Bakı şəhəri Qaradağ Rayon Məhkəməsi Qərar — İş №3(002)-2265/2024

Azərbaycan Respublikası adından QƏRAR Bakı şəhəri İş № 3(002)-2265/2024 22.08.2024 BAKI ŞƏHƏRİ QARADAĞ RAYON MƏHKƏMƏSİ Hakim Mürsəlov Rufan Kamil oğlunun sədrliyi, Mustafayeva Sevda Bahaddin qızının katibliyi, Qaradağ rayon icra şöbəsinin icra məmuru X1 iştirakı ilə, xx xxxx 1988-ci ildə Bakı şəhərində doğulmuş, Azərbaycan Respublikasının vətəndaşı, evli, ünvan 1 ünvanında qeydiyyatda olmaqla ünvan 2 ünvanında kirayədə yaşayan Şəxs Azərbaycan Respublikası İXM-nin 529.1-ci maddəsilə inzibati inzibati məsuliyyətə cəlb edilməsinə dair materiala məhkəmənin inzibati binasında açıq məhkəmə iclasında baxaraq, MÜƏYYƏN ETDİ: Qaradağ rayon icra şöbəsinin icra məmuru X2, borclu Şəxs barəsində protokol tərtib edərək, Bakı şəhəri Qaradağ rayon Məhkəməsinin 3(002)-2608/2023 saylı, 25 dekabr 2023-cü il tarixli icra vərəqəsinin icrası ilə bağlı icra məmurunun qanuni tələblərini yerinə yetirmədiyinə görə onun İnzibati Xətalar Məcəlləsinin 529.1-ci maddəsi ilə inzibati məsuliyyətə cəlb edilməsini xahiş etmişdir. İş materiallarına əlavə edilmiş 08 avqust 2024-cü il tarixli MN ******* saylı inzibati xəta haqqında protokoldan aydın olur ki, Şəxs, Bakı şəhəri Qaradağ rayon Məhkəməsinin 3(002)-2608/2023 saylı, 25 dekabr 2023-cü il tarixli icra sənədinə əsasən İXM-nin 528.1-ci maddəsində nəzərdə tutulmuş inzibati xətanı törətməkdə təqsrili bilinməklə 500 manat məbləğində cərimə edilsə də həmin cəriməni ödəməkdən qərəzli boyun qaçırdığına görə onun barəsində İnzibati Xətalar Məcəlləsinin 529.1-ci maddəsi protokol tərtib edilmişdir. Məhkəmə iclasında iştirak edən Qaradağ rayon İcra şöbəsinin icra məmuru X2 öz izahatında tərtib etdiyi protokolu müdafiə edərək bildirmişdir ki, Bakı şəhəri Qaradağ rayon Məhkəməsinin 3(002)-2608/2023 saylı, 25 dekabr 2023-cü il tarixli qərarına əsasən Şəxs İXM-nin 528.1-ci maddəsində nəzərdə tutulmuş inzibati xətanı törətməkdə təqsirli bilinərək 500 manat məbləğində cərimə edilmişdir. Həmin qərardan narazı qalan Şəxs Bakı Apellyasiya Məhkəməsinə şikayət verərək qərarın ləğv edilməsini xahiş etmişdir. Bakı Apellyasiya Məhkəməsinin 3(103)-147/2024 saylı, 26 yanvar 2024-cü il tarixli qərarına əsasən şikayət təmin edilməmiş, Bakı şəhəri Qaradağ rayon Məhkəməsinin 3(002)- 2608/2023 saylı, 25 dekabr 2023-cü il tarixli qərarı dəyişdirilmədən saxlanılmışdır. Bundan sonra Bakı şəhəri Qaradağ rayon Məhkəməsinin 3(002)-2608/2023 saylı, 25 dekabr 2023cü il tarixli icra vərəqəsinə əsasən borclu barəsində icra sənədi üzrə icraat başlanılmışdır. İcra sənədi icraata daxil olduqdan sonra qanunvericiliklə nəzərdə tutulmuş qaydada icraata başlamaq haqqında qərar qəbul olunaraq tələbin könüllü icrasına dair bildirişlə birlikdə borcluya göndərilmişdir. Lakin borclu bu günədək heç bir ödəniş etməmiş və qərarın icrasından qərəzli şəkildə yayınmışdır. Belə ki, borclu Şəxs 08 avqust 2024-cü il tarixdə icra şöbəsində izahat verərkən yaranmış borcundan xəbərdar olduğunu və imkansızlıq səbəbindən ödəniş etməyəcəyini bildirmişdir. Odur ki, Şəxs yaranmış borcunu qərarın qanuni qüvvəyə mindiyi gündən 03 ay müddətində qanunla müəyyən edilmiş əsaslar olmadan icra etmədiyinə görə barəsində inzibati tənbeh tədbirinin tətbiq edilməsini xahiş etmişdir. Məhkəmə iclasının yeri və vaxtı barədə barəsində inzibati xəta haqqında iş üzrə icraat aparılan Şəxs rəsmi qaydada məlumat verilsə də, o, məhkəmə iclasında iştirak etməmiş, lakin məhkəməyə teleqram ünvanlayaraq yeni işdə sınaq müddətində olduğu üçün üzürlü səbəbdən məhkəmə iclasında iştirak edə bilməyəcəyini, məhkəmənin onsuz keçirilməsini və iştirakı olmadan qərar qəbul edilməsini xahiş etmişdir. Məhkəmə işə borclunun iştirakı olmadan baxılmasını mümkün hesab etmişdir. Tərtib edilmiş inzibati protokoldan, iş materiallarından və icra məmurunun izahatlarından aydın olur ki, Şəxs yaranmış borcundan xəbəri olmaqla heç bir üzrlü səbəb olmadan icra sənədini uzun müddətdir ki, icra etməmişdir. İş materiallarına əlavə edilmiş, Şəxs 08 avqust 2024-cü il tarixli izahatından aydın olur ki, o, yuxarıda qeyd olunan icra sənədindən xəbərdar maddi imkansızlıq səbəbindən ödəniş etməyəcəyini göstərmişdir. Beləliklə Şəxs Azərbaycan Respublikası İnzibati Xətalar Məcəlləsinin 529.1-ci maddəsi ilə nəzərdə tutulan inzibati xətanı törətməsi özünün şəxsi etirafı və inzibati xəta haqqında tərtib edilmiş 08 avqust 2024-cü il tarixli MN ******* nömrəli protokolla və işin digər halları ilə tam təsdiq olunur. Azərbaycan Respublikası İXM-nin 529.1.-ci maddəsinə əsasən yol hərəkəti qaydaları əleyhinə olan inzibati xətaların və bu Məcəllənin 353.2-ci maddəsində nəzərdə tutulan inzibati xətanın törədilməsinə görə inzibati cərimə istisna olmaqla, inzibati cərimə növündə inzibati tənbeh tətbiq etmə haqqında səlahiyyətli orqanın (vəzifəli şəxsin) qərarının qanuni qüvvəyə mindiyi gündən 3 ay müddətində qanunla müəyyən edilmiş əsaslar olmadan icra edilməməsinə görə yüz altmış saatdan iki yüz qırx saatadək ictimai işlər tətbiq olunur. Həmin Məcəllənin İXM-nin 21-ci maddəsində göstərilir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Məhkəmə, Şəxs tərəfindən törədilmiş inzibati xətanın xarakterini, ictimai təhlükəlilik dərəcəsini nəzərə alaraq barəsində ictimai işlər növündə inzibati tənbeh tədbirinin tətbiq edilməsini daha məqsədə müvafiq hesab edir. Qeyd olunanları nəzərə alaraq və Azərbaycan Respublikası İnzibati Xətalar Məcəlləsinin 115,128,129 və 130-cu maddələrini rəhbər tutaraq, QƏRARA ALDİM: Şəxs Azərbaycan Respublikasının İnzibati Xətalar Məcəlləsinin 529.1-ci maddəsində nəzərdə tutulmuş inzibati xətanı törətməkdə təqsirli bilinərək barəsinə 200 (iki yüz) saat ictimai işlər növündə tənbeh tədbiri tətbiq edilsin. Şəxs üzərinə; ictimai işlərin yerinə yetirildiyi yerlərdə elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək vəzifəsi qoyulsun. Qərarın icrası Şəxs yaşayış yeri üzrə Bakı şəhər Probasiya İdarəsinə həvalə edilsin. Qərardan, onun surətinin rəsmi qayda təqdim edildiyi və ya alındığı gündən 10 (on) gün müddətində Qaradağ Rayon Məhkəməsi vasitəsilə Bakı Apellyasiya Məhkəməsinə apellyasiya şikayəti və protesti verilə bilər. Hakim: Rufan Mürsəlov