Bakı şəhəri Qaradağ Rayon Məhkəməsi Qərar — İş №3(002)-2649/2025

Azərbaycan Respublikası adından QƏRAR Bakı şəhəri İş № 3(002)-2649/2025 24.12.2025 BAKI ŞƏHƏRİ QARADAĞ RAYON MƏHKƏMƏSİ Hakim Dadaşova Şəfa Əliövsət qızının sədrliyi Məmmədova Ülviyyə Nİzami qızının katibliyi Barəsində inzibati xəta haqqında iş üzrə icraat aparılan Şəxs iştirakı ilə, xx.xx.1959-cu il tarixdə Bakı şəhərində doğulmuş, Azərbaycan Respublikasının vətəndaşı (FİN: xxxxxxx), Bakı şəhəri, Qaradağ rayonu, Qobustan qəsəbəsi, Massiv 2, Ev 96 ünvanında yaşayan Şəxs Azərbaycan Respublikasının İnzibati Xətalar Məcəlləsinin 529.3-cü maddəsi ilə nəzərdə tutulmuş inzibati xətanı törətməsinə dair inzibati xəta haqqında protokola və ona əlavə olunmuş materiallara baxaraq, məhkəmə MÜƏYYƏN ETDİ: Şəxs Azərbaycan Respublikasının İnzibati Xətalar Məcəlləsinin 529.3-cü maddəsi ilə nəzərdə tutulmuş inzibati xətanı törətməsinə dair xx.xx.2025-ci il tarixli, İXP ******* saylı inzibati xəta haqqında protokol və ona əlavə edilmiş sənədlər Bakı şəhəri Qaradağ Rayon Məhkəməsinə daxil olmuşdur. İnzibati xəta haqqında protokola və ona əlavə edilmiş sənədlərə əsasən, Şəxs barəsində Azərbaycan Respublikasının İXM-nin 339.1-1-ci maddəsi ilə qəbul edilmiş xx.xx.2025-ci il tarixli, EQ 26927219 nömrəli inzibati tənbeh vermə haqqında iş üzrə qərar qüvvəyə mindiyi gündən 3 ay müddətinə icra etməmiş və bununla da, Azərbaycan Respublikasının İXM-nin 529.3-cü maddəsində nəzərdə tutulmuş inzibati xətanı törətmişdir. Məhkəmə iclasında iştirak edən Şəxs öz izahatında bildirmişdir ki, DİN BYDPİ tərəfindən onun barəsində tərtib edilən xx.xx.2025-ci il tarixli, EQ 26927219 saylı elektron qərarla razı deyil. Belə ki, o, təqribən 10 il əvvəl sözü gedən **-LK-*** dövlət qeydiyyat nömrə nişanlı VAZ 21041 minik markalı nəqliyyat vasitəsini etibarnamə əsasında digər şəxsə satmış, avtomobilin hazırda kimdə və harada olmasından məlumatı yoxdur. Qeyd etdiklərinə əsasən məhkəməyə DİN Baş Dövlət Yol Polisi İdarəsinə VAZ 21041 minik markalı, **-LK-*** dövlət qeydiyyat nömrə nişanlı nəqliyyat vasitəsinin saxlanması barədə ünvanladığı ərizəsini təqdim edərək barəsində tərtib olunan protokola aidiyyəti olmadığından inzibati material üzrə icraata xitam verilməsini xahiş etmişdir. İş materialına əlavə olunmuş ərizədən görünür ki, Şəxs DİN Baş Dövlət Yol Polisi İdarəsinə müraciət edərək ona məxsus olan ağ rəngli VAZ 21041 minik markalı, **-LK-*** dövlət qeydiyyat nömrə nişanlı nəqliyyat vasitəsini 10 il əvvəl satmasına baxmayaraq, cərimələrlə bağlı qərarların onun adına tərtib olunduğunu, bu səbəbdən həmin avtomobilin saxlanmasını xahiş etmişdir. Qeyd olunan ərizə BDYPİ tərəfindən xx.xx.2025-ci il tarixdə qəbul edilmişdir. Belə ki, inzibati xəta haqqında protokola əlavə edilmiş şəkildən sürücünün kimliyini müəyyən etmək mümkün olmamış, eyni zamanda barəsində inzibati xəta haqqında iş üzrə icraat aparılan şəxsin təqdim etdiyi ərizədən onun BDYPİ-nə VAZ 21041 minik markalı, **- LK-*** dövlət qeydiyyat nömrə nişanlı avtomobilin satıldığı müəyyən edilmişdir. Məhkəmə inzibati protokolu nəzərdən keçirib, toplanmış sübutlara məcmu halda hüquqi qiymət verərək hesab edir ki, Şəxs Azərbaycan Respublikasının İXM-nin 529.3-cü maddəsində nəzərdə tutulan əməli törətməsinə dair inzibati iş üzrə icraata xitam verilməlidir. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 53.2-ci maddəsinə əsasən hər hansı şəxs barəsində başlanılmış inzibati xətalar haqqında işlər üzrə icraata, həmçinin onun inzibati xəta törədilməsinə aidiyyəti olmadıqda və ya təqsirliliyi sübuta yetirilmədikdə, o cümlədən təqsirliliyin sübuta yetirilməsində qanuna zidd olaraq əldə edilmiş sübutlardan istifadə edildikdə xitam verilir. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərərçəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Məhkəmə törədilmiş inzibati xətanın hallarını nəzərə alaraq hesab edir ki, Şəxs müvafiq inzibati xətanın törədilməsində təqsirliliyini sübuta yetirəcək hər hansı sənəd mövcud olmadığından onun əməlində inzibati xəta tərkibi olmadığı nəzərə alınaraq inzibati məsuliyyətdən azad olunmalı və iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 40, 43, 48-51, 53, 114-117 və 128-130 maddələrini rəhbər tutaraq, məhkəmə QƏRARA ALDİ: Şəxs barəsində xx.xx.2025-ci il tarixli, İXP ******* saylı protokol üzrə Azərbaycan Respublikasının İnzibati Xətalar Məcəlləsinin 53.2-ci maddəsinə əsasən həmin Məcəllənin 529.3-cü maddəsi ilə başlanılmış inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi vaxtdan 10 (on) gün müddətində Bakı Apellyasiya Məhkəməsinə apellyasiya şikayəti verilə bilər. Sədrlik edən: Şəfa Dadaşova