Bakı Şəhəri Binəqədi Rayon Məhkəməsi Qərardad — İş №3(001)-5226/2023

Azərbaycan Respublikası adından QƏRARDAD Bakı şəhəri İş № 3(001)-5226/2023 05.12.2023 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Tağıyev Vüsal Adıgözəl oğlu, Şəxs Azərbaycan Respublikasının İnzibati Xətalar Məcəlləsinin (bundan sonra - İXM) 464-cü maddəsində nəzərdə tutulan inzibati xətanı törətməsinə dair Azərbaycan Respublikasının Maliyyə Nazirliyi tərəfindən tərtib edilmiş xx.xx.2023-cü il tarixli, MN ******* nömrəli inzibati xəta haqqında protokol və ona əlavə edilmiş iş materiallarına baxılmağa hazırlanması zamanı, müəyyən etdim: 05 dekabr 2023-cü ildə Bakı şəhəri Binəqədi Rayon Məhkəməsinin icraatına Şəxs İXM-in 464-cü maddəsində nəzərdə tutulan inzibati xətanı törətməsinə dair Azərbaycan Respublikasının Maliyyə Nazirliyi tərəfindən tərtib edilmiş xx.xx.2023-cü il tarixli, MN ******* nömrəli inzibati xəta haqqında protokol daxil olmuşdur. İnzibati xəta haqqında protokolu nəzərdən keçirərək hesab edirəm ki, aşağıda göstərilənlərə əsasən inzibati xəta haqqında protokol onu tərtib etmiş orqana geri qaytarılmalıdır. Belə ki, Azərbaycan Respublikasının Maliyyə Nazirliyi tərəfindən tərtib edilmiş xx.xx.2023-cü il tarixli, MN ******* nömrəli inzibati xəta haqqında protokolda inzibati xətanın törədildiyi vaxt kompüter vasitəsilə yazılıb çap edilsə də, sonradan tarixlərə qələmlə düzəliş edilmiş, tarixlər dəyişdirilərək baxılması üçün məhkəməyə göndərilmişdir. Bu da, Azərbaycan Respublikasının Maliyyə Nazirliyi həmin hərəkətlə ciddi hesabat sənədi olan protokolun təhrif olunmasına və dəyişdirilməsinə səbəb olmuşdur. İXM-in 100.5-ci maddəsinə əsasən protokol ciddi hesabat sənədi olmaqla, nömrələnmiş blanklarda tərtib olunur. Protokolun forması müvafiq icra hakimiyyəti orqanı tərəfindən müəyyən olunur. Göründüyü kimi, qanunvericilik tərəfindən protokolun forması müəyyən edilmiş və onun təhrifi və ya başqa cür dəyişdirilməsi yolverilməzdir. Bu da belə qənaətə gəlməyə əsas verir ki, Şəxs barəsində olan xx.xx.2023-cü il tarixli, MN ******* nömrəli inzibati xəta haqqında protokol düzgün tərtib edilməmişdir. İXM-in 109.1.6-cı maddəsinə əsasən, protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə məhkəmə qərardad qəbul edir. Beləliklə, qeyd olunalarla müəyyən edilir ki, Şəxs İXM-in 464-cü maddəsi ilə nəzərdə tutulan inzibati xətanı törətməsi haqqında Azərbaycan Respublikasının Maliyyə Nazirliyi tərəfindən tərtib edilmiş protokol, həmin Məcəllənin tələblərinə uyğun tərtib edilməyərək məhkəməyə təqdim olunmuşdur. Buna görə də, inzibati xəta haqqında tərtib edilmiş protokol və əlavə edilmiş iş materialları onu tərtib etmiş orqana geri qaytarılmalıdır. Yuxarıda göstərilənlərə əsasən və İXM-in 109.1.6-cı maddəsini rəhbər tutaraq, qərara aldım: Şəxs barəsində tərtib edilmiş xx.xx.2023-cü il tarixli, MN ******* nömrəli inzibati xəta haqqında protokol və ona əlavə edilmiş iş materialları Azərbaycan Respublikasının Maliyyə Nazirliyinə geri qaytarılsın. Hakim: Vüsal Tağıyev