Bakı Şəhəri Binəqədi Rayon Məhkəməsi Qərar — İş №3(001)-572/2025

Azərbaycan Respublikası adından QƏRAR Bakı şəhəri İş № 3(001)-572/2025 15.01.2025 BAKI ŞƏHƏRİ BİNƏQƏDİ RAYON MƏHKƏMƏSİ Hakim Nəsibov Samir Nadir oğlunun sədrliyi, Məhkəmə iclas katibi Bayramov Tural Ural oğlunun katibliyi, inzibati xəta haqqında protokol tərtib etmiş şəxs Bakı şəhəri Binəqədi Rayon Polis İdarəsinin 7-ci Polis Bölməsinin sahə inspektoru, polis kapitanı X1, barəsində inzibati xəta haqqında iş üzrə icraat aparılan şəxs Şəxs iştirakları ilə, 02 avqust 1984-cü il tarixdə Lənkəran şəhərində doğulmuş, Azərbaycan Respublikasının vətəndaşı, subay, orta təhsilli, işləməyən, ünvan 1 ünvanında qeydiyyatda olmaqla, Abşeron rayonu, Masazır qəsəbəsində yaşayan Şəxs Azərbaycan Respublikasının İnzibati Xətalar Məcəlləsinin (bundan sonra İXM) 510 və 535.1-ci maddələrində nəzərdə tutulmuş inzibati xətaları törətməsinə dair tərtib edilmiş protokola açıq məhkəmə iclasında baxaraq, M Ü Ə Y Y Ə N E T D İ: Şəxs İXM-nin 510-cu və 535.1-ci maddələrində göstərilən inzibati xətaları törətməsinə dair Bakı şəhəri Binəqədi Rayon Polis İdarəsinin 7-ci Polis Bölməsinin sahə inspektoru, polis kapitanı X3 tərəfindən tərtib edilmiş 15 yanvar 2025-ci il tarixli, MN ******* saylı “inzibati xəta haqqında” protokol baxılması üçün həmin tarixdə Bakı şəhəri Binəqədi Rayon Məhkəməsinə göndərilmişdir. Protokol onunla əsaslandırılmışdır ki, Şəxs 14 yanvar 2025-ci il tarixdə ünvan 3 ünvanında ucadan səs-küy salaraq küçə söyüşləri söyüb, polis əməkdaşlarına tabesizlik göstərmişdir. Məhkəmə iclasında inzibati xəta haqqında protokol tərtib etmiş şəxs V.S.İsgəndərzadə izahatında göstərdi ki, 14 yanvar 2025-ci il tarixdə polis əməkdaşları axtarışda olan X8 adlı şəxsin 9-cu mkr. ərazisində olan “Atmosfer” çay evində olduğunu bilib onu yaxalamaq üçün saat 20 radələrində həmin çay evində daxil olmuş, Çingiz Ağazadəyə yaxınlaşan zaman sonuncunun qardaşı Şəxs çay evinə gəlmiş və qardaşının aparılmaması üçün ucadan söyüşlər söymüş, çay evinin iş rejimini pozmuş, polis əməkdaşları onu sakintliyə dəvət etsələr də, o, polislərin qanuni tələbinə tabe olmayaraq özü ilə gətirdiyi bıçaqla öz boğazına xəsarət yetirmişdir. Buna görə də, həmin şəxs də polis bölməsinə gətirilmiş və bu barədə polis əməkdaşları tərəfindən raport tərtib edilmişdir. Həmin raport əsasında o, hazırki protokolu tərtib edərək, baxılması üçün məhkəməyə təqdim etmişdir. Sonda V.S.İsgəndərzadə məhkəmədən Şəxs barəsində cəza təyin edilməsini xahiş etdi. Məhkəmə iclasında Şəxs özünü təqsirli bilərək, izahatında göstərdi ki, 14 yanvar 2025-ci il tarixdə o,dostları və qardaşı Çingizlə birlikdə “Atmosfer” çay evində olarkən o, telefonla danışmaq üçün həyətə çıxmış, geri qayıdanda isə qardaşının 2 nəfər tərəfindən aparıldığını görmüş və qardaşının aparılmasına mane olmaq məqsədilə üzərində olan bıçağı boğazına dirəyərək özünə xəsarət yetirmişdir. Qardaşını aparmaq istəyənlər mülki geyimdə olduqlarından onların polis əməkdaşı olmasını bilməmiş, həmçinin həmin şəxslərə qarşı hər hansı nalayiq ifadə işlətməmişdir. Məqsədi qardaşının aparılmaması olmuşdur. Hazırda əməlindən peşmandır və məhkəmədən barəsində yüngül cəza təyin edilməsini xahiş edir. Məhkəmə iclasında şahid qismində dindirilmiş Binəqədi RPİ-nin Cinayət axtarış şöbəsinin axtarış üzrə əməliyyat müvəkkili X9 ifadəsində göstərdi ki, 14 yanvar 2025-ci il tarixdə daxil olmuş əməliyyat məlumatı əsasında axtarışda olan X8 adlı şəxsin 9-cu mkrda “Atmosfer” çay evində olduğu bildirilmiş, o və digər polis əməkdaşları saat 20 radələrində həmin çay evində daxil olub Çingiz Ağazadəyə yaxınlaşdıqdan sonra onun qardaşı Şəxs uca səslə onların üzərinə gələrək, qardaşının aparılmasına maneçilik törətməyə çalışmış, daha sonra öz boğazına bıçaqla xəsarət yetirmişdir. Onlar Hafizi sakitliyə dəvət etsələr də, Hafiz onlara məhəl qoymadığından, barəsində qanuni tədbir görülməsi üçün 7-ci Polis Bölməsinə gətirilmişdir. Məhkəmə iclasında şahid qismində dindirilmiş X2 digər şahid X4 ifadəsinə uyğun ifadə verdi. İş materiallarında olan və məhkəmə baxışı zamanı tədqiq edilmiş: - Binəqədi RPİ-nin Cinayət axtarış şöbəsinin əməkdaşları tərəfindən tərtib edilmiş raportda göstərilmişdir ki, “xx.xx.2025-ci il tarixdə saat 20:00-da axtarışda olan X5 əməliyyat-axtarış tədbirləri zamanı 9-cu mkr.-da yerləşən “Atmosfer” çay evində olduğu müəyyən olundu. Həmin şəxsə yaxınlaşan zaman onun qardaşı Şəxs uca səslə səs-küy salaraq etirazını bildirdi və ünvanımıza nalayiq ifadələr işlədərək qanuni tələbimizə tabesizlik göstərmişdir...” - “İnzibati qaydada tutma haqqında” protokoldan görünür ki, Şəxs 14 yanvar 2025ci il tarixdə, saat 23:00-da inzibati qaydada tutulmuşdur. Tətbiq edilən hüquq və məhkəmənin mövqeyi: İXM-in 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir. İXM-in 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İXM-in 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İXM-in 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. İXM-in 53.2-ci maddəsinə əsasən hər hansı şəxs barəsində başlanılmış inzibati xətalar haqqında işlər üzrə icraata, həmçinin onun inzibati xəta törədilməsinə aidiyyəti olmadıqda və ya təqsirliliyi sübuta yetirilmədikdə, o cümlədən təqsirliliyin sübuta yetirilməsində qanuna zidd olaraq əldə edilmiş sübutlardan istifadə edildikdə xitam verilir. İXM-in 76.1-ci maddəsinə əsasən İnzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. İXM-in 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. İXM-in 105.1-ci İnzibati Xətalar Məcəlləsinin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. İXM-in 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Məhkəmə işdə iştirak edən şəxslərin izahatlarını, şahid ifadələrini dinləyib, qanunvericiliyin yuxarıda göstərilən müddəalarına əsaslanaraq, hesab edir ki, Şəxs əməlində İXM-nin 535.1-ci maddəsinin tərkib əlamətləri sübuta yetirilmədiyindən, onun barəsində həmin maddə ilə başlanmış inzibati xəta haqqında iş üzrə icraata xitam verilməlidir. Belə ki, İXM-nin 535.1-ci maddəsinə əsasən, polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə həmin maddədə nəzərdə tutulan məsuliyyət yaranır. Lakin, İXM-nin 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlər bu maddə ilə məsuliyyət yaradır. İşin faktiki halları ilə Şəxs çay evində ictimai qaydanı pozan xırda xuliqanlıq hərəkətləri öz təsqidini tapdığından, o, həmin maddənin sanksiyası həddində inzibati xəta üzrə məsuliyyətə cəlb edilməli və cəzalandırılmalıdır. Şəxs əməlini səmimi etiraf etməsi və peşmanlıq hissi keçirməsi onun məsuliyyətini yüngülləşdirən hal kimi məhkəmə tərəfindən nəzərə alınır, onun məsuliyyətini ağırlaşdıran hal müəyyən edilməmişdir. Şəxs törətdiyi inzibati xətanın xarakterini nəzərə alaraq hesab edir ki, ona yalnız inzibati həbs növündə tənbeh təyin etməklə və onu müəyyən müddətə cəmiyyətdən təcrid etməklə tənbehin məqsədlərinə nail olmaq olar. Barəsində inzibati icraat aparılan şəxsə inzibati həbslə əlaqədar olmayan cərimə tənbeh növünün təyin edilməsi isə məqsədəmüvafiq deyildir. İXM-nin 31.4-cü maddəsinə əsasən, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. Beləliklə, göstərilənləri nəzərə alaraq, məhkəmə hesab edir ki, Şəxs İXM-nin 510cu maddəsində nəzərdə tutulan inzibati xətanı törətməkdə təqsirli bilinərək, 4 gün müddətində inzibati həbs edilməli, tutulmasının əvvəli 14 yanvar 2025-ci il tarixdən, saat 23:00-dan hesablanmalıdır. Yuxarıda göstərilənlərə əsasən və İXM-in 40, 43, 48-51, 61, 73, 114, 128-130-cu maddələrini rəhbər tutaraq, məhkəmə Q Ə R A R A A L D İ: Şəxs Azərbaycan Respublikasının İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməkdə təqsirli bilinib, 04 (dörd) gün müddətə inzibati həbs edilsin. Həbsdə saxlama müddətinin əvvəli 14 yanvar 2025-ci il tarixdən, saat 23:00-dan hesablansın. Onun barəsində Azərbaycan Respublikasının İnzibati Xətalar Məcəlləsinin 535.1-ci maddəsi ilə tərtib edilmiş inzibati xəta üzrə icraata xitam verilsin. Qərar dərhal icra edilsin. Qərarın icrası Azərbaycan Respublikasının Daxili İşlər Nazirliyinin İnzibati Həbs olunanların Saxlanma Məntəqəsinə həvalə edilsin. Qərarın surəti rəsmi qaydada verildiyi gündən 10 (on) gün müddətində Azərbaycan Respublikasının İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Sədrlik edən Samir Nəsibov