Bakı Şəhəri Xəzər Rayon Məhkəməsi Qərar — İş №3(003)-1399/2022

Azərbaycan Respublikası adından QƏRAR Bakı şəhəri İş № 3(003)-1399/2022 14.10.2022 BAKI ŞƏHƏRİ XƏZƏR RAYON MƏHKƏMƏSİ Hakim Qəhrəmanov Əkrəm Sabir oğlunun sədrliyi, Mirzəyeva Mahirə Bayaz qızının katibliyi, barəsində inzibati xəta haqqında iş üzrə icraat aparılan hüquqi şəxs Şəxs şirkətinin Azərbaycan Respublikasındakı filialının nümayəndəsi X1 iştirakı ilə Şəxs şirkətinin Azərbaycan Respublikasındakı filialının Azərbaycan Respublikası İnzibati Xətalar Məcəlləsinin 430.4-ci maddəsi ilə nəzərdə tutulmuş inzibati xəta törətməsi barədə Azərbaycan Respublikasının Mərkəzi Bankından daxil olmuş materiala açıq məhkəmə iclasında baxaraq, məhkəmə M Ü Ə Y Y Ə N E T D İ: İnzibati xəta haqqında EP seriyalı ******* nömrəli, 05 sentyabr 2022-ci il tarixli protokola əsasən Şəxs şirkətinin Azərbaycan Respublikasındakı filialı 16550 Avro məbləğində vəsaiti 27 avqust 2020-ci il tarixdə Azərbaycan Respublikasından kənara qabaqcadan ödəniş etməklə köçürmüşdür. Lakin ödənişin aparıldığı gündən 2 il müddət keçməsinə baxmayaraq 16550 Avro məbləğində vəsait hesabına alınan malların ölkəyə idxalını təsdiq edən gömrük bəyannaməsini və ya idxal olunan xidmətlərin göstərilməsini təsdiq edən sənədi banka təqdim etməmiş, qabaqcadan ödənilmiş valyuta vəsaiti xaricdən geri qaytarılmamışdır. Bununla da, Şəxs şirkətinin Azərbaycan Respublikasındakı filialı Azərbaycan Respublikası İnzibati Xətalar Məcəlləsinin 430.4-cü maddəsində göstərilən inzibati xətanı törətmişdir. Məhkəmə iclasında barəsində inzibati xəta haqqında iş üzrə icraat aparılan hüquqi şəxs Şəxs şirkətinin Azərbaycan Respublikasındakı filialının nümayəndəsi X2 bildirdi ki, Şəxs şirkətinin Azərbaycan Respublikasındakı filialı ilə Estoniyada fəaliyyət göstərən «Cybernetica AS» şirkəti arasında bağlanmış 24 avqust 2020-ci il tarixli müqaviləyə əsasən şirkət tərəfindən avans yolu ilə 16550 Avro pul ödənilmiş və bu pulun müqabilində 02 noyabr 2020-ci il tarixdə həmin məbləğdə mallar Azərbaycan Respublikasına idxal edilərək bununla bağlı müvafiq gömrük bəyannaməsi verilmişdir. Qeyd olunanlara əsasən Şəxs şirkətinin Azərbaycan Respublikasındakı filialının barəsində inzibati xəta haqqında iş üzrə icraata xitam verilməsini məhkəmədən xahiş etdi. Azərbaycan Respublikasının Mərkəzi Bankına məhkəmə iclasının vaxtı və yeri barədə qanunla nəzərdə tutulmuş qaydada poçt vasitəsi ilə bildiriş göndərilmişdir. Lakin onun nümayəndəsi məhkəməyə gəlməmiş və gəlməməsinin səbəbləri barəsində məhkəməyə məlumat verməmişdir. Məhkəmə Azərbaycan Respublikası İnzibati Xətalar Məcəlləsinin 61.3-cü maddəsinə əsasən işə Azərbaycan Respublikasının Mərkəzi Bankının nümayəndəsinin iştirakı olmadan baxılmasını mumkün hesab etmişdir. Məhkəmə barəsində inzibati xəta haqqında iş üzrə icraat aparılan hüquqi şəxsin nümayəndəsini dinləyib, iş materiallarını və təqdim olunmuş sənədləri araşdırıb hesab edir ki, inzibati xəta hadisəsi olmadığından inzibati xəta haqqında iş üzrə icraata xitam verilməlidir. Belə ki, iş materiallarına əlavə edilmiş Şəxs şirkətinin Azərbaycan Respublikasındakı filialı ilə «Cybernetica AS» şirkəti arasında bağlanmış 24 avqust 2020ci il tarixli müqavilədən görünür ki, satıcı alıcıya 16550 Avro dəyərində mal satmışdır. İş materiallarına əlavə edilmiş «YapıKredi Bank Azərbaycan»ın köçürmə ərizəsinin surətindən görünür ki, Şəxs şirkətinin Azərbaycan Respublikasındakı filialı tərəfindən «Cybernetica AS» şirkətinin xeyrinə 24 avqust 2020-ci il tarixli müqaviləyə əsasən 25 avqust 2020-ci il tarixdə 16550 Avro məbləğində ödəniş olunmuşdur. İş materiallarına əlavə edilmiş 02 noyabr 2020-ci il tarixli, **********7034 sorğu nömrəli gömrük bəyannaməsindən görünür ki, «Cybernetica AS» şirkəti tərəfindən Şəxs şirkətinin Azərbaycan Respublikasındakı filialanın ünvanına 24 avqust 2020-ci il tarixli müqaviləyə əsasən göndərilmiş 16550 Avro məbləğində mallar bəyan edilmişdir. Azərbaycan Respublikası İnzibati Xətalar Məcəlləsinin 18.1-ci maddəsinə görə hüquqi şəxslər, o cümlədən xarici hüquqi şəxslər və xarici hüquqi şəxslərin filial və nümayəndəlikləri bu Məcəllənin Xüsusi hissəsində nəzərdə tutulmuş inzibati xətalara görə inzibati məsuliyyətə cəlb olunurlar. Həmin Məcəllənin 18.5-ci maddəsinə görə hüquqi şəxs barəsində inzibati tənbeh yalnız hakim tərəfindən tətbiq edilir. İnzibati Xətalar Məcəlləsinin 12-ci maddəsinə görə bu Məcəllə ilə qorunan ictimai münasibətlərə qəsd edən, hüquqa zidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 53.0.1-ci maddəsinə görə inzibati xəta hadisəsi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Məhkəmədə müəyyən olundu ki, Şəxs şirkətinin Azərbaycan Respublikasındakı filialı tərəfindən «Cybernetica AS» şirkətinə aralarında bağlanmış 24 avqust 2020-ci il tarixli müqaviləyə əsasən avans yolu ilə 16550 Avro pul ödənilmişdir. Bu pulun müqabilində 16550 Avro məbləğində mallar 02 noyabr 2020-ci il tarixdə, yəni 2 il müddət ərzində Azərbaycan Respublikasına idxal edilərək bəyan edilmişdir. Məhkəmə hesab edir ki, Azərbaycan Respublikası İnzibati Xətalar Məcəlləsinin 430.4-cü maddəsi ilə inzibati xəta hadisəsi olmadığına görə Şəxs şirkətinin Azərbaycan Respublikasındakı filialının barəsində inzibati xəta haqqında iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İXM-nin 40, 43, 48-51, 115-117, 128-130 maddələrini rəhbər tutaraq, məhkəmə QƏRARAALDİ: Barəsində inzibati xəta haqqında iş üzrə icraat aparılan hüquqi şəxs Şəxs şirkətinin Azərbaycan Respublikasındakı filialının Azərbaycan Respublikası İnzibati Xətalar Məcəlləsinin 430.4-ci maddəsi ilə nəzərdə tutulmuş inzibati xəta törətməsi barədə iş üzrə icraata inzibati xəta hadisəsi olmadığına görə xitam verilsin. Qərarın surəti təqdim olunduğu və ya alındığı gündən 10 gün müddətində şikayət və ya protest verilə bilər. Qərardan apellyasiya şikayəti verilmədikdə, qərar həmin müddət başa çatdığı vaxtdan sonrakı gün qüvvəyə minir. Hakim Əkrəm Qəhrəmanov