Bakı Şəhəri Yasamal Rayon Məhkəməsi Qərardad — İş №3(004)-1735/2022

Azərbaycan Respublikası adından QƏRARDAD Bakı şəhəri İş № 3(004)-1735/2022 04.04.2022 BAKI ŞƏHƏRİ YASAMAL RAYON MƏHKƏMƏSİ Hakim Cavadzadə Rəşad Bəylər oğlu, X1 Bakı şəhər Səbail Rayon Polis İdarəsinin 39-cu polis bölməsi tərəfindən qəbul edilmiş 09 fevral 2022-ci il tarixli inzibati tənbeh vermə haqqında qərarından verdiyi şikayətə baxaraq, m ü ə y y ə n e t d i m: X2 şikayət ərizəsi ilə məhkəməyə müraciət edərək, Bakı şəhər Səbail Rayon Polis İdarəsinin 39-cu polis bölməsi tərəfindən qəbul edilmiş 09 fevral 2022-ci il tarixli inzibati tənbeh vermə haqqında qərarın ləğv edilməsini və inzibati xəta haqqında iş üzrə icraata xitam verilməsi barədə qərar qəbul edilməsini xahiş etmişdir. Məhkəmə şikayət ərizəsini və ona əlavə edilmiş sənədləri araşdıraraq hesab edir ki, inzibati qərardan şikayət geri qaytarılmalıdır. Belə ki, işin baxılmağa hazırlanması zamanı iş materiallarında olan sənədlərə əsasən müəyyən edilmişdir ki, ərizə verən şəxs tərəfindən törədilməsi istinad edilən inzibati xəta hadisəsi Bakı şəhəri Səbail rayonunun ərazisində törədilmişdir. Bundan əlavə şikayət vermiş şəxs X1 yaşayış ünvanı Tərtər rayonu Cəmilli kəndidir. “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun 3-cü maddəsinin 1-ci bəndinə əsasən Azərbaycan Respublikası vətəndaşının yaşayış yeri yalnız Azərbaycan Respublikası vətəndaşının şəxsiyyət vəsiqəsi ilə müəyyən edilir. “Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair” Azərbaycan Respublikası Konstitusiya Məhkəməsi Plenumunun 4 noyabr 2020-ci il tarixli qərarına əsasən qanunverici tərəfindən Azərbaycan Respublikası İnzibati Xətalar Məcəlləsinin 129.1.3-cü maddəsində dəyişikliklər edilənədək səlahiyyətli orqanın (vəzifəli şəxsin) qərarından məhkəməyə şikayət həmin Məcəllənin 110.1-ci maddəsində müəyyən olunmuş qaydaya uyğun olaraq inzibati xətanın törədildiyi və yaxud barəsində qərar çıxarılmış şəxsin vəsatətinə əsasən onun yaşadığı yer üzrə verilə bilər. Məhkəmə qeyd edir ki, Azərbaycan Respublikası Konstitusiyasının 62-ci maddəsinə əsasən hər kəsin onun işinə qanunla müəyyən edilmiş məhkəmədə baxılması hüququ vardır. Şəxsin razılığı olmadan onun işinə başqa məhkəmədə baxılmasına yol verilmir. Beləliklə məhkəmə hesab edir ki, inzibati xəta hadisəsi Bakı şəhəri Səbail rayonu ərazisində törədildiyindən və həmçinin şəxsin yaşayış yeri Tərtər rayonu olduğundan ərizə geri qaytarılmalıdır. Məhkəmə izah edir ki, Bakı şəhər Səbail Rayon Polis İdarəsinin 39-cu polis bölməsi tərəfindən qəbul edilmiş 09 fevral 2022-ci il tarixli inzibati tənbeh vermə haqqında qərarından yenidən şikayət verməklə inzibati xətanın törədildiyi yer üzrə Bakı şəhəri Səbail Rayon Məhkəməsinə və ya yazılı vəsatətininə əsasən yaşayış yeriniz üzrə Tərtər Rayon Məhkəməsinə müraciət edilə bilər. Məhkəmə həmçinin izah edir ki, gələcəkdə məhkəməyə maraciət edilərkən buraxılmış müddətin bərpası ilə bağlı vəsatətin verilməsi məsələsinə diqqət yetirilməlidir. Göstərilənlərə əsasən və Azərbaycan Respublikası İXM-nin 128-130-cu maddələrini rəhbər tutaraq məhkəmə q ə r a r a a l d ı m: X1 Bakı şəhər Səbail Rayon Polis İdarəsinin 39-cu polis bölməsi tərəfindən qəbul edilmiş 09 fevral 2022-ci il tarixli inzibati tənbeh vermə haqqında qərarından verdiyi şikayət ərizəsi geri qaytarılsın. Qərarın surəti rəsmi qaydada alındığı gündən 10 (on) gün müddətində Bakı Apellyasiya Məhkəməsinə Yasamal Rayon Məhkəməsi vasitəsi ilə şikayət verilə bilər. Hakim: Rəşad Cavadzadə