Bakı Şəhəri Binəqədi Rayon Məhkəməsi Qərardad — İş №3(001)-7359/2025

Azərbaycan Respublikası adından QƏRARDAD Bakı şəhəri İş № 3(001)-7359/2025 03.10.2025 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Bağırov Zamiq Rəşid oğlu, X1 inzibati tənbeh vermə haqqında qərardan verdiyi şikayətin baxılmağa hazırlanması zamanı, müəyyən etdim: X2 şikayət ərizəsi ilə məhkəməyə müraciət edərək, İXM-nin 327.1-ci maddəsi ilə barəsində tərtib olunmuş inzibati xəta haqqında protokol ləğv edilməsini məhkəmədən xahiş etmişdir. İnzibati xəta haqqında işin materiallarının baxılmağa hazırlanması müəyyən edilmişdir ki, X2 tərəfindən verilmiş şikayət geri qaytarılmalıdır. Belə ki, X2 barəsində tərtib olunmuş xx.xx.2025-ci il tarixli, İXP ******* nömrəli inzibati xəta haqqında protokoldan şikayət verərək həmin protokol ləğv edilməsini xahiş etmişdir. Halbuki, İnzibati Xətalar Məcəlləsində inzibati xəta haqqında protokoldan deyil, inzibati xəta haqqında iş üzrə qərardan şikayət vermək nəzərdə tutulmuşdur. Məhkəmə tərəfindən “Asanpay” ödəniş portalına baxış keçirilərək X1 barəsində qəbul edilmiş inzibati tənbeh vermə haqqında qərarın mövcud olmadığı müəyyən edilmişdir. Həmçinin İXP ******* nömrəli saylı protokol da həmin portalda yoxlanılmış, sözügedən seriya və nömrədə protokol üzrə hələ hər hansı bir qərarın qəbul olunmağı öz təsdiqini tapmamışdır. Azərbaycan Respublikasının İnzibati Xətalar Məcəlləsinin 128.1-ci maddəsinə əsasən barəsində qərar çıxarılmış fiziki şəxs, yetkinlik yaşına çatmayanların qanuni nümayəndəsi, hüquqi şəxsin nümayəndəsi, zərərçəkmiş şəxs, müdafiəçi və nümayəndə, həmçinin bu Məcəllənin 43.2-ci maddəsində nəzərdə tutulan vəzifəli şəxs inzibati xəta haqqında iş üzrə qərardan şikayət, prokuror isə protest verə bilər. Azərbaycan Respublikasının İnzibati Xətalar Məcəlləsinin 126.1-ci maddəsinə əsasən barəsində inzibati xəta haqqında iş üzrə qərar qəbul edilmiş şəxs yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydaları əleyhinə olan inzibati xətaların törədilməsinə görə inzibati tənbeh tətbiq etmə haqqında qərar ona bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan 20 (iyirmi) gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. Şikayət şəxsən verilə və ya poçt, yaxud internet vasitəsilə göndərilə bilər. Məhkəmə qeyd etməyi zəruri hesab edir ki, şikayət vermiş şəxs barəsində qərar qəbul edildikdən sonra məhkəməyə müraciət edə bilər, hazırki qərardadla şikayətin geri qaytarılması şəxsin bu hüququnu istisna etmir. X2 barəsində inzibatə tənbeh vermə haqqında qərar verildiyi halda sonuncu inzibati xətanın törədildiyi yer üzrə rayon (şəhər) məhkəməsinə şikayət edə bilər. Qeyd olunanlara əsasən məhkəmə hesab edir ki, X1 barəsində tərtib olunmuş inzibati xəta haqqında protokoldan verdiyi şikayət geri qaytarılmalıdır. “Azərbaycan Respublikası Konstitusiya Məhkəməsi Plenumunun Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair” xx.xx.2020-ci il tarixli qərarına görə inzibati xəta haqqında iş üzrə qərardan verilən şikayətə və ya protestə baxmağa hazırlıq zamanı qəbul edilən qərardaddan apellyasiya şikayət vermək hüququ istisna edilir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 128, 130-137-ci maddələrini rəhbər tutaraq, qərara aldım: X1 xx.xx.2025-ci il tarixli, İXP ******* nömrəli inzibati xəta haqqında protokoldan verdiyi şikayət geri qaytarılsın. Qərardaddan apellyasiya şikayəti verilə bilməz. Hakim: Zamiq Bağırov