iştirak etməmişdir. Məhkəmə işə Azərbaycan Respublikası DİN Baş Dövlət Yol Polis İdarəsinin nümayəndəsinin iştirakı olmadan baxılmasını mümkün hesab etmişdir. Məhkəmə şikayəti iş materialları ilə əlaqəli şəkildə araşdırıb hesab edir ki, şikayət əsaslı olduğundan təmin edilməli, Azərbaycan Respublikası DİN Baş Dövlət Yol Polis İdarəsinin xx.xx.2025-ci il tarixli EQ 27585372 nömrəli inzibati tənbeh vermə haqqında qərarı ləğv edilməklə, inzibati xəta haqqında iş yenidən baxılmaq üçün səlahiyyətli orqana - Azərbaycan Respublikası DİN Baş Dövlət Yol Polis İdarəsinə göndərilməlidir. İş materiallarında olan və məhkəmə iclasında tədqiq edilmiş Azərbaycan Respublikası DİN Baş Dövlət Yol Polis İdarəsinin xx.xx.2025-ci il tarixli EQ 27585372 nömrəli inzibati tənbeh vermə haqqında qərarından görünür ki, “LEXUS LX 470” minik markalı, **-CE-*** dövlət qeydiyyat nişanlı avtomobilin sürücüsü X2 Azərbaycan Respublikası İXM-in 346.4-cü maddəsində nəzərdə tutulan inzibati xətanı törətməkdə təqsirli bilinib 80 manat cərimə edilmişdir. Azərbaycan Respublikası İnzibati Xətalar Məcəlləsinin 346.4-cü maddəsinə əsasən yanqoşqusu olmayan motosikletlər, mopedlər, velosipedlər və kiçik elektrik nəqliyyat vasitələri istisna olmaqla, digər nəqliyyat vasitələrinin yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə səksən manat məbləğində cərimə edilir. Qərara əlavə edilmiş fotoşəkildən görünür ki, “LEXUS LX-470” markalı, **-CE-*** dövlət qeydiyyat nişanlı olan avtomobilin dayandığı hissə, yolun hərəkət hissəsinin ikinci və ya sonrakı cərgəsi kimi qiymətləndirilə bilməz. Çünki, fotoşəkildə avtomobil intensiv hərəkət yolunun kənarında, digər avtomobillərin sıx hərəkətindən kənarda yerləşir. Həmçinin, yol zolaqları və ya xüsusi nişanlanma (xətt, zolaq bölgüsü) mövcud deyil ki, buranın 2-ci və ya sonrakı cərgə olub-olmaması hüquqi olaraq müəyyən olunsun. Həmçinin, “LEXUS LX-470” markalı, **-CE-*** dövlət qeydiyyat nişanlı olan avtomobil digər avtomobillərin hərəkətinə maneə yaratmır, dayandığı sahənin genişliyi və boşluğu şəkildən açıq görünür. Avtomobilin dayandığı sahə də digər piyadalar da bu ərazidə hərəkət edir. Göründüyü kimi şikayət verən şəxsə tətbiq edilən qanun norması yolun hərəkət hissəsinin kənarında ikinci və sonrakı cərgələrdə dayanma və ya durmanı qadağan edir, faktiki dayanma yeri isə yolun hərəkət hissəsinin kənarında ikinci və sonrakı cərgələrdə deyil, belə olan halda vətəndaşın həmin norma ilə təqsirli bilinib ona cərimə tətbiq edilməsi əsassız və qanunsuz olmuşdur. Azərbaycan Respublikası İnzibati Xətalar Məcəlləsinin: 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. 12.1-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. 75-ci maddəsinə əsasən inzibati xəta haqqında iş üzrə aşağıdakılar müəyyən edilməlidir: inzibati xəta hadisəsi (inzibati xəta törədilmişdirmi); inzibati xəta törətmiş şəxs; inzibati xəta törətməkdə şəxsin təqsiri. 135.1.6-cı maddəsinə əsasən bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi üçün əsasdır. 134.1-ci və 134.1.4-cü maddələrinə əsasən inzibati xəta haqqında iş üzrə qərardan verilən şikayət və ya protest baxıldıqda bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Təsvir edilənlərə əsasən məhkəmə hesab edir ki, X1 Azərbaycan Respublikası DİN Baş Dövlət Yol Polis İdarəsinin xx.xx.2025-ci il tarixli EQ 27585372 nömrəli inzibati tənbeh vermə haqqında qərarından verdiyi şikayət təmin edilməli, həmin qərar ləğv edilərək inzibati xəta haqqında iş yenidən baxılmaq üçün səlahiyyətli orqana (vəzifəli şəxsə) göndərilməlidir. Şərh olunanlara əsasən və Azərbaycan Respublikası İnzibati Xətalar Məcəlləsinin 134-135-ci maddələrini rəhbər tutaraq QƏRARAALDİ: Şikayət təmin edilsin. Azərbaycan Respublikası DİN Baş Dövlət Yol Polis İdarəsinin xx.xx.2025-ci il tarixli EQ 27585372 inzibati tənbeh vermə haqqında qərarı ləğv edilsin, inzibati xəta haqqında iş yenidən baxılmaq üçün səlahiyyətli orqana - Azərbaycan Respublikası DİN Baş Dövlət Yol Polis İdarəsinə göndərilsin. Qərardan rəsmi qaydada verildiyi vaxtdan 10 (on) gün müddətində Bakı Apellyasiya Məhkəməsinə şikayət verilə bilər. Sədrlik edən Elçin Ağayev