Bakı Şəhəri Binəqədi Rayon Məhkəməsi Qərar — İş №3(001)-89/2024

Azərbaycan Respublikası adından QƏRAR Bakı şəhəri İş № 3(001)-89/2024 11.01.2024 BAKI ŞƏHƏRİ BİNƏQƏDİ RAYON MƏHKƏMƏSİ Hakim Ağayev Elçin Zəkəriyə oğlunun sədrliyi, Məhkəmə iclasının katibi Həsənzadə Fuad Fərhad oğlunun katibliyi, İnzibati xəta haqqında protokol tərtib etmiş Bakı şəhəri Binəqədi RPİ-in 6-cı PB-in sahə rəisi, polis mayoru X2, Barəsində inzibati xəta haqqında icraat aparılan şəxs Şəxs iştirakları ilə, xx xxxxxxxx 1998-ci ildə Beyləqan rayonunda doğulmuş, Azərbaycan Respublikası vətəndaşı, evli – himayəsində bir azyaşlı uşağı olan, orta təhsilli, fərdi qaydada təmir işlərilə məşğul olan, Füzuli rayonu İşıqlı kəndində qeydiyyatda olmaqla ünvan 1 ünvanda yaşayan, Şəxs Azərbaycan Respublikası İnzibati Xətalar Məcəlləsinin 206-cı və 535.1-ci maddələrində nəzərdə tutulmuş inzibati xətaları törətməsi barədə protokola baxaraq, MÜƏYYƏN ETDİ: Şəxs barəsində Azərbaycan Respublikası İnzibati Xətalar Məcəlləsinin 206-cı və 535.1-ci maddələri ilə inzibati xəta haqqında protokol tərtib edilmişdir ondan ötrü ki, o, 11 yanvar 2024-cü ildə gecə saat 04 radələrində Bakı şəhəri Binəqədi rayonu Biləcəri qəsəbəsi M.Hüseynzadə küçəsində 6-cı PB-in əməkdaşları Kamal Hüseynovun və Rüfət Əliyevin qanuni tələblərində qəsdən tabe olmamış, 6-cı PB-yə gətirilib daha sonra həkim müayinəsində keçirildikdə sidik nümunəsində AMP (+), MET (+) kimi narkotik vasitə olan heroin aşkar edilmişdir. Bakı şəhəri Binəqədi RPİ-in 6-cı PB-in sahə rəisi, polis mayoru X5 tərəfindən Şəxs İnzibati Xətalar Məcəlləsinin 206-cı və 535.1-ci maddələri ilə nəzərdə tutulmuş inzibati xəta törətməsi barədə 11 yanvar 2024-cü il tarixli protokola əsasən inzibati xəta haqqında material baxılması üçün məhkəməyə göndərilmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs İnzibati Xətalar Məcəlləsinin 206-cı maddəsi ilə nəzərdə tutulmuş inzibati xəta törətməkdə özünü təqsirli bilərək, İnzibati Xətalar Məcəlləsinin 535.1-ci maddəsi ilə nəzərdə tutulmuş inzibati xəta törətməkdə isə özünü təqsirli bilməyərək izahatında göstərmişdir ki, xx.xx.2024-cü ildə gecə saat 04 radələrində Füzuli rayonundan gəlmiş qohumu Röyal Qəmbərovla birlikdə kafedən çıxaraq avtomobil ilə Bakı şəhəri Binəqədi rayonu Biləcəri qəsəbəsi M.Hüseynzadə küçəsində dar dalanda hərəkət edərkən qarşılarına polis avtomobili çıxmış, həmin avtomobilə yol vermək üçün idarə etdiyi nəqliyyat vasitəsini arxaya verərkən polis əməkdaşların şübhələnmiş və avtomobildən düşərək onlara tərəf gəlmişlər. Bu zaman Röyal qorxaraq avtomobildən düşüb qaçmışdır. O, isə avtomobildən düşüb polis əməkdaşlarına yaxınlaşmış, heç bir yerə qaçmamışdır. Polislər Röyalı tutmuş və onları birlikdə 6-cı PB-yə gətirmişlər. Narkotik vasitə qəbul etdikləri şübhə doğurduğundan onları tibbi müayinə aparmışlar. Yoxlama zamanı hər ikisindən götürülmüş nümunələrdə narkotik vasitə aşkar edilmişdir. Həmin heroini bir neçə gün əvvəl Binəqədi rayonu ərazisində istehlak etmişdir. Ona görə də özünü narkotik vasitənin qanunsuz istehlakında təqsirli bilir. Polis əməkdaşlarına isə heç bir tabesizlik göstərməmişdir. Bildirdiyi kimi polisləri görüb qaçmamış, avtomobildən düşüb onlara yaxınlaşmış, özünü və onunla birlikdə olub qaçan şəxsin kimliyi ilə bağlı məlumatları təqdim etmiş, polis bölməsinə getmək lazım olduqda isə etiraz etmədən könüllü şəkildə getmişdir. Qeyd olunanlara əsasən İnzibati Xətalar Məcəlləsinin 206-cı maddəsi ilə ona yüngül növdə tənbeh təyin edilməsini, İnzibati Xətalar Məcəlləsinin 535.1-ci maddəsilə isə iş üzrə icraata xitam verilməsini xahiş etmişdir. Şəxs verilmiş suallara cavab olaraq bildirmişdir ki, himayəsində xx.xx.2017-ci il təvəllüdlü anadangəlmə serebral iflic olan oğlu vardır. Arvadı heç yerdə işləmir. Ailəsinə qazanc gətirən yeganə şəxsdir. Hərəkət məhdudiyyəti olan uşağına arvadı ilə növbələşərək baxırlar. Əvvəllər İXM-in 206-cı maddəsilə məsuliyyətə cəlb olunmamışdır. Narkotik vasitələrdən istifadə etməsinin səbəbi həm də uşağın çarəsi olmayan xəstəliyidir. Məhkəmə iclasında inzibati xəta haqqında protokol tərtib etmiş Binəqədi RPİ-in 6-cı PB-in sahə rəisi, polis mayoru X5 protokolu müdafiə edərək izahatında bildirmişdir ki, Şəxs 11 yanvar 2024-cü ildə gecə saat 04 radələrində Bakı şəhəri Binəqədi rayonu Biləcəri qəsəbəsi M.Hüseynzadə küçəsində 6-cı PB-in əməkdaşları Kamal Hüseynovun və Rüfət Əliyevin qanuni tələblərində qəsdən tabe olmamış, 6-cı PB-yə gətirilib daha sonra həkim müayinəsində keçirildikdə sidik nümunəsində AMP (+), MET (+) kimi narkotik vasitə olan heroin aşkar edilmişdir. Qeyd olunanlara əsasən Şəxs İnzibati Xətalar Məcəlləsinin 206-cı və 535.1-ci maddələri ilə nəzərdə tutulmuş inzibati xəta törətməsi barədə 11 yanvar 2024cü il tarixli protokol tərtib etmiş və inzibati xəta haqqında material baxılması üçün məhkəməyə göndərilmişdir. Binəqədi RPİ-in 6-cı PB-in sahə rəisi, polis mayoru X5 verilmiş suallara cavab olaraq bildirmişdir ki, o, 11 yanvar 2024-cü ildə saat 04 radələrində Bakı şəhəri Binəqədi rayonu Biləcəri qəsəbəsi M.Hüseynzadə küçəsində xidmət aparan polis əməkdaşlarının arasında olmamış, protokolu 6-cı PB-in əməkdaşları Kamal Hüseynovun və Rüfət Əliyevin raportu əsasında tərtib etmişdir. Məhkəmə iclasında 6-cı PB-in əməkdaşları Kamal Hüseynov və Rüfət Əliyev iştirak etməmişlər. İş materiallarında olan və məhkəmə iclasında tədqiq edilmiş: Ambulator X1 dair xx.xx.2024-cü il tarixli 121 saylı rəydən görünür ki, ekspress-test üsulu ilə müayinə nəticəsində Şəxs götürülmüş sidik nümunəsində AMP (+), MET (+) aşkar edilmişdir. Şəxs Binəqədi RPİ-in 6-cı PB-yə yazdığı izahatından görünür ki, o, özünü narkotik vasitənin qanunsuz istehlakında təqsirli bilsədə, xx.xx.2024-cü ildə 6-cı PB-in polis əməkdaşlarına isə heç bir tabesizlik göstərmədiyini bildirmişdir. 6-cı PB-in əməkdaşları Kamal Hüseynov və Rüfət Əliyev tərəfindən imzalanmış xx.xx.2024-cü il tarixli Raportdan görünür ki, 11 yanvar 2024-cü ildə Bakı şəhəri Binəqədi rayonu Biləcəri qəsəbəsi M.Hüseynzadə küçəsində 2 nəfər şəxsin şübhəli davranışlarına görə onlara yaxınlaşdıqda həmin şəxslər qaçmağa başlamışlar. Onları saxlayıb 6-cı PB-yə dəvət etsələrdə, onlar 6-cı PB-yə getməkdən imtina edərək tabesizlik göstərmişlər. Onların 6-cı PB-yə gətirilməsi təmin edilmiş, orada yoxlama zamanı onlardan birinin Şəxs olduğu məlum olmuşdur. MN seriyalı № ******* nömrəli 11 yanvar 2024-cü il tarixli protokoldan görünür ki, Bakı şəhəri Binəqədi RPİ-in 6-cı PB-in sahə rəisi X5 tərəfindən Şəxs İnzibati Xətalar Məcəlləsinin 206-cı və 535.1-ci maddələr ilə nəzərdə tutulmuş inzibati xəta törətməsi barədə protokol tərtib edilmişdir. İnzibati xəta haqqında işin aidiyyəti üzrə göndərilməsi barədə xx.xx.2024-cü il tarixli qərardaddan görünür ki, MN seriyalı № ******* nömrəli 11 yanvar 2024-cü il tarixli protokol baxılması üçün Bakı şəhəri Binəqədi Rayon Məhkəməsinə göndərilmişdir. İnzibati Xətalar Məcəlləsinin 206-cı maddəsi ilə bağlı: 2005-ci il 28 iyun tarixli Azərbaycan Respublikasının Qanunu ilə təsdiq edilmiş “Azərbaycan Respublikasının ərazisində dövriyyəsi qadağan edilmiş, məhdudlaşdırılmış və nəzarət edilən narkotik vasitələrin, psixotrop maddələrin, habelə Azərbaycan Respublikasının ərazisində idxalına, ixracına, tranzit nəql edilməsinə və istehsalına lisenziya (xüsusi razılıq) tələb olunan prekursorların Siyahı”sına əsasən AMP (+) MET (+) (heroin tərkibli) Azərbaycan Respublikasının ərazisində dövriyyəsi qadağan edilmiş narkotik vasitədir. Azərbaycan Respublikası İXM-in 206-cı maddəsinə görə qanunsuz olaraq narkotik vasitələrin, psixotrop maddələrin istehlakına, satış məqsədi olmadan şəxsi istehlak miqdarında hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə edilir, işin hallarına görə və xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə iki ayadək müddətə inzibati həbs tətbiq edilir. Barəsində inzibati xəta haqqında iş üzrə icraat aparılan şəxs Şəxs İnzibati Xətalar Məcəlləsinin 206-cı maddəsi ilə nəzərdə tutulmuş inzibati xəta törətməsi özünün həmin hissədə etirafı ilə yanaşı Ambulator X1 dair xx.xx.2024-cü il tarixli 121 saylı rəyi ilə təsdiq olunur. Belə ki, həmin rəyə əsasən ekspress-test üsulu ilə müayinə nəticəsində ondan götürülmüş sidik nümunəsində AMP (+) MET (+) aşkar edilmişdir. Onun həmin hərəkətlərinə münasibətdə əməlin inzibati xəta olmasını aradan qaldıran hallar, həmçinin inzibati məsuliyyətindən azad edilməsi üçün əsaslar yoxdur. Odur ki, təqsiri tam sübuta yetirildiyinə görə İnzibati Xətalar Məcəlləsinin 206-cı maddəsi ilə inzibati məsuliyyətinə cəlb edilməli və tənbeh edilməlidir. İnzibati Xətalar Məcəlləsinin 535.1-ci maddəsi ilə bağlı: Şəxs İnzibati Xətalar Məcəlləsinin 535.1-ci maddəsində nəzərdə tutulan inzibati xəta əməlində özünü təqsirli bilmir, polis əməkdaşlarına tabesizlik göstərmədiyini bildirir. Onun bu barədə bildirdiklərinin təkzib edilməsi üçün məhkəməyə heç bir sübut təqdim edilməmişdir. Sahə rəisi polis mayoru Asim Salahov verilmiş suallara cavab olaraq bildirmişdir ki, o, 11 yanvar 2024-cü ildə gecə saat 04 radələrində Bakı şəhəri Binəqədi rayonu Biləcəri qəsəbəsi M.Hüseynzadə küçəsində xidmət aparmış polis əməkdaşlarının arasında olmamış, protokolu 6-cı PB-in əməliyyatçıları Kamal Hüseynovun və Rüfət Əliyevin raportu əsasında tərtib etmişdir. Belə olan halda aydın olur ki, sahə rəisi A.Salahovun hadisə ilə bağlı bildirdikləri özünün gördükləri deyil, raport əsasında dedikləridir. Raport tərtib etmiş 6-cı PB-in əməkdaşları Kamal Hüseynov və Rüfət Əliyev isə dəvət edilmələrinə baxmayaraq məhkəmə iclasına gəlməmişlər. Məhkəmə qeyd edir ki, Şəxs tərəfindən Azərbaycan Respublikası İXM-in 535.1-ci maddəsində nəzərdə tutulmuş inzibati xəta törədilməsi kifayətedici aydınlıqla sübuta yetirilmir. Azərbaycan Respublikası İXM-in 8-ci maddəsinə görə barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Məhkəmə barəsində inzibati xəta haqqında protokol tərtib edilmiş şəxs Şəxs istinad edilən Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulan inzibati xəta əməlinə inzibati xətalar qanunvericiliyin sübutlar və sübutetmə ilə bağlı müddəaları baxımından yanaşaraq hesab edir ki, məhkəmə baxışı zamanı onun tərəfindən polisin qanunu tələbinə qəsdən tabesizlik göstərilməsi sübuta yetirilməmişdir. Azərbaycan Respublikası İXM-in 53.1.1-ci maddəsinə əsasən inzibati xəta hadisəsi olmadıqda inzibati xəta haqqında başlanılmış icraata xitam verilir. Həmin Məcəllənin 105.1-ci maddəsinə əsasən İnzibati Xətalar Məcəlləsinin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs)inzibati xəta haqqında işin icraatına xitam verilməsi haqqında qərar qəbul edir. İşin təsvir edilmiş hallarını və onlara tətbiq ediləcək hüquq normalarının tələblərini nəzərə alaraq məhkəmə hesab edir ki, Şəxs barəsində Azərbaycan Respublikası İXM-in 535.1-ci maddəsilə başlanılmış icraata xitam verilməli, o, İnzibati Xətalar Məcəlləsinin 206cı maddəsi ilə inzibati məsuliyyətinə cəlb edilməklə tənbeh edilməlidir. Məhkəmə Şəxs İnzibati Xətalar Məcəlləsinin 206-cı maddəsi ilə inzibati tənbeh təyin etmək məsələsini həll edərkən qanunun aşağıdakı prinsip və müddəalarını rəhbər tutur. Azərbaycan Respublikası İXM-in 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. Həmin Məcəllənin 32.2-ci maddəsinə əsasən inzibati tənbeh tətbiq edilərkən xətanın xarakteri, inzibati xəta törədən səxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İşə əlavə edilmiş AZ-İV seriyalı № 148251 nömrəli doğum haqqında şəhadətnamənin surətindən görünür ki, Şəxs xx.xx.2017-ci il təvəllüdlü Məhərrəm adlı oğlu var. İşə əlavə edilmiş Əlillik haqqında arayışdan görünür ki, xx.xx.2017-ci il təvəllüdlü Məhərrəm serabral iflic xəstəsidir, ona müddətsiz birinci dərəcəli əlillik verilmişdir. Məhkəmə Şəxs ilk dəfə inzibati məsuliyyətə cəlb edilməsini, səmimi etirafını, öz əməlinə mənfi münasibətini, himayəsində birinci dərəcəli əlil uşağı olmasını onun məsuliyyətini yüngülləşdirən hallar kimi müəyyən edir. Məhkəmə Şəxs məsuliyyətini ağırlaşdıran hal müəyyən etmir. Məhkəmə qeyd edilən məsuliyyəti yüngülləşdirici halları nəzərə alaraq hesab edir ki, Şəxs cərimə növündə tənbeh təyin etməklə tənbehin məqsədlərinə nail olmaq olar. Azərbaycan Respublikası İXM-in 114.1-ci və 114.1.1-ci maddələrinə əsasən inzibati xəta haqqında işə baxılarkən aşağıdakı məsələlər barəsində qərar çıxarılır: ..inzibati tənbeh vermə haqqında... Şərh olunanlara əsasən və Azərbaycan Respublikası İnzibati Xətalar Məcəlləsinin 114-cü maddəsini rəhbər tutaraq, QƏRARA ALDİ: Şəxs Azərbaycan Respublikası İnzibati Xətalar Məcəlləsinin 206-cı maddəsi ilə təqsirli bilinib 300 (üç yüz) manat cərimə edilsin. Şəxs barəsində Azərbaycan Respublikası İXM-in 535.1-ci maddəsilə başlanılmış icraata inzibati xəta hadisəsi olmadığından xitam verilsin. Qərarın surəti rəsmi qaydada təqdim edildiyi gündən 10 ( on) gün müddətində Bakı Apelyasiya Məhkəməsinə şikayət verilə bilər. Sədrlik edən Elçin Ağayev