Bakı Şəhəri Xəzər Rayon Məhkəməsi Qərardad — İş №3(003)-995/2025

Azərbaycan Respublikası adından QƏRARDAD Bakı şəhəri İş № 3(003)-995/2025 22.05.2025 BAKI ŞƏHƏRİ XƏZƏR RAYON MƏHKƏMƏSİ Bakı şəhəri Xəzər Rayon Məhkəməsinin hakimi Rüstəmov Emin Şahin oğlu, Şəxs barəsində tərtib edilmiş xx.xx.2025-ci il tarixli MN ******* saylı protokola baxaraq müəyyənetdi: Bakı şəhəri Xəzər RPİ-nin 3-cü PŞ tərəfindən Şəxs barəsində xx.xx.2025-ci il tarixli MN ******* saylı protokol tərtib edilmişdir. İş materiallarını araşdırıb hesab edirəm ki, Şəxs barəsində tərtib edilmiş xx.xx.2025-ci il tarixli MN ******* saylı protokol və ona əlavə edilmiş sənədlər geri qaytarılmalıdır. Belə ki, Azərbaycan Respublikası İnzibati Xətalar Məcəlləsinin 100.1.4-cü maddəsinə əsasən inzibati xəta haqqında protokolda inzibati xətanın törədildiyi yer, vaxt və bu xətanın mahiyyəti göstərilməlidir. Həmin Məcəllənin 100.1.7-ci maddəsinə əsasən inzibati xəta haqqında protokolda barəsində inzibati xəta haqqında iş üzrə icraat aparılan fiziki şəxsin və ya hüquqi şəxsin nümayəndəsinin izahatları göstərilməlidir. Müəyyən olundu ki, Şəxs barəsində Xəzər RPİ-nin 3-cü PŞ-nin sahə rəisi Fərid Hüseynli tərəfindən 08 may 2025-ci il tarixdə Azərbaycan Respublikası İXM-nin 232-1-ci maddəsi ilə tərtib edilmiş protokola ekspertiza rəyi əlavə edilməmişdir. Maddi zərərin 1000 manat miqdarında qiymətləndirilməsinin necə aparılması barədə hər hansı məlumat və sübut yoxdur. Azərbaycan Respublikası İXM-nin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib olunduqdan, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda və işə baxılarkən tamamlamaq mümkün olmadıqda, inzibati xətalar haqqında protokolun və digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Həmin Məcəllənin 76-cı maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar digər sübutlarla yanaşı inzibati xəta haqqında protokolla da müəyyən olunur. Odur ki, qanunvericiliyin tələbləri əsasında tərtib edilməyən protokolun iş üzrə sübut kimi qəbul edilməsi də mümkün deyil. İş üzrə kifayət qədər sübut toplanmadan inzibati xəta haqqında protokol tərtib edilmişdir. Hadisənin baş verməsinə dəlalət edən, yəni inzibati xəta hadisəsinin olmasını əks etdirən, üstəlik hadisənin məhz Şəxs tərəfindən törədilməsini əks etdirən hər hansı sübut (sənəd) protokola əlavə edilməmişdir (fotoşəkil və sair). Beləliklə, inzibati xəta haqqında material natamam olduğundan inzibati xəta haqqında protokol və ona əlavə olunmuş sənədlər geri qaytarılmalıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 109-cu maddəsini rəhbər tutaraq, məhkəmə qəraraaldı: Şəxs barəsində Xəzər rayon Polis İdarəsinin 3-cü Polis Şöbəsinin sahə inspektoru Fərid Hüseynli tərəfindən 08 may 2025-ci il tarixli Azərbaycan Respublikası İXM-nin 232-1-ci maddəsi ilə MN seriyalı ******* saylı protokol və ona əlavə olunmuş sənədlər baxılmadan geri qaytarılsın. Hakim Emin Rüstəmov