Bakı Şəhəri Xəzər Rayon Məhkəməsi Qərar — İş №3(003)-1638/2022

Azərbaycan Respublikası adından QƏRAR Bakı şəhəri İş № 3(003)-1638/2022 29.11.2022 BAKI ŞƏHƏRİ XƏZƏR RAYON MƏHKƏMƏSİ Hakim Qəhrəmanov Əkrəm Sabir oğlunun sədrliyi, Hüseynova Mətanət Təbriz qızının katibliyi, barəsində inzibati xəta haqqında iş üzrə icraat aparılan şəxs Şəxs iştirakı ilə Şəxs Azərbaycan Respublikası İnzibati Xətalar Məcəlləsinin 482.1-ci maddəsi ilə inzibati xəta törətməsi törətməsi barədə Azərbaycan Respublikası Dövlət Gömrük Komitəsi Hava Nəqliyyatında Baş Gömrük idarəsindən daxil olmuş materiala açıq məhkəmə iclasında baxaraq, məhkəmə MÜƏYYƏNETDİ: Azərbaycan Respublikası Dövlət Gömrük Komitəsi Əməliyyat-İstintaq Baş İdarəsi İstintaq və təhqiqat idarəsinin istintaq şöbəsinin müstəntiqi X1 29 sentyabr 2022-ci il tarixli qərarına əsasən Şəxs əməlində Azərbaycan Respublikası CM-nin 206.1 və 206.3.2-ci maddələrinin tərkibi olmadığından barəsində cinayət təqibinə və Azərbaycan Respublikası CM-nin 206.3.2-ci maddəsi ilə başlanılmış cinayət işinin icraatına Azərbaycan Respublikası CPM-nin 39.1.2-ci maddəsinə əsasən xitam verilmişdir. Şəxs əməlində Azərbaycan Respublikası İnzibati Xətalar Məcəlləsinin 482.1-ci maddəsinin tərkibi olduğu nəzərə alınaraq cinayət işinn materiallarından zəruri sənədlərin surəti çıxarılıb baxılması üçün aidiyyati üzrə Hava Nəqliyyatında Baş Gömrük idarəsinə göndərilmişdir. Həmin qərar əsasında Hava Nəqliyyatında Baş Gömrük İdarəsi Əməliyyat və Təhqiqat idarəsi Təhqiqat şöbəsinin böyük təhqiqatçısı X2 tərəfindən Şəxs barəsində Azərbaycan Respublikası İnzibati Xətalar Məcəlləsinin 482.1-ci maddəsi ilə inzibati xəta haqqında 00800-0248/22 nömrəli, 14 oktyabr 2022-ci il tarixli protokol tərtib edilərək baxılması üçün Bakı şəhəri Xəzər rayon Məhkəməsinə göndərilmişdir. İnzibati xəta haqqında 00800-0248/22 nömrəli, 14 oktyabr 2022-ci il tarixli protokola əsasən Şəxs Azərbaycan Respublikasının gömrük sərhədindən keçirilən az miqdarda malları bəyan etməmişdir. Bununla da, Şəxs Azərbaycan Respublikası İnzibati Xətalar Məcəlləsinin 482.1-ci maddəsində göstərilən inzibati xətanı törətmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs bildirdi ki, 26 noyabr 2021-ci il tarixdə Bakıdan İstanbulda olan qızının yanına getmək istəyərkən hava limanında saxlanılmış və özü ilə götürdüyü 39835 manat məbləğində qızıllar aşkar olunaraq götürülmüşdür. Hal-hazırda həmin qızılları Dövlət Gömrük Komitəsində saxlanılır. Azərbaycan Respublikası Dövlət Gömrük Komitəsi Hava Nəqliyyatında Baş Gömrük idarəsinə məhkəmə iclasının vaxtı və yeri barədə qanunla nəzərdə tutulmuş qaydada poçt vasitəsi ilə bildiriş göndərilməsinə baxmayaraq nümayəndəsi məhkəməyə gəlməmiş, gəlməməsinin səbəbləri barəsində məhkəməyə məlumat verməmişdir. Məhkəmə Azərbaycan Respublikası İnzibati Xətalar Məcəlləsinin 61.3-cü maddəsinə əsasən işə onun iştirakı olmadan baxılmasını mumkün hesab etmişdir. Məhkəmə proses iştirakçısını dinləyib, iş materiallarını araşdırıb müəyyən etdi ki, Şəxs Azərbaycan Respublikasının gömrük sərhədindən keçirilən az miqdarda qızılları bəyan etməmişdir. Buna görə də, məhkəmə hesab edir ki, Şəxs əməlində Azərbaycan Respublikası İXM-nin 482.1-ci maddəsində nəzərdə tutulan inzibati xəta tərkibi vardır. Azərbaycan Respublikası İnzibati Xətalar Məcəlləsinin 38.1-ci maddəsinə əsasən inzibati tənbeh inzibati xətanın törədildiyi gündən ən geci üç ay keçənədək verilə bilər. Gömrük qaydalarına görə inzibati tənbeh inzibati xətanın törədildiyi gündən ən geci bir il keçənədək verilə bilər. İnzibati Xətalar Məcəlləsinin 38.3-cü maddəsinə əsasən cinayət işinin başlanması rədd edildikdə və ya cinayət işinə xitam verildikdə, lakin şəxsin əməllərində inzibati xəta tərkibinin bütün əlamətləri olduqda, inzibati tənbeh cinayət işinin başlanmasının rədd edilməsi və ya ona xitam verilməsi haqqında qərar qəbul edildiyi gündən ən geci üç ay keçənədək verilə bilər. Həmin Məcəllənin 53.0.6-cı maddəsinə əsasən bu Məcəllənin 38-ci maddəsində nəzərdə tutulmuş müddətlər başa çatdıqda inzibati xəta haqqnda iş üzrə icraat başlana bilməz, başlanmış icraata isə xitam verilir. Məhkəmə hesab edir ki, Şəxs inzibati xəta törətməsi və İnzibati Xətalar Məcəlləsinin 482.1-ci maddəsi ilə təqsirli olması tam sübuta yetirilmiş, lakin gömrük qaydalarına görə inzibati xətanın törədildiyi gündən bir ildən çox müddət keçdiyinə görə o, həmin maddə ilə inzibati məsuliyyətə cəlb edilə bilməz və bu səbəbdən iş üzrə icraata xitam verilməlidir. İnzibati xətanın bilavasitə obyekti olan Azərbaycan Respublikası Dövlət Gömrük Komitəsinin xəzinəsində saxlanılan 39835 manat dəyərində 321,04 qram qızıllar qərar qüvvəsini aldıqdan sonra Şəxs geri qaytarılmalıdır. Yuxarıda göstərilənlərə əsasən və Azərbaycan Respublikası İXM-nin 40, 43, 48-51, 115-117, 128-130 maddələrini rəhbər tutaraq, məhkəmə QƏRARA ALDİ: Barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 482.1-ci maddəsində nəzərdə tutulmuş inzibati xətanı törətməkdə təqsirli bilinsin. İnzibati xətanın törədildiyi gündən 1 (bir) ildən çox müddət keçdiyindən Şəxs Azərbaycan Respublikası İnzibati Xətalar Məcəlləsinin 482.1-ci maddəsi ilə nəzərdə tutulmuş inzibati xəta törətməsinə dair inzibati xəta haqqında iş üzrə icraata xitam verilsin. İnzibati xətanın bilavasitə obyekti olan Azərbaycan Respublikası Dövlət Gömrük Komitəsinin xəzinəsində saxlanılan 39835 manat dəyərində 321,04 qram qızıllar qərar qüvvəsini aldıqdan sonra Şəxs geri qaytarılsın. Qərarın surəti təqdim edildiyi və ya alındığı gündən 10 gün müddətində Bakı şəhəri Xəzər rayon Məhkəməsi vasitəsi ilə Bakı Apellyasiya Məhkəməsinə apellyasiya şikayəti verilə bilər. Qərardan apellyasiya şikayəti verilmədikdə, qərar həmin müddət başa çatdığı vaxtdan sonrakı gün qüvvəyə minir. Hakim: Əkrəm Qəhrəmanov