Bakı şəhəri Qaradağ Rayon Məhkəməsi Qərar — İş №3(002)-206/2022

Azərbaycan Respublikası adından QƏRAR Bakı şəhəri İş № 3(002)-206/2022 09.02.2022 BAKI ŞƏHƏRİ QARADAĞ RAYON MƏHKƏMƏSİ Hakim Mürsəlov Rufan Kamil oğlunun sədrliyi, Mustafayeva Sevda Bahaddin qızının katibliyi, Qaradağ rayon icra şöbəsinin icra məmuru, İ dərəcəli ədliyyə qulluqçusu X6, Barəsində inzibati xəta haqqında iş üzrə icraat aparılan şəxs Şəxs iştirakları ilə, 17 avqust 1986-cı ildə Bakı şəhərində doğulmuş, Azərbaycan Respublikasının vətəndaşı, ünvan 1 ünvanında qeydiyyatda olan Şəxs Azərbaycan Respublikası İXM-nin 528.1-ci maddəsi ilə təqsirləndirilməsinə dair inzibati materiala məhkəmənin binasında, açıq məhkəmə iclasında baxaraq, məhkəmə MÜƏYYƏN ETDİ: Şəxs Qaradağ rayon Məhkəməsinin 2(002)-2650/2018 saylı, 07 noyabr 2018-ci il tarixli icra vərəqəsini üzrlü səbəb olmadan icra etmədiyinə görə barəsində Azərbaycan Respublikası İXM-nin 528.1-ci maddəsi ilə tərtib edilmiş inzibatı material baxılması üçün məhkəməyə daxil olmuşdur. Məhkəmə iclasında iştirak edən Qaradağ rayon icra şöbəsinin icra məmuru X11 protokolu müdafiə edərək bildirmişdir ki, Bakı Şəhəri Qaradağ Rayon Məhkəməsinin 2(002)-2650/2018 saylı, 07 noyabr 2018-ci il tarixli icra vərəqəsinə əsasən 24 sentyabr 2008-ci il təvəllüdlü X5, 21 aprel 2010-cu il təvəllüdlü X3 və 22 noyabr 2013-cü il təvəllüdlü X4 yetkinlik yaşına çatanadək saxlanılmaları üçün 20 iyun 2018-ci il tarixdən başlayaraq X1 X2 xeyrinə hər ay hər uşağa görə 154 manat, cəmi 462 sabit pul məbləğində aliment və 24 sentyabr 2008-ci il təvəllüdlü X5 müalicəsi üçün 50 manat əlavə xərc tutulması qət edilmişdir. İcra sənədi icraata daxil olduqdan sonra qanunvericilikdə nəzərdə tutulmuş qaydada icraata başlamaq haqqında qərar qəbul olunaraq tələbin könüllü icrasına dair bildirişlə birgə borcluya göndərilmişdir. 2019-cu ilin dekabrından 2020-ci ilin aprelinə qədər hər ay 325 manat, 2021-ci ilin may ayından 2022ci ilin yanvarına qədər isə hər ay 285 manat aliment borcundan tutulmuşdur. İndiyədək borcundan 10946 manat 70 qəpik aliment borcu ödəmiş, 11060 manat məbləğdə isə aliment borcu ödənilmədən qalmışdır. Buna görə də borclu barəsində İXM-nin 528.1-ci maddəsi ilə 09 fevral 2022-ci il tarixli MN ******* saylı protokol tərtib etmiş və borclunu inzibati məsuliyyətə cəlb olunmasını xahiş etmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs Şəxs öz izahatında göstərmişdir ki, icra vərəqəsindən məlumatı vardır. 07 oktaybr 2019-cu ildən “Rifah” supermarketdə çeşidləyici vəzifəsində işləyir. Orda maaşı əvvəlcə 130 manat olmuş sonradan, yəni 2020-ci ilin martından maaşı 460 manata qalxmışdır. Pandemiyadan qabaq 460 manat maaşdan 70%-i yəni 325 manat hər ay aliment borcundan tutulmuşdur, 2021-ci ilin may ayından etibarən isə əmək haqqısı azaldılaraq 400 manata düşmüş və ondan 285 manat aliment borcu tutulmuşdur. O aliment borclarından vaxtlı-vaxtında ödəniş etməklə bu günədək 10946 manat 70 qəpik ödədiyini bildirərək daha yüksək əmək haqqı verən iş axtardığını və anasının bu ilin aprelindən etibarən alacağı təqaüdlə də aliment borcundan müvafiq ödənişlər edəcəyini bildirmişdir. Odur ki, aliment borcunu vaxtlı-vaxtında ödəməklə borcunu ödəməkdən qəsdən yayınmamasını, icra məmurunun çağırışlarına vaxtı-vaxtında gəlməsinin və digər hər hansı bir gəlirə və ya qazanca malik olmamasının nəzərə alınaraq inzibati iş üzrə icraata xitam verilməsini məhkəmədən xahiş etmişdir. Məhkəmə, tərəflərin izahatını və icra işini nəzərdən keçirərək, hesab edir ki, borclu Şəxs əməlində hazırki vaxtda inzibati xəta tərkibi olmadığından inzibati xəta haqqında iş üzrə icraata xitam verilməlidir. Belə ki, məhkəmə araşdırması zamanı borclunun yaranmış borcunu ödəməkdən qəsdən yayınmasına və eləcə də icra məmurunun qanuni tələblərinə qəsdən tabe olmamasına dair heç bir hal müəyyən edilməmişdir. İnzibati Xətalar Məcəlləsinin 528.1-ci maddəsinə əsasən məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Həmin Məcəllənin 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 114.1.4-cü maddəsinə əsasən inzibati xəta haqqında işə baxılarkən inzibati xəta haqqında iş üzrə icraata xitam verilməsi haqqında məsələ üzrə qərar çıxarılır. Həmin Məcəllənin 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barədə şübhələr onun xeyrinə həll edilir. Qeyd olunanları nəzərə alaraq və Azərbaycan Respublikası İnzibati Xətalar Məcəlləsinin 115,128,129 və 130-cu maddələrini rəhbər tutaraq, məhkəmə QƏRARA ALDİ: Şəxs əməlində Azərbaycan Respublikası İXM-nin 528.1-ci maddəsində nəzərdə tutulmuş inzibati xəta tərkibi olmadığından başlanmış inzibati xəta haqqında icraata xitam verilsin. Qərardan onun surəti təqdim edildiyi və ya alındığı gündən 10 (on) gün müddətində Qaradağ rayon Məhkəməsi vasitəsilə Bakı Apellyasiya Məhkəməsinə apellyasiya şikayəti və protesti verilə bilər. Sədrlik edən: Rufan Mürsəlov