Bakı Şəhəri Binəqədi Rayon Məhkəməsi Qərar — İş №3(001)-6794/2024

Azərbaycan Respublikası adından QƏRAR Bakı şəhəri İş № 3(001)-6794/2024 06.12.2024 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Nəsibov Samir Nadir oğlunun sədrliyi, Rəhimova Aynurə Şirzad qızının katibliyi, inzibati xəta haqqında protokol tərtib etmiş şəxs Bakı şəhəri Binəqədi rayon Polis İdarəsinin 43-cü Polis Bölməsinin polis sahə rəisi, polis baş leytenantı X2, barəsində inzibati xəta haqqında iş üzrə icraat aparılan şəxs Şəxs iştirakları ilə, xx xxxxxx 1980-cı il tarixdə Bərdə şəhərində doğulmuş, Azərbaycan Respublikasının vətəndaşı, subay, ortaixtisas təhsilli, ünvan 1 ünvanında yerləşən fərdi evdə yaşayan Şəxs Azərbaycan Respublikasının İnzibati Xətalar Məcəlləsinin (İXM) 535.1-ci maddəsində nəzərdə tutulan inzibati xətanı törətməsinə dair tərtib edilmiş protokola baxaraq, M Ü Ə Y Y Ə N E T D İ: Bakı şəhəri Binəqədi Rayon Polis İdarəsinin 43-cü Polis Bölməsinin polis sahə rəisi, polis baş leytenantı X5 tərəfindən Şəxs barəsində İXM-nin 535.1-ci maddəsi ilə tərtib edilmiş 06 dekabr 2024-cü il tarixli, ******* nömrəli inzibati xəta haqqında protokol 06 dekabr 2024-cü il tarixdə baxılması üçün məhkəməyə göndərmişdir. İnzibati xəta haqqında protokol onunla əsaslandırılmışdır ki, Şəxs 05 dekabr 2024cü il tarixdə Binəqədi qəsəbəsi ərazisində polisin qanuni tələblərinə tabe olmamış, nəticədə İXM-nin 535.1-ci maddəsinin tələblərini pozmuşdur. Məhkəmə iclasında inzibati xəta haqqında protokolu tərtib etmiş şəxs izahatında göstərdi ki, Polis Bölməsinin əməkdaşlarının tərtib etdikləri raport əsasında müəyyən olunmuşdur ki, 05 dekabr 2024-cü il tarixdə, saat 13 radələrində 3 nəfər şəxs Binəqədi qəsəbə bələdiyyəsinin qarşısında ucadan söyüş söyür, ünvansız nalayiq ifadələr işlədirlər. Polis əməkdaşları həmin şəxslərə yaxınlaşıb, onları sakitliyə dəvət etsələr də, həmin şəxslər polisin qanuni tələbinə tabe olmamış, öz hərəkətlərinə davam etmişlər. Bu zaman polis əməkdaşları onları Polis Bölməsinə dəvət etmiş, lakin onlar bölməyə getməkdən imtina etdiklərindən polis vasitəsilə gətirilmişlər. Bölmədə müəyyən olunmuşdur ki, həmin şəxslərdən biri Şəxsdur. Sonuncudan izahat alınmış, həmin tarixdə barəsində tutma haqqında protokol tərtib edilərək inzibati qaydada tutulmuş, 06 dekabr 2024-cü il tarixdə inzibati xəta haqqında protokol tərtib edilərək, baxılması üçün məhkəməyə təqdim edilmişdir. Sonda S.V.Cəfərov məhkəmədən Şəxs barəsində qanunauyğun cəza təyin edilməsini xahiş etdi. Məhkəmə iclasında barəsində inzibati xəta haqqında protokol tərtib edilmiş şəxs izahatında göstərdi ki, 05 dekabr 2024-cü il tarixdə, saat 13 radələrində o, Binəqədi qəsəbə bələdiyyəsinin qarşısında Rəşad İsayevlə görüşmək istəyərkən polis əməkdaşları ona yaxınlaşıb, onu Polis Bölməsinə dəvət etmişlər. O, səbəbini soruşduqda polis əməkdaşları bölmədə səbəbi bildirəcəklərini dedikləri üçün o, səbəbsiz yerə polis bölməsinə getməkdən imtina etmişdir. Polis əməkdaşlarına qarşı heç bir tabesizlik göstərməmiş, söyüş söyməmişdir. Məhkəmə iclasında şahid qismində dindirilmiş Binəqədi RPİ-nin Post-patrul xidməti bölüyü polis nəfəri X1 ifadəsində göstərdi ki, 05 dekabr 2024-cü il tarixdə, saat 13 radələrində Binəqədi qəsəbə bələdiyyəsinin qarşısında 3 nəfər şəxsin ünvansız söyüşlər söydüyünü görüb, iş yoldaşları ilə həmin şəxslərə yaxınlaşıb onları sakitliyə dəvət etsələr də, həmin şəxslər öz hərəkətlərini davam etdirdiklərindən, polis bölməsinə gətirilmişlər. Tədqiq edilən sübutlar: - Binəqədi RPİ-nin 43-cü PB-nin əməkdaşları E.Nəsirzadə, P.Talıbov və A.Abbasov tərəfindən tərtib edilmiş raportda göstərilmişdir ki, “xx.xx.2024-cü il tarixdə təxminən 13 radələrində ünvan 4 ünvansız, nalayiq söyüşlər işlədərək ictimai qaydanı pozduğunu görmüş, onlara yaxınlaşıb özlərini təqdim edərək vətəndaşları sakitliyə və qanuni tələbi pozmamağa dəvət etsələr də, həmin şəxslər polisin qanuni tələbinə məhəl qoymamışlar...43-cü Polis Bölməsində məlum olmuşdur ki, həmin şəxslər X6, Şəxs və X3r...”. - “İnzibati qaydada tutma haqqında protokol”dan görünür ki, Şəxs 05 dekabr 2024cü il tarixdə, saat 16:30-da inzibati qaydada tutulmuşdur. Tətbiq edilən hüquq və məhkəmənin mövqeyi: Məhkəmə proses iştirakçılarının izahatlarını, şahid ifadəsini dinləyib, inzibati xəta haqqında iş materiallarını nəzərdən keçirərək hesab edir ki, Şəxs barəsində İXM-in 535.1ci maddəsi ilə olan inzibati xəta haqqında protokol əsaslıdır. Belə ki, məhkəmə iş üzrə toplanmış sübutlara və onların məcmusuna tam, hərtərəfli və obyektiv baxılmasına əsaslanmaqla belə nəticəyə gəlir ki, Şəxs İXM-in 535.1-ci maddəsində nəzərdə tutulmuş inzibati xətanın törədilməsində təqsirliliyi inzibati xəta haqqında protokol, protokol tərtib etmiş şəxsin izahatı, şahid ifadəsi, eləcə də iş materialları ilə tam sübuta yetirilmiş və onun əməli düzgün olaraq həmin maddə ilə tövsif edilmişdir. Həmçinin Şəxs hərəkətlərinə münasibətdə əməlin inzibati xəta olmasını aradan qaldıran hallar, habelə inzibati məsuliyyətindən azad edilməsi üçün əsaslar yoxdur. Odur ki, Şəxs təqsiri tam sübuta yetirildiyinə görə inzibati məsuliyyətə cəlb edilməli və tənbeh edilməlidir. Məhkəmə inzibati xəta törətmiş şəxs Şəxs məsuliyyətini yüngülləşdirən və ağırlaşdıran hallar müəyyən edilməmişdir. Məhkəmə barəsində inzibati icraat aparılan şəxs Şəxs törətmiş olduğu inzibati xətaya görə təyin ediləcək tənbehin növü ilə bağlı aşağıdakıları qeyd etməyi zəruri hesab edir. İXM-in 2-ci maddəsinə əsasən Azərbaycan Respublikasının inzibati xətalar qanunvericiliyin vəzifələri insan və vətəndaş hüquqlarını və azadlıqlarını, onun sağlamlığını, əhalinin sanitariya-epidemioloji salamatlığını, ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. İXM-in 3-cü maddəsinə əsasən yalnız həmin Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. İXM-in 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İXM-in 12.1-ci maddəsinə əsasən həmin Məcəllə ilə qorunun ictimai münasibətlərə qəsd edən, hüquqa zidd olan, təqsirli sayılan (qəsdən və ya ehtiyatsızlıqdan törədilən) inzibati məsuliyyətə səbəb olan əməl (hərəkət və hərəkətsizlik) inzibati xəta hesab olunur. İXM-in 21-ci maddəsində göstərilir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. İXM-in 31.1-ci maddəsinə əsəsən inzibati xətaya görə tənbeh İnzibati Xətalar Məcəlləsinə uyğun olaraq tətbiq edilir. İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İXM-in 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. İXM-in 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Beləliklə, məhkəmə inzibati xətanın xarakterini, inzibati xəta törədən şəxsin şəxsiyyətini xarakterizə edən halları, onun təqsirinin dərəcəsi, əmlak vəziyyətini, habelə məsuliyyətini ağırlaşdıran halların olmamasını nəzərə alaraq hesab edir ki, Şəxs İXM-in 535.1-ci maddəsi ilə təqsirli bilinərək, barəsində təqsirli bilindiyi maddənin sanksiyasında müəyyən edilən inzibati cərimə növündə tənbehin dörddə üçündən çox olmayan məbləğdə inzibati cərimə növündə tənbeh tədbiri tətbiq edilməlidir. İXM-nin 535.1-ci maddəsinin sanksiyasında fiziki şəxslər üçün müəyyən edilmiş cərimə cəzasının maksimum həddi 200 manat olduğundan, məhkəmə yuxarıda göstərilənlərə əsaslanaraq, hesab edir ki, Şəxs 150 manat məbləğində inzibati cərimə edilməlidir. Yuxarıda göstərilənlərə əsasən və İXM-in 40, 43, 48-51, 61, 73, 114, 128-130-cu maddələrini rəhbər tutaraq, məhkəmə Q Ə R A R A A L D İ: Şəxs Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanı törətməkdə təqsirli bilinsin. Azərbaycan Respublikası İnzibati Xətalar Məcəlləsinin 31.4-1-ci maddəsi tətbiq edilməklə Şəxs 150 (yüz əlli) manat məbləğində inzibati cərimə edilsin. Qərardan onun surəti rəsmi qaydada verildiyi vaxtdan 10 (on) gün müddətində qərarı qəbul etmiş hakim vasitəsilə və ya birbaşa Bakı Apellyasiya Məhkəməsinə apellyasiya şikayəti verilə bilər. Qərardan şikayət verilməzsə, qərar şikayətin verilməsi müddətinin bitdiyi gün qanuni qüvvəyə minir. Sədrlik edən Samir Nəsibov