Bakı Şəhəri Binəqədi Rayon Məhkəməsi Qərardad — İş №3(001)-896/2025

Azərbaycan Respublikası adından QƏRARDAD Bakı şəhəri İş № 3(001)-896/2025 17.02.2025 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Sadıqova Aynurə Vahid qızı, Şəxs barəsində Azərbaycan Respublikasının İnzibati Xətalar Məcəlləsinin (bundan sonra - İXM) 511.1.2-ci maddəsi ilə tərtib edilmiş inzibati xəta haqqında protokol əsasında toplanmış materialın baxılmağa hazırlanması zamanı, müəyyən etdim: Məhkəmənin icraatına Bakı şəhəri Binəqədi RPİ DYPŞ tərəfindən Şəxs barəsində İXM-in 511.1.2-ci maddəsi ilə tərtib edilmiş 17 fevral 2025-ci il tarixli, İXP ******* nömrəli inzibati xəta haqqında protokol əsasında toplanmış material daxil olmuşdur. İnzibati xəta haqqında işin materiallarını araşdıraraq hesab edirəm ki, Bakı şəhəri Binəqədi RPİ DYPŞ tərəfindən Şəxs barəsində İXM-in 511.1.2-ci maddəsi ilə tərtib edilmiş 17 fevral 2025-ci il tarixli, İXP ******* nömrəli inzibati xəta haqqında protokol və ona əlavə edilmiş materiallar aidiyyat qaydalarına əsasən baxılmalı olduğu məhkəməyə verilməmişdir. Belə ki, inzibati xəta haqqında protokol və ona əlavə edilmiş sənədləri araşdırarkən müəyyən olunmuşdur ki, barəsində inzibati xəta haqqında protokol tərtib olunmuş şəxs Şəxs idarə etdiyi nəqliyyat vasitəsinin mexaniki nəqliyyat vasitəsi olub-olmaması inzibati xəta haqqında protokolu tərtib etmiş orqan tərəfindən müəyyən edilməmişdir. İXM-nin 511.1.2-ci maddəsinə əsasən, mexaniki nəqliyyat vasitəsinin bir və ya daha çox təkərinin yolun səthindən qaldırmaqla idarə edilməsinə görə nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə edilir və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla, on beş gündən bir ayadək müddətə inzibati həbs tətbiq olunur. Maddənin mənasından da göründüyü kimi İXM-nin 511.1.2-ci maddəsinin tərkibi inzibati xəta yalnız mexaniki nəqliyyat vasitəsi ilə törədildikdə yaranır. Odur ki, məhkəməyə təqdim olunmuş iş materialları ilə barəsində inzibati xəta haqqında protokol tərtib olunmuş şəxs Şəxs idarə etdiyi mopedin mexaniki nəqliyyat vasitəsi olmasını müəyyən etmək mümkün olmur. İXM-in 106.0.3-cü maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən inzibati xəta haqqında protokol və işin digər materialları bu Məcəllənin tələblərinə müvafiq olaraq tərtib edilməsi məsələsini həll edir. İXM-in 106.0.5-ci maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən mahiyyəti üzrə baxılması üçün işdə kifayət qədər sübutların toplanması məsələsini həll edir. Bununla da, inzibati xəta haqqında işin baxılmağa hazırlanması zamanı şəxs barəsində tərtib olunan inzibati xəta haqqında protokolun İXM-in tələblərinə uyğun tərtib olunmaması müəyyən edilmişdir ki, bu da işin mahiyyəti üzrə baxılmasına mane olur. İXM-in 109.1.6-cı maddəsinə əsasən protokol və ya digər materiallar səlahiyyəti olmayan şəxslər tərəfindən tərtib olunduqda, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokollar və ya digər sənədlərin onu tərtib etmiş orqana, vəzifəli şəxsə geri qaytarılır. Yuxarıda göstərilənlərə əsasən və İXM-in 106, 109, 110.1-ci maddələrini rəhbər tutaraq, qərara aldım: Şəxs barəsində Azərbaycan Respublikasının İnzibati Xətalar Məcəlləsinin 511.1.2ci maddəsi ilə Bakı şəhəri Binəqədi Rayon Polis İdarəsi DYPŞ tərəfindən tərtib olunmuş inzibati xəta haqqında protokol və onun əsasında toplanmış materiallar geri qaytarılsın. Hakim: Aynurə Sadıqova