Bakı şəhəri Qaradağ Rayon Məhkəməsi Qərar — İş №3(002)-457/2022

Azərbaycan Respublikası adından QƏRAR Bakı şəhəri İş № 3(002)-457/2022 12.04.2022 BAKI ŞƏHƏRİ QARADAĞ RAYON MƏHKƏMƏSİ Hakim Mürsəlov Rufan Kamil oğlunun sədrliyi, Mustafayeva Sevda Bahaddin qızının katibliyi, Qaradağ rayon icra şöbəsinin icra məmuru Əhmədzadə Səbuhi İsmayıl oğlunun, Barəsində inzibati xəta haqqında iş üzrə icraat aparılan şəxs Şəxs iştirakları ilə, xx xxxxxx 1981-ci ildə Fizuli rayonunda doğulmuş, Azərbaycan Respublikasının vətəndaşı, Fizuli rayonu, Yuxarı Əbdülrəhmanlı kəndində qeydiyyatda olmaqla Bakı şəhəri, ünvan 1 ünvanında yaşayan Şəxs Azərbaycan Respublikası İXM-nin 528.1-ci maddəsi ilə təqsirləndirilməsinə dair inzibati materiala məhkəmənin binasında, açıq məhkəmə iclasında baxaraq, məhkəmə MÜƏYYƏN ETDİ: Şəxs Bakı şəhəri Qaradağ rayon Məhkəməsinin 2(002)-789/2021 saylı, 16 may 2021-ci il tarixli icra vərəqəsini üzrlü səbəb olmadan icra etmədiyinə görə barəsində Azərbaycan Respublikası İXM-nin 528.1-ci maddəsi ilə tərtib edilmiş inzibatı material baxılması üçün məhkəməyə daxil olmuşdur. Məhkəmə iclasında iştirak edən Qaradağ rayon icra şöbəsinin icra məmuru Əhmədzadə Səbuhi İsmayıl oğlu protokolu müdafiə edərək bildirmişdir ki, Bakı şəhəri Qaradağ rayon Məhkəməsinin 2(002)-789/2021 saylı, 16 may 2021-ci il tarixli icra vərəqəsinə əsasən 14 iyun 2005-ci il təvəllüdlü X4, 06 yanvar 2009-cu il X7 və 31 dekabr 2017-ci il təvəllüdlü X5 yetkinlik yaşına çatanadək saxlanılması üçün 08 fevral 2021-ci il tarixdən başlayaraq Şəxs X2 xeyrinə hər ay 140 manat, ümumilikdə üç uşağa görə 420 manat sabit pul məbləğində alimentin tutulması qət edilmişdir. Borclu indiyədək borcundan cəmi 290 manat pul məbləğini dörd ay bundan qabaq ödəmiş, hal-hazırda 5590 manat aliment borcu qalmaqdadır. Buna görə də borclu barəsində İXM-nin 528.1-ci maddəsi ilə 12 aprel 2022-ci il tarixli MN ******* saylı protokol tərtib etmiş və borclunu inzibati məsuliyyətə cəlb olunmasını xahiş etmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs Şəxs öz izahatında göstərmişdir ki, icra vərəqəsindən məlumatı vardır. İndiyədək üç övladının saxlanılması üçün qeyri-rəsmi formada 1000 manata yaxın pul ödəmişdir. Bundan başqa 16 may 2021-ci il tarixdə X6 ilə rəsmi qaydada ayrılsa da, sonradan barışaraq altı aya qədər onlarla birgə yaşamış, lakin aliment tələbindən imtina edilməsi üçün müraciət edilməli olduğunu bilməmişdir. O, öz izahatında daha sonra qeyd etmişdir ki, özü həm ürək çatışmazlığı, həm də şəkər xəstəliyindən əziyyət çəkir, halhazırda heç bir yerdə işləmir, atası və əmisi Birinci Qarabağ müharibəsində şəhid olmuşlar. Bütün bu halların, həmçinin aprelin ayının 20-sinə qədər tələbkara 400 manat məbləğində borcundan ödəniş edəcəyini, ilk dəfə inzibati məsuliyyətə cəlb olunmasının, borcunu ödəməkdən qəsdən yayınmamasını və icra məmurunun çağırışlarına vaxtıvaxtında gəlməsinin nəzərə alınaraq inzibati iş üzrə icraata xitam verilməsini məhkəmədən xahiş etmişdir. Məhkəmə, tərəflərin izahatını və icra işini nəzərdən keçirərək, hesab edir ki, borclu Şəxs əməlində hazırki vaxtda inzibati xəta tərkibi olmadığından inzibati xəta haqqında iş üzrə icraata xitam verilməlidir. Belə ki, məhkəmə araşdırması zamanı borclunun yaranmış borcunu ödəməkdən qəsdən yayınmasına və eləcə də icra məmurunun qanuni tələblərinə qəsdən tabe olmamasına dair heç bir hal müəyyən edilməmişdir. İnzibati Xətalar Məcəlləsinin 528.1-ci maddəsinə əsasən məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Həmin Məcəllənin 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 114.1.4-cü maddəsinə əsasən inzibati xəta haqqında işə baxılarkən inzibati xəta haqqında iş üzrə icraata xitam verilməsi haqqında məsələ üzrə qərar çıxarılır. Həmin Məcəllənin 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barədə şübhələr onun xeyrinə həll edilir. Qeyd olunanları nəzərə alaraq və Azərbaycan Respublikası İnzibati Xətalar Məcəlləsinin 115,128,129 və 130-cu maddələrini rəhbər tutaraq, məhkəmə QƏRARA ALDİ: Şəxs əməlində Azərbaycan Respublikası İXM-nin 528.1-ci maddəsində nəzərdə tutulmuş inzibati xəta tərkibi olmadığından başlanmış inzibati xəta haqqında icraata xitam verilsin. Qərardan onun surəti təqdim edildiyi və ya alındığı gündən 10 (on) gün müddətində Qaradağ rayon Məhkəməsi vasitəsilə Bakı Apellyasiya Məhkəməsinə apellyasiya şikayəti və protesti verilə bilər. Sədrlik edən: Rufan Mürsəlov