Bakı şəhəri Qaradağ Rayon Məhkəməsi Qərar — İş №3(002)-1208/2023

Azərbaycan Respublikası adından QƏRAR Bakı şəhəri İş № 3(002)-1208/2023 10.07.2023 BAKI ŞƏHƏRİ QARADAĞ RAYON MƏHKƏMƏSİ Hakim Mürsəlov Rufan Kamil oğlunun sədrliyi, Mustafayeva Sevda Bahaddin qızının katibliyi, Azərbaycan Respublikası Qida Təhlükəsizliyi Agentliyi Bakı regional Bölməsinin etibarnamə üzrə nümayəndəsi X1 iştirakı ilə, "xxxx" Məhdud Məsuliyyətli Cəmiyyəti barəsində Azərbaycan Respublikasının Qida Təhlükəsizliyi Agentliyi Bakı Regional Bölməsi tərəfindən İnzibati Xətalar Məcəlləsinin 447.0.4-cü maddəsi ilə daxil olmuş inzibati xəta haqqında materiala məhkəmənin binasında açıq məhkəmə iclasında baxaraq, məhkəmə MÜƏYYƏN ETDİ: "xxxx" MMC barəsində Azərbaycan Respublikasının Qida Təhlükəsizliyi Agentliyi Bakı Regional Bölməsi tərəfindən İnzibati Xətalar Məcəlləsinin 447.0.4-cü maddəsi ilə inzibati xəta haqqında protokol və ona əlavə edilmiş sənədlər baxılması üçün Qaradağ Rayon Məhkəməsinə göndərilmişdir. İş materiallarında olan 07 iyun 2023-cü il tarixli, MN ******* nömrəli inzibati xəta haqqında protokoldan və ona əlavə edilmiş materiallarından aydın olur ki, "xxxx" MMC, İD ********** nömrəli müraciət əsasında ölkəyə idxal olunmuş xurma məhsullarını sertifikat olmadan ünvan 1 ünvanında 07 mart 2023-cü il tarixdə satmışdır. Məhkəmə iclasında iştirak edən Azərbaycan Respublikası Qida Təhlükəsizliyi Agentliyi Bakı Regional Bölməsinin “İdxal və ixraca nəzarət sektoru”nun məsləhətçisi və həmin qurumun etibarnamə üzrə nümayəndəsi X2 öz izahatında tərtib edilmiş protokolu müdafiə edərək göstərmişdir ki, "xxxx" MMC tərəfindən Azərbaycan Respublikası Qida Təhlükəsizliyi Agentliyinə yeyinti məhsullarına qida təhlükəsizliyi sertifikatı verilməsi üçün müracət edilmiş, həmin (İD ********** nömrəli) müraciətdə 4200 karton qutuda xurma məhsullarının İran İslam Respublikasının Ərdəbil şəhərindən ölkəyə idxal ediləcəyi göstərilmişdir. Mallar ölkəyə daxil olduqdan sonra məhsul nümunəsi yoxlanılması üçün labarotoriyaya verilmişdir. Azərbaycan Qida Təhlükəsizliyi İnstitutu Milli Referans Labarotoriyasından verilmiş 10 aprel 2023-cü il tarixli sınaq nəticələrinə əsasən sözügedən xurma məhsulunda kif və maya göbələkləri aşkarlanmışdır. Nəticədə AQTA-nın Bakı Regional Bölməsi tərəfindən 11 aprel 2023-cü il tarixli, “təhlükəli malların (məhsulların) gömrük ərazisinin hüdudlarından kənara çıxarılması və ya məhv edilməsi barədə” Qərar qəbul edilmişdir. Qərarın nəticə hissəsinə əsasən "xxxx" MMC-nin 07 mart 2023-cü il tarixliŞ İD ********** nömrəli müraciəti əsasında idxal olunmuş 15 avqust 2022-ci il istehsal tarixli, 15 avqust 2024-cü il son istifadə tarixli “X4” şirkətinin istehsalı olan ümumi çəkisi 25050 kiloqram olan xurma məhsulu partiyası qərarın hüquqi qüvvəyə mindiyi gündən 10 gün ərzində Agentliyin əməkdaşlarının iştirakı ilə Azərbaycan Respublikası Gömrük ərazisinin hüdudlarından kənara çıxarılmasının təmin edilməsi, bu icra edilmədiyi halda isə məhsul partiyasının Agentliyin əməkdaşlarının iştirakı ilə 10 gün ərzində məhv edilməsi qərara alınmışdır. Qərarın surəti 11 aprel 2023-cü il tarixdə bildirişlə birgə "xxxx" MMC-yə göndərilmişdir. Bundan sonra MMC tərəfindən təkrar nümunələrin götürülməsi üçün AQTA-nın Bakı Regional Bölməsinə müraciət edilmişdir. AQTA-nın Bakı Regional Bölməsi tərəfindən MMC-yə ünvanlanmış 25 may 2023-cü il tarixli məktubda "xxxx" MMCnin ölkəyə idxal etdiyi məhsul partiyası barədə məlumatların 30 may 2023-cü il tarixinədək Agentliyin Bakı regional Bölməsinə təqdim etmələri xahiş olunmuş, əks halda məhsulların sertifikatsız satışı kimi qiymətləndiriləcəyi bildirilmişdir. Lakin "xxxx" MMC tərəfindən sözügedən bildirişə də müvafiq cavab verilmədiyindən MMC-cə 30 may 2023-cü il tarixdə “İnzibati xəta haqqında iş üzrə icraata başlanması haqqında” bildiriş ünvanlanmış, həmin bildirişdə də MMC-nin səlahiyyətli nümayəndəsinin 07 iyun 2023-cü il, saat 11:30-da AQTA-nın Bakı regional Bölməsinə gəlməsi bildirilmiş, əks təqdirdə MMC-nin iştirakı olamdan İXM-nin 99.4-cü maddəsinə əsasən inzibati xəta haqqında iş üzrə icraata başlanılacağı bildirilmişdir. Lakin bu bildirişə də "xxxx" MMC tərəfindən cavab verilməmişdir. Nəticədə "xxxx" MMC barəsində MN ******* saylı, 07 iyun 2023-cü il tarixli inzibati xəta haqqında protokol tərtib edilərək baxılması üçün Qaradağ rayon Məhkəməsinə göndərilmişdir. O öz izahatında daha sonra göstərmişdir ki, bundan əvvəl də "xxxx" MMC tərəfindən oxşar inzibati pozuntulara yol verildiyindən İXM-nin 447.0.4-cü maddəsi ilə təqsirli bilinərək cərimə edilmişdir. Odur ki, bütün bunların nəzərə alınaraq "xxxx" MMC barəsində inzibati tənbeh tədbirinin tətbiq edilməsini xahiş etmişdir. Məhkəmə iclasının vaxtı və yeri barədə "xxxx" MMC-yə rəsmi qaydada təkrarən məlumat verilsə də, qeyd olunan təşkilatlardan nümayəndə məhkəmə iclasına gəlməmiş və bunun səbəbləri barədə də məhkəməyə heç bir məlumat daxil olmamışdır. Məhkəmə, işə nümayəndənin iştirakı olmadan baxılmasını mümkün hesab etmişdir. Məhkəmə iş materiallarını araşdırıb hesab edir ki, "xxxx" MMC tərəfindən Azərbaycan Respublikası İnzibati Xətalar Məcəlləsinin 447.0.4 maddəsində nəzərdə tutulmuş inzibati xətanın törədilməsi Azərbaycan Respublikasının Qida Təhlükəsizliyi Agentliyi Bakı Regional Bölməsi tərəfindən tərtib edilmiş inzibati xəta haqqında protokol və işin digər materialları ilə tam sübuta yetirilir. Belə ki, iş materiallarında olan 25 may 2023-cü il tarixli, 3-44-1/2-5223/23 nömrəli AQTA-nın Bakı Regional Bölməsi tərəfindən "xxxx" MMC-yə ünvanlanmış məktubda ölkəyə idxal olunmuş qida məhsulları partiyası (satılması, istehsalçıya geri göndərilməsi və ya anbarda saxlanması) barədə məlumatların 30 may 2023-cü il tarixədək təqdim edilməli olduğu, qeyd olunan müddət ərzində məlumat verilmədiyi təqdirdə isə məhsulların sertifikatsız satışı kimi qiymətləndiriləcəyi və MMC barəsində inzibati xəta haqqında iş üzrə icraata başlanılacağı qeyd edilmişdir. Bundan başqa iş materiallarında olan 30 may 2023-cü il tarixli, 3-44-1/2-5438/23 nömrəli, “İnzibati xəta haqqında iş üzrə icraata başlanması” haqqında bildirişdə də "xxxx" MMC-nin nümayəndəsinin 07 iyun 2023-cü il tarixdə, saat 11:30-da AQTA-nın Bakı Regional Bölməsinə gəlməyinin zəruri olduğu, əks təqdirdə İXM-nin 99.4-cü maddəsinə əsasən inzibati xəta haqqında iş üzrə icraata başlanılacağı qeyd edilmişdir. Məhkəmə araşdırması zamanı müəyyən edilmişdir ki, "xxxx" MMC, AQTA-nın Bakı Regional Bölməsi tərəfindən onlara ünvanlanmış müraciətlərə cavab verməmiş, həmçinin İran İslam Respublikasından invoys tarixi 06 mart 2023-cü il, invoys nömrəsi 1401/558 olan, **********089 nörməli mənşə sertifikatı ilə və 09 yanvar 2023-cü il tarixli müqavilə ilə göndərilən, brutto çəkisi 25050 kq, netto çəkisi 23500 kq olan xurma yükü İD ********** nömrəli icazə sənədi əsasında "xxxx" MMC tərəfindən gömrük bəyannaməsi ilə rəsmiləşdirilərək ölkəyə idxal olunmuş və 07 mart 2023-cü il tarixdə hüquqi şəxsin ünvanında satılmışdır. Azərbaycan Respublikası İnzibati Xətalar Məcəlləsinin 447.0.4-cü maddəsində göstərilir ki, qanunvericiliyə əsasən məcburi sertifikatlaşdırılmalı olan, lakin sertifikatlaşdırılmamış malların istehsalına, satılmasına, işlərin yerinə yetirilməsinə, xidmətlərin göstərilməsinə görə fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilir. Həmin Məcəllənin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 21-ci maddəsinin tələbinə görə inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 31.3-cü maddəsinin tələbinə əsasən hüquqi şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta nəticəsində hüquqi şəxsin əldə etdiyi xeyrin həcmi və ya onun maraqlarının təmin edilməsinin xarakteri və dərəcəsi, hüquqi şəxsi xarakterizə edən hallar, o cümlədən onun maliyyə və əmlak vəziyyəti, xeyriyyəçilik və ya digər ictimai faydalı fəaliyyətlə məşğul olması, habelə məsuliyyəti yüngülləşdirən və ağırlaşdıran hallar nəzərə alınır. Beləliklə, məhkəmə "xxxx" MMC-nin törətdiyi inzibati xətanın xarakterini və əvvəllər də eyni pozuntuya görə inzibati məsuliyyətə cəlb edilmələrini nəzərə alaraq hesab edir ki, "xxxx" MMC barəsində hüquqi şəxs qismində İnzibati Xətalar Məcəlləsinin 447.0.4-cü maddəsinin sanksiyasında nəzərdə tutulmuş həddə cərimə növündə tənbeh tədbiri tətbiq edilməlidir. Göstərilənlərə əsasən və Azərbaycan Respublikası İnzibati Xətalar Məcəlləsinin 43, 49-51, 114-115, 117, 129 və 130-cu maddələrini rəhbər tutaraq məhkəmə QƏRARA ALDİ: "xxxx" MMC (VÖEN:**********) Azərbaycan Respublikası İnzibati Xətalar Məcəlləsinin 447.0.4-cü maddəsində nəzərdə tutulmuş inzibati xətanı törətməkdə təqsirli bilinməklə 4000 (dörd min) manat məbləğində inzibati cərimə edilsin. Qərarın surəti təqdim edildiyi və ya alındığı gündən 10 (on) gün müddətində Bakı Apellyasiya Məhkəməsinə şikayət verilə bilər. Hakim: Rufan Mürsəlov