Bakı Şəhəri Binəqədi Rayon Məhkəməsi Qərar — İş №3(001)-5758/2025

Azərbaycan Respublikası adından QƏRAR Bakı şəhəri İş № 3(001)-5758/2025 04.09.2025 BAKI ŞƏHƏRİ BİNƏQƏDİ RAYON MƏHKƏMƏSİ Hakim Nəsibov Samir Nadir oğlunun sədrliyi, Bayramov Tural Ural oğlunun katibliyi, Barəsində inzibati xəta haqqında icraat aparılan şəxs Şəxs iştirakı ilə xx xxxx 1992-ci il tarixdə Ağdam rayonunun Çuxurməhlə kəndində doğulmuş, Azərbaycan Respublikasının vətəndaşı, evli, çilingər işləyən, Ağdam rayonunun Çuxurməhlə kəndində qeydiyyatda olan Şəxs Azərbaycan Respublikasının İnzibati Xətalar Məcəlləsinin (İXM) 342.9-cu maddəsində nəzərdə tutulan inzibati xətanı törətməsinə dair barəsində tərtib edilmiş 09 iyun 2025-ci il tarixli, İXP ******* nömrəli “inzibati xəta haqqında protokol”a açıq məhkəmə iclasında baxaraq, M Ü Ə Y Y Ə N E T D İ: Şəxs barəsində İXM-nin 342.9-cu maddəsi ilə 09 iyun 2025-ci il tarixli, İXP ******* nömrəli protokol baxılması üçün Bakı şəhəri Binəqədi Rayon Məhkəməsinə göndərilmişdir. Protokol onunla əsaslandırılmışdır ki, 09 iyun 2025-ci il tarixdə Binəqədi rayonunda Şəxs “Toyota Prius (hibrid)” minik markalı, **-FA-*** dövlət qeydiyyat nişanlı avtomobilə baxış keçirilərkən avtomobildə müvafiq icazə olmadan səs siqnalının quraşdırıldığı aşkar edilmişdir. Məhkəmə iclasında barəsində inzibati xəta üzrə icraat aparılan Şəxs izahatında göstərdi ki, onun avtomobilində qeyri-qanuni quraşdırılmış səs siqnalı olmuşdur. Lakin, 09 iyun 2025-ci il tarixdə polis əməkdaşları onun mobil telefonuna zəng vuraraq, avtoqəza ilə bağlı çağırmış, o, deyilən yerə getdikdə avtomobilinə baxış keçirmiş, siqnalı götürmüşlər. Yəni, həmin vaxt o siqnaldan istifadə etməmişdir. Sonda Şəxs müsadirə edilmiş siqnalın onun şəxsi mülkiyyəti olduğunu bildirib, siqnalın ona verilməsini xahiş etdi. Məhkəmə iclasının vaxtı və yeri barədə lazımı qaydada məlumat verilməsinə baxmayaraq protokol tərtib edən orqanın nümayəndəsi məhkəməyə gəlməmişdir. Məhkəmə işə onun iştirakı olmadan baxılmasını mümkün hesab etmişdir. İş materiallarında olan Binəqədi RPİ-nin DYPŞ-nin inspektoru, polis baş-leytenantı İlkin Vəliyev və hal şahidlərinin imzası ilə təsdiq edilmiş raportda göstərilmişdir ki, “Toyota” markalı, **-FA-*** dövlət qeydiyyat nişanlı avtomobildə çoxavazlı səs siqnalı aşkar edilmişdir. Beləliklə, barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 342.9-cu maddəsi ilə nəzərdə tutulmuş inzibati xəta törətməsi iş materialları əsasında sübuta yetirilmiş və onun barəsində həmin maddənin sanksiyası həddində inzibati tənbeh tətbiq edilməlidir. İXM-nin 342.9-cu maddəsinə əsasən, nəqliyyat vasitələrinin müvafiq icazə olmadan xüsusi (çoxavazlı) səs və ya sayrışan işıq siqnalları və ya operativ nəqliyyat vasitələri üçün müəyyən edilmiş rənglənmə sxemləri, yazılar və tanınma nişanları ilə təchiz edilməsinə, yaxud nəqliyyat vasitəsinin dövlət qeydiyyat nişanının görünüşünü çətinləşdirən örtüklərdən və ya qurğulardan, nəqliyyat vasitəsinin sürətini ölçməyə maneçilik törədən və ya ölçmə cihazlarının işinə mane olan antiradar və digər texniki vasitələrdən, yaxud əhalinin dincliyini nümayişkaranə şəkildə pozan səs siqnallarından istifadə edilməsinə görə inzibati xətanın törədilməsində alət və ya inzibati xətanın bilavasitə obyekti olmuş predmet müsadirə edilməklə, beş yüz manatdan səkkiz yüz manatadək məbləğdə cərimə edilir. Məhkəmə İXM-yə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakterini, inzibati xəta törədən şəxsin şəxsiyyətini, onun təqsirinin dərəcəsini, əmlak vəziyyətini, habelə məsuliyyəti yüngülləşdirən və ağırlaşdıran halları nəzərə alır. Məhkəmə barəsində tətbiq ediləcək inzibati xətanın növünü müəyyən edərkən xətanın xarakterini, inzibati xəta törədən şəxsin şəxsiyyətini, onun təqsirinin dərəcəsini nəzərə alır və İXM-nin 342.9-cu maddəsində nəzərdə tutulan inzibati tənbeh tədbiri – çoxavazlı səs siqnalı müsadirə edilməklə cərimə tətbiq olunmalıdır. Şərh olunanlara əsasən və İXM-nin 34, 40, 43, 114, 128-130-cu maddələrini rəhbər tutaraq Q Ə R A R A A L D İ M: Şəxs Azərbaycan Respublikasının İnzibati Xətalar Məcəlləsinin 342.9-cu maddəsində nəzərdə tutulmuş inzibati xətanı törətməkdə təqsirli bilinərək, inzibati xətanın aləti olan çoxavazlı səs siqnalı müsadirə edilməklə ona 500 (beş yüz) manat miqdarında cərimə inzibati tənbeh tədbiri tətbiq edilsin. Qərarın surəti təqdim edildiyi və ya alındığı gündən 10 (on) gün müddətində Bakı Apelyasiya Məhkəməsinə şikayət verilə bilər. Sədrlik edən Samir Nəsibov