Bakı Şəhəri Yasamal Rayon Məhkəməsi Qərar — İş №3(004)-1007/2023

Azərbaycan Respublikası adından QƏRAR Bakı şəhəri İş № 3(004)-1007/2023 16.03.2023 BAKI ŞƏHƏRİ YASAMAL RAYON MƏHKƏMƏSİ Hakim Cavadzadə Rəşad Bəylər oğlunun sədrliyi, Məhkəmə iclasının katibi Əliyeva Zəminə Səməd qızının katibliyi, Barəsində inzibati icraat aparılan şəxs Şəxs iştirakları ilə, Şəxs Azərbaycan Respublikası İnzibati Xətalar Məcəlləsinin 342.9-cu maddəsində nəzərdə tutulmuş inzibati xətanı törətməsinə dair materiala baxaraq məhkəmə müəyyən etdi: Azərbaycan Respublikası Bakı şəhəri Yasamal Rayon Polis İdarəsindən daxil olmuş 07 fevral 2023-cü il tarixli, AP seriyalı, ******* saylı inzibati xəta haqqında protokoldan görünür ki, Şəxs "Toyota" minik markalı, AZ **-DT-*** dövlət qeydiyyat nişanlı avtomobili idarə edərkən nəqliyyat vasitəsini müvafiq icazə olmadan sayrışan işıq quraşdırmışdır. Buna görə də Şəxs barəsində Azərbaycan Respublikası İXM- nin 342.9-cu maddəsi ilə inzibati xəta haqqında protokol tərtib olunmuşdur. Barəsində inzibati icraat aparılan şəxs Şəxs bildirmişdir ki, o xüsusi bir sayrışan işıq quraşdırmamışdır. Taksi fəaliyyəti ilə məşğul olduğundan idarə etdiyi avtomobilin üzərinə şahmat deyilən, içərisində işiq yanan əşya qoymuşdur.Bununla bağlı müfaviq əməkdaşlar tərəfindən heç vaxt xəbərdarlıq edilməmişdir. Həmin işıqlar sayrışan işıqlar deyildir. Barəsində əsassız protokol tərtib olunmuşdur. Odur ki, barəsində başlanmış inzibati xəta haqqında işin icraatına xitam verilməsini xahiş edir. Məhkəmə iclasının vaxtı və yeri haqqında lazımi qaydada xəbərdar edilməsinə baxmayaraq, protokol tərtib etmiş orqanın nümayəndəsi məhkəməyə gəlməmələrinin səbəblərini və ya mümkünsüzlüyünü bildirmədən və bu səbəblərin üzrlü olması barədə sübutlar təqdim etmədən məhkəmə iclasına nümayəndəsini göndərməmişdir. Məhkəmə işə protokol tərtib etmiş orqanın nümayəndəsinin iştirakı olmadan baxılmasını mümkün hesab etmişdir. Məhkəmə barəsində inzibati xəta haqqında iş üzrə icraat aparılan şəxsi dinləyi iş materiallarını tədqiq edərək hesab edir ki, inzibati xəta haqqında iş üzrə icraata xitam verilməlidir. Məhkəmə gəldiyi nəticəni aşağıda qeyd olunanlarla əsaslandırır. Məhkəmə araşdırması zamanı müəyyən edilmişdir ki, Şəxs taksi fəaliyyəti ilə məşğul olur və bu səbəbdən "Toyota" minik markalı, AZ **-DT-*** dövlət qeydiyyat nişanlı avtomobilin üzərində onun taksi fəaliyyəti ilə məşğul olduğu nəqliyyat vasitəsi “Taksi” tanınma nişanı ilə avtomobilin damında şahmat qaydasında yerləşdirilmiş damalarla təhciz olunmuşdur. İnzibati protokolda qeyd edildiyi ki, xüsusi olaraq sayrışan işiq quraşdırılmamışdır. İş materiallarına əlavə edilmiş bir ədəd DVD diskə məhkəmə baxışı zamanı "Toyota" minik markalı, AZ **-DT-*** dövlət qeydiyyat nişanlı avtomobilin sayrışan işıqla təchiz etməsi müəyyən edilmir. Azərbaycan Respublikası İnzibati Xətalar Məcəlləsinin 342.9-cu maddəsinə görə nəqliyyat vasitələrinin müvafiq icazə olmadan xüsusi (çoxavazlı) səs və ya sayrışan işıq siqnalları və ya operativ nəqliyyat vasitələri üçün müəyyən edilmiş rənglənmə sxemləri, yazılar və tanınma nişanları ilə təchiz edilməsinə, yaxud nəqliyyat vasitəsinin dövlət qeydiyyat nişanının görünüşünü çətinləşdirən örtüklərdən və ya qurğulardan, nəqliyyat vasitəsinin sürətini ölçməyə maneçilik törədən və ya ölçmə cihazlarının işinə mane olan antiradar və digər texniki vasitələrdən, yaxud əhalinin dincliyini nümayişkaranə şəkildə pozan səs siqnallarından istifadə edilməsinə görə inzibati xətanın törədilməsində alət və ya inzibati xətanın bilavasitə obyekti olmuş predmet müsadirə edilməklə, beş yüz manatdan səkkiz yüz manatadək məbləğdə cərimə edilir. Həmin maddədən görünür ki, nəqliyyat vasitələrinin müvafiq icazə olmadan xüsusi (çoxavazlı) səs və ya sayrışan işıq siqnalları və ya operativ nəqliyyat vasitələri üçün müəyyən edilmiş rənglənmə sxemləri, yazılar və tanınma nişanları ilə təchiz edilməsinə görə məsuliyyət müəyyən edilmişdir ki, barəsində inzibati xəta haqqında iş üzrə icraat aparılan şəxsin belə məsuliyyəti yaradan, yəni nəqliyyat vasitəsini sayrışan işıqla təchiz etməsi müəyyən edilmir. Azərbaycan Respublikasının İnzibati Xətalar Məcəlləsinin 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraata başlanıla bilməz, başlanmış icraata isə xitam verilir. Həmin Məcəllənin 134.1.3-cü maddəsinə görə inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında qərar qəbul edilir. Beləliklə, məhkəmə hesab edir ki, Şəxs barəsində Azərbaycan Respublikasının İnzibati Xətalar Məcəlləsinin 342.9-cu maddəsi ilə başlanmış inzibati xəta haqqında iş üzrə icraata xitam verilməlidir. Yuxarıda qeyd olunanlara əsasən Azərbaycan Respublikası İXM-nin 114-118 və 128- 130 maddələrini rəhbər tutaraq, məhkəmə Qərara aldı: Şəxs barəsində Azərbaycan Respublikasının İnzibati Xətalar Məcəlləsinin 342.9-cu maddəsi ilə başlanmış inzibati xəta haqqında iş üzrə icraata xitam verilsin. Qərarın surəti rəsmi qaydada alındığı gündən 10 (on) gün müddətində Bakı Apellyasiya Məhkəməsinə apellyasiya şikayəti verilə bilər. Hakim: Rəşad Cavadzadə