Azərbaycan Respublikası adından QƏRAR Bakı şəhəri İş № 3(001)-584/2025 07.02.2025 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi İbrahimova Aytəkin Nazim qızının sədrliyi, məhkəmənin məsləhətçisi (məhkəmə iclas katibi) Hacıyeva Nigar Zahid qızının katibliyi, inzibati xəta haqqında protokol tərtib etmiş Azərbaycan Respublikasının Mərkəzi Bankının nümayəndəsi Nümayəndə, barəsində inzibati xəta haqqında protokol tərtib edilmiş Şəxs nümayəndəsi X1 iştirakı ilə, Şəxs tərəfindən Azərbaycan Respublikasının İnzibati Xətalar Məcəlləsinin (bundan sonra – İXM) 430.4-cü maddəsi ilə Azərbaycan Respublikasının Mərkəzi Bankı tərəfindən tərtib edilmiş inzibati xəta haqqında protokol əsasında toplanmış materiala məhkəmənin binasında, açıq məhkəmə iclasında baxaraq, məhkəmə müəyyən etdi: İşin faktiki halları
1. Məhkəmənin icraatına Azərbaycan Respublikasının Mərkəzi Bankı tərəfindən Şəxs barəsində İXM-in 430.4-cü maddəsi ilə tərtib edilmiş xx.xx.2025-ci il tarixli, EP ******* nömrəli inzibati xəta haqqında protokol əsasında toplanmış material daxil olmuşdur. Həmin protokola əsasən Şəxs 248876.00 məbləğində vəsaiti xx.xx.2022-ci il tarixdə xaricə köçürmüş və 2 il müddət keçsə də, 142120.00 Avro məbləğində vəsait hesabına alınan malları ölkəyə idxal etməmiş, valyuta vəsaitini geri qaytarmamışdır. Xəta xx.xx.2024-cü il tarixdə hüquqi şəxsin qeyd olunan ünvanında törədilmişdir.
2. Məhkəmə iclasında Azərbaycan Respublikasının Mərkəzi Bankının nümayəndəsi Nümayəndə bildirmişdir ki, Şəxs ilə “SW ENERJİ LOJİSTİK DİŞ TİCARET A.Ş” arasında xidməti müqavilə bağlanmış bu müqaviləni banka təqdim edərək qeyd edilən məbləği (142120.00 Avro), “SW ENERJİ LOJİSTİK DİŞ TİCARET A.Ş” şirkətinə köçürmüşdür. Qanunvericiliyin tələblərinə uyğun olaraq maliyyə əməliyyatlarının nəticəsini əks etdirəcək məlumatı banka təqdim etməli olduğu halda Şəxs bu məlumatı banka təqdim etməmişdir. Belə ki, 13002-01/90 nömrəli, xx.xx.2024-cü il tarixdə "xxxx" ASC-dən Azərbaycan Respublikasının Mərkəzi Bankına ünvanlanan müraciətdə ödənişin təyinatı və nəticəsi barədə məlumatın (Aktın) banka verilmədiyi bildirilmişdir. Lakin sonradan müəyyən edilmişdir ki, Şəxs bu aktı Banka təqdim etmişdir. Eyni aktı sonradan Mərkəzi Banka da təqdim etmişdir. Belə olduğu təqdirdə Mərkəzi Bank olaraq tərtib edilmiş, protokolu müdafiə etməyərək, hüquqi şəxsin xeyrinə müvafiq qərarın qəbul edilməsini məhkəmədən xahiş edirik.
3. Məhkəmə iclasında barəsində inzibati xəta haqqında protokol tərtib edilmiş Şəxs nümayəndəsi X2 bildirmişdir ki, Azərbaycan Respublikasının Mərkəzi Bankı Şəxs barəsində xx.xx.2025-ci il tarixli, EP ******* nömrəli inzibati xəta haqqında protokol tərtib edərək, İXM-in 430.4-cü maddəsində nəzərdə tutulan inzibati xətanı törətməkdə təqsirli bilinməsi, inzibati qaydada məsuliyyətə cəlb edilməsinə dair Bakı şəhəri Binəqədi Rayon məhkəməsinə müraciət etmişdir. xx.xx.2022-ci il tarixində Şəxs ilə Türkiyə Cumhuriyyətində fəaliyyət göstərən “SW ENERJİ LOJİSTİK DİŞ TİCARET A.Ş” şirkəti arasında xidməti müqavilə bağlanmışdır. Bu zaman xidməti müqavilələr üzrə xaricə pul köçürmələri ilə bağlı akt tərtib edilərək müvəkkil banka təqdim edilməlidir ki, onların MMCsi də bu aktları tərtib edərək müvəkkil bank "xxxx" a təqdim etmişlər. Görünür ki, hər hansı bir yalnışlıq olmuş və məhkəməyə də təqdim etdikləri Akt "xxxx"ın diqqətindən kənarda qalmışdır. Hal-hazırda qeyd edilən anlaşılmazlıq aradan qaldırılmışdır. Belə ki, akt həm "xxxx" a, həm də Mərkəzi Banka təqdim edilmişdir. Qeyd edilənləri nəzərə alaraq Şəxs barəsində başlanılmış inzibati xəta haqqında iş üzrə icraata xitam verilməsini xahiş etmişdir. İş materiallarında olan və məhkəmə tərəfindən tədqiq edilmiş:
4. xx.xx.2022-ci il tarixli müqavilədən görünür ki, Şəxs ilə Böyük Britaniyada fəaliyyət göstərən “SW ENERJİ LOJİSTİK DİŞ TİCARET A.Ş” şirkəti arasında xidməti müqaviləsı bağlanmışdır.
5. Şəxs "xxxx" ASC-də olan bank hesabından çıxarışdan görünür ki, xx.xx.2022-ci il tarixdə Şəxs tərəfindən həmin hesaba 142120.00 Avro vəsaiti köçürülmüş, həmin tarixdə vəsait “SW ENERJİ LOJİSTİK DİŞ TİCARET A.Ş” şirkətinin hesabına köçürülmüş, lakin akt təqdim edilməmişdir. Məhkəmənin əsaslandırması və mövqeyi
7. Məhkəmə, proses iştirakçısının izahatını dinləyib, iş materiallarını və məhkəmə iclasında toplanmış sübutları hərtərəfli və əhatəli şəkildə tədqiq edərək belə nəticəyə gəlir ki, Şəxs əməlində İXM-in 430.4-cü maddəsində nəzərdə tutulmuş inzibati xəta tərkibi olmadığından başlanılmış inzibati xəta haqqında icraata xitam verilməlidir.
8. Belə ki, məhkəmədə tədqiq edilmiş sübutlarla müəyyən edilmişdir ki, xx.xx.2022ci il tarixli müqavilə ilə Şəxs ilə Böyük Britaniyada fəaliyyət göstərən “SW ENERJİ LOJİSTİK DİŞ TİCARET A.Ş” şirkəti arasında bağlanan müqavilə xidmətlərin göstərilməsi ilə bağlıdır. xx.xx.2022-ci il tarixdə Şəxs tərəfindən 248876.00 məbləğində vəsait “SW ENERJİ LOJİSTİK DİŞ TİCARET A.Ş” şirkətinin hesabına köçürülmüş lakin 142120.00 Avro məbləğində vəsait hesabına dair akt təqdim edilməmişdir kimi qeydiyyat aparılmışdır. Lakin məhkəməyə təqdim edilən sənədlərdən görünür ki, tərəflər arasında xidməti müqavilə, tərtib edilmiş akt mövcuddur və bu sənədlər müvəkkil banka bir daha təqdim edilmişdir. Ona görə də, məhkəmə Şəxs əməlində İXM-in 430.4-cü maddəsində nəzərdə tutulmuş inzibati xəta tərkibinin olmaması səbəbi ilə onun barəsində başlanmış inzibati xəta haqqında icraata xitam verilməsi qənaətinə gəlmişdir.
9. Azərbaycan Respublikası Konstitusiya Məhkəməsi Plenumunun “Azərbaycan Respublikası İnzibati Xətalar Məcəlləsinin 38.1 və 430.4-cü maddələrinin əlaqəli şəkildə şərh edilməsinə dair” 19 dekabr 2019-cu il tarixli qərarında göstərilmişdir ki, məhkəmələr Azərbaycan Respublikası İnzibati Xətalar Məcəlləsinin 430.4-cü maddəsində nəzərdə tutulmuş məsuliyyət tədbirlərini tətbiq edərkən inzibati xətanı törədən şəxsin təqsirini Azərbaycan Respublikası İnzibati Xətalar Məcəlləsinin tələblərinə uyğun müəyyən etməlidirlər.
10. İXM-in 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir.
11. İXM-in 12.1-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur.
12. İXM-in 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir.
13. İXM-in 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir.
14. İXM-in 105.1-ci maddəsinə əsasən bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir.
15. İXM-in 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda məhkəmə inzibati xəta haqqında iş üzrə icraata xitam verilməsi haqqında qərar çıxarır.
16. Beləliklə, məhkəmə hesab edir ki, Azərbaycan Respublikasının Mərkəzi Bankı tərəfindən tərtib olunmuş xx.xx.2025-ci il tarixli, EP ******* nömrəli inzibati xəta haqqında protokola dair Şəxs əməlində İXM-in 430.4-cü maddəsinin tərkib əlamətləri olmadığından inzibati xəta haqqında iş üzrə icraata xitam verilməlidir.
17. Qeyd olunanlara əsasən və İXM-in 40, 43, 48-50, 53, 105, 114-115 və 128-130cu maddələrini rəhbər tutaraq, məhkəmə
qərara aldı:
Azərbaycan Respublikasının Mərkəzi Bankı tərəfindən tərtib olunmuş xx.xx.2025-ci il tarixli, EP ******* nömrəli inzibati xəta haqqında protokola dair Şəxs əməlində Azərbaycan Respublikasının İnzibati Xətalar Məcəlləsinin 430.4-cü maddəsinin tərkib əlamətləri olmadığından inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi vaxtdan 10 (on) gün müddətində Azərbaycan Respublikasının İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə apellyasiya şikayəti verilə bilər.
Hakim: Aytəkin İbrahimova