Bakı şəhəri Qaradağ Rayon Məhkəməsi Qərardad — İş №3(002)-705/2021

Azərbaycan Respublikası adından QƏRARDAD Bakı şəhəri İş № 3(002)-705/2021 18.05.2021 BAKI ŞƏHƏRİ QARADAĞ RAYON MƏHKƏMƏSİ Qaradağ Rayon Məhkəməsinin hakimi Mürsəlov Rufan Kamil oğlu, Şəxs Azərbaycan Respublikası İXM-nin 529.3-cü maddəsi ilə təqsirləndirilməsinə dair inzibati materialın icraata qəbul edilməsi məsələsinə baxaraq, MÜƏYYƏN ETDİM: DİN-nin Sumqayıt şəhər Polisi İdarəsi Dövlət Yol Polis Şöbəsi tərəfindən Şəxs barəsində Azərbaycan Respublikası İXM-nin 529.3-cü maddəsi ilə inzibati xəta haqqında material 07 aprel 2021-ci il tarixdə Sumqayıt Şəhər Məhkəməsinə daxil olmuşdur. Sumqayıt Şəhər Məhkəməsinin 19 aprel 2021-ci il tarixli qərardadı ilə Şəxs tərəfindən İXM-nin 529.3-cü maddəsində nəzərdə tutulmuş inzibati xətanı törətməsinə dair tərtib olunmuş protokol və ona əlavə olunmuş sənədlər baxılması üçün aidiyyəti üzrə Bakı şəhər Qaradağ rayon Məhkəməsinə göndərilmişdir. Məhkəməyə təqdim edilmiş materialları araşdıraraq hesab edirəm ki, material natamam olduğundan geri qaytarılmalıdır. Belə ki, iş materiallarına Şəxs barəsində İXM-nin 529.3-cü maddəsi ilə protokolun tərtib edilmə vaxtı və yeri barədə ona rəsmi xəbərdarlıq edilməsinə dair heç bir sübut əlavə edilməmişdir. İş materiallarına Şəxs ünvanlanmış qeyri-müəyyən tarixli məktubun surəti əlavə edilsə də bu məktubun hansı tarixdə göndərilməsi və Şəxs tərəfindən alınıbalınmamasını müəyyən etmək mümkün deyildir. Çünki iş materiallarına Şəxs qeyd olunan inzibati işlə əlaqədar göndərilmiş məktubun alınıb-alınmamasını sübut edən xəbərnamə və həmin məktubun göndərilməsini təsdiq edən reyesterdən çıxarış əlavə edilməmişdir. Azərbaycan Respublikası İXM-nin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib olunmadıqda, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Qeyd olunanları və Azərbaycan Respublikası İnzibati Xətalar Məcəlləsinin 40, 43, 100, 106 109-cu maddələrini rəhbər tutaraq, QƏRARA ALDİM: Şəxs İnzibati Xətalar Məcəlləsinin 529.3-cü maddəsi ilə təqsirləndirilməsinə dair inzibati xəta haqqında material natamam olduğundan DİN-nin Sumqayıt Şəhər Polis İdarəsinin Dövlət Yol Polis Şöbəsinə geri qaytarılsın. Qərardan, onun surətinin rəsmi qaydada verildiyi vaxtdan 10 gün müddətində apellyasiya şikayəti verilə bilər. Hakim: Rufan Mürsəlov