Bakı Şəhəri Yasamal Rayon Məhkəməsi Qərar — İş №3(004)-1235/2024

Azərbaycan Respublikası adından QƏRAR Bakı şəhəri İş № 3(004)-1235/2024 29.02.2024 BAKI ŞƏHƏRİ YASAMAL RAYON MƏHKƏMƏSİ Bakı Şəhəri Yasamal Rayon Məhkəməsinin hakimi Məmmədli Orxan Qədir oğlunun sədrliyi, X1 iclas katibliyi ilə, İnzibati xəta haqqında protokolu tərtib etmiş şəxs Bakı şəhəri Yasamal Rayon Polis İdarəsinin 27-ci polis şöbəsinin sahə rəisi X2, Zərərçəkmiş şəxsin qanuni nümayəndəsi X3, Barəsində inzibati xəta haqqında iş üzrə icraat aparılan Şəxs iştirakları ilə, xx.xx.1987-ci ildə Ağdaş rayonunda anadan olmuş, Azərbaycan Respublikası vətəndaşı, subay, ünvan 1 ünvanında qeydiyyatda olmaqla, ünvan 2 ünvanında yaşayan Şəxs barəsində Azərbaycan Respublikası İXM-nin 388-1.1.1-ci maddəsi ilə Yasamal rayon Polis İdarəsi 27-ci Polis Şöbəsindən daxil olmuş inzibati xəta haqqında işə baxaraq, MÜƏYYƏN ETDİ: Şəxs X3 övladı Elman Abbaszadənin mübahisə zamanı işlətdiyi qeyri-əxlaqi ifadəsi olan videonu sosial şəbəkədə “huru_aliyeva_17” və “aliyeva_huru_17” profil adından paylaşaraq, “İnformasiya informasiyalaşdırma və informasiyanın mühafizəsi haqqında” Azərbaycan Respublikası Qanununun tələblərinə əsasən internet informasiya ehtiyatında yerləşdirilməsi qadağan edildiyi halda, həmin məlumatı informasiya-telekommunikasiya şəbəkəsinin istifadəçisi kimi “İnstagram” və “Tik Tok” sosial şəbəkələrində yerləşdirərək yaymışdır. Bununla da Şəxs İXM-in 388-1.1.1-ci maddəsində nəzərdə tutulmuş inzibati xətanı törətmişdir. Onun barəsində Bakı şəhəri Yasamal rayon Polis İdarəsi 27-ci Polis Şöbəsi tərəfindən xx.xx.2024-cü il tarixli, MN ******* saylı inzibati xəta haqqında protokol tərtib olunmuşdur. Protokol tərtib etmiş Bakı şəhəri Yasamal rayon Polis İdarəsi 27-ci Polis Şöbəsinin sahə rəisi X5 məhkəməyə verdiyi izahatında bildirdi ki, Şəxs öz sosial şəbəkələrdəki profillərində X3 övladı Elman Abbaszadənin qeyri-əxlaqi ifadələr işlətdiyi videonu paylaşmışdır. Həmçinin həmin videonu tanışı Orxan adlı şəxsə göndərmişdir, o da öz profillərində həmin videonu paylaşmışdır. O, “İnformasiya informasiyalaşdırma və informasiyanın mühafizəsi haqqında” Azərbaycan Respublikası Qanununun tələblərinə əsasən internet informasiya ehtiyatında yerləşdirilməsi qadağan edildiyi halda, həmin məlumatı informasiya-telekommunikasiya şəbəkəsinin istifadəçisi kimi sosial şəbəkələrində yerləşdirərək yaymışdır və bununla da İXM-in 388-1.1.1-ci maddəsində nəzərdə tutulmuş inzibati xətanı törətmişdir. Barəsində inzibati xətalar haqqında iş üzrə icraat aparılan şəxs Şəxs məhkəməyə verdiyi izahatında özünü təqsirli bilərək göstərdi ki, o, 2012-ci ildən jurnalist kimi fəaliyyət göstərmişdir. Həmin videonu paylaşaraq səhifənin reytinqini qaldırmaq istəmiş, başqa bir məqsədi olmamışdır. Videonun silinməsi qarşılığında o heç bir pul tələb etməmişdir, həmin pulu onun tanışı Orxan tələb etmişdir. Həmin puldan ona müəyyən hissinin veriləcəyi barədə verilən izahatlar yalandır, o özüdə heç vaxt həmin videonun silinməsi üçün pul tələb etməmişdir. Əməlindən peşmandır, barəsində yüngül tənbeh növünün tətbiq edilməsini məhkəmədən xahiş edir. Zərərçəkmiş şəxsin qanuni nümayəndəsi X6 məhkəməyə verdiyi izahatında göstərdi ki, o, azərbaycan dilində sərbəst danışır və başa düşür. Həmin videoda onun oğlu Elman Abbaszadə həyəcanlı olduğu üçün və azərbaycan dilində yaxşı danışa bilmədiyi üçün “İctimai” kanala müsahibə verən zaman qeyri-əxlaqi ifadə işlətmişdir, ona görə də o, kanalın rəhbərliyi ilə danışaraq həmin videonun yayımlanmamasını xahiş etmişdir. Lakin sonradan onun övladı işə gedən zaman iş yoldaşları ona “Tik-Tok” və “İnstagram” şəbəkələrində həmin videonu göstərmişlər. O, həmin videonun Hürü və Orxan adlı şəxslər tərəfindən yayıldığını öyrənmiş və videonun silinməsini tələb etmişdir. Lakin Hürü həmin videonu paylaşmadığını, Orxanın isə həmin videonu silməsi müqabilində pul tələb etdiyini bildirmişdir. Sonradan həmin şəxslər barədə iş yerinin rəhbərliyinə şikayətlər etmiş və onlar işdən azad olunmuşlar. Hazırda inzibati xətalar haqqında iş üzrə icraat aparılan şəxs Şəxs şikayətçidir, ona və övladına böyük mənəvi zərər dəyib və şəxsin barəsində inzibati həbs növündə tənbehin tətbiq edilməsini məhkəmədən xahiş edir. Şəxs həmin əməli törətməsi Yasamal RPİ 27-ci polis şöbəsinin baş təhqiqatçısı Nəsimi Seyidzadənin “cinayət işinin başlanılmasının rədd edilməsi barədə” qərarı ilə də təsdiq edilir. Azərbaycan Respublikası İXM-in 388-1.1.1-ci maddəsinə əsasən informasiya ehtiyatında və ya informasiya-telekommunikasiya şəbəkəsində “İnformasiya, informasiyalaşdırma və informasiyanın mühafizəsi haqqında” Azərbaycan Respublikasının Qanunu ilə yayılması qadağan edilən informasiyanın yerləşdirilməsinə yol verilməsi inzibati xəta kimi müəyyən edilmişdir. Həmin xətaya görə inzibati cərimə və ya inzibati həbs nəzərdə tutulmuşdur. “İnformasiya informasiyalaşdırma və informasiyanın mühafizəsi haqqında” Azərbaycan Respublikası Qanununun 13-2.3.9-cu bəndinə əsasən internet informasiya ehtiyatının və onun domen adının sahibi və ya informasiya-telekommunikasiya şəbəkəsinin istifadəçisi həmin informasiya ehtiyatında (informasiya-telekommunikasiya şəbəkəsində) təhqir və ya böhtan xarakteri daşıyan, habelə şəxsi həyatın toxunulmazlığını pozan məlumatların yerləşdirilməsinə yol verməməlidir. Azərbaycan Respublikası İXM-in 76.1-ci maddəsinə əsasən inzibati xətanın olubolmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Şəxs həmin inzibati xətanı törətməsi barəsində tərtib olunmuş yuxarıda qeyd edilən protokol, “cinayət işinin başlanılmasının rədd edilməsi barədə” qərarla, özünün məhkəməyə verdiyi izahatı, iş materiallarında olan onun sosial şəbəkələrdə paylaşdığı video-görüntüləri ilə tam sübuta yetirilir. İnzibati məsuliyyəti istisna edən və icraatı rədd edən hallar yoxdur. İş materiallarındakı xx.xx.2024-cü il tarixli tutma protokoluna əsasən Şəxs həmin tarixdə saat 09:45 radələrində tutulmuşdur. Azərbaycan Respublikası İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə törədilmiş inzibati xətaya görə, barəsində inzibati xəta haqqında iş üzrə icraat aparılan şəxsin əməlini etiraf etməsini, əməlindən peşman olmasını, qadın olmasını nəzərə alaraq sanksiyada nəzərdə tutulmuş cərimə növündə inzibati tənbeh verilməsini məqsədə müvafiq və ədalətli hesab edir. Həmçinin məhkəmə Azərbaycan Respublikasının İnzibati Xətalar Məcəlləsinin 32-ci maddəsinə əsasən Şəxs əməlini etiraf edərək peşman olmasını onun məsuliyyətini yüngülləşdirən hallar kimi nəzərə alır. Azərbaycan Respublikası İXM-nin 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 48-51, 114, 128-130-cu maddərini rəhbər tutaraq, QƏRARA ALDİ: Şəxs Azərbaycan Respublikası İnzibati Xətalar Məcəlləsinin 388-1.1.1-ci maddəsi ilə təqsirli bilinərək 500 (beş yüz) manat məbləğində inzibati cərimə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı Şəhəri Yasamal Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən, Orxan Məmmədli