Bakı Şəhəri Binəqədi Rayon Məhkəməsi Qərar — İş №3(001)-9419/2025

Azərbaycan Respublikası adından QƏRAR Bakı şəhəri İş № 3(001)-9419/2025 21.01.2026 BAKI ŞƏHƏRİ BİNƏQƏDİ RAYON MƏHKƏMƏSİ Hakim Nəsibov Samir Nadir oğlunun sədrliyi, Kazımov Bəxtiyar Fərhad oğlunun katibliyi, Şikayət vermiş şəxs X1 iştirakı ilə X1 Azərbaycan Respublikası Daxili İşlər Nazirliyi Bakı Şəhər X5 İdarəsi tərəfindən qəbul edilmiş 17 sentyabr 2025-ci il tarixli, TP ******* nömrəli inzibati tənbeh vermə haqqında qərardan şikayətinə açıq məhkəmə iclasında baxaraq, M Ü Ə Y Y Ə N E T D İ: X2 şikayət ərizəsi ilə məhkəməyə müraciət edərək, Bakı Şəhər X5 İdarəsi tərəfindən qəbul edilmiş 17 sentyabr 2025-ci il tarixli, TP ******* nömrəli inzibati tənbeh vermə haqqında qərarın ləğv edilməsini və inzibati xəta haqqında iş üzrə icraata xitam verilməsini xahiş etmişdir. X2 şikayəti onunla əsaslandırmışdır ki, o, xx.xx.2025-ci il tarixində saat təxminən 08:10 radələrində idarə etdiyi Changan markalı, ** SX *** nömrəli avtomobili ilə Nəsimi rayonu, 4-cü mkr. dairəsindən Memar Əcəmi metrosu istiqamətində dairədə hərəkətdə olduğu zaman Mazda markalı ** UJ ***7 nömrəli avtomobil onun nəqliyyat vasitəsini arxadan vurmuşdur. Hadisə ilə bağlı 102-yə zəng etmişdir. Sonradan tıxac yaranmasın deyə avtomobilləri Cavadxan küçəsi Memar Əcəmi metrostansiyası istiqamətində sağ kənara çəkərək polisin gəlməsini gözləmişlər. Təxminən 1 saat sonra polis əməkdaşı gəlmişdir. Avtomobilinə dəyən zərərin yüngül olmasını görüb, “buna görə məni bura çağırmısız” deyərək qəzəblənmişdir. Polis əməkdaşı hadisənin necə baş verməsini soruşmuş, o, da dairədə dövr etdiyini və hadisə vaxtının arxadan vurulma fotosunu göstərmişdir. Polis fotonu görərkən, “elə bilirsən səndə günah yoxdur?! Gələrsən sənə cərimə yazaram ağlın başına gələr” deyərək onu təhdid etmişdir. Polis əməkdaşı sabah səhər Bakı şəhər Yol Polisi İdarəsinə 10-cu otağa gəlmələrini bildirmişdir. xx.xx.2025-ci il tarixdə 10-cu otağa getmiş, orada fotonu təkrar göstərmişdir ki o, artıq dairədə hərəkətdədir, digər maşın isə onun maşınını arxadan vurub. Şəkildən aydın görsənsə də, polis ona əhəmiyyət verməyərək arxa deyil yan hissə olduğunu söyləmişdir. Mazda markalı avtomobilin videoqeydiyyatını rəhbər tutaraq o, Mazdanın qarşısından sola dairədə dönür deyə onu təqsirli bildi. O, nə qədər izah etməyə çalışmışdır ki, dairədədir, dairəvi hərəkətdə digər avtomobil onun arxasına düşür, yolun axını belə tələb edir, videoqeydiyyatda elə təəssürat yaranır ki, sanki o, digər avtomobilin qarşısına manevr edir. Həmin videonun hadisə anından bir neçə saniyə əvvəl görüntüsü olmadığı üçün o, həmin videonu məqbul saymır. Çəkdiyi fotoda onun avtomobilinin arxadan vurulduğu aydın görünür. Eyni zamanda yolda heç bir xətlənmə işarəsi yoxdur və həmin yolda dairədə dönmək üçün eyni hüquqa malikdirlər. Polisdən digər maşının videoqeydiyyatçısının yox, Təhlükəsiz Şəhər kamerası görüntüsünü istəmişdir. “Biz baxmışıq və bilirik” deyərək, görüntülər ona təqdim edilməmişdir. Eyni zamanda adını bilmədiyi mülki geyimli polis işçisi hadisə sxemi çəkilməli olan sənədə hadisə sxemi çəkilmədən boş vəziyyətdə imza çəkməyini tələb etmişdir. O, güman edir ki, həmin sxemdə saxtakarlıq edərək, digər avtomobilin onun avtomobilinin arxasından deyil, sol hissəsindən vurması ilə bağlı qəza sxemi tərtib edilmişdir. Sonda ona cərimə tətbiq edilmişdir. O, həmin cərimədən şikayət etmişdir. xx.xx.2025-cı il tarixdə polis mayoru Lətif Həsənpv zəng edərək, xx.xx.2025-ci il tairxdə Şəhər Yol Polisi İdarəsini gəlməyini istəmişdir. O, getmiş və hadisə barədə yenidən izahat yazmış, TŞ kamerasının görüntülərini göstərmələrini xahiş etmişdir. X3 Seymur Allahverdiyevi çağıraraq ona TŞ görüntülərini göstərməsini tapşırmışdır. Sonradan adını bildiyi Seymur Allahverdiyev ilk dəfə qəza yerinə gələr polis nəfəridir. Onlar kamera otağına getmişlər, təəssüf ki, bir ay müddət keçdiyindən kamera görüntüsü yaddaşdan silinmişdir. xx.xx.2025-ci il tarixdə cavab məktubu email vasitəsilə ona göndərilmiş və qərar dəyişməmişdir. Məhkəmə iclasında iştirak edən şikayət vermiş şəxs X2 ərizədə göstərilənləri nəzərə alaraq şikayətin təmin edilməsini və iş üzrə icraata xitam verilməsini xahiş etmişdir. Məhkəmə iclasının vaxtı və yeri barədə lazımi qaydada məlumat verilməsinə baxmayaraq Bakı Şəhər X5 İdarəsinin nümayəndəsi məhkəmə iclasına gəlməmişdir. Məhkəmə Bakı Şəhər X5 İdarəsinin nümayəndəsinin iştirakı olmadan məhkəmə iclasının keçirilməsini mümkün hesab etmişdir. Məhkəmə şikayət vermiş şəxsin izahatını dinləyib, şikayət ərizəsini və iş materiallarını araşdıraraq hesab edir ki, şikayət qismən təmin edilməlidir. İş materiallarında olan Bakı Şəhər X5 İdarəsi tərəfindən qəbul edilmiş 17 sentyabr 2025-ci il tarixli, TP ******* nömrəli inzibati tənbeh vermə haqqında qərardan görünür ki, X2 İXM-nin 327.1-ci maddəsində nəzərdə tutulan inzibati xətanı törətdiyi üçün 40 manat məbləğində cərimə edilmişdir. Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətanıın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir; 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir; 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir; 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir; 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir; 81.2-ci maddəsinə əsasən yol hərəkəti qaydaları və yol hərəkəti təhlükəsizliyinin təmin edilməsi qaydaları əleyhinə olan inzibati xətaların aşkarlanmasında istifadə olunan, foto və ya video qeydiyyat funksiyalarına malik xüsusi texniki vasitələr müvafiq icra hakimiyyəti orqanının mərkəzi informasiya sisteminə inteqrasiya olunmalıdır; 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir; 327.1-ci maddəsinə əsasən yol nişanlarının və ya yolların hərəkət hissəsinin işarələrinin tələblərinə riayət edilməməsinə, yaxud nəqliyyat vasitəsinin yolların hərəkət hissələrində yerləşdirilməsi, yaxud araməsafəsi, yedəyə alma, yük daşıma, sürmə təlimi keçmə, yaşayış zonasında hərəkət etmə, əks istiqamətli hərəkət zolağına çıxmadan ötmə və ya manevr etmə qaydalarının pozulmasına, səkilərlə və “Yol hərəkəti haqqında” Azərbaycan Respublikasının Qanunu ilə nəzərdə tutulmamış hallarda yolun çiyni ilə hərəkət edilməsinə, nəqliyyat vasitələrindən bayıra hər hansı əşyanın atılmasına görə qırx manat məbləğində cərimə edilir. Yuxarıda sadalanan normalarının tələblərindən görünür ki, şəxsin inzibati məsuliyyətə cəlb edilməsi üçün sübutların məcmusu tələb olunur və heç bir sübutun, o cümlədən sübutlardan biri olan inzibati tənbeh vermə haqqında protokolun və qərarın qabaqcadan müəyyən edilmiş qüvvəsi yoxdur. Şikayət ərizəsində X2 yol hərəkəti qaydasını pozmadığını bildirmişdir. Həmçinin, məhkəmənin inzibati xəta hadisəsinin videogörüntülərinin məhkəməyə təqdim olunmasına dair Azərbaycan Respublikası Daxili İşlər Nazirliyi Bakı Şəhər X5 İdarəsinə ünvanlanmış sorğuya cavab verilməmişdir. İnzibati məsuliyyətə cəlb olunmuş şəxs öz təqsirsizliyini sübut etməyə borclu olmadığından, onun təqsirli olması barəsində olan şübhələr onun xeyrinə həll olunduğundan, inzibati orqan xətanı təsdiq edən sübutları məhkəməyə təqdim etmədiyindən, 17 sentyabr 2025-ci il tarixli, TP ******* nömrəli qərarın ləğv edilməsinə dair şikayət əsaslıdır. Beləliklə məhkəmə hesab edir ki, X2 barəsində olan 17 sentyabr 2025-ci il tarixli, TP ******* nömrəli qərarda onun İnzibati Xətalar Məcəlləsinin 327.1-ci maddəsində nəzərdə tutulan inzibati xətanı törətməsi aydınlaşdırılmamış, qərar qəbul edilərkən səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki hallar araşdırılmamış və inzibati tənbeh vermə haqqında qanunvericiliyin tələbləri inzibati tənbeh vermə haqqında işin hallarının hərtərəfli, tam və obyektiv araşdırılmasına maneə törədəcək dərəcədə pozulmuşdur. İnzibati Xətalar Məcəlləsinin 135.1.6-cı maddəsinə görə bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Həmin Məcəllənin 134.1.4-cü maddəsinə görə inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilə bilər. Göstərilənləri nəzərə alaraq məhkəmə hesab edir ki, şikayət qismən təmin edilməli, Bakı Şəhər X5 İdarəsi tərəfindən qəbul edilmiş 17 sentyabr 2025-ci il tarixli, TP ******* nömrəli inzibati tənbeh vermə haqqında qərar ləğv edilməli və iş yenidən baxılması üçün həmin quruma göndərilməlidir. Qeyd olunanlara əsasən və İXM-in 128-130-cu və 133-135-ci maddələrini rəhbər tutaraq, məhkəmə Q Ə R A R A A L D İ: X1 şikayəti qismən təmin edilsin. Azərbaycan Respublikası Daxili İşlər Nazirliyi Bakı Şəhər X5 İdarəsi tərəfindən qəbul edilmiş 17 sentyabr 2025-ci il tarixli, TP ******* nömrəli inzibati tənbeh vermə haqqında qərar ləğv edilsin və iş yenidən baxılması üçün həmin quruma göndərilsin. Qərardan onun surəti rəsmi qaydada verildiyi vaxtdan 10 (on) gün müddətinə qərarı qəbul etmiş hakim vasitəsilə və ya birbaşa Bakı Apellyasiya Məhkəməsinə şikayət verilə bilər. Sədrlik edən Samir Nəsibov