Bakı Şəhəri Yasamal Rayon Məhkəməsi Qərardad — İş №3(004)-1018/2022

Azərbaycan Respublikası adından QƏRARDAD Bakı şəhəri İş № 3(004)-1018/2022 23.02.2022 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Hüseyn Akif oğlu Səfərov X1 inzibati xəta haqqında iş üzrə qərardan verdiyi şikayətə baxaraq, MÜƏYYƏN ETDİ: X3 şikayətlə məhkəməyə müraciət edib, Daxili İşlər Nazirliyinin 27 yanvar 2022-ci il tarixli, EXP №1255747 saylı inzibati xəta haqqında protokolu əsasında qəbul edilmiş 28.01.2022-ci il tarixli qərarın ləğv edilməsini və başlanmış inzibati xəta haqqında iş üzrə icraata xitam verilməsini xahiş etmişdir. Şikayəti və təqdim edilmiş sənədləri nəzərdən keçirərək hesab edirəm ki, şikayətə baxılması qeyri-mümkündür, ona görə də geri qaytarılmalıdır. Belə ki, hazırki iş üzrə barəsində şikayət verilmiş inzibati xəta haqqında iş üzrə qərarın surəti iş materiallarına əlavə edilməmişdir, məhkəməyə göndərilməmişdir. Belə olan halda isə şikayətçinin qeyd etdiyi qərarın həqiqətən də mövcud olub-olmamasını müəyyən etmək mümkün olmamışdır. Ümumiyyətlə qərarın Daxili İşlər Nazirliyinə tabe olan hər hansı bir səlahiyyətli orqan və ya məhz Daxili İşlər Nazirliyinin özü tərəfindən qəbul edilməsini də müəyyən etmək mümkün olmur. Çünki qərardan şikayətə baxılarkən, qərar qəbul etmiş səlahiyyətli orqan (vəzifəli şəxs) da məhkəmə iclasına dəvət edilməlidir. Lakin şikayətdən və əlavə edilmiş materiallardan həmin qərarın hansı səlahiyyətli orqan (vəzifəli şəxs) tərəfindən çıxarılması müəyyən edilmədiyindən, məhkəmə iclasına çağırılmalı olan səlahiyyətli orqan (vəzifəli şəxs) da müəyyən edilə bilmir. Bununla da məhkəmə iclasına qərar qəbul etmiş hansı səlahiyyətli orqanın dəvət edilməsini də müəyyən etmək mümkünsüzdür. Qərar olmadığı üçün hadisənin harada törədilməsi, həmin qərardan şikayətin Yasamal Rayon Məhkəməsinə aidiyyətinin olub-olmamasını da müəyyən etmək mümkün deyildir. Həmçinin şikayətçi X3 08 fevral 2022-ci il tarixdə və 15.02.2022-ci il tarixdə də məhkəməyə müraciət edərək, onun barəsində tərtib edilmiş 27 yanvar 2022-ci il tarixli, EXP №1255747 saylı inzibati xəta haqqında protokolun ləğv edilməsi və başlanmış inzibati xəta haqqında iş üzrə icraata xitam verilməsi barədə qərar qəbul edilməsini xahiş etmişdir. Bakı şəhəri Yasamal Rayon Məhkəməsinin 3(004)-768/2022 saylı, 08 fevral 2022-ci il tarixli və 3(004)-926/2022 saylı, 16 fevral 2022-ci il tarixli qərardadları ilə X1 Azərbaycan Respublikası Daxili İşlər Nazirliyi Bakı Şəhəri Baş Polisi İdarəsi Dövlət Yol Polisi İdarəsinin inzibati xəta haqqında iş üzrə protokolundan verdiyi şikayət və əlavə edilmiş sənədlər geri qaytarılmışdır. Həmin qərardadlardan şikayət verilməsi nəzərdə tutulmamışdır. Bu barədə qərardadlarda izah verilmişdir. Bununla belə X3 həmin qərardadlardan apelyasiya şikayəti verdiyi üçün, şikayətlər işlə birlikdə Bakı Apelyasiya Məhkəməsinə göndərilmişdir. Həmin qərardadda da qeyd edilmişdir ki, protokol əsasında qəbul edilmiş hər hansı bir qərar da şikayətə əlavə edilməmişdir. Qərardadda qeyd edilmişdir ki, qərarın surətinin alınması üçün şikayətçinin özünün səlahiyyətli orqana (vəzifəli şəxsə) müraciət etməsi, lakin qərarın surətinin ona verilməməsi barədə iş materiallarına heç bir sübut da əlavə edilməmişdir. Həmin qərardaddakı sadalanan nöqsanlar aradan qaldırılmadan, məhkəməyə yenidən şikayət verilmişdir. Belə ki, X3 tərəfindən hazırkı şikayətə 11.02.2022-ci il tarixli müraciət əlavə edilmişdir. həmin müraciətdə o, qeyd edilən inzibati tənbehvermə haqqında qərarın surətinin Daxili İşlər Nazirliyindən ona təqdim edilməsini xahiş edir. Hazırkı şikayətlni isə 18.02.2022-ci il tarixdə imzalayaraq məhkəməyə təqdim etmişdir. Belə olduğu təqdirdə, qərarın surətinin ona təqdim edilməsi barədə Daxili İşlər Nazirliyinə 11.02.2022-ci il tarixdə etdiyi müraciətinin nəticəsini gözləmədən, faktiki olaraq qərarın surətini almadan, yenidən məhkəməyə şikayət vermişdir. Buna görə də bir daha şikayətçiyə izah edilir ki, şikayətçi özü qərarın surətinin alınması üçün həmin səlahiyyətli orqana müraciət etməli, qərarın surətini aldıqdan sonra, məhkəməyə həmin qərardan şikayət verə bilər. Əgər səlahiyyətli orqan qərarın surətinin şikayətçiyə verilməsindən imtina edərsə, şikayətçi yuxarı səlahiyyətli orqana müraciət edə bilər. Göstərilənlərə əsasən məhkəmə hesab edir ki, hazırki iş üzrə məhkəməyə təqdim edilmiş sənədlərə əsasən inzibati xəta haqqında işin baxılmağa hazırlanması mümkün deyil, ona görə də şikayət geri qaytarılmalı, həmçinin şikayətçiyə izah edilməlidir ki, qərarın təsviri hissəsində göstərilmiş çatışmazlıqlar aradan qaldırıldıqdan sonra yenidən məhkəməyə müraciət edə bilər. Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair Azərbaycan Respublikası Konstitusiya Məhkəməsinin Plenumunun 04.11.2020-ci il tarixli qərarında müəyyən edilmişdir ki, qanunverici tərəfindən Azərbaycan Respublikası İnzibati Xətalar Məcəlləsinin 129.1.3-cü maddəsində dəyişikliklər edilənədək səlahiyyətli orqanın (vəzifəli şəxsin) qərarından məhkəməyə şikayət həmin Məcəllənin 110.1-ci maddəsində müəyyən olunmuş qaydaya uyğun olaraq inzibati xətanın törədildiyi və yaxud barəsində qərar çıxarılmış şəxsin vəsatətinə əsasən onun yaşadığı yer üzrə verilə bilər. Həmçinin inzibati xəta haqqında iş üzrə qərardan verilən şikayətə baxmağa hazırlıq zamanı ərazi üzrə məhkəmə aidiyyəti, barəsində qərar çıxarılmış şəxsin “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun 3-cü maddəsində əks olunan yaşayış yerinin müəyyən edilməsi barədə sənədlərdə və (və ya) onların elektron daşıyıcısında göstərilən yaşayış yeri üzrə müəyyən edilir. Azərbaycan Respublikasının İXM-nin 106.0.4-cü maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən işin icraatını rədd edən halların mövcud olub-olmaması məsələsini, 106.0.5-ci maddəsinə əsasən isə işə mahiyyəti üzrə baxılması üçün işdə kifayət qədər sübutlar toplanıb-toplanmaması məsələlərini həll edir. Şərh olunanlara əsasən və Azərbaycan Respublikası İnzibati Xətalar Məcəlləsinin 106, 109-cu maddələrinə əsasən, QƏRARA ALDİ: Şikayət və əlavə edilmiş sənədlər geri qaytarılsın. Şikayətçiyə izah edilir ki, qərardadda göstərilən çatışmamazlıqlar aradan qaldırıldıqdan sonra, Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair Azərbaycan Respublikası Konstitusiya Məhkəməsi Plenumunun 04.11.2020-ci il tarixli qərarında müəyyən edilmiş ərazi üzrə məhkəmə aidiyyəti qaydalarına əməl etməklə məhkəməyə şikayət verilə bilər. Qəradaddan şikayət və ya protest verilə bilməz. Hakim, Hüseyn Səfərov