Bakı Şəhəri Binəqədi Rayon Məhkəməsi Qərar — İş №3(001)-6602/2024

Azərbaycan Respublikası adından QƏRAR Bakı şəhəri İş № 3(001)-6602/2024 19.11.2024 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Sadıqova Aynurə Vahid qızının sədrliyi, məhkəmənin məsləhətçisi (məhkəmə iclas katibi) Bəbirov Qədir Nadir oğlunun katibliyi, inzibati xəta haqqında protokol tərtib etmiş şəxs Bakı şəhəri Binəqədi RPİ-nin 4cü PB-nin sahə rəisi, polis mayoru X1, barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1994-cü il tarixdə Samux rayonu, İnstitut Ə/D, İnstitut qəsəbəsində doğulmuş, Azərbaycan Respublikasının vətəndaşı, evli, orta təhsilli, fərdi əmək fəaliyyəti ilə məşğul olan Samux rayonu, İnstitut Ə/D, İnstitut qəsəbəsində ünvanında qeydiyyatda olmaqla, Bakı şəhəri, Binəqədi rayonu, 3-cü mədən, korpus 125 ünvanında yaşayan, Şəxs barəsində Azərbaycan Respublikasının İnzibati Xətalar Məcəlləsinin (bundan sonra - İXM) 535.1-ci maddəsi ilə tərtib edilmiş inzibati xəta haqqında protokol əsasında toplanmış materiala məhkəmənin binasında, açıq məhkəmə iclasında baxıb, məhkəmə müəyyən etdi: Məhkəmənin icraatına Bakı şəhəri Binəqədi RPİ-nin 4-cü PB tərəfindən Şəxs barəsində İXM-in 535.1-ci maddəsi ilə tərtib edilmiş 19 noyabr 2024-cü il tarixli, MN ******* nömrəli inzibati xəta haqqında protokol əsasında toplanmış material daxil olmuşdur. Məhkəmə iclasında inzibati xəta haqqında protokol tərtib etmiş şəxs Binəqədi RPİnin 4-cü PB-nin sahə rəisi, polis mayoru X3 izahat verərək bildirmişdir ki, xx.xx.2024-cü il tarixdə, saat təxminən 00:05 radələrində dislokasiya üzrə xidmət aparılan ərazidə “Chevrolet” markalı avtomobilə manevr qaydalarını pozduğu üçün polis əməkdaşları tərəfindən “saxla” işarəsi verilmişdir. Sürücü “saxla” işarəsinə məhəl qoymayaraq küçələrdə sürətini artırıb təhlükəli idarə etməyə başlamışdır. Həmin sürücüyə dəfələrlə işarə verilməsinə, həmçinin yolda qabağının bağlanılıb hərəkətinin məhdudlaşdırılmasına baxmayaraq, o hər dəfə buna məhəl qoymayaraq, ətraf ərazidəki avtomobillərə dəyib ziyan verərək tabesizlik göstərməyə davam etmişdir. Bir müddət müşaiət edildikdən sonra sürücü məcburi surətdə nəqliyyat vasitəsini saxlamışdır. Avtomobil dayandıqdan sonra 2 nəfər düşüb qaçmağa çalışarkən dərhal əməkdaşlar tərəfindən saxlanılmağa çalışılmış, lakin həmin şəxslər əl-qol ataraq müqavimət göstərməyə davam etmiş, polisin şərəf və ləyaqətini alçaldan küçə söyüşləri söyməyə başlamışlar. Daha sonra həmin şəxslərin bölməyə gətirilməsi təmin olunmuş və bölmədə şəxslərdən birinin Şəxs olması məlum olmuşdur. Odur ki, vətəndaş Şəxs barəsində inzibati xəta haqqında protokol tərtib edilmişdir. Qeyd olunanların nəzərə alınaraq, məhkəmədən Şəxs inzibati qaydada məsuliyyətə cəlb olunmasını xahiş etmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək bildirmişdir ki, xx.xx.2024-cü il tarixdə spirtli içki qəbul etmişdir. Sərxoş vəziyyətdə olduğu və avtomobil idarə edə bilməyəcəyi üçün ayıq sürücü çağırmaq qərarına gəlmişdir. Lakin sonra ayıq sürücü kimi bibisi oğluna zəng etmiş və onu evə çatdırmasını xahiş etmişdir. Təxminən 1 saat yarım sonra bibisi oğlu onu avtomobillə götürmüş və o, avtomobildə yuxuya getmişdir. Ayıldıqda qəza baş verdiyini görmüş, sərxoş olduğu üçün başqa heç bir şey xatırlamamış, daha sonra nə baş verdiyini bölmədə anlamışdır. Məhkəmədən əməlindən səmimi peşmançılıq çəkməsinin nəzərə alınaraq barəsində yüngül inzibati tənbeh növünün tətbiq edilməsini xahiş etmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs ona verilən suallara cavab olaraq polisdən qaçmadığını, qaçdıqdan sonra gedəcək yeri olmadığını dərk etdiyini bildirmişdir. Məhkəmə iclasında şahid qismində dindirilmiş Binəqədi RPİ-nin Dövlət Yol polisi şöbəsinin Yol Patrul xidmətinin baş inspektoru, polis baş leytenantı X2 bildirmişdir ki, xx.xx.2024-cü il tarixdə, saat təxminən 00:05 radələrində ərazidə dislokasiya üzrə xidmət apararkən “Chevrolet” markalı, **-AB-*** dövlət qeydiyyat nişanlı avtomobilə manevr qaydalarını pozduğu üçün tərəflərindən “saxla” işarəsi verilmişdir. Sürücü “saxla” işarəsinə məhəl qoymayaraq küçələrdə sürətini artırıb təhlükəli idarə etməyə başlamışdır. Həmin sürücüyə dəfələrlə işarə verilməsinə, həmçinin yolda qabağının bağlanılıb hərəkətinin məhdudlaşdırılmasına baxmayaraq, o hər dəfə buna məhəl qoymayaraq, ətraf ərazidəki avtomobillərə dəyib ziyan verərək tabesizlik göstərməyə davam etmiş, binaların arası ilə hərəkət etmiş və avtomobili əməkdaşların üstünə sürmüşdür. Şəxs avtomobili sürətlə, təhlükəli idarə etmiş və onu saxlamaq üçün əlavə dörd yol-patrul avtomobili cəlb edilmişdir. Təxminən 15 dəqiqə müşaiyət edildikdən sonra sürücü hadisə törədərək məcburi surətdə nəqliyyat vasitəsini saxlamışdır. Avtomobil dayandıqdan sonra biri sürücü biri sərnişin qismində əyləşən 2 nəfər düşüb qaçmağa çalışarkən dərhal tərəflərindən saxlanılmış, lakin həmin şəxslər əl-qol ataraq müqavimət göstərməyə davam etmiş, polisin şərəf və ləyaqətini alçaldan küçə söyüşləri söyməyə başlamışlar. Daha sonra həmin şəxslərin bölməyə aparılması təmin edilmiş və nəqliyyat vasitəsi evakuator vasitəsilə duracağa yerləşdirilmişdir. İş materiallarında olan və məhkəmə iclasında tədqiq edilmiş: 19 noyabr 2024-cü il tarixli, AZA 000127 nömrəli inzibati qaydada tutma haqqında protokoldan görünür ki, Şəxs həmin tarixdə, saat 01:00-da inzibati qaydada tutulmuşdur. xx.xx.2024-cü il tarixli, 2/63985 nömrəli tibbi müayinə protokolundan görünür ki, Şəxs orta sərxoşluq dərəcəsi müəyyən edilmişdir. 19 noyabr 2024-cü il tarixli, MN ******* nömrəli inzibati xəta haqqında protokoldan görünür ki, Şəxs həmin tarixdə polis əməkdaşlarının qanuni tələblərinə tabe olmayaraq, İXM-in 535.1-ci maddəsində nəzərdə tutulan inzibati xətanı törətmişdir. Məhkəmə, proses iştirakçılarını dinləyib, inzibati xəta haqqında iş materiallarını nəzərdən keçirərək hesab edir ki, Şəxs barəsində Binəqədi RPİ-nin 4-cü PB tərəfindən İXM-in 535.1-ci maddəsi ilə tərtib edilmiş inzibati xəta haqqında protokol əsaslıdır. Belə ki, istər məhkəmə iclasında tədqiq edilmiş sübutlarla, istərsə də barəsində inzibati xəta haqqında iş üzrə icraat aparılan Şəxs məhkəmə iclasında verdiyi izahat ilə onun İXM-in 535.1-ci maddəsində nəzərdə tutulan inzibati xətanı törətməsi tam sübuta yetirilmişdir. İXM-in 2-ci maddəsinə əsasən Azərbaycan Respublikasının inzibati xətalar qanunvericiliyin vəzifələri insan və vətəndaş hüquqlarını və azadlıqlarını, onun sağlamlığını, əhalinin sanitariya-epidemioloji salamatlığını, ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. İXM-in 3-cü maddəsinə əsasən yalnız həmin Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. İXM-in 6-cı maddəsinə əsasən bu məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır. İXM-in 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İXM-in 12.1-ci maddəsinə əsasən həmin Məcəllə ilə qorunun ictimai münasibətlərə qəsd edən, hüquqa zidd olan, təqsirli sayılan (qəsdən və ya ehtiyatsızlıqdan törədilən) inzibati məsuliyyətə səbəb olan əməl (hərəkət və hərəkətsizlik) inzibati xəta hesab olunur. İXM-in 21-ci maddəsində göstərilir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. İXM-in 31.1-ci maddəsinə əsəsən inzibati xətaya görə tənbeh İnzibati Xətalar Məcəlləsinə uyğun olaraq tətbiq edilir. İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İXM-in 31.4-1.-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Məhkəmə, İXM-in 32.1.1-ci maddəsinə əsasən Şəxs əməlindən səmimi peşman olmasını onun məsuliyyətini yüngülləşdirən hal kimi nəzərə alır. Məhkəmə, İXM-in 33.1.7-ci maddəsinə əsasən Şəxs inzibati xətanı sərxoş halda törətməsini onun məsuliyyətini ağırlaşdıran hal kimi nəzərə alır. İXM-in 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. İXM-nin 89.5-ci maddəsinə əsasən inzibati qaydada tutma müddəti inzibati xəta törətmiş şəxsin protokol tərtib etmək üçün gətirildiyi vaxtdan, sərxoş halda olmuş şəxsin isə ayıldığı vaxtdan hesablanır. xx.xx.2024-cü il tarixli 2/63985 nömrəli sərxoşluq hallarının bütün növlərinin təyini məqsədi ilə aparılan tibbi müayinə protokolundan görünür ki, Şəxs orta sərxoşluq dərəcəsi müəyyən edilmişdir. Bu səbəbdən məhkəmə, barəsində inzibati xəta haqqında iş üzrə icraat aparılan şəxs Şəxs inzibati qaydada tutulan vaxt sərxoş olduğunu nəzərə alaraq, hesab edir ki, onun inzibati qaydada tutuma müddətinin əvvəli 19 noyabr 2024-cü il tarixdən hesablanmalıdır Məhkəmə, Şəxs şəxsiyyətini, məsuliyyətini yüngülləşdirən halı, məsuliyyətini ağırlaşdıran halın olmamasını, törətmiş olduğu inzibati xətanın xarakterini, inzibati qaydada tutulmasını və inzibati tənbehin məqsədlərinə nail olmasını nəzərə alaraq, ona inzibati həbs növündə tənbehin təyin edilməsini məqsədə müvafiq hesab edir. Qeyd olunanları nəzərə alaraq və İXM-in 40, 43, 48, 48-51, 61, 73, 114, 128-130-cu maddələrini rəhbər tutaraq, məhkəmə qərara aldı: Şəxs Azərbaycan Respublikasının İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanı törətməkdə təqsirli bilinib, 08 (səkkiz) gün həbs edilsin. Şəxs məhkəmə iclas zalından həbs edilsin. Həbsdə saxlama müddətinin əvvəli 19 noyabr 2024-cü il tarixdən hesablansın. Qərarın icrası Azərbaycan Respublikasının Daxili İşlər Nazirliyinin İnzibati Həbs olunanların Saxlanma Mərkəzinə həvalə edilsin. Qərarın surəti rəsmi qaydada verildiyi gündən 10 (on) gün müddətində Azərbaycan Respublikasının İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Hakim: Aynurə Sadıqova