Bakı şəhəri Qaradağ Rayon Məhkəməsi Qərar — İş №3(002)-330/2024

Azərbaycan Respublikası adından QƏRAR Bakı şəhəri İş № 3(002)-330/2024 20.02.2024 BAKI ŞƏHƏRİ QARADAĞ RAYON MƏHKƏMƏSİ Hakim Mürsəlov Rufan Kamil oğlunun sədrliyi, Mustafayeva Sevda Bahaddin qızının katibliyi ilə, Şəxs barəsində Azərbaycan Respublikasının Qida Təhlükəsizliyi Agentliyi Bakı Regional Bölməsi tərəfindən İnzibati Xətalar Məcəlləsinin 447.0.6-cü maddəsi ilə daxil olmuş inzibati xəta haqqında materiala məhkəmənin binasında açıq məhkəmə iclasında baxaraq, məhkəmə MÜƏYYƏN ETDİ: Şəxs MMC barəsində Azərbaycan Respublikasının Qida Təhlükəsizliyi Agentliyi Bakı Regional Bölməsi tərəfindən İnzibati Xətalar Məcəlləsinin 447.0.6-cü maddəsi ilə inzibati xəta haqqında protokol və ona əlavə edilmiş sənədlər baxılması üçün Qaradağ Rayon Məhkəməsinə göndərilmişdir. İş materiallarında olan 23 yanvar 2024-cü il tarixli MN ******* nömrəli inzibati xəta haqqında protokoldan və ona əlavə edilmiş materiallarından aydın olur ki, Şəxs MMC, İD ********** nömrəli müraciət əsasında ölkəyə idxal olunmuş arpa səmənisi məhsul partiyasından nümunə götürülməsinə şərait yaratmamışdır. Məhkəmə iclasının vaxtı və yeri barədə Şəxs MMC-yə və Azərbaycan Respublikasının Qida Təhlükəsizliyi Agentliyi Bakı Regional Bölməsinə rəsmi qaydada məlumat verilsə də, qeyd olunan təşkilatlardan nümayəndələr məhkəmə iclasına gəlməmiş və bunun səbəbləri barədə də məhkəməyə heç bir məlumat daxil olmamışdır. Məhkəmə, işə nümayəndələrin iştirakı olmadan baxılmasını mümkün hesab etmişdir. Məhkəmə iş materiallarını araşdırıb hesab edir ki, Şəxs MMC tərəfindən Azərbaycan Respublikası İnzibati Xətalar Məcəlləsinin 447.0.6 maddəsində nəzərdə tutulmuş inzibati xətanın törədilməsi Azərbaycan Respublikasının Qida Təhlükəsizliyi Agentliyi Bakı Regional Bölməsi tərəfindən tərtib edilmiş inzibati xəta haqqında protokol və işin digər materialları ilə tam sübuta yetirilir. Belə ki, iş materiallarında olan 04 dekabr 2023-cü il tarixli, 3-44-1/2-2-12040/23 nömrəli AQTA-nın Bakı Regional Bölməsi tərəfindən Şəxs MMC-yə ünvanlanmış məktubda AQTA-nın əməkdaşı tərəfindən idxal olunan məhsul partiyalarından nümunə götürülməsi məqsədilə MMC ilə əlaqə saxlanıldığı, lakin onlar tərəfindən məhsul partiyasından nümunə götürülməsinə şərait yaradılmadığı qeyd edilmişdir. Buna şərait yaradılması məqsədilə xx.xx.2023-cü il tarixdə, saat 10:00-da AQTA-nın Regional Bölməsinə gəlmələri xahiş olunmuşdur. Bundan başqa iş materiallarında olan 15 dekabr 2023-cü il tarixli, 3-44-1/2-1- 12431/23 nömrəli, “İnzibati xəta haqqında iş üzrə icraata başlanması” haqqında bildirişdə Şəxs MMC-nin nümayəndəsinin 28 dekabr 2023-cü il tarixdə, saat 10:30-da AQTA-nın Bakı Regional Bölməsinə gəlməyinin zəruri olduğu, əks təqdirdə İXM-nin 99.4-cü maddəsinə əsasən inzibati xəta haqqında iş üzrə icraata başlanılacağı qeyd edilmişdir. Həmçinin 30 dekabr 2023-cü il tarixli, 3-44-1/2-1-12885/23 nömrəli, oxşar məzmunlu “İnzibati xəta haqqında iş üzrə icraata başlanması” haqqında bildirişdə Bertefet CO» MMC-nin nümayəndəsinin 11 yanvar 2024-cü il tarixdə, saat 10:30-da AQTA-nın Bakı Regional Bölməsinə gəlməyinin zəruri olduğu qeyd edilmişdir. Şirkətə daha bir dəfə, 12 yanvar 2024-cü il tarixdə də “İnzibati xəta haqqında iş üzrə icraata başlanması” haqqında bildiriş göndərilməklə 23 yanvar 2024-cü il tarixdə, saat 10:30-da AQTA-nın Bakı Regional Bölməsinə dəvət edilmişdir. Məhkəmə araşdırması zamanı müəyyən edilmişdir ki, Şəxs MMC, AQTA-nın Bakı Regional Bölməsi tərəfindən onlara ünvanlanmış müraciətlərə cavab verməmiş, həmçinin İD ********** nömrəli müraciət əsasında ölkəyə idxal olunmuş arpa səmənisi məhsul partiyasından nümunə götürülməsinə şərait yaratmamışdır. Azərbaycan Respublikası İnzibati Xətalar Məcəlləsinin 447.0.6-cı maddəsində göstərilir ki, nəzarət olunmalı məhsulun müvafiq dövlət nəzarəti orqanlarından gizlədilməsinə görə fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilir. Həmin Məcəllənin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 21-ci maddəsinin tələbinə görə inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 31.3-cü maddəsinin tələbinə əsasən hüquqi şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta nəticəsində hüquqi şəxsin əldə etdiyi xeyrin həcmi və ya onun maraqlarının təmin edilməsinin xarakteri və dərəcəsi, hüquqi şəxsi xarakterizə edən hallar, o cümlədən onun maliyyə və əmlak vəziyyəti, xeyriyyəçilik və ya digər ictimai faydalı fəaliyyətlə məşğul olması, habelə məsuliyyəti yüngülləşdirən və ağırlaşdıran hallar nəzərə alınır. Beləliklə, məhkəmə Şəxs MMC-nin törətdiyi inzibati xətanın xarakterini, inzibati xəta nəticəsində onun maraqlarının təmin edilməsinin dərəcəsini, hüquqi şəxsi xarakterizə edən halları və s. nəzərə alaraq hesab edir ki, Şəxs MMC hüquqi şəxs qismində İnzibati Xətalar Məcəlləsinin 447.0.6-cü maddəsinin sanksiyasında nəzərdə tutulmuş həddə cərimə növündə tənbeh tədbiri tətbiq edilməlidir. Göstərilənlərə əsasən və Azərbaycan Respublikası İnzibati Xətalar Məcəlləsinin 114- 115, 129 və 130-cu maddələrini rəhbər tutaraq məhkəmə QƏRARA ALDİ: Şəxs MMC Azərbaycan Respublikası İnzibati Xətalar Məcəlləsinin 447.0.6-cü maddəsində nəzərdə tutulmuş inzibati xətanı törətməkdə təqsirli bilinsin və hüquqi şəxs qismində 4000 (dörd min) manat məbləğində inzibati cərimə edilsin. Qərarın surəti təqdim edildiyi və ya alındığı gündən 10 (on) gün müddətində Bakı Apellyasiya Məhkəməsinə şikayət verilə bilər. Hakim: Rufan Mürsəlov